1-2. Pavapava rarua edia idau be dahaka, bona ededia henanadai baita herevalaimu?

MANI idaunegai e noho pavapavadia rarua edia sivarai aita lalodia. Ta be Israel ena iduhu ten basileiana e lohiaiava, a ta be Iuda ena iduhu rua basileiana e lohiaiava. Ena be nega idaudia ai e mauri, to dala momo ai idia na heheḡereḡere. Unu pavapava raruosi ese Iehova e gwau-edeede henia bona ena taunimanima e hakaudia kerere. Idia raruosi ese kaivakuku e tomadiho heni bona e ala-ala. To, ḡau tamona ai ini tatau raruosi na i’idau. Idia ta be e kara dika ela bona e mase, to ta be e helalo-kerehai bona ena kara dika rohorohodia na e hegwautao. Idia be daidia?

² Ta be Ahaba, Israel pavapavana, bona ta be Manase, Iuda pavapavana. Ini tatau raruosi edia kara ena idau ese mai anina bada ḡauna ta, helalo-kerehai, anina be hadibadamu. (Apos. 17:30; Roma 3:23) Helalo-kerehai anina be dahaka, bona edena dalai baine hedinarai diba? Una baita dibaia na namo, badina ta kara dikamu neganai ta uramu Iehova ese eda dika baine gwautao. Ini henanadai haeredia baita diba totona, ita ese unu pavapava raruosi edia mauri bona edia haheitalai amo baita dibamu ḡaudia baita herevalaimu. Bena Iesu ese helalo-kerehai e hahedibalaia dalana baita herevalaiamu.

3. Ahab be pavapava ede bamona?

³ Ahaba na Israel ena iduhu ten basileiana ena pavapava namba 7. Ia ese Iesebel e adavaia, Iesebel na not kahana ena taḡa bada hanuana Sidono pavapavana natuna. Una headava dainai kohu momo na Israel tanona ai e vareailai. To una headava ese danu Israel besena edia hetura karana Iehova ida e hadikaia. Iesebel na Baal e tomadiho heniava hahinena, bona Ahaba  lalona e ania una tomadiho dika hereana, ariara karadia bona natu e bouboulaidiava tomadihona, na Israel tanona ai e vareailaia. Iesebel kwin ai ela neganai, Iehova ena peroveta taudia na asie noho namonamova. Ia ese peroveta taudia momo e hamasedia. (1 Han. 18:13) Ahaba sibona mo na “Iehova vairanai e kara havara; e gunalaia taudia iboudiai na ia ese e hereadia.” (1 Han. 16:30) Iehova ese Ahaba bona Iesebel edia kara na e itadia, bona mai dibana idia be dahaka e kara. To Iehova na hebogahisi Diravana dainai, ia ese peroveta tauna Elia e siaia Iena taunimanima baine hadibadia edia kara bae haidau haraḡa na namo. To Ahaba bona Iesebel na asie ura bae kamonai.

4. Iehova be e gwa Ahaba enai be dahaka baine vara, bona Ahaba be dahaka e kara?

⁴ Dokonai, Iehova ena haheauka karana Ahaba enai na e ore. Ia ese Elia e siaia Ahaba bona Iesebel ediai baine vara ḡauna e hamaorolaidia. Edia ruma bese ibounai na bae mase. Elia ena hereva ese Ahaba kudouna e gwadaia! Una hekokoroku tauna na sibona e “hahemanau.”​—1 Han. 21:19-29.

5-6. Dahaka ese e hahedinaraiamu Ahaba na se helalo-kerehai momokani?

⁵ Ena be una negai Ahaba na sibona e hahemanau, to gabeai ena kara ese e hahedinaraia ia na se helalo-kerehai momokani. Ena basileia amo Baal tomadihona na se kokia. Bona Iehova itomadiho henina karana na se habadaia. Ahaba na dala ma haida ai danu e hahedinaraia ia na se helalo-kerehai.

