1-3. (a) Sekaria ese peroveta ḡaukarana e matamaia neganai, Iehova ena taunimanima edia mauri dalana be ede bamona? (b) Dahaka dainai Iehova ese ena taunimanima e boiridia Ia ‘bae lou’ henia?

BUKA helokuna ta e rohomu, hahine ta na bosea lalonai helai, bona hahine rarua mai hanidia, boḡe hanidia na heheto, na e rohomu. Unu na Sekaria ese ena matahanai ai e ita ḡaudia. (Sek. 5:1, 7-9) Dahaka dainai Iehova ese unu matahanai na iena peroveta tauna e henia? Una negai Israel taudia edia mauri dalana be ede bamona? Hari ina negai Sekaria ena matahanai ese edena dalai ita e durudamu?

² Laḡani 537 B.C.E. ai Iehova ena taunimanima na e moale bada herea. Idia na laḡani 70 lalodiai Babulono ena iḡui ai e noho murinai, e ruhadia. Mai moaledia ida Ierusalem e lou lao tomadiho momokanina bae haginia lou totona. Laḡani 536 B.C.E. ai, dubu helaḡa badina e hadaia. Una negai taunimanima na e “lolo badabada, bona reḡena na dauhai danu e kamonaiva.” (Esr. 3:10-13) To, se daudau haida ese edia ḡaukara na e  koua. Hekwakwanai momo e davari dainai e lalomanoka bena dubu ihaginina ḡaukarana e rakatania, bona sibodia edia ruma e haginiva bona uma ḡaukara e karava. Laḡani 16 muridiai, Iehova ena dubu ihaginina ḡaukarana na e hadokoa. Namona na ta ese Dirava ena taunimanima baine hadibadia, Iehova bae lou henia bona sibodia edia ura ḡaudia basie tahu. Iehova na e urava Ia bae lou henia, bona mai kudoudia idoinai ida bae tomadiho henia.

³ Una dainai laḡani 520 B.C.E. ai, Dirava ese ena peroveta tauna Sekaria e siaia, iena taunimanima baine durudia Babulono amo e ruhadia badina bae lalopararalaia totona. Ina lada Sekaria, anina na “Iehova ese E Lalodiatao,” una ese mai anina bada hereva momokanina e hadibadamu. Ena be Israel taudia ese Iehova ena hahemauri karadia na e laloboio, to Iehova ese idia na dounu e lalodiatao. (Sekaria 1:3, 4 ba duahi.) Mai ena lalokau ida e hadibadia baine durudia tomadiho ḡoevana bae haginia lou, to ma e hadibadia danu bema mai kudoudia idoinai ida Ia basie tomadiho henia, Ia ese baine dadaraidia. Mani aita itaia, edena dala ai Sekaria ena matahanai namba 6 bona 7 ai Iehova ese ena taunimanima e durudia. Bona hari ina negai unu matahanai amo dahaka ta dibamu?

4. Sekaria ena matahanai namba 6 ai dahaka e ita, bona dahaka dainai buka kahana ruaosi na mai toretoredia? (Rau 21 ai laulau namba 1 ba itaia.)

⁴ Sekaria karoa 5 ese matahanai idauna ta e herevalaia. (Sekaria 5:1, 2 ba duahi.) Sekaria ese buka helokuna ta e itaia e rohova, ena lata na 9 mita bona ena lababa na 4.5 mita heḡereḡerena! Una buka na e hekeho, baine heduahi totona. Ia lalonai na hahemaoro herevadia bona buka kahana kahana ai e tore. (Sek. 5:3) Idaunegai, buka  (o scroll) na kaha tamona ai mo e toreva, to ina buka kahana ruaosi na mai toretoredia dainai e hahedinaraiamu ena hereva na mai anidia bada.

5, 6. Iehova ese henaohenao karadia be ede e lalodia tomamu?

⁵ Sekaria 5:3, 4 ba duahi. Iehova ese taunimanima iboudiai na edia kara heḡereḡeredia baine hahemaoro henidia, Ia ladana e henemailaia taudia ediai una na mai anina bada. Idia na Dirava e lalokau heniamu bona mai dibadia henaohenao karadia ese ‘Dirava ladana baine ḡonaḡonalaia’ diba. (Her. 30:8, 9) Herevana ta na dahaka badi dainai baine henaohenao, to ena kara amo be hahedinaraiamu ia ese kohu imataḡaniḡani henidia urana na e laloa badamu. Bona Iehova, Ia ladana, bona Iena taravatu na e lalodia maraḡimu.

⁶ Sekaria 5:3, 4 na e gwaumu: “Heuduguirai ḡauna, . . . [na] henaoa tauna ena ruma lalonai baine vareai . . . bena ena ruma ai baine mia ela bona baine ha-orea.” Iehova ena hahemaoro na ḡau ta ese basine koua diba. Iena taunimanima bogaraḡidiai e miamu kara kereredia iboudiai baine hahedinaraidia diba. Ena be ta ese ena henaohenao karana na siahu taudia, bosi, elda taudia, eiava tama sina edia amo baine hunia, to Dirava ena amo na basine hunia diba, badina Ia vairanai ḡau iboudiai na hehedinararai. (Heb. 4:13) Ta moalemu badina ita ese ‘ḡau idoidiai e kara maoromaoromu’ taudia ta bamodiamu!​—⁠Heb. 13:18.

