1, 2. Mose e mase murinai Iosua enai be dahaka e vara?

IEHOVA ese Iosua e hamaoroa, eto: “Egu hesiai tauna Mose vada e mase; taunabunai, a tore isi, ina Ioridane sinavaina ba hanaia, . . . hari Israel taudia na henidiamu tanona ai ba raka vareai.” (Ios. 1:1, 2) Iosua enai una na senisi badana ta, ia na kahirakahira laḡani 40 lalodiai Mose e hesiai henia!

² Mose ese Israel taudia na laḡani daudau e gunalaidia dainai, Iosua na reana e lalova Dirava ena taunimanima ese iena hegunalai karana be ede be laloa tomamu. (Deu. 34:8, 10-12) Baibul e herevalaia bukana ta ese Iosua 1:1, 2 na ini e herevalaia toma: “Idaunegai bona hari ina negai, tano ta ai hegunalai taudia e idaumu neganai, gari bona daradara e varamu.”

3, 4. Ede ta diba tomamu Iosua na Dirava e abidadama henia momokani, bona edena henanadai baita laloa?

³ Iosua e gari na mai badina, to dina haida lalodiai, ia na haraḡa herea kara ta e karaia. (Ios. 1:9-11) Ia na Dirava e abidadama henia momokani. Baibul ese e hahedinaraia, Iehova ese aneru  ta amo Iosua bona Iena taunimanima e hakaudiava. Baita gwau dibamu una aneru na Hereva, Dirava Natuna roboana.​—⁠Eso. 23:20-23; Ioa. 1:1.

⁴ Iehova ena heduru dainai, Israel taudia ese Iosua, Mose gabuna e abia tauna, e badinaia. Hari ina negai danu, ḡau momo na e idaumu, bona reana baita lalomu, ‘Dirava ena orea e heau haraḡamu dainai, Ihakauda Tauna Iesu baita badinaia badidia haida be dahaka?’ (Mataio 23:10 ba duahia.) Mani Iehova ese guna ena taunimanima e hakaudiava daladia haida aita lalo.

5. Iosua na Ieriko e raka henia kahi neganai dahaka e vara? (Rau 22 ai laulau ba itaia.)

⁵ Israel taudia na Ioridane amo e raka hanai murinai, Iosua enai ḡau ta e vara. Ieriko e raka henia kahi neganai, tau ta mai ena dare ida e hedavari henia. Iosua na asi dibana una tau be daika, to e nanadaia: “Oi na ai ida, eiava inaimai?” Una tau ese ena dagi e herevalaia neganai, Iosua na e hoa. Una tau eto, ia na “Iehova ena tuari oreana lohiana,” vada e heḡaeḡae Dirava ena taunimanima baine durudia. (Iosua 5:13-15 ba duahi.) Ena be siri haida ai e hahedinaraia, Iehova ese Iosua e hereva henia, to ena aneru amo Iosua e hereva henia, guna e karava heḡereḡerena.​—Eso. 3:2-4; Ios. 4:1, 15; 5:2, 9; Kara 7:38; Gal. 3:19.

6-8. (a) Dahaka dainai taunimanima edia lalohadai ai Iehova ena hahediba herevadia haida na asi anidia? (b) Dahaka dainai Iehova ena hahediba herevadia na mamaoro bona nega korikori ai e heni? (Futnout ba itaia.)

⁶ Ieriko hanuana bae hadikaia herevana na aneru Igunalaidia tauna ese Iosua e hamaorolaia. Matamanai, una hereva bae abia dae na auka. Heḡereḡere, Iehova ese Iosua e haḡania tatau iboudiai baine peritomedia, una anina na idia na dina haida lalodiai do basie tuari. Una be nega maorona unu tatau bae peritomedia, eiava?​—Gen. 34:24, 25; Ios. 5:2, 8.

⁷ Unu Israel tuari taudia na reana e lalova edia ruma bese be ede bae gimadia toma bema inaidia na edia kamepa ai bae vareai. To haraḡa herea, sivarai e kamonai Ieriko na “e hekou ahu, Israel taudia daidiai.” (Ios. 6:1) Una ese edia abidadama Dirava ena hahekau dalana ai na e hagoadaia.

