1-2. Elda tauna ese baine karaia “ḡaukara namona” be dahaka?

 BEMA oi na hesiai tauna ta, oi na reana kahirakahira elda tauna ta ai bo laomu. O uramu una “ḡaukara namona” ba karaia, a?—1 Tim. 3:1.

² Elda tauna ena ḡaukara be dahaka? Ia na haroro ḡaukara e gunalaiamu, e ḡaukara goadamu mamoe vadivadi ai bona hahediba ḡaukarana ai, bona ena hereva bona kara amo kongrigeisin e hagoadaiamu. Unu badi daidiai Baibul ese e ḡaukara goadamu elda taudia na e gwauraidiamu “herahia.”—Efe. 4:8.

3. Edena dala ai tadikaka ta baine heḡereḡere elda tauna ai bainela totona? (1 Timoteo 3:​1-7; Tito 1:​5-9)

³ Oi be dahaka ba kara unu amo ba heḡereḡere elda ta ai baola diba? Ta na dia ena diba dainai elda ai be laomu. Nega momo ta na moni ḡaukara e tahumu neganai, ena diba dainai e abia daemu bona ḡaukara e heniamu. Bema oi na o uramu elda ta ai baola, oi na dia haroro bona hahediba tauna mo. To, namona na oi ese Baibul ena hahekau herevadia 1 Timoteo 3:​1-7 bona Tito 1:​5-9 ai ba badinadia. (Ba duahidia.) Ina atikol ai elda tauna ena kara haida baita herevalaimu: (1) lada namona kongrigeisin lalonai bona murimurina ai, (2) ruma bese kwarana namona, bona (3) mai ena ura ida kongrigeisin baine hesiai henia.

 LADA NAMONA

4. “Basie habadelaia” anina be dahaka?

⁴ Elda ta ai baola totona, oi na ‘basie habadelaimu’ na namo, anina na emu kara namona dainai kongrigeisin lalonai ta ese basine habadelaimu. Danu, oi na ‘harimu baine namo murimuri taudia ediai.’ Ena be murimuri taudia ese emu abidadama dainai bae hevasehalaimu, to namona na ba hahedinaraia oi na kara momokani taumu. (Dan. 6:​4, 5) Sibomu ba henanadai, ‘Lau ladagu be namo kongrigeisin lalonai bona murimurinai, a?’

5. Edena dala ai ba hahedinaraia oi ese “kara namo o ura heniamu”?

⁵ Bema oi ese ‘kara namo o ura heniamu,’ oi na haida edia kara namo o lalo badamu bona edia kara namodia daidiai o hanamodiamu. Bona oi na mai moalemu ida ma haida o kara namo henidiamu, herevana una na dia oiemu maduna. (1 Tes. 2:8) Dahaka dainai ina kara namona na mai anina bada elda taudia ediai? Badina edia nega bada na e ḡaukaralaiamu tadikaka taihu bae vadivadidia bona kongrigeisin ai edia maduna bae hua. (1 Pet. 5:​1-3) Herevana edia ḡaukara na momo, to haida idurudia karana amo e abiamu moalena ese unu na e hereadia.—Apos. 20:35.

6. “Heabi dae” karadia haida be dahaka? (Heberu 13:​2, 16; laulau danu ba itaia.)

⁶ Dia oi turamu mo to taunimanima iboudiai o kara namo henidiamu neganai, o hahedinaraiamu oi na “heabi dae” taumu. (1 Pet. 4:9) Buka ta ese heabidae tauna na ini e herevalaia toma: “Iena iduara na hekeho taunimanima idauidau ediai.” Sibomu ba henanadai, ‘Vadivadi taudia be e dibamu lau be heabi-dae taugu, eiava?’ (Heberu 13:​2, 16 ba duahidia.) Heabidae tauna ese dekenai miadia ḡaudia na vadivadi taudia ida e moalelaimu. Ia na asi edia kohu momo taudia, e ḡaukara goadagoadamu taudia heḡereḡere seket taudia, bona vadivadi tadikakadia e abidia daemu.—Gen. 18:​2-8; Her. 3:27; Luka 14:​13, 14; Apos. 16:15; Roma 12:13.

7. Elda na “moni basine mata ḡaniḡani heni” anina be dahaka?

⁷ “Moni basine mata ḡaniḡani heni.” Anina na emu mauri lalonai moni bona kohu na dia ḡau ginigunadia. Herevana mai emu  kohu eiava lasi to oi ese Basileia o tahua gunamu. (Mat. 6:33) Emu nega, goada, bona kohu o ḡaukaralaidiamu Iehova itomadiho henina, emu femli inarina, bona kongrigeisin iduruna totona. (Mat. 6:24; 1 Ioa. 2:​15-17) Sibomu ba henanadai: ‘Lau ese moni be ede na laloa tomamu? Dekegu ai miadia ḡaudia be heḡereḡere eiava lau be na uramu moni bona kohu momo baina abi?’—1 Tim. 6:​6, 17-19.

