1. Dahaka dainai ta moale bada hereamu?

TA MOALE bada hereamu badina ita na Iehova ena Witnes taudia! Eda haroro bona hahediba ḡaukarana amo Dirava ladana na ta hahedinaraiamu. Ta moalemu bema ‘mauri hanaihanai e uramu kudou maoro tauna’ ta, na ta duruamu Iehova ena hesiai tauna ai e laomu. (Apos. 13:48, NWT) Iseda hemami na Iesu ena heḡereḡerena, ia na e ‘moale’ ena hahediba ese edia haroro ḡaukara ai e davari ḡaudia e hamaorolaia neganai.​—Luka 10:1, 17, 21.

2. Edena dalai baita hahedinaraia eda haroro ḡaukara na ta laloa badamu?

² Eda haroro ḡaukara na ta laloa badamu. Aposetolo Paulo ese Timoteo e hamaoroa, eto: “Sibomu nahuamu ba tohoa, bona emu hahediba herevadia nahuadia ba toho.” Bona ma eto: “Unu ba kara toma, bena sibomu ba hahemauri, bona bae kamonai henimu taudia danu ba hamauridia.” (1 Tim. 4:16) Una dainai, eda haroro ḡaukara amo taunimanima na bae mauri diba. Siboda eda kara nahuadia baita toho badina ita na Dirava ena Basileia henunai baita nohomu taudia. Ta uramu nega iboudiai eda kara amo Iehova baita hanamoa bona eda kara na ta harorolaiamu sivarai namona ida baine heḡereḡere. (Fili. 1:27) Eda ‘hahediba herevadia nahuadia baita toho’ totona, haida do asita haroro henidia neganai baita heḡaeḡae namonamo bona Iehova ena heduru baita noia.

3. Taunimanima ese Basileia sivaraina be ede e laloa tomamu? Haheitalai ta a gwauraia.

³ Ena be eda haroro ḡaukara na baita karaia goadagoadamu, to eda teritori ai momo ese Basileia sivaraina na basie abia daemu. Mani Tadikaka Georg Lindal ena ekspiriens aita laloa. Laḡani 1929 ela 1947 ai, ia na Iceland ena gabu ibounai lalonai sibona e harorova. Ena be pablikeisin tausen momo e hariharilai, to ta ese hereva momokani na se abia dae. Ia na e gwa: “Haida ese  hereva momokani na e dadaraia, a momo ese hereva momokani na asie laloa bada.” Danu ena be Gilead Skuli amo misinari haida e siaidia unuseniai haroro ḡaukara e karaia, to laḡani 9 muridiai Iceland taudia haida mo edia mauri Iehova enai e gwauhamatalaia bona e bapatiso. *

4. Ede baita hemami tomamu bema taunimanima ese sivarai namona basie abia daemu?

⁴ Taunimanima ese sivarai namona asie abia daemu neganai ta lalohisihisimu. Eda hemami na Paulo ena heḡereḡerena, Iuda taudia momo ese asie abia dae Iesu na gwauhamata Mesiana neganai, ia na e gwa: ‘Egu lalo-hisihisi na bada herea, daragu danu e doko.’ (Roma 9:1-3) Ena be ba hekwarahi bona emu Baibul stadi dainai ba ḡuriḡuri, to basine goada bona ena stadi baita hadokoa be ede bamona? O bema oi na ta do so durua e bapatiso be ede bamona? Reana emu hemami na be dikamu bona bo laloamu Iehova ese emu hesiai ḡaukara na se hanamoa, a? Ina atikol ai henanadai rua baita haerelaimu: (1) Dahaka ese ta ena hesiai ḡaukara ena namo e hahedinaraiamu? (2) Ta haroromu neganai dahaka baita laloatao na namo?

5. Dahaka dainai Iehova dainai ta karamu ḡaukaradia anidia na ita ese ta lalomu dalanai asie varamu?

⁵ Baibul ese Dirava ena ura e karaiamu tauna na ini e herevalaia toma: “Ḡau idoidiai ia baine kara be anidia do bae vara ḡoevaḡoeva.” (Sal. 1:3) To, una ese na se hahedinaraiamu Iehova dainai ta karamu ḡaudia iboudiai, anidia na hanaihanai ta lalomu dalanai be varamu. Taunimanima edia mauri na “hekwarahi” amo e honu, badina ita iboudai na dia ḡoḡoevadae. (Iobu 14:1) Danu, e inai henidamu taudia ese eda hesiai ḡaukara ena heau dalana na reana be kouamu. (1 Kor. 16:9; 1 Tes. 2:18) Una dainai, Iehova be ede e diba tomamu eda hesiai ḡaukara na ta karaia namonamomu? Una henanadai baita haerelaia totona, mani Baibul ena hahekau herevadia haida aita herevalai.

