1. Iehova ese ena ura baine haḡuḡurua totona, dahaka baine kara?

IEHOVA na ena ura baine haḡuḡurua totona ḡau idauidau ai baine hahelao diba. Heḡereḡere, Iehova na Hahediba Tauna, Hahegoada Tauna, Evanelia o sivarai namona iharorolaina tauna ai bainela diba. (Isa. 48:17; 2 Kor. 7:6; Gal. 3:8) To, ia na nega momo taunimanima e ḡaukaralaidiamu iena ura bae haḡuḡurua totona. (Mat. 24:14; 28:19, 20; 2 Kor. 1:3, 4) Iena ura ihaḡuḡuruna totona Iehova ese ita ta ta na aonega bona goada baine henida. Diba bada taudia na e laloparara unu iboudiai ese Iehova ladana anina e hahedinaraiamu.

2. (a) Dahaka dainai nega haida ta daradaramu Iehova ese ita be e ḡaukaralaidamu, eiava? (b) Ina atikol ai dahaka baita herevalaimu?

² Ita iboudai na ta uramu Iehova ese baine ḡaukaralaida iena ura baita haḡuḡurua, to haida ese una na e daradaralaiamu. Dahaka dainai? Badina e hemamimu idia laḡanidia, edia noho dalana bona edia diba na dia heḡereḡere. To, haida na e lalomu idia ese hari e karaiamu ḡaukarana na heḡereḡere dainai basie uramu edia hesiai ḡaukara bae habadaia. To ina atikol ai baita itaiamu, edena dalai Iehova ese ita ta ta baine ḡaukaralaida iena ura baita haḡuḡurua totona. Bona Baibul sivaraidia haida baita herevalaimu, edena dalai Iehova ese iena hesiai taudia​—tatau bona hahine​—e hagoadadia iena ura e haḡuḡurua. Bena Iehova ese baine ḡaukaralaida daladia baita herevalaimu.

3. Filipi 2:13 heḡereḡerena, Iehova ese iena ura ikarana urana be edena dalai baine henida?

³ Filipi 2:13 ba duahia. * Iehova ese iena ura ikarana  urana na baine henida diba. Edena dalai unu baine kara toma? Heḡereḡere, reana baita itaiamu kongrigeisin ai heduru baita heni na namo. Eiava elda taudia na brens ofis amo revareva ta be duahiamu bena be hadibadamu ma teritori haida ai heduru baita heni na namo. Reana ita na siboda baita henanadaimu, ‘Baina heduru totona lau be dahaka baina kara?’ Eiava, reana ḡaukara badana ta e henida to ikarana dalana na asi dibada. Eiava, Baibul siri ta o duahia murinai, bo lalomu, ‘Edena dalai lau ese ina Baibul sirina baina ḡaukaralaia diba ma haida baina durudia?’ Iehova ese ita na basine doridamu ḡau ta baita karaia totona. To, bema be itadamu ita na mai kudouda idoinai ida ta lalomu ḡaudia ta uramu baita kara, ia ese be durudamu.

4. Edena dalai Iehova ese goada baine henida iena ura baita karaia totona?

⁴ Iehova ese goada baine henida diba. (Isa. 40:29) Edena dalai? Iena lauma helaḡa ena heduru amo. (Eso. 35:30-35) Iehova ese iena orea amo ḡaukara ta ta ikaradia daladia e hadibadamu. Bema ḡaukara ta ikarana dalana na asi dibamu, heduru ba noi diba. Bona Tamada gubai ba noia, “siahu herea-daena” baine henimu. (2 Kor. 4:7; Luka 11:13) Iehova ese tatau bona hahine e durudia dalana na e hagoadadia bona iena ura ikarana urana e henidia, bona unu haheitalai na Baibul ai e herevalai. Unu baita herevalaimu neganai, Iehova ese oi baine ḡaukaralaimu diba daladia mani ba lalo.

5. Iehova ese Mose e ḡaukaralaia ena taunimanima e hamauridia dalana bona negana amo dahaka ta dibamu?

⁵ Iehova ese Mose e ḡaukaralaia Israel taudia baine hamauridia. To Iehova ese Mose be edena negai e ḡaukaralaia? O laloamu “Aigupto taudia edia aonega idoinai” e dibaia murinai Iehova ese e ḡaukaralaia, a? (Apos. 7:22-25) Lasi, to manau tauna ai e halaoa murinai Iehova ese e ḡaukaralaia. (Apos. 7:30, 34-36) Mose na goada e henia Aigupto edia lohia vairanai baine gini. (Eso. 9:13-19) Iehova ese Mose e ḡaukaralaia dalana bona negana amo dahaka ta dibamu? Iehova ese e uramu iena kara bae tohotoho taudia bona iena goada ai e tabekaumu taudia na e ḡaukaralaidiamu.​—Flp. 4:13.

