1. Dahaka dainai Iehova mo baita toma henia diho?

IEHOVA mo baita toma henia diho na maoro badina Ia na ita e Havarada Tauna bona mauri e Henimu Tauna. (Apok. 4:11) To ḡau ta ese una baine hadikaia diba. Ena be Iehova na ta lalokau heniamu bona ta matauraiamu, iseda mauri ai ḡau ma haida ilalodia bada karana ese Ia itoma henina diho karana baine hadikaia diba. Una baine vara dalana baita lalopararalaia guna na namo. Ginigunana na, Iehova mo baita toma henia diho anina mani aita herevalaia.

2. Esodo 34:14 heḡereḡerena, bema ita na Iehova mo ta toma diho heniamu dahaka baita kara na namo?

² Baibul ai, Iehova ilalokau henina karana na ia itoma henina diho karana ida e herevalaia. Tau ta eiava ḡau ta ese Iehova ta toma diho heniamu karana basine hadikaia na namo.​—Esodo 34:14 ba duahia.

3. Ededia badi maorodia daidiai Iehova ta toma diho heniamu?

³ Ita na badi maorodia daidiai Iehova ta toma diho heniamu. Dahaka dainai unu ta gwau tomamu? Hahemomokani ḡaudia ese e hahedinaraimu Iehova na asi ta toma diho henia kavamu. Ita ese iena kara namodia ta ura henimu bona Ia e uramu bona se uramu ḡaudia ta dibamu. Iena ura taunimanima ediai na ta lalopararalaiamu bona ta karaiamu. Ta moalemu badina dala e kehoa ita na ia turana ai baitala. (Sal. 25:14) Ita e Havarada Tauna e herevalaiamu ḡaudia iboudiai idibadia karana ese ita na ia kahirakahira e verida laomu.​—Iak. 4:8.

4. (a) Diabolo be dahaka e ḡaukaralaimu Iehova itoma diho henina karana baine hadikaia? (b) Ina atikol ai dahaka baita herevalaimu?

⁴ Diabolo na tanobada dikana e biaguamu dainai, tanobada ḡaudia e ḡaukaralaimu unu amo ita na eda mauri ai mai anidia bada ḡaudia baita lalodia maraḡi bona tauanina ena ura dikadia basita dadarai. (Efe. 2:1-3; 1 Ioa. 5:19) Iena  ura badana na, Iehova itoma diho henina karana baine hadikaia. Diabolo ese baine ḡaukaralai daladia rua mani aita herevalai. Dala ginigunana na, Satana na e uramu ita na moni baita ura henia dikadika bona dala iharuana na ia na e uramu ita na moale karadia dikadia baita abi hidi.

5. Dahaka dainai moni iura henina karanai nahuada baita toho na namo?

⁵ Vaia, ita iboudai na ta uramu aniani namodia baita ani, dabua namodia baita kara, bona ruma namodia ai baita noho. To, namona na moni iura henina karanai nahuada baita toho. Hari ina negai momo na “moni bae mata ḡaniḡani henia” bona moni amo bae hoi diba ḡaudia e ura heni badamu. (2 Tim. 3:2) Iesu na dibana ia murinai e rakamu taudia na una kara ese baine tohodia diba. Una dainai, ia na eto: “Asi tauna ta ese biagu rarua isiaidia baine lao heni diba. Badina be ta baine inai henia, ta baine lalokau henia; eiava ta baine badinaia, ta be baine dadaraia. Dirava bona Taḡa isiaidia basio lao heni diba.” (Mat. 6:24) Ta na Iehova e tomadiho heniamu lalonai nega bada e atomu e uramu baine taḡa, ia na biagu rua isiaidia e lao henimu na heto. Una ese e hahedinaraiamu ia na dia mai kudouna idoinai ida Iehova e toma henia dihomu.

