IOSEF, ARIMATEA TAUNA, na se laloa ia na heḡereḡere Roma edia gavana baine hereva henia diba. Pontio Pilato na kara auka tauna. To, Iesu na gabu namona ai bae guria totona, ta ese Pilato baine noia tauanina baine abia na namo. Iosef na matamanai e laloava Pilato ese ena noinoi na basine abia daemu. To Pilato na ena tuari tauna ta amo e diba Iesu na da e mase neganai, Iosef ena noinoi na e abia dae. Ena be Iosef na dounu e lalohisihisiva, to Iesu e hamasea gabuna ela.​—⁠Mar. 15:42-45.

• Ina Iosef, Arimatea tauna, be daika?

• Ia be Iesu varavarana, a?

• Bona dahaka dainai ena sivarai na mai anina bada?

Evanelia bukana Mareko ai, Iosef na e gwauraia “kaunsil tauna ta mai harina namona.” Inisenia ai, ina hereva kaunsil ese Sanhedrin e herevalaia, una na Iuda taudia edia kota badana, bona idia ese hanua taudia, gavamani, bona tomadiho e biagudiava. (Mar. 15:1, 43) Una dainai Iosef na ena taunimanima e gunalaidiava tauna ta, bona Roma edia gavana baine hereva henia diba. Danu, ia na taḡa tauna.​—⁠Mat. 27:57.

Sanhedrin taudia ese Iesu na e inai heniava. Idia ese Iesu ihamasena dalana e karaia. To, Iosef na “tau namona bona kara maoromaoro tauna.” (Luka 23:50) Ia na dia Sanhedrin taudia ma haida heḡereḡeredia, ia na kara maoromaoro tauna bona e urava Dirava ena taravatu baine badinadia. Danu, ia na “Dirava ena basileia e nariava” dainai, Iesu ena hahediba ta ai ela. (Mar. 15:43; Mat. 27:57) Ia ese Iesu ena sivarai na e abia dae, badina be hereva momokani bona hahemaoro maoromaoro e urava.

Ioane 19:38 ai e hahedinaraia, Iosef na Iesu ena hahediba tauna ta to Iuda taudia garidia e gariva dainai, una na se hahedinaraia. Iosef be dahaka dainai e gariva? Mai dibana Iuda taudia ese Iesu na e inai heniava bona Iesu e abidadama heniava taudia na dubu amo e kokidiava. (Ioa. 7:45-49; 9:22) Dubu amo ta bae kokia neganai, anina na bae kirikirilaia, bae dadaraia, bona idau tauna bamona bae kara henia. Una dainai Iosef na se ura ena abidadama Iesu enai baine gwauraia hedinarai. Bema una baine gwauraia hedinarai, ena dagi bona ena hahenamo iboudiai baine haboiodia.

Dia Iosef sibona enai mo una e vara. Ioane 12:42 na e gwaumu: “Hanua lohiadia hutuma ese [Iesu] e abiabiraia, to asie gwauraia hedinarai, Farisea taudia daidiai; dubu amo bae doridia lasi na garina.” Unu bamona tauna ta na Nikodemo, ia danu Sanhedrin tauna ta.​—⁠Ioa. 3:1-10; 7:50-52.

Ena be Iosef na hahediba ta, to sibona ese una na se herevalaia hedinarai. Una na kerere badana ta, badina Iesu na e gwa: “Taunimanima vairadiai bae gwauraigu hedinarai taudia iboudiai na lau ese Tamagu guba ai e nohomu vairanai baina gwauraidia hedinarai; a taunimanima vairadiai baine ḡoregu tauna na lau ese Tamagu guba ai e nohomu vairanai baina ḡorea.” (Mat. 10:32, 33) Iosef ese Iesu na e abia daeva, to taunimanima vairadiai na se gwauraia hedinarai. Oi danu unu bamona, a?

Iosef ena namo be, Baibul na e gwaumu ia ese Sanhedrin taudia na se durudia Iesu bae hamasea totona. (Luka 23:51) Haida na e gwaumu,  reana Iesu e hahemaoro henia neganai Iosef na lasi. Herevana ia na unuseniai eiava lasi, to reana Iosef ese una hahemaoro kererena na se moalelaia​—⁠to ia na asi ena siahu una kara baine koua!

