1. Hari ina negai, momo ese aonega korikorina ena boiboi be ede e laloa tomamu? (Hereva Lada-isidia 1:20, 21)

 TANO momo ai, nega momo tadikaka taihu na taunimanima e lao maimu gabudia ai eda buka bona magasin e hariharilaimu. Oi da una haroro dalana o karaia, a? Bema oibe, na dibamu ina Hereva Lada-isidia ai e torea laulau herevana na do laloamu​—aonega na ariara ai e boi lolomu, taunimanima ese ena sisiba bae kamonai totona. (Hereva Lada-isidia 1:20, 21 ba duahi.) Baibul bona eda pablikeisin ai Iehova ena aonega​—“aonega” korikorina​—baita davaria diba. Una na taunimanima ese bae abia ḡauna badana, mauri dalanai bae raka totona. Ta moale badamu bema ta ese eda pablikeisin e abia daemu. To, dia taunimanima iboudiai na unu e kara tomamu. Haida na asie uramu Baibul ena hereva bae dibaia. Haida be ita e kirikirilaidamu. Badina e laloamu Baibul na buka gunana. A ma haida be, Baibul ese e gwauraidiamu kara maoromaoro taravatudia na e gwauraidia dikamu, e laloamu, e badinamu taudia na kara auka taudia bona e kara maoromaoro hereamu. To, Iehova na dounu mai ena lalokau ida aonega korikorina e henimu. Ededia dala ai?

2. Hari ina negai, aonega korikorina be ede baita abia toma diba, to momo be ede e kara tomamu?

² Iehova ese aonega korikorina e halasiamu dalana ta na, iena Hereva Baibul amo. Kahirakahira taunimanima iboudiai na mai edia Baibul. Bona eda orea ese e halasimu Baibul pablikeisin be ede bamona? Iehova ena hahenamo dainai, eda pablikeisin na gado 1,000 mai kahana ai e halasiadiamu. Aonega herevana e kamonaimu taudia, anina na, Baibul ena hereva e duahiamu bona e badinaiamu taudia, na hahenamo be davarimu. To, taunimanima  momo na asie uramu aonega korikorina bae kamonaia. Abi hidi haida e uramu bae kara neganai, sibodia edia dibai e tabekaumu eiava taunimanima ma haida e kamonai henidiamu. Reana ita eda hereva danu basie kamonaimu, badina ita na Baibul ena hereva ta badinaiamu. Ina atikol ese taunimanima unu e kara tomamu badidia be herevalaimu. To ḡau ginigunana na, Iehova ena aonega baita abia dalana aita herevalaia.

3. Aonega korikorina anina be dahaka?

³ Aonega na, ta abimu dibana baita ḡaukaralaia abi hidi maorodia baita kara karana, e herevalaia diba. To, aonega korikorina na dia una mo. Baibul na e gwaumu: “Iehova igari-henina na aonega matamana; Helaḡa Diravana idibana na lalo-parara.” (Her. 9:10) Una dainai, ta uramu mai anina bada abi hidina ta baita karaia neganai, Iehova ena lalohadai heḡereḡerena​—“Helaḡa Diravana idibana” karana​—ese baine biaguda na namo. Una baita karaia dalana na, Baibul bona Baibul e herevalaimu pablikeisin baita stadilaidia. Unu baita kara tomamu neganai, aonega korikorina baita hahedinaraiamu.​—Her. 2:5-7.

4. Dahaka dainai Iehova sibona mo na heḡereḡere aonega korikorina baine henida?

⁴ Iehova sibona ese aonega korikorina baine henida diba. (Roma 16:27) Dahaka dainai Ia na aonega Badina? Badina ginigunana na, Ia na ḡau iboudiai Ihavaradia Tauna dainai, iena diba bona laloparara e kara ḡaudia ediai na asi hetoana. (Sal. 104:24) Iharuana be, Iehova ena kara iboudiai ese ena aonega e hahedinaraiamu. (Roma 11:33) Badi ihatoina be, Iehova ena amo e maimu aonega sisibadia e badinamu taudia na hanaihanai hahenamo e abimu. (Her. 2:10-12) Aonega korikorina baita abia totona, namona na abi hidi ta bona kara ta ta uramu baita karaia neganai, unu hereva momokani toiosi baita abi dae bona baita badinadia.