⁸ Danu, Israel taudia na e haḡanidia Ieriko basie tuari henia, to dina 6 lalodiai nega tamona hanua bae rakaia heḡeḡe, bona dina namba 7 ai nega 7 unu bae kara toma. Tuari taudia haida na e lalova, ‘Eda nega bona goada baita haorea kavamu!’ To Israel Igunalaidia Tauna, Iehova, na mai dibana ia be dahaka e karava. Israel taudia na una hahediba herevadia e badina neganai edia abidadama e hagoadaia, bona Ieriko taudia ida se tuari.​—⁠Ios. 6:2-5; Heb. 11:30. *

9. Dahaka dainai Dirava ena orea amo ta abimu hahediba herevadia baita badina? Haheitalai ta ba gwauraia.

⁹ Una sivarai amo dahaka ta dibamu? Orea ese dala matamatadia haida e herevalaimu neganai, reana nega haida asita lalopararalai namonamomu. Heḡereḡere reana matamanai ta lalova, siboda eda stadi negadiai, eiava haroro bona hebou ai eda mobael eiava tablet baita ḡaukaralaidia na  dia lalohadai maorona. Hari unu ḡau iḡaukaralaidia edia namo ta lalopararalaimu. Matamanai ta daradaralaiva ḡaudia edia namo ta itamu neganai, eda abidadama e hagoadaiamu bona tadikaka taihu ida lalotamona ai ta nohomu.

10. Ierusalem ai gavanin bodi ese e karaia hebouna be daika ena hahekau henunai?

¹⁰ Korenelio na Kristen tauna ai ela bena laḡani 13 murinai, Iuda Kristen taudia haida na dounu peritome taravatuna e badinaiava. (Kara 15:1, 2) Antioka ai una e hepapahuahulaia neganai, tadikaka ese Paulo e siaia bainela Ierusalem ai gavanin bodi ediai una baine henanadailaia. To daika ena hahekau henunai Paulo e siaia? Paulo eto: “Lalogu ai e hedinarai herevana dainai nala.” Baita gwaumu, Keriso ena hahekau henunai Paulo e siaia unu amo gavanin bodi ese una hekwakwanai bae hamaoromaoroa.​—⁠Gal. 2:1-3.

11. (a) Peritome herevana dainai Iuda taudia bogaraḡidiai dahaka e vara? (b) Edena dala ai Paulo na e manau bona Ierusalem ai elda taudia e badinadia? (Futnout danu ba itaia.)

¹¹ Keriso ena hahekau henunai, gavanin bodi ese e hahedinaraia ḡoevaḡoeva idau bese Kristen taudia bae peritomedia na asi anina. (Kara 15:19, 20) To laḡani haida muridiai, Iuda taudia momo ese natudia na dounu e peritomediava. Ierusalem ai elda taudia na e kamonai haida ese Paulo na e maumauraiava, e gwauva ia na Mose ena Taravatu se badinaiava, una dainai idia ese Paulo na hahediba herevadia ma haida e henia. * (Kara 21:20-26) Idia ese e hamaoroa tatau hani ida dubu helaḡa baela, unu amo taunimanima na bae lalo Paulo na ‘taravatu e badinaiava.’ Paulo ese edia hereva na basinema abia dae, badina bema toma una na Iuda Kristen taudia edia kerere, idia ese peritome herevana na asie lalopararalaia namonamova. To, Paulo na mai manauna ida elda taudia edia hereva  e badinaia, badina e diba una ese Kristen taudia bogaraḡidiai lalotamona karana baine havaraia. To, reana baita lalomu, ‘Dahaka dainai Iesu ese una hekwakwanai na se hamaoromaoroa haraḡa, ena be ena mase ese Mose ena Taravatu vada e hadokoa?’​—⁠Kol. 2:13, 14.

12. Dahaka dainai Keriso ese nega e heni peritome dainai e vara hepapahuahuna bae hamaoromaoroa?

¹² Haida ese diba matamatadia na asie abi dae haraḡamu. Iuda Kristen taudia na nega e henidia edia lalohadai bae haidaua totona. (Ioa. 16:12) Idia haida na dounu e laloava peritome karana na Dirava ihetura henina toana ta. (Gen. 17:9-12) A haida be asie urava edia lalohadai bae haidau, Iuda taudia ese bae daḡedaḡe henidia garina. (Gal. 6:12) To gabeai, Keriso ese Paulo ena revareva amo hahekau herevadia ma haida e heni.​—Roma 2:28, 29; Gal. 3:23-25.

13. Dahaka ese baine duruda diba Keriso ena hahekau dalana baita badinaia?

¹³ Orea ese e karamu senisidia haida asita lalopararalai namonamomu neganai, namona na guna Keriso ese Dirava ena taunimanima e hakaudiava dalana baita laloa. Iosua bona Kristen ginigunadia edia negai, Keriso na hanaihanai hahekau herevadia e heniva, unu amo Dirava ena taunimanima baine gimadia, edia abidadama baine hagoada, bona lalotamona ai bae noho.​—⁠Heb. 13:8.

14-16. ‘Hesiai tauna mai ena kamonai bona kara maoromaoro’ ese e henimu hahekau herevadia amo dahaka ta dibamu?