6. Iehova ese Barasilai e ḡaukaralaia King David e durua karana amo dahaka ta dibamu?

⁶ Laḡani hundred momo muridiai, Iehova ese Barasilai e ḡaukaralaia King David baine durua totona. David bona ia ida ela taudia na ‘e hitolodia, taudia e boera, bona e ranu mase’ badina una negai David na natuna Absalom amo e komuva. Una negai ena be Barasilai na buruka to una na se laloa, a ia bona haida na David bona ia ida ela taudia e durudia. Ia na mai dibana Iehova ese ia na baine ḡaukaralaia diba. To ena goada heḡereḡerenai ia ese Dirava ena hesiai taudia e durudia. (2 Sam. 17:27-29) Una ese dahaka e hadibadamu? Herevana laḡanida na bada eiava maraḡi, Iehova ese ita na baine ḡaukaralaida diba eda gabu ai o tano ma ta ai e nohomu tadikaka bona taihu baita durudia. (Her. 3:27, 28; 19:17) Ena be reana dekedia na basita lao dibamu, to tanobada heḡeḡemadai iduruna ḡaukarana dainai ta atomu kontribiusin amo baita durudia diba.​—2 Kor. 8:14, 15; 9:11.

7. Iehova ese Simeon be ede e ḡaukaralaia toma, bona edena dalai una ese ita e hagoadadamu?

⁷ Simeon na Ierusalem ai e nohova neganai ia na buruka bona Iehova ese e  gwauhamata henia, do se mase ai Mesia baine itaia. Reana una gwauhamata ese Simeon na e hagoadaia bada, badina ia na laḡani daudau lalonai e urava Mesia baine itaia. Iena abidadama bona haheauka karana dainai Iehova ese e hanamoa. Dina ta, ia na lauma helaḡa ese e durua bena dubu helaḡa ela. Unuseniai, ia ese mero maraḡina, Iesu e itaia, bona Iehova ese Simeon na e ḡaukaralaia Iesu na Keriso ai bainela peroveta herevana baine gwauraia. (Luka 2:25-35) Ena be Simeon ese Iesu na se itaia tanobadai ena hesiai ḡaukara e karaia, to ienai e vara ḡauna na e moalelaia bona vaira negai ia na ma hahenamo momo baine abi. Tanobada matamatana ai, una abidadama tauna ese be itaiamu Iesu ena lohia dalana amo ruma bese iboudiai ese hahenamo be abimu. (Gen. 22:18) Simeon heḡereḡerena, Iehova ese ita na dala idauidau ai e ḡaukaralaidamu dainai ta moalemu.

8. Iehova ese ita be ede baine ḡaukaralaida toma Banaba e ḡaukaralaia heḡereḡerena?

⁸ Kristen taudia ginigunadia edia negai, tau ta ladana Iosef na e ura Iehova ese baine ḡaukaralaia. (Apos. 4:36, 37) Aposetolo taudia ese ia ladana na e gwauraia Banaba, anina na “Tauhalo Tauna” reana badina ia na haida e hagoadadiava tauna namona. Heḡereḡere Saulo na Kristen tauna ai ela neganai, momo na se urava ia bae hereva henia badina guna ia ese Iesu e badinaiava taudia e daḡedaḡe henidiava. To Banaba ese Saulo na e hagoadaia bona Saulo ese iena kara namona na e laloa bada. (Apos. 9:21, 26-28) Gabeai, Ierusalem ai e nohova elda taudia na e urava Antioka ai e nohova tadikaka bae hagoadadia. Idia be daika e siaia? Idia ese Banaba e siaia. Bona idia na abi hidi maorona e karaia. Ia ese idia na e hagoadadia “Lohiabada na bae badinaia mai lalodia idoidiai ida.” (Apos. 11:22-24) Una heḡereḡerena, hari danu Iehova ese ita na baine ḡaukaralaida diba tadikaka bona taihu baita hagoadadia. Heḡereḡere, mase dainai e daradokomu taudia baita hagoadadia. Eiava baine ḡaukaralaida diba gorere eiava lalometau tauna ta baita vadivadia eiava baita rini henia bena hahegoada herevadia amo baita hagoadaia. Iehova ese Banaba e ḡaukaralaia heḡereḡerena oi danu o uramu Iehova ese baine ḡaukaralaimu, a?​—1 Tes. 5:14.