5. Taunimanima ese Iehova ena amo e maimu aonegana e dadaraiamu neganai, dahaka e varamu?

⁵ Haroro ḡaukara ai ta davaridiamu taudia momo na e gwaumu mauri ḡaudia na e karadia ḡoevaḡoeva; to ḡau iboudiai Ihavaradia Tauna na se abia daemu bona e gwaumu mauri ḡaudia iboudiai na evolution amo e vara. Ta davaridiamu taudia haida na e gwaumu Dirava na e abia daemu, to e laloamu Baibul ese e gwauraimu daladia na gugunana bona sibodia edia ura daladia e badinamu. Una dainai hari be dahaka e varamu? Taunimanima na sibodia edia aonega ai e tabekaumu to dia Dirava ena aonega ai e tabekaumu dainai, tanobada maurina be da namo? Idia ese moale korikorina de mamiamu eiava nega vaira helarona de davaria? E varamu ḡaudia daidiai ta abia daemu ina hereva na momokani: “Asi aonega ta, asi lalo-parara ta, asi lalo-hadai ta ese Iehova baine laoa ahu diba.” (Her. 21:30) Una ese e hagoadadamu Iehova enai aonega korikorina baita tahua! To madi, taunimanima momo unu na asie kara tomamu. Dahaka dainai?

6. Hereva Lada-isidia 1:22-25 ena hereva heḡereḡerena, daidia be asie uramu aonega korikorina bae kamonaia?

⁶ “Aonega na ariara ai e boi lolomu” neganai, momo na asie uramu bae kamonai. Baibul ese e hahedinaraiamu, aonega e dadaraiamu taudia edia orea na toi: ‘Asi aonegadia (o mata-lahui) taudia,’ “ḡonaḡona taudia,” bona “kavakava taudia.” (Hereva Lada-isidia 1:22-25 ba duahi.) Mani unu orea ta ta ese Dirava ena aonega e dadaraiamu badidia, bona idia basita tohotohodia daladia aita herevalai.

7. Dahaka dainai haida na e uramu ‘asi aonegadia taudia’ heḡereḡeredia bae noho?

⁷ ‘Asi aonegadia (o mata-lahui) taudia’ na, hereva iboudiai e abi dae haraḡamu eiava ikoidia  na haraḡa. (Her. 14:15.) Nega momo haroro ḡaukara ai taunimanima unu bamodia ta davaridiamu. Heḡereḡere mani a laloa, taunimanima milioni momo na tomadiho eiava politikol igunalaidia taudia ese e hakaudia kereremu. Haida na e dibamu unu hegunalai taudia ese e koidia neganai, e badu dikadikamu. To, Hereva Lada-isidia 1:22 ai e gwauraidia taudia na e uramu asi aonegadia taudia heḡereḡeredia bae noho, badina una dala na e uramu dounu bae badinaia. (Ier. 5:31) Idia na e uramu edia ura bae badinaia bona asie uramu Baibul ena hereva bae dibaia eiava Baibul ena taravatu bae badinaia. Idia momo edia hemami na Quebec, Canada ai tomadiho e laloa badamu hahinena ta ena hemami heḡereḡerena, ia ese Witnes ta na e hamaoroa: “Bema emai pris ese ai na e hakaumai kerere, una na iena kerere dia aiemai!” Asita uramu mai lalodia idoidiai ida dala kereredia e badinamu taudia baita tohotohodia!​—Her. 1:32; 27:12.

