STEFANO na daḡedaḡe tataudia haida vairadiai e gini. Idia na Sanhedrin taudia, Israel ena kota badana lalonai. Unu tatau 71 edia siahu na bada bona hahemaoro e karava. Idia na Hahelaḡa Tauna Badana Kaiafa ese e haboudia; hua haida gunadiai kota ese Iesu bae hamasea herevana e gwauraia neganai, Kaiafa ese una kota e gunalaia. (Mat. 26:57, 59; Kara 6:8-12) Hahebade koikoi taudia ta ta e vareailaidiava lalonai, Stefano enai ḡau idauna ta e itaia​—ia vairana na “aneru ta vairana na heto.”​—Kara 6:13-15.

To, unu e vara ḡaudia lalodiai dahaka dainai Stefano na se gari? Sanhedrin taudia vairadiai do se gini neganai, Stefano na Dirava ena lauma ena heduru amo ena hesiai ḡaukara e goadalaiava. (Kara 6:3-7) Una kota lalonai, lauma helaḡa ese e hagoadaia bona e hahelaloatao. (Ioa. 14:16) Kara karoa 7 ai, Stefano na asi garina ida e herevava lalonai, lauma helaḡa ena heduru amo Heberu Revarevadia ai e hetore sivaraidia 20 mai kahana e lalodia tao. (Ioa. 14:26) Stefano ena abidadama e hagoadaia ḡauna ma ta na, matahanai ta amo Iesu e itaia Dirava idibana kahana ai gini.​—Kara 7:54-56, 59, 60.

Reana ita danu nega ta daḡedaḡe baita davarimu. (Ioa. 15:20) Bema hanaihanai Dirava ena Hereva baita stadilaiamu bona haroro ḡaukara baita goadalaiamu, Iehova ena lauma helaḡa ena heduru baita mamiamu. Danu, daḡedaḡe karadia baita haheaukalaimu bona lalomaino baita abiamu.​—1 Pet. 4:12-14.