⁶ Gabeai, Ahaba ese Iuda pavapava namona Iehosafat e boiria, ia baine bamoa Suria taudia bae tuari henidia neganai, Iehosafat ese e hamaoroa Iehova ena peroveta tauna bae nanadaia guna. Matamanai, Ahaba na se ura una lalohadai baine abia dae, e gwa: “Tau ta do noho, iena amo Iehova ena hereva baitama tahua. . . . A lau ese na inai heniamu, badina be ia na nega ta ḡau namodia egu ai se perovetalai, a ḡau dikadia mo.” Ena be unu e gwau toma, to idia ese peroveta tauna Mikaia e hereva henia. Momokani, una peroveta tauna ese Ahaba enai baine vara ḡau dikadia e perovetalai! Gwau-edeede tauna Ahaba na Iehova ese ena dika baine gwauatao dalana se tahua, to una peroveta tauna na dibura ai e atoa. (1 Han. 22:7-9, 23, 27) Ena be Ahaba ese Iehova ena peroveta tauna e hadiburaia, to ienai e perovetalai herevadia na e ḡuḡuru. Gabeai e vara tuarina lalonai, Ahaba na e alaia.​—1 Han. 22:34-38.

7. Ahaba e mase murinai Iehova ese ia be ede e herevalaia toma?

⁷ Ahaba e mase murinai, Iehova ese ia e laloa dalana e hahedinaraia. Pavapava namona Iehosafat na tuari amo e lou neganai, Iehova ese peroveta tauna Iehu e siaia e sisiba henia, badina Ahaba ida e ḡaukara hebou. Iehova ena peroveta tauna na e gwa: “Kara dika taudia o durudiamu bona Iehova e inai heniamu taudia o ura henidiamu be maoro a?” (2 Sis. 19:1, 2) Mani a laloa: Bema Ahaba na bema helalo-kerehai momokani, peroveta tauna ese ia na basinema gwauraia Iehova e inai heniamu kara dika tauna. Momokani, ena be Ahaba na ena kara dika dainai e lalohisihisi, to ia na se helalo-kerehai momokani.

8. Ahaba ena haheitalai amo dahaka ta dibamu helalo-kerehai karanai?

⁸ Ahaba ena haheitalai amo dahaka ta dibamu? Ahaba na Elia ena amo iena ruma bese ibounai enai baine vara ḡauna e kamonai neganai, matamanai sibona e hahemanau. Una na kara namona. To gabeai e kara ḡaudia ese e hahedinaraia ia na kudounai se helalo-kerehai. Una dainai, helalo-kerehai anina na dia nega kwadoḡi lalonai ba lalohisihisi karana mo. Mani haheitalai ma ta aita laloa, una ese baine duruda helalo-kerehai momokani anina baita lalopararalaiamu.

9. Manase be pavapava ede bamona?

⁹ Laḡani 200 murinai, Manase na Iuda ena pavapava ai ela. Iena kara dika ese Ahaba ena kara dika na e hereaia! Baibul na e gwaumu: “Iehova vairanai e kara havara-havara, bona e habadua.” (2 Sis. 33:1-9) Manase ese dirava koikoidia edia ihaboulaina patadia e kara, bona Iehova ena dubu helaḡa lalonai kaivakuku au-tubuana ta e haginia; una au-tubuana na dirava koikoi hahinena laulauna. Mari bona babalau karadia idauidau e kara. Danu “asi edia kerere taudia hutuma raradia e hahebubu.” Ia ese taunimanima momo na daḡedaḡe dalanai e hamasedia bona dirava koikoidia baine tomadiho henidia totona, natuna memerodia na “haḡole-oho boubouna” ai e halaodia.​—2 Han. 21:6, 7, 10, 11, 16.