8. Dahaka ese be durudamu baita heaonegamu?

⁸ Badi namodia dainai, Baibul ese ita na e haḡoadadamu dia kavakava taudia heḡereḡeredia baita noho, to darada na “lo taudia daradia heḡereḡeredia ai baela.” (1 Kor. 14:20) Baita aonega dibamu, bema Baibul ena hahekau herevadia eda mauri ai baita badina. Bena taina ruana baita itaiamu, Baibul ena hahekau herevadia ta badinamu dainai hekwakwanai baita hahanaidiamu bona abi hidi maorodia baita karamu. Una dala amo eda tubu lauma dalanai baita dibamu. Bema nega taina daudau lalonai Baibul da ta stadilaia bona hebou da tala, reana siboda baita henanadai, dahaka dainai Iehova enai eda mauri na do asita gwauhamatalaia bona do asita bapatiso? Bema da ta bapatiso, ita be ta ḡaukara goadamu sivarai namona iharorolaina bona ihahedibalaina tauna namona ai ta laomu, a? Ta karamu abi hididia ese e hahedinaraimu, ita be Baibul ena hahekau herevadia ta badinamu, a? Haida ta kara henidiamu neganai, Kristen kara namodia ta hahedinaraimu, a? Bema ḡau haida na baita haidau, namona na Iehova ena hahediba herevadia baita lalodia bada, badina unu ese “asi aonegana tauna na e ha-aonegaiamu.”​—Sal. 19:7.

9. Edena dalai heḡonaḡonalai taudia ese Dirava ena aonega na e dadaraiamu?

⁹ Dirava ena aonega e dadaraiamu orea iharuana na, “ḡonaḡona taudia.” Nega haida, eda haroro ḡaukara ai taunimanima unu bamodia ta davaridiamu. Idia na e ura badamu haida bae kirikirilaidia. (Sal. 123:4) Baibul ese ita na e hadibada dina gabedia ai ḡonaḡona taudia na bae momo. (2 Pet. 3:3, 4) Kara maoromaoro tauna Lot ravana heḡereḡeredia, hari taunimanima haida na asie uramu Dirava ena hereva bae kamonai. (Gen. 19:14) Momo na Baibul ena hahekau herevadia e badinamu taudia e kirikirilaidiamu. Unu heḡonaḡonalai taudia na “sibodia edia ura dikadia” dainai unu be kara tomamu. (Iuda 7, 17, 18; NWT) Baibul ese heḡonaḡonalai taudia e herevalaidia dalana na aposteit taudia bona Iehova e dadaraiamu taudia edia kara heḡereḡerena!

10. Salamo 1:1 ena hereva heḡereḡerena, edena dalai heḡonaḡonalai taudia heḡereḡeredia ai basitala diba?

¹⁰ Edena dalai siboda baita henahua-toho heḡonaḡonalai taudia ai basitala? Dala ta na, e maumau momomu taudia basita bamodia. (Salamo 1:1 ba duahia.) Anina na aposteit taudia edia buka basita duahi bona edia hereva basita kamonai. Ta lalopararamu bema basita henari namonamomu, reana ḡau iboudiai baita maumauraimu bona Iehova bona ena orea amo ta abimu hahediba herevadia baita daradaralai matamamu. Una basine vara totona, siboda baita henanadai: ‘Hahekau daladia matamatadia e lasimu, eiava orea ese ḡau ta anina e hahedinaraia namonamomu neganai, lau be hanaihanai na maumaumu, a? Lau be hegunalai taudia edia kerere na tahuamu, a?’ Bema unu kara  baita hadoko haraḡamu, Iehova na be moalemu.​—Her. 3:34, 35.

11. “Kavakava taudia” ese Iehova ena taravatu maoro bona kerere ai be ede e lalodia tomamu?

