1, 2. (a) Hari ina negai edena maino baita moalelaia diba? (b) Dahaka ese e koudamu dainai hari ina negai maino ai asita nohomu? (Rau 12 ai laulau ba itaia.)

ITA iboudai na ta uramu maino ai baita noho, bona basita lalohekwarahi. To ta moalemu badina Iehova ese ena “maino” na e henida, unu amo una maino ese eda lalohadai bona hemami baine gimadia! (Fili. 4:6, 7) Danu eda mauri na Iehova enai ta gwauhamatalaia dainai, ita ese “Dirava ena maino,” o eda hetura karana namona Ia ida na ta moalelaiamu.​—⁠Roma 5:1.

² To, Dirava ese tanobada ai maino baine havaraia negana na do se kau. Ini dina gabedia ai heiriheiri karadia, bona taunimanima momo edia daḡedaḡe karadia na bada herea. (2 Tim. 3:1-4) Ita na Kristen tauda dainai, namona na baita hekwarahi Satana bona ena hahediba koikoidia baita dadarai. (2 Kor. 10:4, 5) To, eda maino na murimuri varavaradia ese bae hadikaia diba. Idia haida ese be kirikirilaidamu ta abi daemu ḡaudia daidiai, o be laloamu ita na ruma bese ta hapararaiamu, eiava eda abidadama asita rakataniamu dainai be dadaraidamu. Ruma bese edia daḡedaḡe karadia be ede baita lalodia toma? Unu daḡedaḡe karadia e varamu neganai edena dala ai baita haheauka diba?

3, 4. (a) Iesu ena hahediba herevadia ese dahaka baine havaraia? (b) Ededia negai Iesu ibadinana karana na mai hekwarahina?

³ Iesu na mai dibana iena hahediba herevadia ese taunimanima na baine hapararadia, bona ia bae badinaia taudia na daḡedaḡe lalodiai bae boga auka na namo. Unu daḡedaḡe karadia ese ruma bese ena maino baine hadikaia diba. Iesu na eto: “Lalomui na basieto maino tanobada ai baina mailaia totona nama; dia maino asina mailaia, a dare hari. Badina be lau nama tau ese tamana baine inai henia, bona kekeni ese sinana baine inai henia, bona eregabe hahinena ese ravana hahinena baine inai henia, bona ruma taudia ese ruma biaguna bae inai henia helaoreana.”​—⁠Mat. 10:34-36.

⁴ Iesu na ina hereva, ‘Lalomui na basieto maino baina mailaia,’ e gwauraia neganai, ia na e ura e kamonai heniava taudia na bae diba ia bae badinaia neganai hekwakwanai na bae davari. Iena hereva ese taunimanima na baine hapararadia diba. Momokani, Iesu ena ḡaukara badana na Dirava ena hereva momokani baine harorolaia, dia ruma bese edia hetura karana baine hadikaia. (Ioa. 18:37) To, ta ese Keriso ena hahediba herevadia baine badinadia auka na mai hekwarahina, bema turana namodia o ena ruma bese taudia na hereva momokani asie abia daemu.

5. Iesu murinai e rakava taudia ediai be dahaka e vara?

⁵ Iesu na e gwa ia murinai e rakamu taudia ese edia ruma bese amo e davarimu daḡedaḡe karadia bae haheaukalai na namo. (Mat. 10:38) Keriso ena hahediba taudia na iena lalonamo bae abia totona, edia ruma bese edia hekirikirilai karadia e haheaukalai o e dadaraidia. Bona e abi hahenamodia ese e haboio ḡaudia na e hereadia.​—⁠Mareko 10:29, 30 ba duahi.

6. Dahaka baita laloatao na namo bema varavarada ese bae daḡedaḡe henida?

⁶ Iehova ta tomadiho heniamu dainai varavarada ese e daḡedaḡe henidamu neganai, namona na dounu baita lalokau henidia. To namona na baita helalotao Dirava bona Keriso baita lalokau henidia karana na ḡau ginigunana. (Mat. 10:37) Danu, namona na baita laloparara Satana na e uramu eda ruma bese ilalokau henidia karana baine ḡaukaralaia Dirava ta badinaiamu karana baine hadikaia totona. Ruma bese edia daḡedaḡe karadia amo e varamu hekwakwanaidia haida bona baita hanaidia daladia mani aita herevalai.

