1. Lalokau hereadaena be dahaka, bona dahaka dainai una na kara hereadaena? (Rau 7 ai laulau ba itaia.)

BAIBUL ena hahekau herevadia ibadinadia karana amo e varamu lalokauna (a·gaʹpe) na Iehova ena harihari ḡauna ta. Iehova na una lalokau Badina. (1 Ioa. 4:7) Una na lalokau hereadaena. Una lalokau dainai haida baita ura henidiamu bona baita kara namo henidiamu, to ta hahedinaraiamu badina korikorina na haida edia namo ta lalo gunamu. Diksinari ta ese e hahedinaraia, a·gaʹpe anina na “kara amo baine hedinarai.” Bema ita ese una lalokau baita hahedinaraia eiava haida ese ita edai be hahedinaraiamu, eda mauri na be namomu bona baita moalemu.

2, 3. Edena dala ai Iehova ese lalokau hereadaena e hahedinaraia?

² Iehova ese Adam bona Heva do se karadia neganai iena lalokau taunimanima ediai na vada e hahedinaraia. Ia ese tanobada e karaia taunimanima ese bae noholaia hanaihanai, bona mauri bae moalelaia totona. Dia sibona ena namo dainai e karaia, to ita eda namo dainai e karaia. Danu, mai ena lalokau ida natuna tanobada ai e hanamodia bona Paradaiso ai bae mauri hanaihanai diba.

³ Adam bona Heva e gwau-edeede murinai, Iehova ese lalokau  hereadaena e hahedinaraia. Ia ese unu gwau-edeede taudia raruosi besedia edia mauri ihoina dalana e karaia, badina mai dibana idia haida ese Iena lalokau bae abia dae. (Gen. 3:15; 1 Ioa. 4:10) Momokani, Iehova ese Hahemauri Tauna ta e gwauhamatalaia neganai, Ienai una boubou ḡauna na vaitani de karaia na heto. Bena laḡani 4,000 muridiai, Iehova na sibona se helalo to Natuna vara-edeana e heni taunimanima daidiai baine mase. (Ioa. 3:16) Iehova ena lalokau hereadaena dainai ta moalemu!

4. Dahaka ese e hahedinaraiamu lalokau na baita hahedinaraia diba?

⁴ Ita ese lalokau korikorina na baita hahedinaraia diba badina Dirava ese ita na ia heida-idana ai e karada. Adam ena amo ta abia kara dikana dainai ta hekwarahimu lalokau baita hahedinaraia, to lalokau na dounu baita hahedinaraia diba. Abel ese Dirava e lalokau henia dainai boubou ḡauna namona e heni. (Gen. 4:3, 4) Lalokau dainai Noa na laḡani momo lalodiai Dirava ena hereva e harorolaia, ena be ta se ura baine kamonai. (2 Pet. 2:5) Abraham na Dirava ese e haḡania natuna Isaak baine bouboulaia neganai, Dirava ilalokau henina karana e atoa guna, sibona ena hemami be se laloa. (Iak. 2:21) Unu abidadama taudia heḡereḡeredia, ta uramu lalokau baita hahedinaraia, herevana hekwakwanai baita davari.

5. Ededia dala ai lalokau korikorina baita hahedinaraia diba?

⁵ Baibul na e gwa, lalokau korikorina na “dia hereva amo, dia mala amo, a kara ai bona momokani ai baita hahedinaraia.” (1 Ioa. 3:18) Anina be eda hereva ai lalokau herevadia basita gwaurai hedinarai, a? Lasi! (1 Tes. 4:18) To, anina na lalokau na hereva ai mo basita gwauraia, to kara amo danu baita hahedinaraia. Heḡereḡere, bema tadikaka ta na e dabumu, hahenamo herevadia mo baita gwaurai na dia heḡereḡere, to baita durua na namo. (Iak. 2:15, 16) Una heḡereḡerena, Iehova bona dekeda taudia ta lalokau henidiamu dainai, Dirava baita noia dia uit “iutuna taudia” mo baine siaidia, to ita danu una haroro ḡaukarana baita durua.​—⁠Mat. 9:38.