6. Iesu ese Laodikea kongrigeisin e sisiba henidia herevana amo dahaka ta dibamu?

⁶ Kristen ginigunadia edia nega e ore e laova neganai, Laodikea kongrigeisin taudia na e hekokorokuva e gwauva: “Lau na taḡa taugu, mai egu kohu momo; ḡau ta ai asina dabumu.” To, Iehova bona Iesu vairadiai idia ‘na dika rohoroho, ihareha, ogoḡami, mata-kepulu, asi ramidia.’ Iesu ese idia e sisiba henidia badina na idia ese  moni bona kohu e ura heni dikadikava bona edia hetura karana Iehova ida na e hadikaia. (Apok. 3:14-17) Bema kudoudai moni iura henina bada karana ta laloamu, namona na karaharaḡa eda lalohadai baita haidaua. (1 Tim. 6:7,8) Bema unu basita kara tomamu, ita na ḡau haida baita ura heni badamu bona Iehova ese eda tomadiho basine abia daemu. Badina be Iehova na e uramu ia baita ‘lalokau henia mai laloda idoinai, laumada idoinai, darada idoinai, mai goadada idoinai’ ida. (Mar. 12:30) Edena dalai eda mauri lalonai moni na ḡau badana ai baita halaoa diba?

7-9. Elda tadikakana ta David ena haheitalai amo dahaka ta dibamu?

⁷ United States ai e nohomu elda ta David, ena haheitalai mani aita laloa. Ia na e gwauva ia na ḡaukara goadagoada tauna. Ia e ḡaukarava kampanina ese ḡaukara namona ta e henia bona davana na namo, bona United States ai ia na una ḡaukara e karaiava tauna namona ta. David na e gwa: “Una negai na laloava unu na Iehova ena hahenamo.” To, una be momokani, a?

⁸ Gabeai David na e laloparara iena ḡaukara ese iena hetura karana Iehova ida na e hadikaiava. Bena ini e gwau toma: “Kongrigeisin heboudia bona haroro ḡaukara lalodiai lau ese ḡaukara gabuna ai na davariva hekwakwanaidia na lalodiava. Ena be moni momo na davariva, to egu lalometau na e badava bona adavagu ida asia noho namonamova.”

⁹ Una dainai David na e diba mai anina bada ḡaudia baine abi hidi na namo. Ia na e gwa: “Lalogu na hadaia una na baina hamaoromaoroa.” David na e ura ena  ḡaukara sediual baine haidaua bona una na biaguna e hamaorolaia. Bena dahaka e vara? David na ḡaukara amo e hadokoa. To ia be dahaka e kara? David na e gwa: “Murina dinana ai heduru painia baina karaia hanaihanai totona aplikeisin na hahonua.” David bona adavana na tauanina iduruna ḡaudia bae abi totona, haḡoeva-haḡoeva ḡaukaradia e karava. Se daudau David na regiula painia ḡaukara e hamatamaia, bona gabeai adavana danu ia ida e painiava. Idia raruosi ese e karaia moni ḡaukarana na momo ese se lalo badava ḡaukarana, to idia ediai una na dia ḡau badana. Ena be e abiava monina na dia guna heḡereḡerena, to hua ta ta ai edia dabu ḡaudia na e hoiva. Idia na e ura Iehova bae atoa guna, bona e laloparara Iehova ese Basileia e atoa gunamu taudia na e naridiamu.​—Mat. 6:31-33.

