Una gwauhamata ese orea matamatana ta ladana League of Nations danu e haginia. Una orea e haginia badina na “tanobada ibounai lalonai ḡaukara hebou karana bona maino bona noho namona baine havaraia.” Kristendom tomadiho momo ese una orea na e durua. America ai, The Federal Council of the Churches of Christ ese League of Nations e hanamoa neganai, e gwa “ia na tanobada ai Dirava ena Basileia ese e ḡaukaralaiamu politikol oreana.” Una orea ese League of Nations e durua dalana na haida e siaidia Paris Peace Conference ela. Una hebou ela tauna ta na eto, una hebou ese “tanobada ena histri lalonai nega matamatana ta e hamatamaia.”

Una e gwauraia ḡauna na de hematamava, to una hebou ela taudia ese asie hamatamaia. To, laḡani 1919 ai Iehova ese ena taunimanima e hagoadadia haroro ḡaukara bae goadalaia neganai, una nega matamatana vada e hematama. To una do se vara neganai, Baibul Stiuden ediai ḡau badadia haida e vara.

Saturday, January 4, 1919 na e abia hidi Watch Tower Bible and Tract Society bae gunalaia taudia bae abidia hidi. Una nega ai, Iehova ena orea e gunalaiava taudia, Joseph F. Rutherford bona ma tadikaka seven na Atlanta, Georgia, U.S.A. ai e hadiburadia. To henanadai na ina, unu e hadiburadia tadikakadia be bae abidia hidi lou, eiava? O idia gabudiai ma haida bae abidia hidi?

Dibura ruma ai Tadikaka Rutherford na orea ede baine heau toma nega vairai na e lalo-hekwarahilaia. Ia na e diba tadikaka haida na e urava hegunalai tauna matamatana ta bae abia hidi. Una dainai, revareva ta na hebou taudia e tore henidia e ura Evander J. Coward na hegunalai tauna matamatana ai bainela. Tadikaka Rutherford ese Tadikaka Coward na e gwauraia, “manau,” “aonega,” bona “Lohiabada e badinaiamu tauna.” To, tadikaka momo na e ura una abi hidi na hua siks murinai bae karaia. E hadiburadia tadikakadia daidiai kota e karava tadikakadia ese edia ura na e abia  dae. To, una hebou lalonai tadikaka haida na se moale.

Bena tadikaka ta ese una na e hamaoromaoroa. Bona tadikaka ma ta na e gwa: “Lau na dia loea ta to taravatu baina badinaia anina na mai dibagu. Dirava na e uramu ia baita badinaia. Una baita karaia dalana namona na Tadikaka Rutherford na baita abia hidi lou eda hegunalai tauna ai bainela.”​—Sal. 18:25.

Tadikaka Rutherford ida e hadiburadia tauna ta, A. H. Macmillan na e gwa, una dina murinai Tadikaka Rutherford na ema egu cell ai e kokokoko bona e gwa: “Imamu na a duduia lasi.” Bena, Tadikaka Rutherford ese revareva maraḡina ta e henia. Tadikaka Macmillan ese una revareva kwadoḡina e itaia neganai maoromaoro e laloparara. Una revareva na ini e torea toma: “RUTHERFORD WISE VAN BARBER ANDERSON BULLY AND SPILL DIRECTOR FIRST THREE OFFICERS LOVE TO ALL.” Una anina na dairekta gunadia na e abidia hidi lou, bona Joseph Rutherford, Charles Wise, bona William Van Amburgh edia ḡaukara na se haidaudia. Una dainai, Tadikaka Rutherford na dounu presiden.

Unu tadikaka eit na dibura ai lalonai, mai edia abidadama Baibul Stiuden taudia na unu tadikaka bae ruhadia totona noinoi herevana ta e halasia. Taunimanima 700,000 mai kahana ese una noinoi herevana e sainia. Laḡani 1919 Wednesday, March 26 ai, una noinoi herevana do se siaia lalonai, Tadikaka Rutherford bona bamona na e ruhadia.

Tadikaka Rutherford na e welkam henia taudia e hereva henidia neganai e gwa: “Lau na na dibamu emai ai eme vara ḡauna ese nega aukadia totona ai e haheḡaeḡaemaimu. . . . Umui o hekwarahi na dia ai dibura amo ba ruhamai. Una na dia emui hekwarahi badina korikorina. . . . To umui o hekwarahimu badina na Hereva Momokani ba harorolaia, bona unu e kara toma taudia na hahenamo namona ta e abia.”