¹¹ Dirava ena aonega e dadaraiamu orea ihatoina na, “kavakava taudia.” Idia na kakavakava, badina asie uramu Dirava ena taravatu maoro bona kerere ai bae badina. To, e uramu sibodia ese dahaka be maoro bona dahaka be kerere bae abi hidi. (Her. 12:15) Taunimanima unu bamodia ese Iehova, aonega Badina, na e dadaraiamu. (Sal. 53:1) Haroro ḡaukara ai ta davaridiamu neganai, nega momo Baibul ena taravatu ta badinamu dainai e gwau henidamu. To, idia ese mauri na basie henidamu. Baibul na e gwaumu: “Aonega na atai ai, kavakava tauna na basine davaria diba; hanua ikoukouna ai ia na se herevamu.” (Her. 24:7) Kavakava taudia ese aonega sisibadia na basie heni diba. Una dainai, Iehova ese e sisiba henidamu, ‘kavakava tauna vairana amo baita raka oho’!​—Her. 14:7.

12. Dahaka ese be durudamu kavakava taudia edia dala baita dadarai?

¹² Ita na dia Dirava ena sisiba e dadaraimu taudia heḡereḡeredia, to ita ese Dirava ena dala, anina na ena taravatu maoro bona kerere ai ta ura henidiamu. Una ura ihagoadana totona, Dirava ena Hereva e badinaiamu taudia ediai e varamu ḡaudia bona asie badinaiamu taudia ediai e varamu ḡaudia baita haheḡereḡere. Mani taunimanima na Iehova ena aonega sisibadia asie badinamu dainai, ediai e varamu hekwakwanaidia a haherodia. Bena, Dirava o badinaiamu dainai emu mauri na e namo karana a laloa.​—Sal. 32:8, 10.

13. Iehova ese e doridamu ena aonega sisibadia baita badina, a?

¹³ Iehova ese taunimanima iboudiai ediai ena aonega na e henimu, to ta se doriamu baine abidia dae totona. To, Ia ese ena aonega herevadia asie kamonaimu taudia ediai e varamu ḡaudia na e herevalai. (Her. 1:29-32) Iehova asie uramu bae badinaia taudia na “edia kara huahuadia bae ani.” Gabeai, edia mauri dalana dainai bae hisihisi, bae hekwakwana, bona dokonai bae mase. To, Iehova ena aonega sisibadia e kamonaimu bona e badinamu taudia ediai ina gwauhamata na e ḡuḡurumu: “E hakala henigumu tauna baine noho hedai; baine noho namonamo, dika garina basine gari.”​—Her. 1:33.

14-15. Hereva Lada-isidia 4:23 amo dahaka ta dibamu?

¹⁴ Bema Dirava ena aonega baita badinaiamu, nega iboudiai namo baita davarimu. Matamanai tame herevalaia heḡereḡerena, Iehova ese taunimanima iboudiai ediai ena aonega sisibadia na e henidiamu. Heḡereḡere, Hereva Lada-isidia bukana lalonai, Iehova ese aonega sisibadia momo e heni, eda mauri be hanamoamu bema baita badinamu. Mani unu aonega sisibadia hani aita herevalai.

¹⁵ Kudoumu ba gimaia. Baibul na e gwaumu: “Lalomu [o kudoumu] ba gimaia tarika-tarika, badina be iena amo mauri e lohilohimu.” (Her. 4:23) Kudouda korikorina baita gimaia  totona, ḡau momo baita karamu. Aniani namodia baita animu, baita exercise namonamomu, bona ta manadalai tauani ihadikana karadia baita dadarai. Lauma dalanai kudouda baita gimaia karana danu unu bamona. Dina iboudiai Dirava ena Hereva amo lauma aniani baita abi. Kristen heboudia baita heḡaeḡaelai, baita lao heni, bona baita haere. Baita goada totona, haroro ḡaukarana baita karaia hanaihanai. Bona kara mirodia basita kara totona, kudouda o laloda baine hadikaia ḡaudia heḡereḡere, matabodaḡa ḡaudia e hahedinaraimu moale karadia bona hebamo dikadia baita dadarai.