10. Kudouda be ede baita gimaia toma?

¹⁰ Ena be eda moni bona kohu na bema bada eiava lasi, to kudouda baita gimaia na ḡau badana. Edena dalai? Taḡa na basio ura henia dikadika. Bona namona na emu moni ḡaukara ese Iehova ihesiai henina ḡaukarana basine hadikaia. Ede bo diba tomamu una na oiemu ai e varamu? Sibomu ba henanadai: Hebou bona haroro lalodiai lau be na karaiamu moni ḡaukarana na laloa momomu, eiava? Nega vairai moni dalanai baina heḡereḡere eiava lasi na lalo-hekwarahilaia momomu, a? Moni bona kohu daidiai adavagu ida emai headava lalonai hekwakwanai a davarimu, a? Lau be na uramu taunimanima ese se lalo badamu moni ḡaukarana ta baina karaia unu amo nega bada baina ato Iehova baina hesiai henia, a? (1 Tim. 6:9-12) Unu henanadai ta lalodiamu lalonai baita helalotao Iehova ese ita na e lalokau henidamu bona ia e toma henia dihomu taudia na ini e gwauhamata henidia toma: “Lau na basina negemu bona basina rakatanimu, lasi ona lasi vaitani.” Una dainai aposetolo Paulo na e gwa: “Lalomui ai moni basio hekise-hekise henia.”​—Heb. 13:5, 6.

11. Moale karadia ese ta ena kara be ede baine haidaua toma?

¹¹ Iehova na e uramu mauri baita moalelaia, bona moale karadia amo una na baine vara diba. Momokani Dirava ena Hereva na eto: “Tau ta ena dala namo-hereana binai: baine aniani, baine inuinu, bona  ena hekwarahi baine moalelaia.” (Koh. 2:24) To, tanobada ai moale karadia momo ese ita na basie durudamu. Unu ese taunimanima edia kara namodia e hadikamu, bona e hagoadadiamu Dirava ese e gwauraimu dika ḡaudia na idia ese namodia e gwauraimu bona e ura henidiamu.

12. Korinto Ginigunana 10:21, 22 heḡereḡerena, dahaka dainai eda moale karadia baita abi hidi namonamo?

¹² Ita na ta uramu Iehova mo baita toma henia diho, una dainai nega tamona “Lohiabada ena pata” bona “lauma dikadia edia pata” amo basita aniani diba. (1 Korinto 10:21, 22 ba duahi.) Ta ida ta aniani heboumu neganai una na ia ta hetura heniamu toana. Bema ita na daḡedaḡe, meamea, babalau, matabodaḡa karadia, o tauanina ena ura e hahedinaraimu moale karadia baita abi hidimu, anina na ita na Dirava e inai heniamu taudia ese e haḡaeḡaelaia anianina ta ania heboumu. Una dainai, siboda ta hahedikamu bona eda hetura karana Iehova ida danu be dikamu.

13-14. Iakobo 1:14, 15 heḡereḡerena, dahaka dainai ta abi hidimu moale karadia baita lalodia namonamo? Haheitalai ta ba gwauraia.

¹³ Ededia dala haida ai moale karadia na aniani ida baita haheḡereḡereamu? Aniani negadiai baita ani anianidia na baita abi hidi diba. To ta hadonoamu murinai, ita ese aniani tauanida ai baine ḡaukara dalana na basita biagua dibamu. Aniani namona ese tauanida e duruamu to aniani dikana ese ita be hagoreredamu. Una na basine hedinarai haraḡamu to nega be daudaumu murinai baita dibamu.

¹⁴ Una heḡereḡerena, moale karadia ta uramu baita abi hidi neganai ita ese laloda baita ubua ḡaudia baita biagu dibamu. To ta abi hidimu murinai, unu moale karadia na laloda bona kudouda ai baine ḡaukara dalana na basita biagua dibamu. Moale karana namona ese ita be durudamu; a dikana ese be hadikadamu. (Iakobo 1:14, 15 ba duahi.) Moale karadia dikadia edia dika na basita lalopararalaia haraḡamu, to gabeai be hedinaraimu. Una dainai Baibul na e gwaumu: “Basio laloa kerere: Dirava na basita koia diba. Taunimanima e hadomu ḡaudia heḡereḡeredia mo bae abi. Tau-anina ena e hadoamu tauna ese tau-anina ena mase baine abia.” (Gal. 6:7, 8) Momokani, Iehova ese e inai henimu moale karadia baita dadarai na ḡau badana.​—Sal. 97:10.

