1922—Laḡani 100 Gunanai
“DIRAVA . . . ese vada e . . . hakwalimuda, . . . Iesu Keriso bagunai.” (1 Kor. 15:57, King James Version) Una siri na laḡani 1922 ena laḡani sirina ai ela, Bible Student taudia e hagoadadia Iehova ese edia abidadama dainai ahudia be henimu. Una laḡani lalonai, Iehova ese unu e haroro goadagoadava taudia na ahudia e heni. Basileia ena hereva momokani bae halasia totona sibodia edia buka e printi bona e kara neganai, Iehova ese idia na e hanamodia. Bona laḡani 1922 ai, Iehova ese iena taunimanima na dounu e hanamodiava. Cedar Point, Ohio, U.S.A. ai, Bible Student taudia na e hegogo bona edia hebouhebou badana ta e abia. Una nega amo ema bona hari, una hebouhebou ai e vara ḡauna ese Iehova ena orea taudia edia ḡaukara e durua.
“LALOHADAI NAMONA TA”
Momo na haroro ḡaukarana e karaiava dainai, tadikaka bona taihu ese pablikeisin momo bae abi na namo. Brooklyn Betele ai tadikaka na magasin e karava, to dounu kampani ma haida e ḡaukaralaidiava edia buka bona magasin bae printidia totona. Nega ta, unu kampani na hua haida lalodiai haroro ḡaukarana ai bae ḡaukaralai bukadia iprinti-dia ai asie heḡereḡere dainai, Tadikaka Rutherford ese Robert Martin, faktori e nariava tadikakana, e nanadaia bema heḡereḡere idia sibodia ese buka bae printi diba.
Brooklyn, New York, Concord Street ai faktorina
Tadikaka Martin na una nega e laloatao neganai e gwa, “Una na lalohadai namona ta, badina buka baita kara eiava baita printidia totona faktori ta baita haginia na namo.” Tadikaka ese 18 Concord Street Brooklyn ai speis ta e rentia bona bae ḡaukaralai diba misinidia e abi.
To taunimanima haida na asie moaleva badina tadikaka na da sibodia buka bae printi diba. Eda buka e printiva kampanina ena president na ela faktori e ha itaia. Ia na e gwa: “Ena be hari mai emui buka iprintidia misini idauidau, to umui na asi dibamui ede ba ḡaukaralai toma. Ini misini na hua siks muridiai be dikamu.”
Tadikaka Martin na e gwa, “Una tau ena hereva na reana momokani, to ai na a diba Iehova ese ai na baine durumai diba; bona momokani una na e vara.” Tadikaka Martin ena hereva na maoro. Buka iprintina misinina ese dina tamona lalonai buka 2,000 e printiva.
Faktori ai, misini e ḡaukaralaiva taudia na printi misinidia badidiai gigini
REIDIO AMO TAUNIMANIMA TAUSEN MOMO A HARORO HENIDIAVA
Dia buka mo e printiva, to Iehova ena taunimanima ese sivarai namona bae harorolaia dalana matamatana ta e hamatamaia, una na reidio amo e harorova. February 26, 1922, Sunday adorahi ai, Tadikaka Rutherford na nega ginigunana reidio amo e haroro. Ia ese reidio steisen KOG Los Angeles, California, U.S.A. ai, ina tok ladana “Millions Now Living Will Never Die” e heni.
Taunimanima 25,000 heḡereḡerena ese una program e kamonaia. Idia haida na Tadikaka Rutherford enai edia revareva amo edia tenkiu herevadia e siai. Una revareva ta na Willard Ashford ena revareva, ia na Santa Ana, California ai e nohova. Ia ese Tadikaka Rutherford e tenkiu henia una tok namona e heni dainai. Bena ia na ma e gwa: “Egu ruma ai gorere taudia na tatoi dainai ruma na basie rakatania diba, una dainai ena be boma mai gabu kahirakahirana ta ai tok boma henia, ai na basiama vasi diba emu tok baia kamonaia totona.”
Una murinai, tadikaka na reidio amo tok momo e heniva. Laḡani 1922 dokonai, The Watch Tower na ini e gwa toma, kahirakahira “taunimanima 300,000 mai kahana ese reidio amo sivarai namona e kamonaia.”
Bible Student taudia na taunimanima edia revareva bona hereva ese e hagoadadia dainai, disisen e karaia Staten Island ena gabu ta ai reidio steisin ta bae haginia, una gabu na dia daudau Brooklyn Betele amo. Vaira laḡanidia ai, Bible Student taudia ese una reidio steisin ladana, WBBR, e ḡaukaralaia Basileia sivaraina namona bae harorolaia totona.
“ADV”
June 15, 1922 ena The Watch Tower ese hahediba herevana ta e halasia, eto September 5 bainela 13, 1922, Cedar Point, Ohio ai, hebouhebou badana ta baine heabi. Bible Student taudia na Cedar Point ai e ginidae neganai, e moale dikadika.
Tadikaka Rutherford na ena tok ginigunana ai kamonai taudia e hamaorodia, eto: “Na abia dae momokanimu, Lohiabada ese . . . ina hebouhebou na be hanamoamu bona tanobada ai taunimanima momo herea ese sivarai namona be harorolaiamu, dia guna heḡereḡerena.” Una hebouhebou ai tok e heni taudia ese tadikaka bona taihu e hagoadadia bae haroro totona.