16. Dahaka dainai hari Hereva Lada-isidia 23:4, 5 ena sisiba na mai anina bada?

¹⁶ Dekemu ḡaudia ba moalelai. Baibul ese ina sisiba e heni: “Taḡa iabina basio hekwarahilaia. . . . O roha heniamu negana ai na e pukimu; badina be asi kaimana hanina e hekaramu, bena guba e roho dae heniamu, ugava na heto.” (Her. 23:4, 5) Moni bona kohu na basie mia daudaumu be ore haraḡamu. To, taḡa taudia bona ogoḡami taudia na e hekwarahimu moni momo bae abi. Una dainai, nega momo sibodia ladadia e hadikamu, edia hetura karana e hadikaiamu, bona gorere momo e davarimu. (Her. 28:20; 1 Tim. 6:9, 10) To, aonega karana ese be durudamu moni ai lalohadai maorona baita abia. Una ese be gimadamu basita mataḡaniḡani bona dekedai miadia ḡaudia baita moalelai.​—Koh. 7:12.

17. Edena dalai Hereva Lada-isidia 12:18 ese e gwauraia “aonega tauna malana” baita abia diba?

¹⁷ Ba lalo guna, bena ba hereva. Bema basita henari namonamomu, eda hereva ese dika bada baine havaraia diba. Baibul na e gwaumu: “E hereva haraḡa-haraḡamu tauna ena hereva na dare e hegwadamu na heto, a aonega tauna malana ese hahemauri e mailaiamu.” (Her. 12:18) Eda hetura karana na be namomu, bema bamoda edia kerere basita maumauraimu. (Her. 20:19) Bema ta uramu eda hereva amo haida baita hagoadadia to basie hahisidia, namona na hanaihanai Dirava ena Hereva baita duahia bona baita laloa. (Luka 6:45) Baibul ena hereva baita laloa dobumu neganai, mai aonegada ida baita herevamu “e lohilohimu” ranuna na heto, ma haida be hagoadadiamu.​—Her. 18:4.

18. Edena dalai Hereva Lada-isidia 24:6 ibadinana karana ese baine duruda, hesiai ḡaukara baita karaia namonamo totona?

 ¹⁸ Hahekau daladia ba badina. Baibul ese ina sisiba namona e heni: “Hahekau mai aonegana amo emu tuari ba goadalaia, bona hahealo taudia hutuma daidiai ba kwalimu.” (Her. 24:6) Mani una siri ena hahekau herevana baita badinaia karana ese eda haroro bona hahediba ḡaukara baine hanamoa daladia aita lalo. Dia eda diba dalanai hesiai ḡaukara baita karaia, to e henidamu hahekau daladia baita badina. Eda Kristen heboudia ai aonega daladia ta dibamu, badina hahediba mai dibadia taudia ese Baibul amo tok bona haheitalai namodia amo e hadibadamu. Bona, Iehova ena orea ese tulu namodia momo​—pablikeisin bona vidio idauidau​—e halasimu, unu ese taunimanima e durudiamu Baibul bae lalopararalaia namonamo diba. Unu tulu idauidau iḡaukaralaidia namonamo dalana mai dibamu?

19. Iehova ese e henimumu aonegana be ede o laloa tomamu? (Hereva Lada-isidia 3:13-18)

¹⁹ Hereva Lada-isidia 3:13-18 ba duahi. Ta moale dikadikamu Dirava ena Hereva amo sisiba namodia ta abimu! Bema unu sisiba namodia na lasi, ede tama mauri toma? Ina atikol ai, Hereva Lada-isidia bukana amo aonega hereva namodia haida tame herevalai. Momokani, Iehova ese aonega herevadia momo herea na Baibul ai e tore. Namona na laloda baita hadai nega iboudiai Iehova ena aonega sisibadia baita badina. Taunimanima momo ese unu aonega herevadia e lalodiamu dalana na asi anina; to namona na baita abia dae momokani, aonega e “dogoa taomu taudia na moale taudia e gwauraidiamu.”