7. Dirava ena hahemaoro karana amo baita roho mauri totona, dahaka baita kara na namo?

⁷ Iehova ese henaohenao karadia iboudia na e inai henidiamu. Iehova ena kara maoromaoro taravatudia ibadinadia karana baita laloa bada na namo, bona eda kara nahuadia baita toho unu amo Ia ladana basita hadikaia. Unu baita kara tomamu neganai, Iehova ese iena taravatu e utuamu taudia baine hahemaoro henidia karana amo baita roho mauri diba.

8-10. (a) Gwauhamata anina be dahaka? (b) Pavapava Sedekia ese dahaka gwauhamata se badinaia?

⁸ Una buka helokuna ese ‘Dirava ladana ai e gwau hamata koikoimu’ taudia e sisiba henidia danu. (Sek. 5:4) Gwauhamata anina na ta ese ḡau ta baine hamomokania totona e gwauraiamu herevana, eiava e gwauhamatamu ḡau ta baine karaia o lasi.

⁹ Iehova ladana ai gwauhamata ta karamu neganai, baita laloa bada na namo. Ierusalem e lohiaia pavapavana ginigabena na unu e kara toma. Sedekia na Iehova enai e gwauhamata Babulono pavapavana baine badinaia. To, Sedekia ese ena gwauhamata na se badinaia. Una dainai, Iehova ese e hahemaoro henia, eto: “Lau na maurimu heḡereḡerena, . . . hanua pavapavana ta ese [Sedekia] na pavapava tauna ai e halaoa, bena una pavapava ai e halaoa tauna ese dagi na e henia tauna ena gwauhamata helaḡana e dadaraia, bona e atua taravatuna e tataia utu; benaini, una tau na dagina e henia pavapavana ena noho gabuna ai baine mase, oibe, Babulono ai baine mase.”​—⁠Ese. 17:16.

¹⁰ Pavapava Sedekia na Dirava ladana ai e gwauhamata dainai, Iehova na e ura una gwauhamata baine badinaia. (2 Sis. 36:13) To, Sedekia na Aigupto ediai heduru e tahu, badina e ura Babulono edia iḡui amo baine heruha, to una na se vara.​—⁠Ese. 17:11-15, 17, 18.

11, 12. (a) Edena gwauhamatana na mai anina bada? (b) Ededia dala haida ai eda mauri ta heni gwauhamatana baita hamomokania na namo?

¹¹ Iehova ese ta karamu gwauhamatadia na e kamonaimu danu. Bona eda gwauhamata na e lalodia badamu, una dainai baita haḡuḡurudia na namo bema ta uramu iena lalonamo baita abia. (Sal. 76:11) Ta kara gwauhamatadia iboudiai amo, mai anina bada ḡauna na Iehova enai eda mauri ta heni gwauhamatana. Una gwauhamata ta karaia anina na eda mauri ibounai lalonai Iehova baita hesiai henia.

¹² Eda mauri ta heni  gwauhamatana be edena dalai baita hamomokania diba? Hahetoho badadia bona maraḡidia lalodiai, Dirava baita badinaiamu karana ese be hahedinaraiamu, ita na ta uramu “dina ta ta” ai Ia baita hanamoa. (Sal. 61:8) Heḡereḡere, ḡaukara o sikuli gabunai ta na heḡahusi herevadia e gwauraimu neganai, una kara ta dadaraiamu bona Iehova ena “dala” ta badinaiamu, a? (Her. 23:26) Bema eda ruma bese taudia haida na dia Witnes taudia, Kristen kara namodia baita hahedinarai totona Iehova ena heduru ta noiamu, a? Dirava ena lalokau karana bona hahekau herevadia dainai, dina ta ta ai ḡuriḡuri amo Ia ta tenkiu heniamu, a? Ita be nega ta atomu Baibul baita duahia hanaihanai totona, a? Ita na ta gwauhamata unu baita kara toma, ani? Dirava baita badinaia na mai anina bada. Eda tomadiho karadia ta karamu neganai ta hahedinaraiamu, Iehova na ta lalokau heniamu bona iena ura ta atoa gunamu. Eda mauri lalonai eda tomadiho karana na mai anina bada. Bona eda gwauhamata baita haḡuḡurumu neganai, vaira negai hahenamo baita abi diba.​—⁠Deu. 10:12, 13.

