1-2. (a) Kahirakahira tanobada besedia ese edena hereva be gwauraiamu? (b) Ededia henanadai baita haerelaimu?

MANI a laloa, tanobada besedia na “maino” bona noho “namo” herevana bae gwauraia. Reana idia na mai hekokorokudia ida be gwaumu tanobada na maino gabuna. Bona idia na be uramu ita na baita laloa idia na heḡereḡere tanobada hekwakwanaidia iboudiai bae haore. To, idia na asi edia siahu gabeai baine vara ḡauna bae koua. Dahaka dainai? Badina Baibul ena peroveta herevana na ini e gwau tomamu: “Hebuatari ese baine lasidia tao . . . bena basie roho mauri diba.”​—1 Tes. 5:3.

² Ini mai anidia bada henanadai baita haerelaimu: Hisihisi bada hereana ai be dahaka be varamu? Una negai Iehova ena ura ita edai be dahaka? Bona hari edena dalai baita heḡaeḡae bena hisihisi bada hereana lalonai Iehova baita badinaia?​—Mat. 24:21.

3. Apokalupo 17:5, 15-18 heḡereḡerena, Dirava ese “Babulono badana” be ede baine haorea toma?

³ Apokalupo 17:5, 15-18 ba duahi. “Babulono badana” na be haoreamu! Atikol 40 ai ta herevalaia bamona, tanobada besedia na asi siahudia una bae koua. Dahaka dainai? Badina be Dirava ese baine ha-uradia, “ena lalo-hadai  bae haḡuḡurua.” Una lalohadai be dahaka? Una na tomadiho koikoi ibounai bona Kristendom danu be haoreamu lalohadaina. * Dirava ese [“daḡedaḡe ḡauna kakakakana,” NWT] “doa gwauta” ḡauna lalona ai ena lalohadai be atoamu. Una  doa gwauta ese politikol oreadia iboudiai e laulaulaidiamu, idia ese daḡedaḡe gauna o United Nations e duruamu. (Apok. 17:3, 11-13; 18:8) Unu politikol oreadia ese tomadiho koikoidia be tuari henidiamu neganai, una na hisihisi bada hereana matamana. Una na tanobada ai be varamu ḡauna dika rohorohona ta.

4. (a) Ededia badi haida daidiai tanobada besedia ese tomadiho koikoi bae tuari henia? (b) Guna unu orea e badinadiava taudia be dahaka be karamu?

⁴ Ita na asi dibada tanobada besedia be dahaka dainai Babulono Badana be haoreamu. Idia na reana be gwaumu tanobada ai tomadiho na maino e kouamu bona gavamani e karamu ḡaudia e koudiamu. Eiava be gwaumu unu tomadiho oreadia na moni bona kohu bada herea vada e habou. (Apok. 18:3, 7) Toana na tanobada besedia ese tomadiho koikoi be tuari heniamu neganai, dia tomadiho koikoi taudia iboudiai be haorediamu, to tomadiho oreadia be haorediamu. Unu orea be haorediamu neganai, guna unu orea e badinadiava taudia na be dibamu e gunalaidia taudia ese e koidia dainai edia tomadiho be rakatanimu.

5. Iehova be dahaka e gwauhamatalaia, bona dahaka dainai?

⁵ Baibul ese Babulono Badana be haoreamu ena daudau na se hahedinaraia, to ita mai dibada ḡauna na una nega na basine daudaumu. (Apok. 18:10, 21) Iehova na e gwauhamata “e abidia hidi taudia” bona tomadiho momokanina dainai, hisihisi bada hereana negana baine hakwadoḡia. (Mar. 13:19, 20) To hisihisi bada hereana baine hematama bona Aramagedono tuarina negana lalonai, Iehova be e uramu dahaka baita kara?

6. Dahaka dainai tomadiho koikoi baita rakatania mo na dia heḡereḡere?

⁶ Atikol 40 ai ta herevalaia heḡereḡerena, Iehova na e uramu ia e tomadiho heniamu taudia na Babulono Badana bae rakatania vaitani. To dia una mo, namona na laloda baita hadai tomadiho momokanina baita badinaia. Unu baita kara toma daladia rua mani aita herevalai.