6, 7. (a) “Lalokau korikori” be dahaka? (b) Lalokau koikoina e hahedinaraia taudia haida be daidia?

⁶ Aposetolo Ioane na e gwa, lalokau na “kara ai bona momokani ai” baita hahedinaraia na namo. Una dainai, namona na eda lalokau na “momokani,” eiava “lalokau korikori.” (Roma 12:9; 2 Kor. 6:6) Una anina na lalokau korikorina na basita hahedinaraia diba bema baita koikoi, vaitani toada korikori na basita hahedinaraiamu. Reana baita lalomu, ‘Lalokau be mai emu koikoi ida ba hahedinaraia diba, a?’ Lasi. Una na dia lalokau korikorina.

⁷ Lalokau koikoina e hahedinaraia taudia haida mani aita lalodia. Eden umana ai, Satana na mai ena koikoi ida e ura baine hahedinaraia, ia na Heva ena namo e laloava, to ena kara amo e hahedinaraia ia na sibona ena namo e laloa. (Gen. 3:4, 5) David ena negai, Ahitofel na ena kara amo e hahedinaraia ena hetura karana pavapava ida na koikoi. Ia na sibona ena namo ihabadana e laloa dainai David taona e tore. (2 Sam. 15:31) Una heḡereḡerena hari ina negai, aposteit bona kongrigeisen e hapararaiamu taudia na “hereva manau bona ere namo” amo e hahedinaraiamu idia na lalokau taudia na heto, to edia kara badina korikorina na sibodia edia namo e lalomu.​—⁠Roma 16:17, 18.

8. Edena henanadai baita laloa na namo?

⁸ Lalokau koikoina e hahedinaraiamu taudia na bae hemarai, badina una lalokau na dia Dirava ena amo e maimu lalokauna. Una  lalokau koikoina amo taunimanima na bae koidia diba, to Iehova na basie koia diba. Danu Iesu na e gwa, e koikoimu taudia na dika bada herea bae davaria. (Mat. 24:51) Momokani, Iehova ena hesiai taudia na asie uramu lalokau koikoina bae hahedinaraia. To, namona na siboda baita henanadai, ‘Lau be lalokau korikorina na hahedinaraiamu, eiava sibogu egu namo na laloamu dainai na koikoimu, a?’ Mani “lalokau korikori” baita hahedinaraia daladia 9 aita herevalai.

9. Lalokau korikorina dainai dahaka baita kara diba?

⁹ Mai moaleda ida hesiai ḡaukara baita karaia, ena be ta ese se itaiamu. Bema mai dalana, namona na mai eda ura ida ‘hehuni’ ai eiava dia taunimanima vairadiai tadikakada baita kara namo henidia. (Mataio 6:1-4 ba duahi.) Anania bona Sapira na unu na se kara toma. Idia na asie ura hehuni ai edia harihari ḡaudia bae heni, to e koikoi bona mai edia hekokoroku ida edia harihari ḡauna e heni dainai e mase. (Kara 5:1-10) To, lalokau korikorina dainai tadikakada baita durudia neganai baita moalemu, ena be taunimanima bae diba eiava lasi. Heḡereḡere, Gavanin Bodi e durudiamu lauma aniani e heḡaeḡaelaimu tadikakadia na asie hahedinaraiamu idia be daidia, bona dahaka ḡaukara e karamu.

10. Edena dala ai ma haida imatauraidia karana baita hahedinaraia diba?

¹⁰ Ma haida imatauraidia karana baita hahedinaraia. (Roma 12:10 ba duahia.) Iesu na taunimanima ese asie lalo badamu ḡaukaradia e kara amo hemataurai karana e hahedinaraia. (Ioa. 13:3-5, 12-15) Namona na baita ḡaukara goada manau karana baita hahedinaraia, unu amo ma haida baita matauraidia diba. Aposetolo taudia ese Iesu ena kara anina na asie lalopararalaia ela bona lauma helaḡa e abia murinai e laloparara. (Ioa. 13:7) Ma haida baita matauraidia diba bema eda diba, kohu, eiava Iehova ena hesiai ḡaukara ai ta abimu hahenamodia basita hekokorokulai. (Roma 12:3) Bona hahenamo e abimu taudia na basita mama henidia, to idia ida baita moale hebou ena be baita laloa ita danu una hahenamo baita abia na maoro.