13. Sekaria ena matahanai namba 6 amo dahaka ta dibamu?

¹³ Sekaria ena matahanai namba 6 amo ta dibamu, Iehova e lalokau heniamu taudia na basie henaohenao eiava basie gwauhamata koikoi na namo. Danu ta dibamu, ena be Israel taudia na kerere momo e kara to Iehova ese se rakatanidia. Edia hekwakwanai na e lalopararalai badina idia na inaidia bogaraḡidiai e nohova. Ia ese ena gwauhamata e badinadia karana amo ita edai haheitalai namona e hahedinaraia, bona baine duruda eda gwauhamata baita badinaia totona. E durudamu dalana ta na, nega vaira helarona e henida. Kahirakahira Ia ese kara dikadia iboudiai tanobada ai baine haoredia vaitani. Sekaria ena matahanai namba 7 ese una helaro namona e hahedinaraia.

14, 15. (a) Sekaria ese matahanai namba 7 ai dahaka e ita? (Rau 21 ai laulau namba 2 ba itaia.) (b) Tohe o bosea lalonai hahine helaina ese dahaka e laulaulaia, bona dahaka dainai e koua ahu?

¹⁴ Sekaria ese buka helokuna e rohova e itaia murinai, aneru ese e hamaoroa baine “gaga isi.” Iena matahanai namba 7 ese dahaka e hahedinaraia? Ia ese tohe o bosea ta e itaia, e laova. (Sekaria 5:5-8 ba duahi.) Una bosea ikouna na “auri-metauna” ta. Una ikou e kokia oho neganai, Sekaria na e itaia bosea “lalonai hahine ta” helai. Aneru ese e hamaoroa, bosea lalonai hahine helaina ese “Kara Dika” e laulaulaia. Una hahine na e ura bosea amo baine raka lasi neganai, Sekaria na e gari dikadika! Aneru ese haraḡa herea hahine na e doria vareai bosea lalonai bena auri metauna amo e koua ahu. Una anina be dahaka?

¹⁵ Una matahanai ese e hahedinaraiamu, Iehova ese iena taunimanima bogaraḡidiai kara dikadia iboudiai na baine haoredia. Ia ese kara dikadia baine itadia neganai haraḡa herea baine kokidia. (1 Kor. 5:13) Aneru ese auri metauna amo bosea e koua ahu karana ese una e hahedinaraia.

16. (a) Sekaria ese e itaia boseana enai be dahaka e vara? (Rau 21 ai laulau namba 3 ba itaia.) (b) Hahine mai hanidia ese bosea be ede e laohaia?

¹⁶ Gabeai, matahanai lalonai hahine rarua e itadia, idia hanidia na mai goadadia boḡe hanidia na heheto. (Sekaria 5:9-11 ba duahi.) Ini hahine rarua na bosea lalonai hahine helaina amo idau! Ini hahine raruosi ese hanidia goadadia amo una bosea e abia isi bona e roholaia. Ede e laohaia? “Sinara tanona” o Babulono e laohaia. To, dahaka dainai Babulono e laohaia?

17, 18. (a) Dahaka dainai “Kara Dika” na Sinara tanona e laohaia? (b) Namona na laloda baita hadai dahaka baita kara?

 ¹⁷ Sekaria ena negai e nohova Israel taudia na bae laloparara dahaka dainai Kara Dika na Sinara tanona e laohaia. Sekaria bona Iuda taudia ma haida na mai dibadia Babulono na kara dika amo e honuhonudae. Idia na unuseniai e tubu dainai, dina ta ta ai e hekwarahiva una hanua ena kara mirodia bona tomadiho koikoi karadia bae dadarai totona. Una matahanai ese idia na e hagoadadia, badina e diba Iehova na e gwauhamata tomadiho momokanina baine haḡoevaia!

¹⁸ To, matahanai ese danu Iuda taudia na e hadibadia edia tomadiho karana baine ḡoeva na namo. Iehova ena taunimanima bogaraḡidiai kara dikadia na basie mia. Dirava ena orea ḡoevana lalonai iena lalokau bona hegima karana ta mamiamu dainai, namona na baita ḡaukara goada una orea baine ḡoeva totona. Dirava ena orea ena ḡoeva karana ta duruamu, a? Dirava ena taunimanima bogaraḡidiai kara dikadia basie mia na namo.

19. Hari ina negai Sekaria ena matahanai amo dahaka ta dibamu?

¹⁹ Sekaria ena matahanai namba 6 bona 7 ese kara koikoi taudia e hadibadiamu, Iehova ese kara dikadia na be haorediamu. To ita na Ia ta tomadiho heniamu tauda dainai, namona na mai momokanida ida kara dikadia baita inai henidia. Ina matahanai amo ta dibamu, bema eda kara amo Dirava baita hamoaleamu, ia ese dia dava dikana be henidamu, to be gimadamu bona be hanamodamu. Ena be ina tanobada dikana ai ta hekwarahimu kara ḡoevadia baita kara, to ta dibamu Iehova ena heduru amo baita kwalimu dibamu. To ede ta diba tomamu ina tanobada dikana ai tomadiho momokanina na baine kwalimu diba? Ede ta diba tomamu hisihisi badana e kahikahimu dainai Iehova ese ena orea na be gimaiamu? Ini henanadai na stadi gabena ai baita herevalaimu.