7. Bema adavamu na dia Witnes tauna o hahinena, dahaka ba kara be namo?

⁷ Baibul na e gwaumu e headavamu taudia na “hisi do bae ani.” (1 Kor. 7:28) Bema adavamu na dia Witnes tauna o hahinena, una ese emu headava lalonai lalometau bona lalohekwarahi bada herea be havaraiamu. To, ḡau badana na Iehova ese emu hekwakwanai e laloamu dalana heḡereḡerena ba lalo. Basio laloa adavamu na Keriso se badinaiamu dainai ba parara eiava emui headava ba hadokoa. (1 Kor. 7:12-16) Ena be adavamu na dia Witnes tauna dainai lauma dalanai ena ruma bese na basine gunalaiamu, to namona na ba matauraia badina ia na ruma bese kwarana. Una heḡereḡerena, Kristen tauna ese adavana, dia Witnes hahinena, baine lalokau henia bona baine naria na namo.​—⁠Efe. 5:22, 23, 28, 29.

8. Ededia henanadai ba lalo bema adavamu ese emu tomadiho karana ai hetoa e atomu?

⁸ Bema adavamu ese emu tomadiho karana ai hetoa e atomu, dahaka ba kara na namo? Heḡereḡere, taihu ta na adavana ese e hamaoroa wiki ta lalonai dina haida mo baine haroro. Bema una na emu ai e varamu, sibomu ba henanadai: ‘Adavagu be e uramu Dirava na tomadiho heniamu karana baina hadokoa, a? Bema lasi, iena ura ḡauna baina badinaia diba, a?’ Lalo maoromaoro karana ese baine durumu diba headava lalonai hekwakwanai basie vara totona.​—⁠Fili. 4:5.

9. Edena dala ai Kristen taudia ese natudia bae hadibadia tamadia o sinadia, dia Witnes taudia, bae matauraia totona?

 ⁹ Natumu ihadibadia karana na mai hekwarahina bema adavamu na dia Witnes tauna o hahinena. Heḡereḡere, natumu ba hadibadia Baibul ena haheḡani bae badinaia, e gwaumu: “Tamamui sinamui ba kamonai henidia.” (Efe. 6:1-3) To, bema adavamu na Baibul ena taravatu se badinamu neganai dahaka ba kara? Adavamu ba matauraia unu amo haheitalai namona ba hahedinaraia. Iena kara namodia ba lalodia bada, bona ba hanamoa. Natumu vairadiai adavamu na basio gwau henia. To, ba hadibadia ta ta na sibodia abi hidi bae kara Iehova bae hesiai henia eiava lasi. Natu edia kara namodia dainai tamadia eiava sinadia ese tomadiho momokani baine abia dae diba.

10. Bema Kristen tama o sina adavana na dia hereva momokani ai, edena dala ai Baibul ena hereva momokani na natuna baine hadibalaidia diba?

¹⁰ Nega haida, hereva momokani asi dibana tauna o hahinena na be uramu natuna na tomadiho koikoi taudia edia moale karadiai baine vareai, eiava tomadiho koikoi edia hahediba herevadia baine hadibadia. Tatau haida ese adavadia, Kristen hahinedia, na be taravatudiamu Baibul amo natudia basie hadibadia totona. Ena be una baine vara, to namona na Kristen hahinena ese dala ma haida amo Baibul ena hereva momokani na natuna baine hadibalaidia. (Kara 16:1; 2 Tim. 3:14, 15) Heḡereḡere, Witnes hahinena na reana adavana ese baine koua natuna basine stadi henidia eiava Kristen heboudia basine laohaidia. Ena be adavana ena abi hidi baine matauraia, to dala e hekehomu  negadiai iena abidadama na natuna vairadiai baine herevalaia diba, unu amo kara maoromaoro ibadinadia dalana bona Iehova idibana karana baine hadibadia. (Kara 4:19, 20) To, tomadiho karana ai natu sibodia ese abi hidi bae kara diba.​—⁠Deu. 30:19, 20. *

11. Dahaka badi dainai oi bona emu murimuri varavara padamui ai hekwakwanai baine vara diba?

¹¹ Reana matamanai, eda ruma bese na asita hadibadia ita na Iehova ena Witnes taudia ta bamodiava. To, eda abidadama e goada neganai, ta diba idia ediai una baita gwauraia hedinarai na namo. (Mar. 8:38) Bema emu abidadama dainai oi bona emu murimuri varavara padamui ai hekwakwanai bae vara, unu hekwakwanai ihamaoromaorodia daladia haida ba lalo bona Dirava ba badinaia hanaihanai na namo.