11. Dahaka dainai mai momokanida ida hahenamo herevadia baita gwaurai?

¹¹ Mai momokanimu ida tadikakamu ba hanamodia. Dala e hekehomu negadiai hahenamo herevadia baita gwaurai na namo, badina una na hahegoada karana. (Efe. 4:29, NWT) To, namona na mai momokanida ida unu baita kara toma. Asita uramu ta baita hanamoa koikoi eiava iduruna sisibadia basita heni. (Her. 29:5) Bema ta na baita hanamoa to murinai baita maumauraia, una na koikoi karana. Aposetolo Paulo ese una kara na e dadaraia bona ma haida e hanamodia dalana amo lalokau korikorina e hahedinaraia. Heḡereḡere, mai ena momokani ida Korinto Kristen taudia edia kara namodia dainai e hanamodia. (1 Kor. 11:2) To bema hahenamo herevadia basie abi na maoro, Paulo na mai manauna ida unu badidia na e gwaurai hedinaraiva.​—⁠1 Kor. 11:20-22.

12. Edena dala ai heabidae karana amo lalokau korikorina baita hahedinaraia diba?

¹² Heabidae karana baita hahedinaraia. Iehova ese e haḡanidamu tadikakada ediai harihari karana baita hahedinaraia. (1 Ioane 3:17 ba duahia.) To, namona na badi maorona ai baita kara, dia namo haida ese bae hanamoda totona. Siboda baita henanadai: ‘Lau ese heabidae karana be turagu korikoridia, lada bada taudia, eiava egu kara namo bae haloua diba taudia ediai mo na hahedinaraiamu, a? Eiava asina dibadia namonamo tadikaka taihu o egu kara namodia basie  halou diba taudia na kara namo henidiamu, a?’ (Luka 14:12-14) Eiava bema tadikaka o taihu ta na abi hidi kererena dainai heduru e uramu eiava eda heabidae karana na se laloa badamu, dahaka baita kara? Unu bamona negadia ai, namona na ina sisiba baita badinaia: “Ba heabi dae heheni, basio maumau.” (1 Pet. 4:9) Una sisiba bo badinaiamu neganai, bo moalemu badina badi maorona ai o heduru.​—⁠Kara 20:35.

13. (a) Edena negai baita haheauka na namo? (b) Manoka taudia baita durudia totona dahaka baita kara diba?

¹³ Manoka taudia baita durudia. Lalokau korikorina baita hahedinaraia karana na ina haheḡani ese baine tohoa diba, “manoka taudia ba imudadia, taunimanima iboudiai ba haheauka henidia.” (1 Tes. 5:14) Ena be manoka taudia momo na ma e goada loumu, to ma haida na mai eda haheauka ida dounu baita durudia na namo. Idia ida hahegoada siridia baita herevalai diba, baita haroro hebou, eiava nega baita ato edia lalohekwarahi ḡaudia baita kamonai totona. Danu, dia namo baita laloa tadikaka ta o taihu ta na goada eiava manoka, to namona na baita diba ita iboudai na mai eda goada bona mai eda manoka ḡaudia. Aposetolo Paulo ese danu e hahedinaraia ia na mai ena manoka ḡaudia. (2 Kor. 12:9, 10) Una dainai, ita iboudai na tadikaka taihu edia heduru amo namo baita davari diba.