¹⁴ Iesu ese “hesiai tauna mai ena kamonai bona mai ena kara maoromaoro” amo nega korikori ai e henimu hahekau herevadia ese e hahedinaraiamu, ita na e laloda badamu. (Mat. 24:45) Marc, natuna na 4, e gwaumu: “Satana na e uramu kongrigeisen baine hamanokaia dainai ruma bese e tohodiamu. Orea ese ruma bese e hagoadadiamu wiki ta ta ai ruma bese ena tomadiho bae karaia, una ese ruma bese kwaradia e hadibadiamu edia ruma bese bae gimadia na ḡau badana!”

¹⁵ Keriso ena hahekau dalana ta lalopararalaiamu neganai, ta dibamu ia na e uramu lauma dalanai baita goada. Elda tauna ta ladana, Patrick, na e gwaumu: “Matamanai, haida na asie urava wiken ai haroro grup maraḡidia ai bae hebou. To una ese Iesu ena kara ta e hahedinaraia, ia na manoka taudia e lalodia badamu. E hemaraiva eiava asie haroro momova tadikakadia bona taihudia ese haroro grup maraḡidia na e moalelai bona lauma dalanai e goadamu.”

¹⁶ Danu, Keriso ese e durudamu eda haroro ḡaukara baita laloa bada, hari una na tanobada ai e karaiamu ḡaukarana badana. (Mareko 13:10 ba duahia.) André, elda matamatana ta, na hanaihanai Dirava ena orea ese e haidaumu daladia e badinamu. Ia na e gwaumu: “Brens ofesi ese betele ai e ḡaukaramu taudia edia namba e hamaraḡia karana ese e hadibadamu, nega na kwadoḡi bona haroro ḡaukara ai eda goada baita ḡaukaralaia na namo.”

17, 18. Dahaka dainai orea ese e haidau ḡaudia edia namo baita lalodia bada?

¹⁷ Eda Pavapava, Iesu Keriso, amo ta abimu hahekau herevadia ese hari ina negai bona vaira negana ai bae duruda diba. Una dainai, namona na vanegai orea ese e haidau ḡaudia baita abi dae bona baita moalelai. Emu ruma bese ena tomadiho negana ai, wiki ta ta heboudia bona haroro ḡaukara ai e haidau ḡaudia bona e durumu daladia ba herevalai.

 ¹⁸ Iehova ena orea amo ta abimu hahediba herevadia badidia bona edia namo baita lalopararalaimu neganai, haraḡa herea baita badinadiamu. Ta moalemu badina e printimu pablikeisen edia namba e hamaraḡi bona teknoloji matamatadia ta ḡaukaralaimu amo moni asita nege kavamu bona tanobada heḡeḡemadai Basileia ḡaukarana e bada e laomu. Una dainai, bema mai dalana kompiuta ai e ato pablikeisen bona vidio idauidau baita ḡaukaralai. Unu amo Keriso ena hahekau dalana baita matauraia bona orea ese e henimu ḡaudia baita ḡaukaralai namonamo.

19. Dahaka dainai Keriso ena hahekau dalana baita badinaia?

¹⁹ Keriso ena hahekau dalana baita badinaiamu neganai, ma haida edia abidadama baita hagoadaiamu bona lalotamona ai baita nohomu. André ese tanobada heḡeḡemadai betele taudia edia namba e hamaraḡia karana e laloa lou neganai, eto: “Guna Betele ai e ḡaukarava taudia ese una senisi e abia dae karana ese egu abidadama e hagoadaia bona egu hemataurai idia ediai e habadaia. Idia na Iehova ena kariota ida e heau heboumu dainai, e abi asainmen idauidau na e moalelaimu.”

20, 21. (a) Dahaka dainai Ihakauda Tauna, Keriso, baita abidadama henia? (b) Stadi gabena ese edena henanadai be haerelaiamu?

²⁰ Ihakauda Tauna, Iesu Keriso, na kahirakahira “hahegari karadia” baine kara bona “baine kwalimu.” (Sal. 45:4; Apok. 6:2) To una do se vara lalonai, ia ese ita e haheḡaeḡaedamu, nega matamatana ai toreisi lou taudia baita hadibadia bona tanobada ihanamona ḡaukaradia ai baita ḡaukara hebou.

²¹ Dirava ese e horoa Pavapavana ese tanobada matamatana ai baine hakauda vareai, to namona na mai laloda idoinai ida baita abidadama henia, herevana eda noho daladia bae idau. (Salamo 46:1-3 ba duahi.) Nega haida eda mauri ai ḡau haida e idaumu neganai, reana una baita abia dae na auka. To, edena dala ai lalomaino baita abia bona Iehova baita abidadama henia momokani? Stadi gabena ese una be haerelaiamu.