1, 2. Sekaria ena matahanai namba 7 murinai, Ierusalem ai e nohova Iuda taudia edia mauri be ede bamona?

SEKARIA ena matahanai namba 7 murinai, ia na e ita ḡaudia e lalohadailaiva. Iehova na e gwauhamata koikoi taudia iboudiai edia kara dika davadia baine henidia. Una gwauhamata ese Sekaria na e hagoadaia. To, ḡau ta do se vara, badina koikoi karadia bona kara dikadia ma haida na dounu e varava, bona Ierusalem ai Iehova ena dubu helaḡa ihagini louna ḡaukarana na do asie haorea. Dahaka dainai Iuda taudia na Dirava ese e henidia ḡaukarana e rakatania haraḡa? Ierusalem e lou lao be edia mauri bae hanamoa totona, a?

² Sekaria na mai dibana Ierusalem ela Iuda taudia na abidadama tatau bona hahine. Idia na “Dirava ese vada e rohedia” o e hagoadadia dainai edia ruma bona bisnes e rakatani. (Esr. 1:2, 3, 5) Danu e noholaiava tanona e rakatania bona asi dibadia tanona ela. Bema idia ediai Iehova ena dubu helaḡa ihagini louna ḡaukarana na dia ḡau badana, reana 1,600 kilomita  laolaona na basiema karaia.

3, 4. Iuda taudia ediai be dahaka hekwakwanai e vara?

³ Iuda taudia na edia laolao lalonai dahaka e lalova? Reana edia noho gabuna matamatana e laloava. Idia na e kamonai guna Ierusalem na hanua mai hairaina. Idia bogaraḡidiai burukadia ese guna dubu helaḡa hairaina na e itaia. (Esr. 3:12) Bema oi na idia ida boma lao bena Ierusalem boma itaia neganai, emu hemami be ede bamona? Boma itaia ruma iboudiai na e hadika bona ava na bada herea neganai, boma lalohisihisi, a? Ierusalem maḡuna, e heḡiḡi-dobi ḡauna, na Babulono ena maḡu badadia ida boma haheḡereḡeredia, a? To, Iuda taudia na asie lalomanoka, badina edia laolao lalonai Iehova ese e durudia bona e gimadia dalana na e itaia. Idia e kau neganai e karaia ḡauna ginigunana na, dubu helaḡa gunana e gini gabunai boubou patana ta e haginia, bona dina ta ta ai edia boubou ḡaudia Iehova e heniava. (Esr. 3:1, 2) Idia na e moaleva dainai, toana na ḡau ta ese basine hamanokadia diba.

⁴ Israel taudia na dia dubu helaḡa ihaginina ḡaukarana mo bae karaia, to edia hanua danu bae haginia lou. Idia ese ruma bae hagini, uma bae kara, bona edia bese bae ubudia. (Esr. 2:70) Toana na ḡaukara badana be karaiamu. To se daudau, inaidia ese edia ḡaukara e koua toho. Ena be matamanai na e gini tutuka, to laḡani 15 lalonai ediai e vara hekwakwanaidia daidiai e lalomanoka. (Esr. 4:1-4) Bona laḡani 522 B.C.E. ai, Parasa pavapavana ese Ierusalem ihaginina ḡaukarana na e taravatua. Unu e vara ḡaudia daidiai toana na una hanua na basie haginia lou diba.​—⁠Esr. 4:21-24.

5. Iehova be edena dala ai ena taunimanima e durudia?

⁵ Iehova na mai dibana ena taunimanima ese heduru bae abi na namo. Dirava ese Sekaria e henia matahanai ginigabena amo Iuda taudia e hadibadia, Ia ese idia na e lalokau henidiava bona edia ḡaukara na e lalo badava. Bona e gwauhamata baine gimadia, bema iena ḡaukara bae hamatamaia lou. Dubu helaḡa ihagini louna ḡaukarana dainai, Iehova na e gwauhamata: “Iehova, emui Dirava, gadona ba badinaia namonamo, ini ḡau do bae vara.”​—⁠Sek. 6:15.