12. Dahaka dainai murimuri varavara ese e inai henidamu? Bona edena dala ai edia hemami baita lalopararalaia?

¹² Murimuri varavara edia hemami ba lalopararalaia. Baibul ena hereva momokanidia ta diba dainai ta moalemu neganai, varavarada na be lalo kereremu be tomu ita na haida ese vada e koida eiava orea kererena lalonai ta vareai. Be laloamu asita lalokau henidiamu badina idia ida dina badadia na asita moalelai heboumu. Eiava e garimu edai dika ta baine vara garina. Namona na edia lalohadai baita haeroa bona edia lalohadai e herevalaimu neganai baita kamonai namonamo, unu amo edia hemami baita lalopararalaiamu. (Her. 20:5) Aposetolo Paulo na e hekwarahiva “taunimanima idau-idau iboudiai” baine lalopararalaidia, unu amo sivarai namona baine harorolai henidia, ita danu unu baita kara toma.​—⁠1 Kor. 9:19-23.

13. Edena dala ai murimuri varavara ida baita herevahereva na namo?

¹³ Mai manaumu ida ba hereva. Baibul na e gwaumu: “Nega idoinai ba hereva mai gado-namomui ida.” (Kol. 4:6) Iehova ena lauma helaḡa baita noia, unu amo varavarada ida ta herevaherevamu neganai, lauma huahuadia baita hahedinarai diba. Dia namo edia tomadiho koikoi lalohadaidia dainai idia ida baita hepapahuahu. Bema edia hereva o kara amo e hahisidamu, namona na aposetolo taudia edia haheitalai baita tohotohoa. Paulo na eto: “E uduguiraimaimu, to a hanamodiamu; e daḡedaḡe henimaimu, to a haheaukamu; ladamai e hadikamu, to a hamarumarudiamu.”​—⁠1 Kor. 4:12, 13.

14. Kara namodia baita hahedinarai ena namo be dahaka?

¹⁴ Kara namo ba hahedinarai. Ena be mai gado namo ida eda murimuri varavara baita hereva henidia na mai ena namo, to eda kara namo ese danu namo bada baine havaraia diba. (1 Petro 3:1, 2, 16 ba duahi.) Varavaramu na emu kara amo be dibamu Iehova ena Witnes taudia ese headava maurina e moalelaiamu, natudia e naridiamu, bona kara maoromaoro dalana e badinaiamu. Ena be varavarada ese hereva momokani na asie abia daemu, to eda kara maorodia amo Iehova ta hamoaleamu dainai baita moalemu.

15. Edena dala ai baita heḡaeḡae guna hepapahuahu basie vara totona?

¹⁵ Ba heḡaeḡae guna. Hepapahuahu e havaramu ḡaudia ba haerodia, bona ihamaoromaorodia daladia ba lalo. (Her. 12:16, 23) Australia taihuna ta na e gwa: “Ravagu tauna ese hereva momokani na se ura heniava. Ia do asia vadivadi henia neganai, lau bona adavagu na Iehova ena heduru a noiava, badu ihavarana karana ta basia karaia totona. Ia ida baia herevalai ḡaudia a heḡaeḡaelaiva unu amo baia herevahereva namonamo diba. A vadivadi heniava neganai, asia herevahereva daudauva, badina mai dibamai tomadiho dainai baia hepapahuahu na dia namo.”