15. Baita moale totona Iehova ese e henida harihari ḡauna ta be dahaka?

¹⁵ Iehova ena taunimanima momo ese JW Broadcasting^® itana karana na e moalelaiamu. Taihu ta ladana Marilyn na e gwa: “JW Broadcasting ese e durugu egu mauri ai baina moale bona program ai e halasimu ḡaudia iboudiai na nanamo dainai na itamu. Na hemamimu lau na sibogu eiava na lalomanokamu neganai, tok namona ta eiava Morning Worship program ta na itaiamu. Unu amo na mamiamu Iehova bona ena orea ese e lalogu badamu. JW Broadcasting ese egu mauri na e durua bada.” Iehova ena harihari ḡauna, JW Broadcasting ese oi e durumumu, a? Hua ta ta JW Broadcasting ai program matamatadia e halasimu, bona ia lalonai hahegoada anedia, audio, bona video na emu ura negana ai ba ita eiava ba hakala diba.

16-17. Dahaka dainai moale karadia ai eda nega baita biagua, bona edena dalai unu baita kara toma?

¹⁶ Ededia moale karadia baita abi hidi, bona hora hida unu moale karadia ai ta haoremu na baita haero namonamo. Bema unu basita kara tomamu, nega bada  na moale karadia ai baita haoreamu bona asi eda nega Iehova baita hesiai henia. To momo ediai na e aukamu moale karadia ai edia nega bae biagua totona. Laḡanina 18 taihu ta ladana Abigail na ini e gwau toma: “Bema dina ai na bisiva adorahi ai lalogu baine moale totona TV na itava. To, bema asina henari namonamova hora momo na haoreva.” Eregabe tadikakana ta Samuel na e gwaumu: “Nega haida intanet ai vidio kwadoḡidia momo na itava. Ta na itaiava murinai ma ta na itaiava to asina dibava lau na hora toi eiava hani vada na haore.”

¹⁷ Emu nega moale karadia ai be ede ba biagua toma? Dala ginigunana na, namona na ba diba oi be hora hida moale karadia ai o haoremu. Mani wiki ta lalonai hora hida o ḡaukaralaimu na ba torea diho. Heḡereḡere TV o itamu, intenet o ḡaukaralaiamu, bona mobael ai game o gadaralaimu horadia na kalenda ai ba tore. Bema o laloamu hora momo o haoremu mani sediual ta ba karaia. Una sediual ai mai anidia bada ḡaudia ba tore guna, murinai moale karadia ba tore. Bena una sediual ba badinaia totona Iehova ba noia baine durumu. Una dala amo oi na mai emu nega sibomu emu Baibul stadi, ruma bese tomadiho, kongrigeisin heboudia, bona Iehova ihesiai henina totona haroro bona hahediba ḡaukaradia ba kara. Danu emu moale karana na bo moalelaiamu badina Iehova o atoa guna.

18-19. Edena dalai baita hahedinaraia ita na Iehova mo ta toma henia dihomu?

¹⁸ Aposetolo Petero ese Satana ena tanobada dokona bona tanobada matamatana e herevalaia murinai, ia na eto: “Egu lalokau taumui e, ini ḡau o narimu dainai ba goada balaheni, hedaro-bouboumui ai baine davarimui, asi toutoumui bona asi kereremui ia vairanai.” (2 Pet. 3:14) Bema ita na una sisiba heḡereḡerena tauani bona lauma dalanai baita ḡoeva, ita na ta hahedinaraiamu Iehova mo ta toma henia dihomu.

¹⁹ Satana bona ena tanobada ese hanaihanai ita na be tohodamu mai anina bada ḡaudia baita lalo maraḡi. (Luka 4:13) Ena be hekou ḡaudia idauidau bae vara, to namona na tau ta o ḡau ta ese Iehova gabuna basine abia. Laloda baita hadai Iehova mo baita toma henia diho!