9. Iehova ese Vasily e durua elda tauna namona ai ela karana amo dahaka ta dibamu?

⁹ Iehova ese tadikaka ta ladana Vasily na e durua elda tauna namona ai bainela. Vasily laḡanina 26 neganai ia na elda ta ai ela, to ia na e gariva badina e laloa ia na dia heḡereḡere kongrigeisin ai hekwakwanai e davariva taudia na lauma dalanai baine durudia. To laḡani daudau elda ḡaukara e kara tadikakadia bona Kingdom Ministry School amo heduru e abi. Vasily na e ḡaukara goada ena elda maduna baina huaia namonamo. Heḡereḡere ia ese lista maraḡina ta e karaia bona baine haḡuḡuru diba ḡaudia e tore. Unu ḡau ta ta e karava neganai goada mamina e abiava. Ia na ini e gwau toma: “Guna na gariva dainai na laloava basina karaia diba karana na hari na moalelaiamu. Iehova ese e durugumu siri maorodia baina ḡaukaralai tadikaka bona taihu baina hagoadadia neganai, una ese lau na e hamoalegumu.” Vasily heḡereḡerena bema umui tadikaka na bo uramu Iehova ese baine ḡaukaralaimui, ia ese umui na baine durumui diba kongrigeisin ai maduna ma haida ba hua namonamo.

10. Abigail be dahaka e kara, bona ena haheitalai amo dahaka ta dibamu?

¹⁰ David bona ena tatau na King Saulo dainai e komu loaloava bona idia na heduru bae abi na namo. Una dainai David ena tatau na Israel edia taḡa tauna Nabala enai aniani e noi. Idia na se hemarai ia bae noia badina idia na tano ḡaeḡaena ai Nabala ena mamoe e naridiava. To Nabala na se ura aniani baine henidia. David na e badu dikadika bona e ura Nabala bona ena ruma bese ai tatau bona memero iboudiai baine hamasedia. (1 Sam. 25:3-13, 22) To Nabala adavana Abigail na kara namo hahinena. Ia na e lalogoada, David vairanai e tui diho bona e noia adavana ena kara davana na basine haloua. Bona e hamaoroa namona na Iehova enai heduru baine tahu. Abigail ena manau bona aonega karana ese David kudouna na e hamarerea. Ia na e diba Iehova ese Abigail e ḡaukaralaia ia baine durua totona. (1 Sam. 25:23-28, 32-34) Abigail ese e kara karadia amo e hahedinaraia ia na e ura Iehova ese baine ḡaukaralaia. Una heḡereḡerena, manau bona aonega karana e hahedinaraimu Kristen taihu na Iehova ese baine ḡaukaralaidia edia ruma bese bona kongrigeisin taudia bae hagoadadia totona.​—Her. 24:3; Tito 2:3-5.

11. Salumu natuna kekenidia be dahaka e kara, bona hari daidia na idia e tohotohodiamu?

¹¹ Laḡani handred momo muridiai, Salumu natuna kekenidia na Iehova ese e ḡaukaralaidia taudia ida e ḡaukara hebou Ierusalem maḡuna e hanamoa lou. (Neh. 2:20; 3:12) Ena be tamadia na lohia tauna to idia na e ura dikadika una ḡaukara aukana bae karaia. (Neh. 4:15-18) Idia na dia Tekoa taudia heḡereḡeredia badina Tekoa taudia na “ḡaukara asie goadalaia.” (Neh. 3:5) Dina 52 lalodiai una ḡaukara e haorea neganai, Salumu natuna kekenidia ese e mamia moalena mani a laloa! (Neh. 6:15) Hari ina negai, taihu na e uramu Dirava bae hesiai henia ini ḡaukara amo, Iehova enai ta hahelaḡamu rumadia bae hanamo bona konstraksin ḡaukarana bae karaia. Edia diba, ura bona Dirava ibadinana karana ese unu ḡaukara na e durua badamu.