10. Edena dalai Iehova ese Manase e matahakani henia, bona Manase be dahaka e kara?

¹⁰ Ahaba heḡereḡerena, Manase na se ura peroveta taudia amo Iehova ena hahediba herevadia baine kamonai. Dokonai, “Iehova ese Asuria pavapavana ena tuari oreana biagudia na [Iuda] ihadikadia totona e siaidia lao; bena idia ese Manase na igau amo e abia, bona auri labora-labora gadeadia ai e ḡuia bena Babulono e laohaia.” Unuseniai, tano idauna ai e hadiburaia neganai, Manase na enai e vara ḡaudia e lalodia dobu. Ia na “senena edia Dirava vairanai e hahemanau herea.” Ma ḡau haida danu e kara. “Ia ese Iehova, ena Dirava, ena hahenamo e tahua ena ḡuriḡuri ai.” Ia ese Dirava e ḡuriḡuri henia loulouva. Bona una kara dika tauna ese ena kara na e haidaua. Iehova na “ena Dirava” ai e halaoa bona e ḡuriḡuri henia goadagoada.​—2 Sis. 33:10-13.

11. Sisiḡa Iharuana 33:15, 16 heḡereḡerena, edena dalai Manase ese e hahedinaraia ia na e helalo-kerehai momokani?

¹¹ Gabeai, Iehova ese Manase ena ḡuriḡuri na e haerelaidia. Iehova na Manase ena ḡuriḡuri amo e diba ia na vada e helalo-kerehai momokani. Manase ena noinoi loulou karana dainai Iehova ese ena king dagina e henia lou. Manase ese una hahenamo na e ḡaukaralaia ena helalo-kerehai momokani karana e hahedinaraia. Ahaba ese se karaia ḡauna na ia ese e karaia. Ena kara e haidau, tomadiho koikoi karana e haorea bona tomadiho momokani karana e haginia lou. (2 Sisiḡa 33:15, 16 ba duahi.) Unu baine kara toma totona baine boga auka bona baine abidadama na namo, badina laḡani daudau lalonai ia ese ena ruma bese, ia e sisiba heniava taudia, bona ena taunimanima na e hakaudia kerere. To hari, Manase na ena mauri laḡanidia oredia lalodiai, e ura e kara ḡaudia dikadia baine hanamodia lou. Una dainai, ena haheitalai namona ese tubuna Iosia na e durua pavapava namona ai bainela.​—2 Han. 22:1, 2.

12. Manase ena haheitalai amo dahaka ta dibamu helalo-kerehai karanai?

¹² Manase ena haheitalai amo dahaka ta dibamu? Ia na sibona e hahemanau, bona ma kara  haida e kara. E ḡuriḡuri, Dirava ena hebogahisi e noia. Bona ena kara e haidaua. E ḡaukara goada e kara kereredia baine hanamodia, Iehova itomadiho henina karana e goadalaia bona ma haida e durudia unu bae kara toma. Manase ena haheitalai ese kara dika badadia e kara taudia na e durudiamu bae abia dae, Iehova ese edia dika na baine gwautao diba. Una ese e hadibadamu Iehova na namo, bona ia na dika e gwautaomu Diravana. (Sal. 86:5) Helalo-kerehai momokani taudia edia dika na baine hegwautao diba.

13. Helalo-kerehai karana ai haheitalai ta mani a gwauraia.

¹³ Manase na dia ena kara dika mo e lalohisihisilaia to kara ma haida danu e kara. Una ese helalo-kerehai karanai mai anina bada ḡauna ta e hadibadamu. Mani ina haheitalai a laloa: Oi na ola stoa, parao ta ba hoia. To stoa tauna ese parao basinema henimu to butter bema henimu. Oi bo moalemu, a? Lasi! Ena be stoa tauna na be gwaumu una butter na parao e gabulaiamu ḡauna, reana oi na dounu bo lalohisihisimu, ani? Una heḡereḡerena, Iehova ese kara dika taudia na e noidiamu bae helalo-kerehai. Bema kara dika tauna na ena kerere dainai e lalohisihisimu, una na namo. Hemami unu hetomana na helalo-kerehai toana ta, to una sibona mo na dia heḡereḡere. Dahaka danu baine kara? Iesu ese e gwauraia parabolena amo helalo-kerehai karana ai ḡau ma haida baita dibamu.