6. Iehova be ede e diba tomamu eda hesiai ḡaukara na ta karaia namonamomu?

⁶ Iehova ese eda hekwarahi bona haheauka karana na e laloa badamu. Iehova matanai eda ḡaukara na ta karaia namonamo, bema mai eda goada bona lalokau ida una ḡaukara ta karaia, herevana haida e kamonai eiava lasi. Paulo na e gwa: “Dirava na asi ena kara gageva-gageva; emui ḡaukara bona emui lalokau ia ladana dainai vada o hahedinarai, helaḡa taudia o durudiava bona o durudiamu, ia ese basine lalo boio.” (Heb. 6:10) Iehova ese eda hekwarahi bona eda lalokau na e laloataomu, ena be eda hekwarahi anina na se vara. Una dainai, Paulo ese Korinto taudia e hamaorodia herevana na oiemu ai danu momokani, e tomu: “Emui hekwarahi Lohiabada lalonai na asio hekwarahilaia kavamu,” ena be emu hekwarahi anina na o laloa heḡereḡerena se vara.​—1 Kor. 15:58.

7. Aposetolo Paulo ese ena haroro ḡaukara e herevalaia dalana amo dahaka ta dibamu?

 ⁷ Aposetolo Paulo na misinari tauna namona bona gabu momo ai kongrigeisin matamatadia momo e hamatama. To, e ura baine hahedinaraia ia na Keriso ena hahediba tauna ta neganai, dia taunimanima hida e durudia Keriso ena hahediba ai ela e herevalaia. To Paulo ese ia e laloa kerereva taudia na e hamaorodia, e gwa: “Na hekwarahi bada.” (2 Kor. 11:23) Paulo heḡereḡerena, baita helalotao Iehova ese eda hekwarahi bona haheauka karana na e laloa badamu.

8. Eda hesiai ḡaukara ai dahaka baita laloatao na namo?

⁸ Eda hesiai ḡaukara ese Iehova e hamoaleamu. Iesu ese hahediba taudia 70 e siaidia Basileia sivaraina bae harorolaia bona edia haroro e haorea murinai idia na “mai moaledia ida” e lou. Dahaka dainai e moale? Idia na eto: “Lauma dikadia ese ai eremai e kamonai, oi ladamu dainai.” To, Iesu ese edia lalohadai e hamaoromaoroa, eto: “Lauma dikadia ese e kamonai henimuimu na basio moalelaia; a ina hari ba moalelaia: ladamui na guba ai vada e torea.” (Luka 10:17-20) Iesu na mai dibana dia hanaihanai edia hesiai ḡaukara ai hahenamo unu bamodia bae davari. Ita asi dibada Iesu ena hahediba taudia ese matamanai e hereva henidia taudia hida na Keriso ena hahediba ai ela. Namona na hahediba taudia bae moale badina na dia e haḡuḡuru ḡaudia daidiai, to Iehova ese edia hekwarahi e moalelaia dainai.

9. Galatia 6:7-9 heḡereḡerena, bema eda hesiai ḡaukara ai baita haheaukamu dahaka be varamu?

⁹ Bema eda hesiai ḡaukara ai baita haheaukamu, mauri hanaihanai baita abiamu. Mai kudouda idoinai ida Basileia uhena baita hadoamu bona baita ḡeiamu neganai, ita ese danu “lauma” ena baita hadoamu, anina na eda mauri ai Dirava ena lauma helaḡa ena heduru baita abiamu. Bema basita ‘hesiku’ eiava basita “manoka,” herevana ta baita durua Iehova baine hesiai henia o lasi, to Iehova na e gwauhamata mauri hanaihanai baine henida.​—Galatia 6:7-9 ba duahi.