8. “Boga-auka” o hahedinaraiamu daladia haida be dahaka?

⁸ Bema oi na “boga-auka” taumu, anina na emu mauri ai o karamu ḡaudia iboudiai lalodiai, boga auka karana o hahedinaraiamu. Heḡereḡere aniani, inuinu, heḡoeva daladia bona moale karadia ai o henahua tohomu. Danu ina tanobada taudia asio tohotohodiamu. (Luka 21:34; Iak. 4:4) Haida ese e habadumumu neganai, edia kara davadia so haloumu. Oi na so ‘inuinu momomu’ bona momo dibadia oi na so kekeromu. Sibomu ba henanadai, ‘Egu mauri dalana ese e hahedinaraiamu lau be boga auka tauna, eiava?’

9. Edena dala ai “aonega” bona “kara manada” tauna ena kara ba hahedinaraia?

⁹ Bema oi na “aonega” tauna, oi na ḡau idauidau lalodiai Baibul ena hahekau herevadia bo haerodia namonamomu. Unu hahekau herevadia o lalo dobumu, una dainai aonega bona laloparara o hahedinaraiamu. Abi hidi na so kara haraḡamu. To, ḡau iboudiai o haeromu bona o tahu namonamomu. (Her. 18:13) Una dainai, o karamu abi hididia na Iehova ena lalohadai heḡereḡerena. Bema ḡau iboudiai bo kara namonamomu, anina na emu ḡaukara iboudiai na be heau namonamomu bona nega korikori ai bo haḡuḡurudiamu. Momo ese be abidadama henimumu badina dibadia oi na hahekau daladia o badinamu. Unu kara namodia daidiai oi na lada namona bavabia diba. Ruma bese kwarana be edena dala ai Baibul ena hereva heḡereḡerena haheitalai namona baine hahedinaraia. Mani kaha haida aita herevalai.

RUMA BESE KWARANA ESE HAHEITALAI NAMONA BAINE HAHEDINARAIA

10. Edena dala ai tau ese “iena ruma baine reḡua namonamo”?

¹⁰ Bema oi na headava tauna, bona gabeai o uramu elda madunana bavabia, namona na emu ruma bese na haheitalai namona. Una dainai, emu ‘ruma na ba reḡua namonamo.’ Anina na oi ese emu ruma bese na lalokau dalanai ba reḡudia. Bona tomadiho ḡaukaradia ai emu ruma bese ba gunalaia. Dahaka dainai una na mai anina bada? Aposetolo Paulo na ini e gwau toma: “Tau ta ese ena ruma korikori taudia basinema reḡudia diba, Dirava ena ekalesia oreana ede bema reḡua toma?”—1 Tim. 3:5.

11-12. Edena dala ai tau ta ena ruma bese taudia edia kara ese iena maduna iabina dalana baine koua diba? (Laulau danu ba itaia.)

¹¹ Bema oi na tama ta, ‘natumu danu ba reḡudia, bae kamonai henimu bona bae matauraimu.’ Mai lalokaumu ida ba hakaudia bona ba hadibadia. Momokani, natu iboudiai na vaevae e uramu bae moale bona bae gadara. To emu hahediba namona dainai, idia na hereva be kamonaimu bona be hematauraimu. Danu ba ḡaukara goada, edia hetura karana Iehova ida bae hanamoa, Baibul ena hahekau herevadia bae badina, bona bapatiso na edia tahua ḡauna ai bae halaoa.

¹² “Natudia be Iesu ibadinana memerodia, asi edia lebulebu bona asi edia gwau-edeede.” Bema natu na do se bapatiso pablisa eiava e bapatiso bona kara dika badana ta baine karaia, tamana enai be dahaka be varamu?  Bema tama ese natuna ihadibana maduna na se huaia, tama na basine heḡereḡere elda maduna baine huaia totona.—October 15, 1996, The Watchtower, rau 21, par. 6-7 ba itaia.

KONGRIGEISIN BA HESIAI HENIA

13. Edena dala ai ba hahedinaraia oi na “manau” taumu bona ‘sibomu emu ura so badinamu’?

¹³ Kristen kara namodia e hahedinaraimu tadikakadia na hahenamo kongrigeisin ai. “Manau” tauna na maino daladia e goadalaimu. Bema o uramu haida ese bae gwauraimu manau taumu, edia hereva ba hakala bona edia lalohadai ba haero. Heḡereḡere, bema elda edia hebou ai abi hidi ta na Baibul ena taravatu eiava hahekau herevana ta se utuamu bona elda momo ese una e abia daemu, oi be edia lalohadai bo badinaiamu ena be emu lalohadai na idau, a? ‘Sibomu emu ura so badinamu’ anina na momo edia lalohadai o abi daemu bona sibomu emu ura dalana so hedorilaiamu. (Gen. 13:​8, 9; Her. 15:22) Oi na dia “heai” eiava “badu haraḡa” taumu, bona emu hereva amo ma haida so hahisidiamu. Nega aukadia ai, oi na o ḡaukara goadamu “maino” baine vara totona. (Iak. 3:​17, 18) Emu hereva manau ese tadikaka taihu bona murimuri taudia lalodia baine hanamo diba.—Hah. 8:​1-3; Her. 20:3; 25:15; Mat. 5:​23, 24.