Iesu e mase neganai, Iosef na ena gari karana e hahanaia bona Iesu murinai e rakava taudia e durudia. Una na Mareko 15:43 ese e hahedinaraia, eto: “Pilato dekena ela, e noia goadagoada, Iesu tau-anina baine abia.”

Iesu e mase neganai Iosef danu noho. Una dainai, Pilato ese Iesu ena mase harina do se kamonai neganai, Iosef na vada mai dibana. Una dainai, Iosef ese Iesu tauanina iabina totona e noinoi neganai, gavana na “e hoa dikadika, badina be Iesu vada e mase haraḡa.” (Mar. 15:44) Iosef ese Iesu au ai e hisihisi karana e itaia neganai, lalona e hadaia baine hahedinaraia ia na Iesu ena hahediba tauna ta, a? Oibe. Una ese Iosef na e hagoadaia kara ta baine karaia. Ena kara amo e hahedinaraia ia na Iesu ena hahediba tauna.

Iuda edia taravatu ai, e hamasedia taudia na dina do se diho ai bae guridia na namo. (Deu. 21:22, 23) To, Roma taudia ediai, e hamasedia raskol taudia na au ai e rakatanidiava bae bodaḡa eiava guri  tamona lalonai e negediava. To, Iosef na se ura Iesu na unu bae tomaia. Iesu e hamasea gabuna badinai, Iosef na nadi hagana ta e ḡeia. Una kohua na do asie ḡaukaralaia, una ese e hahedinaraiamu Iosef na Arimatea * amo ela Ierusalem negana na dia daudau, bona ia na e urava una gabu ai ena bese baine guridia. (Luka 23:53; Ioa. 19:41) Iosef ese Iesu na ena gara ai e guria karana na kara namona ta, bona una ese Mesia na “taḡa” taudia ida bae guridia peroveta herevana e haḡuḡurua.​—⁠Isa. 53:5, 8, 9.

Evanelia bukadia hani ese e hahedinaraiamu, Iesu tauanina na au amo e abia diho neganai, Iosef ese dabua ḡoevaḡoevana ai e kumia, bona iena gara gabuna ai e atoa. (Mat. 27:59-61; Mar. 15:46, 47; Luka 23:53, 55; Ioa. 19:38-40) Iosef e durua tauna tamona na Nikodemo, ia ese muramura bonadia namodia e laohai. Ini tatau raruosi na mai edia dagi dainai, idia sibodia ese Iesu tauanina na asie laohaia gara gabuna. Idia edia hesiai taudia ese Iesu tauanina e huaia bona e haguria. Herevana edia hesiai taudia e ḡaukaralaidia, to idia ese e karaia ḡaukarana na mai anina bada. Mase taudia bae daudia toho taudia na bae miro ela bona dina 7, idia ese bae dau toho ḡaudia iboudiai danu bae miro. (Num. 19:11; Hag. 2:13) Unu bamona taudia na Pasova puradia ai bae noho tabe, bona Pasova ariadia bona moaledia ai basie vareai. (Num. 9:6) Iosef ese Iesu igurina karana e heḡaeḡaelaia dainai, bamona ese na bae inai henia diba. To, una na se laloa, ia na e ura Iesu na dala maorona ai bae ḡuria, bona e hahedinaraia ia na Keriso ena hahediba ta.

Evanelia bukadia ese Iesu e guria sivaraina e gwauraia murinai, Baibul ese Iosef, Arimatea tauna na ma se herevalaia, una dainai baita henanadaimu: Iosef enai be dahaka e vara? Ita na asi dibada. To, ataiai eme herevalaia karadia dainai, ta dibamu ia ese e hahedinaraia ia na Keriso ena hahediba ta. Badina hahetoho bona hisihisi lalodiai iena abidadama na e goada to se manoka. Una na toa namona.

Una sivarai dainai siboda baita henanadai na namo: ‘Lau be ḡau haida​—⁠dagi, moni ḡaukara, kohu, ruma bese, o ura kwalimu​—⁠ese e kougumu dainai egu hetura karana Iehova ida asina laloa badamu, a?’