14. Tadikaka taihu ida maino ai baita noho totona, dahaka baita kara na namo?

¹⁴ Maino baita kara. Namona na hanaihanai tadikaka taihu ida maino ai baita noho, ena be baita mamia ita na e laloda kerere eiava e kara auka henida. (Roma 12:17, 18 ba duahi.) Mai momokanida ida sori herevana baita gwauraiamu neganai, e lalohisihisimu tauna ena hemami na be namomu. Heḡereḡere, dia namo bao gwa, “Na sorimu badina emu hemami na unu bamona,” to namona na bao gwa, “Na sorimu badina egu hereva amo lalomu na hahisia dainai,” unu amo eda kerere baita hahedinaraia danu. Headava lalonai maino baine mia na mai anina bada. Dia namo headava taudia na taunimanima vairadiai bae koikoi idia na e helalokau hehenimu, a edia ruma ai be bae badu dainai basie hereva hebou, hahehisi herevadia bae gwaurai, eiava bae hedadaba.

15. Edena dala ai baita hahedinaraia mai momokanida ida dika ta gwautaomu?

¹⁵ Dika baita gwautao. Dika baita gwautao totona, e hahisida tauna ena kerere baita laloaboio bona basita badu henia. Bema ‘lalokau ai baita haheauka heheni, lauma ena lalo-tamona baita kahua tao, bona maino ena iḡui’ ai baita noho neganai, asi dibadia edia kara amo ita e hahisida taudia edia dika baita gwautao dibamu. (Efe. 4:2, 3) Mai momokanida ida dika baita gwautao totona, namona na eda lalohadai baita biagua, unu amo kerere basita lalo tao. (1 Kor. 13:4, 5) Bema dounu baita hemakamu, eda hetura karana tadikaka o taihu bona Iehova ida baita hadikaia dibamu. (Mat. 6:14, 15) Mai momokanida  ida dika baita gwautao dalana ma ta na, e hahisidamu taudia daidiai baita ḡuriḡuri.​—⁠Luka 6:27, 28.

16. Iehova ena hesiai ḡaukara ai ta abimu hahenamodia be ede baita ḡaukaralaidia toma?

¹⁶ Siboda eda namo basita lalo. Iehova ena hesiai ḡaukara ai hahenamo ta abimu neganai, namona na ‘siboda eda namo basita tahu, a dekeda tauna ena namo danu baita tahu,’ unu amo lalokau korikori baita hahedinaraia. (1 Kor. 10:24) Heḡereḡere, eda hebouhebou ai atenden taudia na haida do asiela neganai idia na de lao gunamu dainai, reana be lalomu idia bona edia ruma bese edia helai gabudia namodia bae abi hidi. To unu na asie kara tomamu, unu tadikaka na momo asie uramu bae helai gabudiai e helaimu. Una dala amo sibodia edia namo asie lalomu bona lalokau korikori e hahedinaraiamu. Edena dala ai edia haheitalai namona ba tohotohoa diba?

17. Lalokau korikorina ese kerere badadia e kara tauna baine durua dahaka baine kara?

¹⁷ Emu kara dika hehunidia ba gwaurai hedinarai bona ba dadaraidia. Kerere badadia e kara Kristen taudia haida ese edia kerere na e hunimu, badina asie uramu bae hemarai o ma haida bae habadudia. (Her. 28:13) To, una na dia lalokau karana, badina una ese dia kerere tauna mo e hadikaiamu to ma haida danu e hadikadiamu. Danu una ese Dirava ena lauma helaḡa ena ḡaukara baine koua bona kongrigeisen ena maino baine hadikaia diba. (Efe. 4:30) Lalokau korikorina ese kerere badadia e kara Kristen taudia e durudiamu, elda taudia bae hereva henidia bena heduru bae abi diba.​—⁠Iak. 5:14, 15.

18. Dahaka dainai lalokau korikori na mai anina bada?

¹⁸ Lalokau ese kara iboudiai e hereadia. (1 Kor. 13:13) Una kara ese e hahedinaraiamu ita na Iesu murinai ta rakamu taudia bona Iehova, lalokau Badina, ta tohotohoamu. (Efe. 5:1, 2) Paulo na e gwa, bema “asi egu lalokau, lau na ḡau asi anina na heto.” (1 Kor. 13:2) Namona na hanaihanai eda lalokau na dia “hereva” ai mo to “kara ai bona momokani ai” danu baita hahedinaraia.