6. (a) Sekaria ena matahanai namba 8 ai be dahaka e ita? (Rau 26 ai laulau ba itaia.) (b) Dahaka dainai hosi kaladia na idauidau?

⁶ Sekaria ena matahanai namba 8 ese eda abidadama e hagoadaiamu. (Sekaria 6:1-3 ba duahi.) Mani ina a laloa: Kariota hani na “auri-laboralabora ororodia” rua padadia amo e heau lasi, bae tuari totona. Unu kariota e veridia hosidia edia kala na idauidau. Unu amo unu hosi ai e gui taudia edia idau baita diba. Sekaria na e henanadai: “Ini be dahaka?” (Sek. 6:4) Ita danu ta uramu una baita diba, badina ita edai una matahanai na mai anina bada.

7, 8. (a) Ororo ruaosi ese dahaka e laulaulaidia? (b) Dahaka dainai unu ororo na kopa amo e karadia?

⁷ Baibul ai, nega momo ororo ese basileia (kingdom) o gavamani e laulaulaidia. Sekaria ese e ita ororodia na Daniel ese e perovetalai ororodia rua heḡereḡeredia. Una ororo ginigunana be Iehova ese ḡau iboudiai e lohiadia hanaihanaimu karana e laulaulaia. Ororo iharuana be Iesu ese e lohiaiamu Mesia Basileiana e laulaulaia. (Dan. 2:35, 45) Iesu na laḡani 1914 ai e lohia matama negana amo,  unu ororo ruaosi ese Dirava ena ura, tanobada ai, vada e haḡuḡurua.

⁸ Dahaka dainai unu ororo na auri-laboralabora o kopa amo e karadia? Kopa bona golo na auri, bona davadia na babada heherea. Iehova ese Israel taudia e haḡanidia kalaga helaḡana​—⁠bona gabeai Ierusalem dubuna​—⁠bae haginia neganai, namona na unu kopa bae ḡaukaralai. (Eso. 27:1-3; 1 Han. 7:13-16) Una dainai, unu kopa amo e karadia ororo ruaosi amo ta dibamu, Iehova ena lohia siahuna bona Mesia Basileiana na hereadae, idia ese taunimanima bae durudia bona bae hanamodia.

9. Kariota ai e gui taudia be daidia, bona edia ḡaukara be dahaka?

⁹ Mani kariota ma aita lalodia. Unu kariota bona e gui taudia ese dahaka e laulaulaidia? Kariota ai e gui taudia na aneru, reana idia na aneru oreadia. (Sekaria 6:5-8 ba duahi.) Idia na “tanobada idoinai Lohiana” ese e henidia ḡaukarana ihaḡuḡuruna totona ela. Edia ḡaukara be dahaka? Unu kariota bona e gui taudia na gabu ta ta e siaidia lao. Edia maduna na Iehova ena taunimanima bae gimadia, “mirigini tanona” o Babulono amo. Iehova ese e hahedinaraia iena taunimanima na Babulono ese ma basie ḡuidia lou. Una ese Sekaria ena nega ai, dubu helaḡa ihaginina taudia e hagoadadia! Idia na inaidia ese basie koudia diba dainai basie lalohekwarahi.

10. Sekaria ese e ita kariotadia bona e gui taudia edia amo dahaka ta dibamu?

¹⁰ Sekaria ena nega heḡereḡerena, Iehova na doini ena aneru e ḡaukaralaidiamu iena taunimanima baine gimadia bona baine hagoadadia totona. (Mal. 3:6; Heb. 1:7, 14) Laḡani 1919 ai, laulau dalanai lauma Israel na Babulono Badana ena iḡui amo e heruha negana amo, tomadiho momokanina na dounu e tubumu, ena be daḡedaḡe e davarimu. (Apok. 18:4) Aneru ese e gimadamu dainai, basita gari badina Iehova ena orea na tomadiho koikoi ese basine ḡuia lou dibamu. (Sal. 34:7) To, namona na baita diba momokani tanobada heḡeḡemadai Dirava ena hesiai taudia na be hutuma be laomu. Sekaria ena matahanai baita laloa dobumu neganai, baita dibamu ita na unu ororo ruaosi metaidiai dainai ta noho namonamomu.