14. Iesu ena parabole ai, kara havara merona be edena dalai e hahedinaraia ia na e helalo-kerehai?

¹⁴ Iesu ese Luka 15:11-32 ai e kara havara merona ta sivaraina e gwauraia. Mero ta na tamana e gwau-edeede henia, ruma e rakatania, bona “tano daudauna” ta ela. Unuseniai matabodaḡa bona lebulebu maurina e maurilaia. To mauri e auka neganai, e helai bena e lalohadai. E laloparara tamana ena rumai e nohova neganai ena mauri na namo herea. Iesu na e gwa, una mero na “lalona e parara.” Lalona e hadaia baine lou bainela bona tamana baine noia ena dika baine gwauatao. Kerere momo e kara karana e lalopararalaia na mai anina bada. To una mo be heḡereḡere, a? Lasi. Ena mauri baine haidaua na namo!

15. Iesu ena parabole ai e gwauraia boio merona ese helalo-kerehai momokani karana be ede e hahedinaraia toma?

¹⁵ E boio merona ese helalo-kerehai momokani karana e hahedinaraia. Gabu daudauna amo ena hanua e lou henia. Tamana ida e hedavari neganai, tamana e hamaoroa, e gwa: “Lau na Guba Biaguna vairanai bona oi vairamu ai vada na kara havara; lau na dia heḡereḡere oi natumu ba gwauraigu.” (Luka 15:21) Una mero na mai kudouna ibounai ida ena kerere e gwaurai hedinarai karana ese e hahedinaraia, ia na e ura ena hetura karana Iehova ida baine hanamoa lou. Bona e diba iena kara ese tamana danu e hahisia. Ia na e ura baine ḡaukara  goada tamana ena lalonamo baine abia lou, bona e ura tamana ese hesiai taudia ma haida heḡereḡeredia baine kara henia! (Luka 15:19) Ina parabole na dia sivarai ta mo. To ina parabole amo ta dibaiamu ḡauna ese kongrigeisin elda taudia bae durudia diba, kerere badana e karaia tauna ena helalo-kerehai karana bae dibaia totona.

16. Dahaka dainai elda taudia ese ta ena helalo-kerehai karana bae dibaia na auka?

¹⁶ Elda taudia ese kara dika badana ta e karaia tauna ena helalo-kerehai momokani karana bae dibaia na dia haraḡa. Dahaka dainai? Badina elda taudia ese kudou na se itamu, una dainai tadikakadia ena kara amo bae itaia, ia ese ena kara dika na e rakatania vaitani. Nega haida, ta ena kara dika na bada herea, una dainai elda ida be herevaherevamu neganai, basie dibamu ia be e helalo-kerehai momokani eiava lasi.

17. (a) Edena haheitalai ese e hahedinaraiamu ta na ena kerere baine lalohisihisilaia mo na dia helalo-kerehai momokani toana? (b) Korinto Iharuana 7:11 ena hereva heḡereḡerena, helalo-kerehai momokani tauna be dahaka baine kara?