10. Dahaka dainai eda hesiai ḡaukara ai haida be kamonaimu, haida be lasi?

¹⁰ Ta ese sivarai namona baine abia dae bema ia na kudou-maoro tauna. Una na Iesu ese uhe ihadona tauna ena parabole ai e hahedinaraia, uhe ihadona tauna ese uhe na tano idauidau ai e negedia, to tano namona ai e moru uhena mo e tubu. (Luka 8:5-8) Iesu na e gwa tano idauidau na taunimanima kudoudia e laulaulaia, idia ese “Dirava ena hereva” be kudoudia amo bae abia dae eiava lasi. (Luka 8:11-15) Uhe ihadona tauna heḡereḡerena, ita ese eda ḡaukara anina ihavarana karana na basita biagua dibamu, badina asi dibada daika be kudou-maoro tauna. Iseda maduna na, Basileia sivaraina uhena dounu baita hadoa. Aposetolo Paulo ese e gwauraia heḡereḡerena, “ta ta davadia bae abi, edia hekwarahi heḡereḡerena,” dia ena ḡaukara amo e varamu anina heḡereḡerena.​—1 Kor. 3:8.

11. Dahaka dainai Noa na “kara maoromaoro” e harorolaia tauna namona? (Rau 1 laulauna ba itaia.)

¹¹ Iehova ena Witnes taudia ginigunadia edia negai, haida na asie urava bae kamonai. Heḡereḡere, laḡani 40 o 50 lalodiai, Noa na “kara maoromaoro” e harorolaia tauna. (2 Pet. 2:5) Ta dibamu, Noa na e urava haida ese ia e harorolaiava herevana bema abia dae, to Iehova ese una na se gwauraia. To Dirava ese Noa e hamaoroa lagatoi baine karaia neganai, e gwa: “Oi na lagatoi ai ba gui, oi bona natumu bona adavamu bona ravamu hahinedia.” (Gen. 6:18) Iehova ese lagatoi ena bada Noa e hamaorolaia neganai, Noa na e laloparara taunimanima  momo ese ena hereva na basie kamonaimu. (Gen. 6:15) Bona momokani, una daḡedaḡe tanobadana ai ta ese Noa ena haroro herevana se abia dae. (Gen. 7:7) Iehova be e lalo Noa ese ena haroro ḡaukara be se karaia namonamo, a? Lasi! Dirava matanai Noa ese ena haroro ḡaukara na e karaia namonamo, badina Iehova ese e hamaoroa heḡereḡerena e kara.​—Gen. 6:22.

12. Edena dalai peroveta tauna Ieremia ese ena hesiai ḡaukara na e moalelaia, ena be taunimanima na asie urava bae kamonai bona e daḡedaḡeva?

¹² Peroveta tauna Ieremia danu laḡani 40 mai kahana lalodiai e haroro, ena be taunimanima na asie urava bae kamonai bona e daḡedaḡeva. Inaina edia “gwau-gwau bona hekirikirilai” karana dainai e lalomanoka, bona e ura ena hesiai ḡaukara baine rakatania. (Ier. 20:8, 9) To, Ieremia na se hesiku! Dahaka ese e durua lalohadai kereredia e dadarai bona ena hesiai ḡaukara e moalelaia? Ia ese mai anina bada ḡaudia rua e lalodia. Ginigunana, Dirava ena hereva, Ieremia ese e harorolaia herevana, na “nega vaira ḡaudia bona helaro ḡaudia.” (Ier. 29:11) Iharuana, Ieremia ese Iehova ladana na e harorolaia. (Ier. 15:16) Ita danu ina tanobada dikana ai helaro namona e havaraiamu sivaraina bona Iehova ladana ta harorolaiamu. Bema unu mai anina bada ḡaudia rua baita lalodia badamu, eda hesiai ḡaukara na baita moalelaiamu herevana taunimanima bae kamonai eiava lasi.

13. Mareko 4:26-29 ai Iesu ena parabole amo dahaka ta dibamu?

¹³ Lauma dalanai tubu karana na taina ruana e varamu karana. Una na Iesu ese e gwauraia parabolena, uhe e hadoa to e mahuta tauna ena parabole ai e hahedinaraia. (Mareko 4:26-29 ba duahi.) Una tau ena ḡaukara anina na taina ruana e vara bona ia ese na se biagua. Oi danu hahediba ihalaona ḡaukarana ai emu ḡaukara anina na basine hedinarai haraḡamu, badina una na taina ruana e varamu karana bona kahadia na i’idaui’dau. Biru tauna ese e hado ḡaudia na ena ura heḡereḡerena ai basine hatubudiamu heḡereḡerena, ita ese eda Baibul stiuden na basita doridia ita ta uramu dalanai bae goada. Una dainai basio lalomanoka eiava basio hesiku bema idia na se goada haraḡamu. Biru ḡaukarana heḡereḡerena, hahediba ihalaona ḡaukarana ai baita haheauka na namo.​—Iak. 5:7, 8.

