WEATHER e stadilaiamu tauna ta na radar ai baine vara lai gubana e itaiamu. Bona una lai gubana dikana na taunimanima momo e nohomu gabuna e lao henia haraḡamu. Weather e stadilaiamu tauna ese hahediba herevana be gwauraia gunamu, unu amo lai gubana ese taunimanima edia mauri basine hadika.

Una heḡereḡerena, hari Iehova na tanobada ai e nohomu taudia e hadibadia gunamu “lai gubana” dikana ta be kaumu. Ia be edena dalai unu e kara tomamu? Dahaka dainai ta dibamu Iehova ese taunimanima na nega e henidiamu una hahediba herevana bae badinaia? Haeredia baita diba totona, Iehova ese guna haida ediai hahediba herevadia e heni karana mani aita laloa.

Baibul negadiai, Iehova na iena haheḡani herevadia e utuva taudia ediai ‘lai gubadia’ idauidau o hahemaoro karadia idauidau e gwaurai. (Her. 10:25; Ier. 30:23) Iehova ese unu hahemaoro karadia do se kara neganai, e hadibadia gunava unu amo iena hereva bae badina. (2 Han. 17:12-15; Neh. 9:29, 30) Iehova ese idia idurudia totona, nega momo ena abidadama hesiai taudia e ḡaukaralaidiava iena hahemaoro herevadia bae gwaurai bona taunimanima na edia mauri bae haidaua haraḡa.​—Amo. 3:7.

Noa na Dirava ese e ḡaukaralaia iena hahemaoro karadia e gwaurai hedinarai abidadama tauna ta. Laḡani momo lalodiai ia na se gariva bona tanobada ai Abata baine kau hahediba herevana na kara dika bona daḡedaḡe taudia e hadibalaidiava. (Gen. 6:9-13, 17) Una Abata amo bae roho mauri totona, bae kara karadia na Noa ese e hadibadia bona gabeai Noa na e gwauraia, “kara maoromaoro iharorolaina tauna.”​—2 Pet. 2:5.

Ena be Noa na e hekwarahiva, to taunimanima ese Dirava ena hereva na asie badinaia. Idia ese abidadama na se hahedinaraiava. Una dainai, “utu-utu badana e utua dae, bena iboudiai eha dono mamase.” (Mat. 24:39; Heb. 11:7) Una ese e hahedinaraiamu, idia na basie gwau dibamu Dirava ese idia na se hadibadia.

To, nega haida Iehova na ena hahemaoro do se karava neganai taunimanima na nega kwadoḡina lalonai e hadibadiava. Bona e hadibadiava iena hahediba herevadia basie kamonai taudia na dika bada bae davari. Heḡereḡere, Aigupto taudia na Hisihisi Ten do asie abi neganai Iehova ese hahediba herevana na e henidia guna. Haheitalai ta na, Iehova ese Mose bona Arona e siaidia Farao bona ena hesiai taudia bae hadibadia hisihisi namba seven medu hetarina dika-hereana, be havaraiamu. Una hisihisi na dabai baine matama dainai, o laloamu Dirava ese una dina ai e hadibadia edia roho mauri gabudia bae tahu, eiava? Baibul na e gwa: “Bena Farao ena hesiai taudia hahidaosi, Iehova gadona garina e gariva, ese edia hesiai taudia bona edia seri e hakaudia vareai ruma ai; a Iehova ena hereva e dadaraia tauna ese ena hesiai taudia bona ena seri e rakatanidia taora ai.” (Eso. 9:18-21) Una ese e hahedinaraiamu, Iehova na nega badana ai ena hahediba herevadia e heni, unu amo e kamonai taudia na hisihisi asie davari.

Farao bona ena hesiai taudia na hisihisi namba ten do se vara ai hahediba herevadia na e abi. To, idia ese una na e dadaraia. Una dainai, memero roboadia iboudiai e mase. Una na dika herea! (Eso. 11:4-10; 12:29) Hahediba herevadia bema badina neganai bema mauri, a? Oibe! Mose ese Israel  taudia na e hadibadia hisihisi namba ten na be varamu, bona edia ruma bese bae hamauridia daladia danu e hadibadia. (Eso. 12:21-28) Taunimanima hida ese una hahediba herevana e kamonaia? Israel taudia 3 milion mai kahana bona “orea idau-idau taudia hutuma,” dia Israel taudia bona Aigupto taudia haida na Dirava ena hahemaoro amo e roho mauri bona Aigupto e rakatania.​—Eso. 12:38.

Unu e vara ḡaudia amo ta dibamu, Iehova na hanaihanai nega bada e henimu ena hahediba herevadia na taunimanima ese bae badina. (Deu. 32:4) Dirava ena ura be dahaka? Aposetolo Petero ese e hahedinaraia Iehova na “se uramu ta baine mase; e uramu iboumui ai ba helalo kerehai.” (2 Pet. 3:9) Momokani Dirava ese taunimanima na e lalodia badamu. Iena hahemaoro do se matama ai, ia na e uramu iboudiai bae helalo-kerehai bona edia mauri daladia bae haidau.​—⁠Isa. 48:17, 18; Roma 2:4.

Hari danu, tanobada heḡeḡemadai taunimanima iboudiai ese mai anina bada hahediba herevana ta bae badinaia na namo. Iesu tanobada ai e nohova neganai, e hahedinaraia tanobada ḡaudia iboudiai na “hisi bada-herea” lalonai bae ore. (Mat. 24:21) Una dainai, Iesu na peroveta herevana amo ia murinai e rakava taudia ediai bae vara ḡaudia bona bae ita ḡaudia e hadibadia guna. Bona hari iseda negai tanobada ai e varamu ḡaudia e herevalai.​—Mat. 24:3-12; Luka 21:10-13.

Una peroveta herevana heḡereḡerena, Iehova na e uramu taunimanima iboudiai Iena lohia siahuna bae matauraia. Iena ura badana na Dirava e badinaiamu taudia na hari bona vaira negai mauri namona na tanobada matamatana ai bae moalelaia. (2 Pet. 3:13) Iehova na e uramu taunimanima na iena gwauhamata iboudiai bae abidadama heni totona, Iesu ese e perovetalaia “Basileia sivaraina namona,” na “tanobada idoinai bae harorolaia, bese iboudiai ihadibalaidia.” (Mat. 24:14) Dirava ena sivarai na ia e tomadiho heniamu taudia ese tano 240 ai e gwauraia hedinaraimu. Iehova na e uramu taunimanima momo ese iena hahediba herevana bae badinaia bona e maimu “lai gubana” ena hahemaoro amo bae roho mauri.​—Sef. 1:14, 15; 2:2, 3.

To, mai anina bada henanadaina na ina, ena hahemaoro karadia do se vara ai, Iehova be hanaihanai hahediba herevadia e heni gunamu, eiava? E vara ḡaudia momo ese una na e hamomokaniamu. To, henanadai na ina, o laloamu nega mianai taunimanima ese Dirava ena hahediba herevadia be badinamu, eiava? Namona na Dirava ena sivarai ta loalaiamu tauda ese taunimanima momo baita durudia ina tanobada dikana dokona amo bae roho mauri helaoreana.