¹⁷ Mani ina haheitalai a laloa. Tadikaka ta na laḡani momo lalonai e heudahanai. Heduru na se tahu, to ena matabodaḡa karana na adavana, turana, bona elda ediai e hunia. Bena gabeai, elda taudia ese ena kerere e dibaia. Bona ena kerere ihamomokanina ḡaudia e hamaorolaia neganai, ia na e gwau hedinarai unu na e kara bona e sori bada herea. Una be helalo-kerehai momokani toana, a? Una kerere bae hamaoromaoroa elda taudia na dia una tadikaka na ena kara dika dainai e lalohisihisi karana mo bae laloa. To namona na bae itaia ia na helalo-kerehai karadia ma haida danu baine kara. Badina una tadikaka ena kara dika na dia nega tamonai mo e karaia to laḡani daudau lalonai e karaia. Bona sibona ese ena kerere na se gwauraia hedinarai, to ta ese e hahebadelaia. Una dainai elda taudia ese kerere tauna na ena lalohadai, hemami, bona kara e haidaua vaitani karana bae itaia na namo. (2 Korinto 7:11 ba duahia.) Reana kerere tauna ese ena kara na nega daudau lalonai be haidaua dibamu. Una dainai kongrigeisin murimuri ai bae atoa na maoro.​—1 Kor. 5:11-13; 6:9, 10.

18. Edena dalai murimuri ai e atoa tauna ese helalo-kerehai momokani karana baine hahedinaraia diba, bona una dainai dahaka baine vara diba?

¹⁸ Murimuri ai e atoa tauna ese baine hahedinaraia ia na e helalo-kerehai momokani bema baine hebou hanaihanai bona elda edia sisiba, ḡuriḡuri bona stadi karana ai, baine badinaia hanaihanai. Danu namona na ia bae dibaḡania ḡaudia o negadia baine dadarai unu amo ia e karaia kara dikana basine karaia lou. Bema be hekwarahimu iena hetura karana Iehova ida be hanamoamu, Iehova ese ena dika be gwauataomu bona elda taudia ese kongrigeisin ai be abia vareai loumu. Momokani, elda taudia ese  kerere e hamaoromaoromu neganai, namona na kerere ta ta bae haeordia namonamo, bona basie hahemaoro auka.

19. Helalo-kerehai momokani anina be dahaka? (Esekiel 33:14-16)

¹⁹ Tame itaia heḡereḡerena, ta na e karaia kara dikana dainai baine sori mo na dia heḡereḡere. To namona na ena lalohadai bona hemami baine haidaua momokani, bona e karamu ḡaudia amo baine hahedinaraia ia na vada e helalo-kerehai. Anina na dala kererena baine rakatania bona Iehova ena dala ai ma baine raka lou. (Esekiel 33:14-16 ba duahi.) E kara dika tauna ese baine laloa bada ḡauna na, ena hetura karana Iehova ida baine hanamoa lou.

20-21. Kara dika badana e karaia tauna be ede baita durua toma diba?

²⁰ Iesu ese ena hesiai ḡaukara ai e karaia mai anina bada ḡauna ta na ini e gwauraia toma: “Kara dika taudia bae helalo kerehai totona nama.” (Luka 5:32) Ita danu unu baita kara toma na namo. Bema baita diba turada namona ta na kara dika badana ta e karaia. Dahaka baita kara be namo?

²¹ Turada na basita duruamu bema ena kara dika baita huniamu. Ena kara dika na basita hunia hanaihanai dibamu badina Iehova na ḡau iboudiai e itamu. (Her. 5:21, 22; 28:13) Turamu ba durua totona ba hadibaia elda taudia na e uramu ia bae durua. Bema turamu na basine uramu elda taudia ediai ena kerere baine gwaurai hedinarai, namona na oi ese elda taudia ba hadibadia, unu amo bo hahedinaraiamu oi na o uramu ia ba durua. Bema heduru basine abimu ena hetura karana Iehova ida na be dikamu!

22. Atikol gabenai dahaka baita herevalaimu?

²² To, bema ta na nega daudau lalonai kara dika bada hereana e karaia dainai elda taudia ese murimuri ai e atoa be ede bamona? Anina be idia ese hebogahisi karana se hahedinaraia, a? Atikol gabenai, Iehova na mai ena hebogahisi ida kara dika taudia e matahakani henidiamu dalana baita itaiamu bona edena dalai ita ese una kara baita tohotohoa diba.