14. Ini hereva “[hahediba] tauna matamatana” bona ‘abidadama’ anidia be dahaka?

¹⁴ Elda maduna baine huaia tadikakana na dia “[hahediba] tauna matamatana.” Ena be dia laḡani momo vada o bapatiso, to una nega lalonai ba hahedinaraia oi na lo Kristen tauna ta. Elda ai do asiola neganai, namona na ba hahedinaraia oi na Iesu heḡereḡerena o manaumu, bona oi na heḡereḡere ba nari ela bona Iehova ese nega korikori ai maduna ta baine henimu. (Mat. 20:23; Fili. 2:​5-8) ‘Abidadama’ karana o hahedinaraiamu badina oi ese Iehova, ena kara maoromaoro taravatudia, bona ena orea amo e henimu daladia o badinamu.—1 Tim. 4:15.

15. Namona be elda tauna be hahediba mai dibana tauna, a? Ba herevalaia.

 ¹⁵ Baibul ese e hahedinaraia ḡoevaḡoevamu, heitatao taudia na ‘hahediba mai dibadia taudia.’ Anina be idia be hutuma vairadiai e haroro ḡoevaḡoevamu taudia, a? Lasi. Ena be elda taudia momo na hutuma vairadiai haroro na do asie manada, to idia na haroro ḡaukara ai bona mamoe vadivadi ai hahediba mai dibadia taudia. (1 Korinto 12:​28, 29 bona Efeso 4:11 ba haheḡereḡeredia.) To hahediba tauna namona ai baola totona, namona na dounu ba hekwarahi emu hahediba daladia ba hanamo. Edena dala ai hahediba tauna namona ai baola?

16. Edena dala ai hahediba tauna namona ai baola? (Laulau danu ba itaia.)

¹⁶ “Hereva momokani baine abi tarikatarika.” Hahediba tauna namona ai baola totona namona na Dirava ena Hereva ba ḡaukaralaia, hutuma o hadibadiamu bona ta o sisiba heniamu neganai. Anina na Baibul bona iseda pablikeisin idauidau ba dibadia namonamo. (Her. 15:28; 16:23) O stadimu neganai, namona na siri ba ḡaukaralai daladia ba haero namonamo. Bona o hahedibamu neganai namona na ba hekwarahi kamonai taudia kudoudia ba hamarere. Bema e manada elda taudia edia amo heduru bo tahumu bona bo badinamu, oi na hahediba tauna namona ai bo laomu. (1 Tim. 5:17) Elda taudia na tadikaka taihu bae “hagoadadia” to nega haida bae “sisiba henidia” danu. Unu e kara tomamu negadia ai basie kara auka henidia. Bema mai emu lalokau ida Dirava ena Hereva amo bo hahedibamu, oi na hahediba tauna namona ai bo laomu badina oi ese Hahediba Tauna Badana Iesu, o tohotohoamu.—Mat. 11:​28-30; 2 Tim. 2:24.

DOUNU BA ḠAUKARA GOADA

17. (a) Dahaka ese hesiai taudia baine durudia dounu bae ḡaukara goada? (b) Tadikaka e uramu bae abidia hidi neganai, elda taudia be dahaka bae lalo? (Maua ladana “ Tadikaka Edia Kara O Tahumu Neganai Ba Lalo Ḡaudia” ba itaia.)

¹⁷ Hesiai taudia haida na Baibul ena hahekau herevadia elda taudia totodia be haeromu  neganai, reana be hemamimu idia na dia heḡereḡere elda ai baela. To ba helalotao, Iehova bona ena orea na se tomamu oi ese unu kara iboudiai ba hahedinarai ḡoevaḡoeva. (1 Pet. 2:21) Badina Iehova ena lauma helaḡa ese ta e duruamu unu kara baine hahedinaraidia. (Fili. 2:13) Oi ese ba hanamoa karana ta o laloamu? Namona na Iehova enai ba ḡuriḡurilaia. Una na ba hetahulaia bona elda ta ena amo heduru bavabi.

18. Hesiai taudia iboudiai e hagoadadiamu dahaka bae kara?

¹⁸ Namona na ita iboudai, bona elda taudia danu, baita hekwarahi ina atikol ai tame herevalai ḡaudia baita badina. (Fili. 3:16) Oi be hesiai tauna ta, a? Ba ḡaukara goadagoada! Iehova ba noia oi baine hadibamu namonamo, unu amo ia ba hesiai henia bona kongrigeisin lalonai ḡaukara namodia ba kara. (Isa. 64:8) Iehova ese emu hekwarahi baine hanamodia unu amo oi na ba heḡereḡere elda tauna ai baola.