16. Dahaka ba kara diba bema varavaramu edia kara dainai o lalohisihisimu?

 ¹⁶ Momokani, emu murimuri varavara ida ḡau haida daidiai na basio lalotamonamu. Una be varamu neganai, reana bo lalohisihisimu, badina varavaramu na o lalokau henidiamu bona o uramu ba hamoaledia hanaihanai. Bema unu o hemami tomamu, namona na Iehova ibadinana karana bavatoa guna, bona emu ruma bese ilalokau henidia karana be gabeai. Varavaramu ese una be itaiamu neganai be dibamu Baibul ena hereva momokani ibadinana karana na mai anina bada. Herevana dahaka, namona na ba helalotao ma haida na basio doridia dibamu hereva momokani bae abia dae totona. To, namona na idia ese Iehova ena dala o badinaiamu karana ena namo bae itaia. Eda lalokau Diravana ese idia ediai danu dala e kehoa abi hidi bae kara diba Ia bae hesiai henia o lasi.​—⁠Isa. 48:17, 18.

17, 18. Dahaka ese baine durumu diba bema ruma bese tauna ta na Iehova e rakataniamu?

¹⁷ Ruma bese tauna ta murimuri ai e atoamu eiava sibona kongrigeisen e rakataniamu neganai, lalohisihisina na bada herea. Edena dala ai una hisihisi ba haheaukalaia diba?

¹⁸ Hanaihanai lauma ḡaudia ba lalo bada. Emu abidadama ba hagoadaia totona, hanaihanai Baibul ba duahia, Kristen heboudia totona ba heḡaeḡae bona hebou baola, haroro ḡaukara ba karaia, bona Dirava ba noia goada baine henimu ba haheauka totona. (Iuda 20, 21) To, dahaka ba kara diba bema o hemamimu unu ḡaukara na dia mai kudoumu idoinai ida o karamu? Basio hesiku! Lauma ḡaudia bo lalo badamu neganai, emu lalohadai bona hemami na bo biagu dibamu. Salamo 73 e torea tauna mani a laloa. Ia na lalohadai kererena e abia dainai e lalohekwarahi, to Dirava ena tomadiho gabunai e vareai neganai, ena lalohadai na e hamaoromaoroa. (Sal. 73:16, 17) Mai emu abidadama ida Iehova ba tomadiho henia karana ese oi danu unu baine durumu toma.

19. Edena dala ai Iehova ena matahakani dalana ba matauraia?

¹⁹ Iehova ena matahakani dalana ba matauraia. Iena matahakani dalana ese ita iboudai, kerere tauna danu, baine duruda diba, ena be una na mai hisihisina. (Heberu 12:11 ba duahia.) Heḡereḡere, Iehova ese ita na e hadibadamu se helalo–kerehaimu taudia ‘ida basita hetura.’ (1 Kor. 5:11-13) Ena be eda ruma bese tauna ta murimuri ai e atoa dainai baita lalohisihisimu, to ia ida telefon, teks meseij, revareva, e-mail, o intanet amo basita herevahereva na namo.

20. Dahaka dainai baita abidadama?

²⁰ Bavabidadama. Lalokau na ḡau “iboudiai e laromu,” una dainai baita abia dae Iehova e rakataniamu taudia ese Ia na bae lou henia. (1 Kor. 13:7) Bema o itaiamu emu ruma bese tauna ta na ena kara e haidauamu, ia dainai ba ḡuriḡuri diba, unu amo Dirava ena Hereva amo goada baine abi bona Iehova ena noinoi baine abia dae, e tomu: “A lou henigu.”​—⁠Isa. 44:22.

21. Dahaka ba kara na namo bema Iesu o badinaiamu dainai emu ruma bese ese e daḡedaḡe henimumu?

²¹ Iesu na e gwa bema taunimanima ta baita lalokau henia bada to ia baita lalokau henia maraḡi, ia ese baine dadaraida diba. To, Iesu na mai dibana ena hahediba taudia na mai edia boga auka ida ia bae badinaia diba, ena be edia ruma bese ese bae daḡedaḡe henidia. Bema Iesu o badinaiamu dainai emu ruma bese ese bae daḡedaḡe henimu, Iehova enai ba tabekau bena Ia ese baine durumu ba haheauka totona. (Isa. 41:10, 13) Ba moale badina mai dibamu Iehova bona Iesu na oiemu ai e moalemu bona emu abidadama karana dainai be hanamomumu.