7. (a) Edena dalai Iehova ena kara maoromaoro taravatudia baita badina? (b) Edena dalai Heberu 10:24, 25 ese e hahedinaraiamu hari ina negai eda hebou karadia na mai anidia bada?

⁷ Ginigunana na, Iehova ena kara maoromaoro taravatudia baita badina. Namona na tanobada ena kara bona lalohadai na basita abi dae. Heḡereḡere, matabodaḡa karadia idauidau, tatau na tatau ida e mahuta heboumu bona hahine na hahine ida e mahuta hebou karadia. (Mat. 19:4, 5; Roma 1:26, 27) Iharuana na, eda Kristen tadikaka ida eda tomadiho karadia basita hadoko. Herevana ita na edeseniai, Kingdom Hall ai, ruma ai, eiava gabu hehunidia danu eda tomadiho karadia na baita kara. Bona herevana dahaka baine vara, hebou ilao henina karana na basita hadokoa. Una “kara baita habadaia, badina be, o itaiamu, dina badana eme kahikahi.”​—Heberu 10:24, 25 ba duahi.

8. Edena dalai hari ta harorolaiamu herevana na vaira negai be idaumu?

⁸ Hisihisi bada hereana lalonai, hari ta harorolaiamu herevana na be idaumu. Hari ita na Basileia sivaraina namona ta harorolaiamu bona ta hekwarahimu haida na hahediba taudia ai baita halaodia. To una negai, ita baita harorolaiamu herevana na hereva auka hereana, una na hailstones na heto. (Apok. 16:21) Reana ita ese baita harorolaiamu herevana na, Satana ena tanobada na kahirakahira be hadikaia oremu. To gabeai baita dibamu iseda haroro herevana be dahaka bona ede baita harorolaia toma. Haroro bona hahediba ḡaukaradia ihaḡuḡurudia totona, ita be laḡani handred mai kahana lalonai ta ḡaukaralai daladia baita badinamu, a? Eiava ma dala haida baita ḡaukaralaimu? Ita na asi dibada. Herevana edena dalai iseda haroro ḡaukara baita karaia, ita na mai goadada ida Iehova ena hahemaoro herevana baita harorolaiamu, isedai una na hahenamo ta!​—Esek. 2:3-5.

9. Iseda haroro herevana dainai tanobada besedia be dahaka be karamu, to dahaka ta diba momokanimu?

⁹ Toana na eda haroro herevana dainai tanobada besedia na be uramu eda ḡaukara bae koua vaitani. Hari eda haroro ḡaukara ai Iehova ena heduru ai ta tabekaumu heḡereḡerena, una negai danu iena heduru ai baita tabekau na namo. Ta diba momokanimu, Dirava ese goada be henidamu iena ura baita haḡuḡurua totona.​—Mika 3:8.

10. Luka 21:25-28 heḡereḡerena, hisihisi bada hereana be varamu neganai, taunimanima momo be dahaka be karamu?

¹⁰ Luka 21:25-28 ba duahi. Hisihisi bada hereana lalonai, taunimanima na be hoamu badina guna e lalova bae mia hanaihanai ḡaudia na be oremu. Idia na be ‘lalo-hekwarahimu’ badina be laloamu idia na una hisihisi bada hereana ai be masemu. (Sef. 1:14, 15) Toana na una negai Iehova ena taunimanima edia mauri danu be auka hereamu. Bona ita na dia tanobada ena dainai nega aukadia lalodiai baita nohomu. Reana una negai danu mauri e durulaimu ḡaudia haida na basita abimu.

11. (a) Dahaka dainai Iehova ena Witnes na be badu henidiamu? (b) Dahaka dainai hisihisi bada hereana dainai basita gari?