Tadikaka e hadiburadia neganai e vara ḡaudia ese e hahedinaraia idia na Iehova ese e hakaudiava. Laḡani 1919 May 14 ai, apil kotana na e gwa: “Ina kota ai e hadiburadia taudia na hahemaoro kererena e abia, una dainai hahemaoro bae karaia maoromaoro na namo.” Kota gunadia na e gwa tadikaka na kerere badadia e kara bona edia rekodi amo basie koki ela bona edia dika bae hegwautao eiava dibura ai edia noho negana bae hakwadoḡia. To, idia latadiai hahemaoro herevadia haida ma se gwaurai. Una dainai, Judge Rutherford ese gavamani ena taravatu heḡereḡerena ena ḡaukara na se haboioa bona United States ena Supreme Court ai Iehova ena taunimanima daidiai kota e kara, una na gabeai e karaia loulou ḡaukarana ta.

Tadikaka Macmillan na e gwa: “Ai na dia baia helai kava bena Lohiabada ese guba baine laohaimai negana baia naria. Ai na a laloparara ḡau ta baia karaia bena Lohiabada ena ura korikori baia diba.”

Hedkwota ai tadikaka na dia laḡani momo gunadiai e karaiava ḡaukarana mo bae karaia lou. Dahaka dainai? Badina idia do dibura ai lalonai, Betele ai e ḡaukaralaiva printi ḡaudia na e hadikadia. Una ese lalomanoka e havaraia bona tadikaka haida na e daradarava haroro ḡaukarana be vada e doko eiava.

Haida be dounu e urava Baibul Stiuden ese e harorolaiava Basileia sivaraina bae kamonaia, eiava? Una henanadai ihaerelaina totona, Tadikaka Rutherford na tok ta e heni. Taunimanima iboudiai e vavedia. Tadikaka Macmillan na e gwa: “Bema ta basinema mai una hebou, baiama diba haroro ḡaukara na de ore.”

Laḡani 1919 Sunday, May 4 ai Tadikaka Rutherford ena be e gorerea to ia ese Los Angeles, California ai tok ladana “The Hope for Distressed Humanity” e heni. Taunimanima 3,500 ese una tok e kamonaia, to ma handred momo na helai gabudia lasi dainai asie vareai. Murina dinanai taunimanima 1,500 ma ela. Tadikaka na e laloparara taunimanima na e urava sivarai namona bae kamonaia.

Una murinai tadikaka ese e karaia ḡauna na Iehova ena Witnes taudia ese edia haroro ḡaukara ai e karaia ema bona hari.

The Watch Tower August 1, 1919 ḡauna na e gwa, September matamanai Cedar Point, Ohio ai hebouhebou ta baine heabi. Missouri amo ema tadikaka eregabena ta, Clarence B. Beaty na e gwa: “Taunimanima iboudiai na e lalo una hebouhebou baela na namo.” Tadikaka taihu 6,000 mai kahana  na una hebouhebou ela, bona una na tadikaka ese e laloa nambana e hereaia. Bona moale ḡauna ma ta na, Lake Erie ai taunimanima 200 mai kahana e bapatiso.

Laḡani 1919 September 5, hebouhebou dinana namba faiv ai, Tadikaka Rutherford ena tok “Address to Co-laborers,” e heni lalonai magasin matamatana ladana The Golden Age * e halasia. Bona e gwa “una magasin lalonai hari ina negai e varamu ḡaudia bona Baibul ese unu e varamu badidia e hahedinaraimu.”

Baibul Stiuden iboudiai e hagoadadia una pablikeisin matamatana na haroro ḡaukara ai bae ḡaukaralaia. Haroro ḡaukara baine heau dalana e herevalaia revarevana na ini e gwau toma: “Bapatiso taudia ta ta na bae helalotao hesiai ḡaukara na hahenamo ta, bona hari dala bae tahu ina tanobada heḡeḡemadai haroro ḡaukarana bae durua.” Taunimanima momo ese unai hereva na e abia dae! December ai, haroro goadagoada pablisa ese una magasin matamatana e ura bae duahi taudia daidiai subscription 50,000 mai kahana e abi.

Laḡani 1919 dokonai, Iehova ena taunimanima na e haheḡaeḡaedia bona e hagoadadia. Bona, dina gabedia e perovetalai herevadia haida na e ḡuḡuru. Malaki 3:1-4 ai, Iehova ena taunimanima e tohodia bona e haḡoevadia peroveta herevana na e ḡuḡuru, bona Iehova ena taunimanima na laulau dalanai “Babulono Badana” amo e ruhadia bona Iesu ese “hesiai tauna mai ena kamonai bona mai ena kara maoromaoro” * e abia hidi. (Mal. 3:1-4; Apok. 18:2, 4; Mat. 24:45) Baibul Stiuden na vada e heḡaeḡae Iehova ese e henidia ḡaukarana bae karaia.