Laḡani 1922 Cedar Point, Ohio, hebouhebouna ela taudia
Bena Friday, September 8 ai, una hebouhebou ela taudia 8,000 heḡereḡerena na hebou gabuna ai e vareai bona e ura badava Tadikaka Rutherford ena tok bae hakala henia. E urava bae diba ina leta “ADV” anina be dahaka, badina idia e vavedia pepana ai unu leta e tore. Edia helai gabudia ai e helaiva neganai, reana idia momo ese stage daena ai e lokua dae palai badana na e itaia. Tadikaka ta ladana Arthur Claus na Tulsa, Oklahoma amo ela una hebouhebou. Ia na baine kamonai namonamo gabuna ta ai e helai, badina unu negai microphone o loudspeaker na lasi volium bae habadaia totona.
“Ai na a hakala ḡoevaḡoevava”
Taunimanima edia kamonai karana basie hadikaia totona, seamani na ena hahediba herevana ai e gwa Tadikaka Rutherford ena tok lalonai gabeai e maimu taudia na auditorium ai basie havareaidiamu. Daba 9:30 a.m. ai, Tadikaka Rutherford ese Iesu ena hereva, Mataio 4:17 ai e gwauraia, eto: “Guba basileiana vada eme kahira-kahira.” (King James Version) Taunimanima ese Basileia sivaraina bae kamonaia dalana e herevalaia neganai, ina e gwau toma: “Iesu ese e hahedinaraia iena mai negana ai ia ese ena taunimanima baine haboudia, idia na kara maoromaoro bona Iehova e badinaiamu taudia.”
Tadikaka Claus be stage kahana ai helai, ia ese una nega na e laloataomu, eto: “Ai na a hakala ḡoevaḡoevava.” To e gorerea dainai auditorium amo e raka lasi. Ia na se urava badina e diba bema ia be raka lasimu, basie ha vareaia lou dibamu.
Miniti haida muridiai, ena hemami na ma e namo lou. Ia na e gwa auditorium ma e raka henia louva neganai, taunimanima imadia e patapatava reḡena na e kamonai. Ia danu de moaleva! Bena lalona e hadaia guhi ai baine dae kau unu amo una tok namona baine kamonaia. Tadikaka Claus, una negai ia laḡanina na 23, na guhi ai bena dae gabuna ta e davaria. Ia na e gwa, atai windodia (skylight) na hehekoho bona unu e hakahikahidiava lalonai, “tok danu e kamonai namonamova.”
To dia Arthur sibona mo. Ia turana haida danu guhi ai dae kau. Ia turana ta, Frank Johnson, na Arthur e nanadaia eto, “Mai emu kaia maraḡina ta?”
Arthur e vasi gwa, “Oibe, mai egu.”
Bena Frank ese Arthur e vasi hamaoroa: “Ai na ama a ḡuriḡurimu mai ena kaia tauna ta baiama davaria. Oi una palai badana, e lokua dae ḡauna o itaiamu? Ia na saini ta, ini ikoko ai e kokoa kau. Judge ba kamonai henia namonamo. * Ia baine gwa, ‘ba haroro, ba haroro, ba haroro’ neganai, ini varo haniosi ba utudia.”
Una dainai, Arthur na kaia e dogoatao bona turana ida Tadikaka Rutherford ena hereva, palai varona baine utua neganai baine gwaurai herevadia dainai e nariva. Tadikaka Rutherford na ena tok dokona e lao heniava. Tadikaka Rutherford na e moale dikadika bona mai goadana ida vaitani bema lolo, eto: “Bavabidadama bona Lohiabada ena witnes taudia ai baola. Ba tuari ela bona tomadiho koikoidia iboudiai bae ore vaitani. Gabu iboudiai sivarai namona ba harorolaia. Taunimanima na bae diba Iehova na Dirava bona Iesu Keriso na Pavapava iboudiai edia pavapava bona Lohia iboudiai edia lohia. Ina dina na mai anina bada. Pavapava na vada e lohiamu! Umui emui ḡaukara be taunimanima iboudiai ba hadibadia. Una dainai, Pavapava bona iena Basileia daidiai ba haroro, ba haroro, ba haroro!”
Arthur na e gwa, ia bona tadikaka ma haida ese varo e utudia bena e lokua dae palaina na e papa diho bona saini ai e hetore ḡaudia e hedinarai ḡoevaḡoeva. Una saini ai ini leta “ADV” anidia e tore hedinarai: “Pavapava bona iena Basileia dainai ba haroro.”
MAI ANINA BADA ḠAUKARANA TA
Cedar Point ai e abia hebouhebouna ese tadikaka e durudia Basileia sivaraina iharorolaina ḡaukarana bae laloa bada, bona e ura badava una ḡaukara bae karaia taudia na e moaleva. U.S.A. Oklahoma amo, colporteur ta (hari e gwauraiamu painia taudia) na e gwa, “Ai a harorova gabuna ai taunimanima momo na coal mine ai e ḡaukarava, bona idia na ogoḡami taudia.” Ia na e gwa, nega momo taunimanima na Golden Age magasin amo sivarai e kamonaiva neganai, “idia na e taiva.” Ia na ma e gwa, “Ai na a moalemu badina idia na a hagoadadia.”
Unu Bible Student taudia ese Iesu ena hereva Luka 10:2 ai, na e laloa bada: “Uit na vada e lo ḡoevaḡoeva, to iutuna taudia na dia hoho.” Laḡani 1922 dokona ai, idia na lalodia e hadai gabu iboudiai Basileia sivaraina namona bae harorolaia goadagoada.
^ Nega haida Tadikaka Rutherford na e gwauraiava “Judge” badina ia na nega haida Missouri, U.S.A. ai judge ḡaukarana e karaiava.