14. Edena haheitalai ese e hahedinaraiamu eda hesiai ḡaukara anina na taina ruana baine vara?

¹⁴ Teritori haida ai, eda hesiai ḡaukara anina na laḡani momo muridiai be hedinaraimu. Mani Gladys Allen bona varabouna Ruby edia ekspiriens aita laloa. Idia na laḡani 1959 ai Canada ena taoni maraḡina ta Quebec e siaidia regula painia ḡaukarana bae karaia. * Una hanua taudia bona Catholic dubu taudia ese taunimanima na e doridiava dainai Basileia sivaraina na asie urava bae kamonai. Gladys na e gwa: “Laḡani rua lalodiai ai na dina ta ta hora 8 ruma-ta-ruma-ta ḡaukarana a karaiava, to ta se urava baine kamonai. Taunimanima na e maiva edia iduara, to galasi amo ai e itamaiva neganai, ketin e kouava. To, ai na asia hesiku.” Gabeai, taunimanima edia kara na e haidau bona haida na e kamonai. Hari una taoni ai kongrigeisin na da toi.​—Isa. 60:22.

15. Korinto Ginigunana 3:6, 7 ese hahediba taudia ihalaodia ḡaukarana be ede e herevalaia toma?

¹⁵ Hahediba taudia ihalaodia ḡaukarana na pablisa iboudiai ese bae karaia ḡaukarana. Ita na mai dibada kongrigeisin taudia iboudiai ese ta bae durua diba ela bona baine bapatiso. (1 Korinto 3:6, 7 ba duahi.) Heḡereḡere, pablisa ta ese kamonai tauna na pepapepa eiava magasin ta be heniamu. Gabeai, una pablisa na dia heḡereḡere dainai pablisa ma ta be  noiamu una kamonai tauna baine lou henia. Bena ia ese Baibul stadi be hamatamaiamu. Bona pablisa idauidau be boiridiamu una stadi ai be helai vareaimu, bena idia ese dala idauidau ai stiuden be hagoadaiamu. Una stadi ai be helai vareaimu pablisa ta ta ese hereva momokani uhena na una stiuden enai be dairiamu. Unu amo Iesu ena hereva heḡereḡerena, stadi tauna e durua pablisa iboudiai na iena bapatiso dainai bae moale hebou diba.​—Ioa. 4:35-38.

16. Dahaka dainai emu hesiai ḡaukara na ba moalelaia diba ena be mai emu gorere eiava emu goada na dia heḡereḡere?

¹⁶ Bema oi na mai emu gorere o emu goada na dia heḡereḡere dainai hesiai ḡaukarana na basio habadaia dibamu be ede bamona? Ba kara diba ḡaudia daidiai dounu ba moale diba. King David bona ena tuari taudia ese edia ruma bese e hamauridia bona edia kohu na Amalek taudia amo e abi lou neganai, e vara ḡauna mani aita laloa. Tatau 200 na e hesiku bada herea dainai asie tuari, to e noho kohu e naridia. David bona ena tatau na tuari ai e kwalimu murinai, e haḡanidia tuari ai e abi kohudia na e noho tataudia ida bae hari heḡereḡere. (1 Sam. 30:21-25) Tanobada heḡeḡemadai ta karaiamu hahediba taudia ihalaodia ḡaukarana danu unuheto. Stadi tauna ta e duruamu mauri dalanai baine raka pablisadia iboudiai na una kara dainai bae moale diba.

17. Dahaka dainai Iehova baita tenkiu henia?

¹⁷ Iehova ese eda hesiai ḡaukara na mai ena lalokau ida e laloa badamu dainai ta tenkiu heniamu. Ia na mai dibana ita ese ta na basita doria diba sivarai namona baine kamonai bona Ia baine tomadiho henia. To, ia ese e itaiamu ḡauna na iseda hekwarahi bona eda lalokau, una dainai e hanamodamu. Bona eda hesiai ḡaukara ai eda ḡaukara baita moalelaia dalana e hadibadamu. (Ioa. 14:12) Ta diba momokanimu bema basita hesikumu Dirava ena lalonamo baita abiamu!