12. Iehova ese Tabita e ḡaukaralaia heḡereḡerena edena dalai ita baine ḡaukaralaida diba?

¹² Iehova ese Tabita e ḡaukaralaia vabu ediai “kara namodia bona hebogahisi karadia” baine hahedinarai. (Apos. 9:36) Iena kara namodia dainai ia e mase neganai taunimanima momo na e daradoko. To aposetolo Petero ese e hatoreisia lou neganai idia na e moale. (Apos. 9:39-41) Tabita ena haheitalai amo dahaka ta dibamu? Herevana ita na eregabe eiava buruku, tau o hahine to namona na iboudai ese tadikaka bona taihu baita durudia.​—Heb. 13:16.

13. Edena dalai guna e hemaraiva taihuna ta ladana Ruth na Iehova ese e ḡaukaralaia, bona ia be dahaka e gwa?

¹³ Taihu ta ladana Ruth na guna e hemaraiva to ia na e urava misinari ai bainela. Ia maraḡinai, ia na ruma ta amo e laova ruma ta pepapepa e hariharilaiva. Ia na e gwa: “Lau ese una ḡaukara na moalelaiava.” Ienai na e aukava taunimanima ediai Dirava ena Basileia baine harorolaia. Ena be ia na e hemaraiva to laḡanina e 18 neganai, regiula painia ḡaukara e hamatamaia. Laḡani 1946 ai, Watchtower Bible School of Gilead sikulina ela bona gabeai e siaia Hawaii bona Japan ai ena hesiai ḡaukara e karaia. Iehova ese una dala hereadaena amo e ḡaukaralaia  unu tano ai sivarai namona e harorolaia. Fultaim hesiai ḡaukara na kahirakahira laḡani 80 lalonai e karaia murinai, ia na e gwa: “Iehova na lau ihagoadagu tauna. Ia ese e durugu basina hemarai totona. Na abia dae momokanimu bema ta na Iehova baine abidadama henia, ia ese baine ḡaukaralaia diba.”

14. Kolose 1:29 heḡereḡerena, Iehova ese baine ḡaukaralaida totona dahaka baita kara na namo?

¹⁴ Taunimanima edia histri lalonai Iehova ese iena hesiai taudia na dala idauidau ai e ḡaukaralaidia. Oi be ede baine ḡaukaralaimu toma? Iehova ese be itamumu oi na bo hekwarahimu neganai, baine ḡaukaralaimu diba. (Kolose 1: 29 ba duahia.) Ia ese oi na haroro goadagoada tauna, hahediba tauna namona, hahegoada tauna namona, ḡaukara ikarana tauna namona, bona tura namona ai baine halaomu eiava iena ura ihaḡuḡuruna totona oi na dala idauidau ai baine ḡaukaralaimu.

15. Timoteo Ginigunana 4:12, 15 heḡereḡerena, eregabe tadikaka ese Iehova bae noia dahaka bae kara totona?

¹⁵ To umui eregabe memeromui be o uramu emui mauri ai dahaka ba kara? Tadikaka eregabedia edia goada na bada dainai ita na ta uramu kongrigeisin ai maduna haida heḡereḡere, hesiai tauna ena maduna bae huaia. Kongrigeisin momo ai elda na momo to hesiai taudia na dia momo. Umui eregabe tadikakamui be o uramu kongrigeisin ai maduna ma haida ba hua, a? Nega haida tadikaka haida na e laloamu: “Kongrigeisin lalonai pablisa maduna mo baina huaia na heḡereḡere.” Bema oi na unu o hemami tomamu, Iehova ba noia baine durumu hesiai tauna ena maduna ba huaia bona baine hagoadamu ḡau iboudiai ba kara ia ba hesiai henia totona. (Koh. 12:1) Ai na emui heduru a uramu!​—1 Timoteo 4:12, 15 ba duahi.

16. Iehova amo dahaka baita noi, bona dahaka dainai?

¹⁶ Iehova ese oi na dala idauidau ai baine ḡaukaralaimu diba iena ura ba haḡuḡurua totona. Una dainai ia ba noia iena ura ihaḡuḡuruna urana baine henimu bona ia ba noia goada baine henimu. Ena be hari oi na eregabe eiava buruka, to emu nega, emu goada bona emu kohu ba ḡaukaralai Iehova ihanamona totona. (Koh. 9:10) Bema oi na Iehova ena hesiai ḡaukara ai maduna ta e henimumu, basioto oi na dia heḡereḡere dainai ba dadaraia. Eda goada heḡereḡerenai ta karamu hesiai ḡaukaradia ese Tamada lalokauna e hanamoamu na hahenamo badana ta!