11. Dahaka dainai Dirava ena taunimanima bae tuari henidia negana basita garilaia na namo?

¹¹ Kahirakahira Satana ena politikol oreadia na be heboumu bena Dirava ena taunimanima be tuari henidiamu. (Ese. 38:2, 10-12; Dan. 11:40, 44, 45; Apok. 19:19) Esekiel ena peroveta herevana ai e hahedinaraia, unu orea ese tano bae ḡovaia ahu, dagadaga na heto, bona hosi amo baema Dirava ena taunimanima bae tuari henidia totona. (Ese. 38:15, 16) * Baita gari henidia be namo, a? Lasi! Badina Dirava ena aneru oreadia ese be durudamu. Una hisihisi badana negana lalonai, Iehova ena aneru oreadia na be hegogomu Dirava ena taunimanima bae gimadia bona Iena lohia siahuna e dadaraiamu taudia bae haoredia totona. (2 Tes. 1:7, 8) Una na dina idau hereana! To, daika ese Iehova ena guba tuari oreana be gunalaiamu?

12, 13. (a) Sekaria be dahaka e kara? (b) Edena dala ai ta dibamu Rigi ese Iesu Keriso e laulaulaia?

¹² Sekaria sibona ese matahanai iboudiai 8 e itadia. Gabeai e karaia karana ta ese Dirava ena dubu helaḡa e haginia louva taudia e hagoadadia. (Sekaria 6:9-12 ba duahi.) Dirava ese Sekaria e hamaoroa Heledai, Tobia bona Iedaia​—⁠Babulono amo ema taudia tatoi​—⁠ediai silver bona gold baine abi, bona kwara “havava ḡauna ta” baine karaia. (Sek. 6:11) Sekaria ese havava ḡauna be Gavana Serubabele​—⁠Iuda iduhuna bona David ena bese tauna ta​—⁠kwarana ai baine atoa, a? Lasi. Una havava ḡauna na Hahelaḡa Tauna Badana Iosua kwarana ai e atoa neganai, reana e itaia taudia na e hoa.

¹³ Hahelaḡa Tauna Badana Iosua kwarana ai havava ḡauna e atoa dainai, ia be pavapava ai ela, a? Lasi. Iosua na dia David ena bese tauna ta dainai pavapava ai na sela. To, kwarana e havavalaia karana ese vaira negai pavapava bona hahelaḡa ḡaukara baine karaia tauna e laulaulaia. Pavapava ai bainela hahelaḡa tauna badana ladana na e gwauraia Rigi. Baibul ese e hahedinaraiamu una Rigi na Iesu Keriso.​—⁠Isa. 11:1; Mat. 2:23.

14. Iesu na Pavapava bona Hahelaḡa Tauna Badana dainai dahaka be karamu?

¹⁴ Iesu na Pavapava bona Hahelaḡa Tauna Badana dainai, ia ese Iehova ena guba tuari oreana be gunalaiamu. Bona ia na e ḡaukara goadamu, unu amo Dirava ena taunimanima na bae noho namonamo ina tanobada oromana dikana ai. (Ier. 23:5, 6) Vaira neganai, Keriso ese bese iboudiai baine hadareredia, unu amo Dirava ena lohia siahuna baine abia isi bona Iehova ena taunimanima baine durudia. (Apok. 17:12-14; 19:11, 14, 15) To, una dina do se kau neganai, Rigi o Iesu na ḡaukara badana ta do baine haḡuḡurua.

15, 16. (a) Hari ina negai edena ḡaukara e hekaramu, bona daidia ese e karaia? (b) Keriso ena Laḡani 1,000 Lohia negana dokonai dahaka be varamu?

¹⁵ Iesu na Pavapava bona Hahelaḡa ḡaukara mo basine karamu, to ia ese “Iehova ena dubu baine haginia” danu. (Sekaria 6:13 ba duahia.) Laḡani 1919 ai, Iesu ese tomadiho momokani taudia na Babulono Badana ena iḡui amo e ruhadia, bona Kristen kongrigeisen e haginia lou. Danu, “hesiai tauna mai ena kamonai bona mai ena kara maoromaoro” e abia hidi tanobada ai tomadiho ḡoevana bae gunalaia. (Mat. 24:45) Danu, Iesu ese Dirava ena taunimanima ihaḡoevadia ḡaukarana e karaia bona e durudia tomadiho ḡoevana bae badinaia totona.​—⁠Mal. 3:1-3.