 ¹¹ Nega ta be maimu, edia tomadiho e haore taudia na Iehova ena Witnes be badu henidiamu, badina idia na edia tomadiho be badinaiamu. Ta dibamu idia ese edia badu karana na be hahedinaraiamu, heḡereḡere intanet be ḡaukaralaiamu. Eda tomadiho sibona mo se hadikaia dainai, tanobada besedia bona edia lohia, Satana, ese be inai henidamu. Edia ura na tanobada ai tomadiho iboudiai bae haoredia lalohadaina na basine ḡuḡurumu. Una dainai, idia na be hegiromu ita be tuari henidamu. Una neganai, tanobada besedia​—Gog, Magog tauna​—ese edia ḡaukara be karaiamu. * Idia na be heboumu bena Iehova ena taunimanima be tuari henidiamu. (Esek. 38:2, 14-16) Reana hisihisi bada hereana ai be varamu ḡaudia daidiai baita lalo hekwarahimu badina ita na asi dibada una negai be dahaka be varamu. To hisihisi bada hereana dainai basita gari na namo. Iehova na ita baine hamaurida helaoreana hahediba herevadia be henimu. (Sal. 34:19) Ita na baita “gaga isi,” badina be baita dibamu ‘ihamaurida vada baine kahikahi.’ *

12. Edena dalai “hesiai tauna mai ena kamonai bona mai ena kara maoromaoro” ese ita na vaira negai bae vara ḡaudia daidiai e haheḡaeḡaedamu?

¹² “Hesiai tauna mai ena kamonai bona mai ena kara maoromaoro” na ita e haheḡaeḡaedamu unu amo hisihisi bada hereana lalonai Iehova baita badinaia. (Mat. 24:45) Dala momo ai unu e kara toma, to dala ta na laḡani 2016 ela laḡani 2018 rijinol hebouheboudia edia program na nega korikori ai e halasi. Unu program ese e hagoadada Iehova ena dina e kahirakahiramu lalonai ededia kara baita goadalai. Mani unu kara ta ta aita herevalai.

13. Edena dalai Iehova ibadinana karana baita hagoadaia, bona dahaka dainai hari unu baita kara toma?

¹³ Iehova ibadinana: Laḡani 2016 rijinol hebouhebou sinadona na “Iehova Ba Badinaia!” Una program ese ita na e hadibada bema iseda hetura karana Iehova ida na goada, ita ese Ia na baita badinaiamu. Danu, mai kudouda idoinai ida Iehova baita ḡuriḡuri henia bona iena Hereva baita stadilaia neganai, iseda hetura karana Ia ida na be goadamu. Una ese be hagoadadamu hekwakwanai badadia baita hanaimu. Satana ena tanobada dokona e kahirakahiramu lalonai, Dirava bona iena Basileia ibadinana karana na be tohoa badabadamu. Toana na taunimanima ese be kirikirilaidamu. (2 Pet. 3:3, 4) Una baine vara badina ta na, ita ese Satana ena tanobada kahana ta asita duruamu. Namona na hari Iehova ibadinana karana baita goadalaia, unu amo hisihisi bada hereana lalonai Ia baita badinaia.

14. (a) Tanobada ai e nohomu horoa taudia oredia ediai be dahaka be varamu? (b) Dahaka dainai una negai Iehova baita badinaia na mai anina bada?

¹⁴ Hisihisi bada hereana lalonai, tanobada ai Iehova ena orea e hakauamu taudia ediai ḡau idauna ta be varamu. Tanobada ai e nohomu horoa taudia iboudiai na guba ai bae haboudia bena idia danu Aramagedono tuarina lalonai bae tuari. (Mat. 24:31; Apok. 2:26, 27) Una anina na, Gavanin Bodi danu da lasi. To, hutuma bada herea na dounu mai ihakaudia taudia. Mamoe idaudia bogaraḡidia amo tadikaka goadadia ese Iehova ena orea be hakauamu. Namona na Iehova ibadinana karana baita hahedinaraia, anina na unu tadikaka ida baita ḡaukara hebou bona  Dirava ese e henidia hahekau daladia baita badina. Unu amo ita na baita roho mauri diba!