¹⁶ Iesu ena Laḡani 1,000 Lohia negana lalonai, ia bona ia ida pavapava bona hahelaḡa ḡaukara be karamu taudia 144,000 ese kamonai taudia bae durudia bae ḡoevadae totona. Una ḡaukara bae haḡuḡurua neganai, Dirava e tomadiho henia momokanimu taudia sibodia mo ina tanobada ḡoevana ai bae noho. Una murinai, tomadiho momokanina mo baine gini hanaihanai!

17. Iehova ese Iuda taudia be dahaka hahegoada herevana e henidia, bona idia be dahaka e kara?

¹⁷ To, edena dala ai Sekaria ena hereva ese Iuda taudia e durudia? Iehova na e gwauhamata baine durudia bona baine gimadia dubu helaḡa ihaginina ḡaukarana bae haḡuḡurua totona. Una ese idia na e hagoadadia. To taudia na dia momo dainai una ḡaukara be ede bae haḡuḡurua toma? Sekaria ese e gwauraia herevana dainai, idia na asie gari bona asie daradara. Abidadama taudia heḡereḡere Heledai, Tobia bona Iedaia mo asie heduru, to Dirava na e gwa momo na “baema, Iehova ena dubu ihaginina ai bae heduru.” (Sekaria 6:15 ba duahia.) Iuda taudia na e diba Dirava ese  be durudiamu dainai, maoromaoro dubu ihaginina ḡaukarana e hamatamaia lou, ena be inaidia ese una ḡaukara na e taravatua. Gabeai, Iehova ese una taravatu​—⁠ororo bamona idia e koudiamu ḡauna​—⁠na e kokia, bona laḡani 515 B.C.E. ai dubu ihaginina ḡaukarana e haḡuḡurua. (Esr. 6:22; Sek. 4:6, 7) To, Iehova ena hereva ese danu hari ina negai e varamu ḡau badadia e hahedinarai.

18. Edena dala ai Sekaria 6:15 na hari ina negai e ḡuḡurumu?

¹⁸ Hari ina negai, taunimanima milioni momo na tomadiho momokani ai e vareaimu, bona mai kudoudia idoinai ida edia nega, goada, moni bona kohu amo tomadiho ḡoevana e duruamu. (Her. 3:9) Ede ta diba tomamu Iehova ese eda heduru karana na e laloa badamu? Ba helalotao Heledai, Tobia bona Iedaia ese edia gold bona silver na Sekaria e henia kwara havava ḡauna baine karaia totona. Una havava ḡauna amo tomadiho momokani iduruna totona e heni ḡaudia bae lalotao. (Sek. 6:14) Una heḡereḡerena, Iehova ese ia dainai ta karaiamu ḡaukarana bona ta hahedinaraiamu lalokauna na basine lalodia boio. (Heb. 6:10) Ia ese baine lalodia tao hanaihanai.

19. Hari ina negai Sekaria ena matahanai ese edena dalai baine duruda?

¹⁹ Ini dina gabedia ai, tomadiho momokani iduruna ḡaukaradia e ḡuḡurumu karana ese e hahedinaraiamu, Iehova ese ena taunimanima na e hanamodiamu bona Keriso ese e gunalaidiamu. Ita na ḡau ta ese basine hadikaia bona baine mia hanaihanai oreana lalonai ta nohomu dainai ta moalemu. Iehova ena ura tomadiho ḡoevana enai na baine vara momokani. Iehova ena taunimanima ibamodia karana ba laloa bada, bona “Iehova, emui Dirava, gadona ba badinaia namonamo.” Bena eda Pavapava bona Hahelaḡa Tauna Badana bona guba anerudia ese bae gimamu diba. Namona na ba ḡaukara goada tomadiho momokanina ba durua. Unu bo kara tomamu neganai, Iehova Sabaota ese ina nega oromana lalonai baine gimamu ela bona hanaihanai!