15. Edena dalai eda haheauka karana baita hagoadaia, bona hari dahaka dainai unu baita kara toma na mai anina bada?

¹⁵ Haheauka: Laḡani 2017 rijinol hebouhebou sinadona na “Basita Hesiku!” Una program ese ita na e duruda hahetoho idauidau baita haheaukalai. Bona ta diba dia nega namodia ai mo to nega aukadia ai danu haheauka karana baita hahedinaraia. Iehova enai baita tabekaumu neganai, eda haheauka karana baita hagoadaiamu. (Roma 12:12) Iesu ena gwauhamata na basita laloaboio, ia na eto: “Baine haheauka ela bona dokona tauna na do baine mauri.” (Mat. 24:13) Una gwauhamata anina na, herevana dahaka hahetoho ta davarimu namona na Iehova baita badinaia. Bema hari hahetoho iboudiai baita haheaukalaimu, hisihisi bada hereana do se matama ai iseda abidadama na be goadamu.

16. Baita goada totona dahaka baita kara na namo bona edena dalai?

¹⁶ Goada: Laḡani 2018 rijinol hebouhebou sinadona na “Be Courageous!” Una hebouhebou ena tok idauidau ese e duruda baita goada totona eda diba bona aonega ai na basita tabekau. To namona na Iehova enai baita tabekau. Edena dalai? Dina iboudiai Baibul baita duahia bona guna Iehova ese edena dalai ena taunimanima e hamauridia daladia baita lalodia dobu. (Sal. 68:20; 2 Pet. 2:9) Hisihisi bada hereana lalonai tanobada besedia ese ita bae tuari henida neganai, namona na baita goada bona Iehova baita abidadama henia. (Sal. 112:7, 8; Heb. 13:6) Bema hari Iehova enai baita tabekaumu, Gog be tuarimu neganai ita na baita gini goadamu. *

17. Dahaka dainai Aramagedono tuarina dainai basita gari? (Rau 1 laulauna ba itaia.)

¹⁷ Atikol 40 ai ta herevalaia heḡereḡerena, ita momo na dina gabediai ta nohomu. To, ita na ta uramu hisihisi bada hereana  amo baita roho mauri. Aramagedono tuarina na tanobada oromana dikana baine haorea tuari dokona. To, ita na ḡau ta garina basita gari. Dahaka dainai? Badina una na Dirava ena tuari. (Her. 1:33; Esek. 38:18-20; Sek. 14:3) Iehova ena haheḡani heḡereḡerenai, Iesu Keriso ese Dirava ena guba tuari oreana be gunalaiamu. E horodia taudia iboudiai bona aneru momo herea na ia ida be ḡaukara heboumu. Idia ese Satana, ena demoni bona tanobada ai tuari oreadia iboudiai be tuari henidiamu.​—Dan. 12:1; Apok. 6:2; 17:14.

18. (a) Iehova ena gwauhamata be dahaka? (b) Dahaka dainai Apokalupo 7:9, 13-17 ese oi e durumumu emu helaro basio daradaralaia?

¹⁸ Iehova na e gwauhamata, eto: “Tuari ḡauna ta oi ihadikamu totona e karaiamu na ena ḡaukara anina basine vara.” (Isa. 54:17) Iehova e tomadiho heniamu “hutuma bada-herea” na “hisihisi badana amo” bae mauri! Bena idia na Iehova bae hesiai henia. (Apokalupo 7:9, 13-17 ba duahi.) Vairai bae vara ḡaudia na Baibul amo ta dibamu dainai ita na asita daradaramu! Ita na mai dibada, “Iehova ese kamonai taudia e hamauridiamu.” (Sal. 31:23) Iehova e lalokau heniamu bona e hanamoamu taudia na Ia ladana baine hahelaḡaia karana bae moalelaia.​—Esek. 38:23.

19. Vaira negai be dahaka be varamu?

¹⁹ Satana na lasi dainai 2 Timoteo 3:2-5 na tanobada matamatana ai taunimanima edia kara be herevalaiamu dalana mani a laloa. (Maua ladana “ Una Negai Taunimanima Edia Kara Na Ini Bamona” ba itaia.) Tadikaka George Gangas, * guna Gavanin Bodi memba ta ese ini e herevalaia toma: “Iehova e tomadiho heniamu taudia ese tanobada be hahonuamu neganai, ia na noho gabuna namo hereana ai be laomu! Kahirakahira oi na tanobada matamatana ai bo nohomu. Oi na bo mauri hanaihanaimu. Ita iboudai na baita mauri hanaihanaimu.” Una na helaro hereadaena!