Idaunegai Israel Taudia be E Tuariva, To Dahaka Dainai Ita Na Asita Tuarimu?
TANOBADA Tuarina Iharuana ai, Nazi ofesa ta ese Iehova ena Witnes taudia haida e lolo henidia eto: “Bema umui na basio uramu France eiava England ba tuari henidia, umui iboumui ai na bo masemu!” Ena be Nazi tuari taudia na mai edia tuari kohudia ida idia badidiai gigini, to eda tadikaka na asie ura Iehova ena taravatu ta bae utua. Idia na asie gari, ani? Una haheitalai ese e hahedinaraiamu, ita Iehova ena Witnes tauda na, ina tanobada tuaridia lalodiai asita vareaimu. Ena be taunimanima ese e hagaridamu etomu tuari ai basita vareaimu neganai be hamasedamu, to tanobada ena heiriheiri karadia lalodiai na asita vareaimu.
To, una lalohadai na dia sibodia e hegwauraimu Kristen taudia iboudiai ese e abia daemu. Momo na e laloamu Kristen tauna ta ese ena tano baine gimaia na namo. Reana e laloamu, ‘Idaunegai Israel taudia na Dirava ena taunimanima bona idia danu e tuariva, to dahaka dainai hari ina negai Kristen taudia na unu asie kara tomamu?’ Oi be ede bo haere tomamu? Bo gwau dibamu, idaunegai Israel taudia ediai e vara ḡaudia bona hari ina negai Dirava ena taunimanima ediai e varamu ḡaudia na i’idau. Mani badi 5 aita herevalai.
1. DIRAVA ENA TAUNIMANIMA NA BESE TAMONA
Gunaguna, Iehova ese bese tamona e abia hidi ia ena taunimanima ai ela—una na Israel besena. Ia ese Israel taudia na e gwauraidia ‘taunimanima iboudiai amo idia na dava bada kohuna’ na heto. (Eso. 19:5, NWT) Dirava ese idia bae noholaia tanona danu e henidia. Una dainai, Dirava ese e haḡanidia bese ma haida ituari henidia totona baela neganai, idia ese Iehova e tomadiho heniava taudia na asie tuari henidia o asie aladia. *
Hari ina negai, tomadiho momokani taudia na “bese idau-idau bona iduhu idau-idau bona hanua idau-idau bona gado idau-idau amo.” (Apok. 7:9) Bema Dirava ena taunimanima na tuari lalodiai bae vareai, idia ese tadikakadia bae tuari henidia bona bae hamasedia diba.
2. IEHOVA ESE ISRAEL TAUDIA E HAḠANIDIA BAE TUARI
Gunaguna, Iehova ese abi hidi e karava, Israel taudia be edena negai bona dahaka dainai bae tuari. Heḡereḡere, Dirava ese Israel taudia e hamaorodia Kanaan taudia na bae tuari henidia, badina idia na demoni e tomadiho henidiava, matabodaḡa karadia e karava, bona natudia e bouboulaidiava. Iehova ese Israel taudia e haḡanidia, unu kara dika rohorohodia e karava taudia iboudiai na Gwauhamata Tanona amo bae kokidia, unu amo edia kara dikadia na basie tohotoho. (Lev. 18:24, 25) Israel taudia na Gwauhamata Tanona ai e vareai murinai, nega haida Dirava ese e haḡanidiava Israel bae gimaia totona inaidia bae tuari henidia. (2 Sam. 5:17-25) To, Iehova na se gwa Israel taudia na sibodia abi hidi bae kara tuari baela eiava lasi. Bema idia na sibodia abi hidi e karava neganai, nega momo dika e davariva.—Num. 14:41-45; 2 Sis. 35:20-24.
Hari ina negai, Iehova ese taunimanima na se hamaorodia bae tuari. Bese ta ta na sibodia edia ura dainai e tuarimu, to dia Dirava ena ura dainai. Idia na e tuarimu badina e uramu tano ma haida bae abi, moni momo bae abi, eiava politikol karadia bae duru. To bema haida na e gwaumu Dirava ladanai e tuarimu, edia tomadiho bae gimaia eiava Dirava inaina bae aladia totona, be ede bamona? Iehova ese vaira nega ai be varamu tuarina—una na Aramagedono tuarina—ai ia e tomadiho heniamu taudia momokanidia be gimadiamu bona inaina na be haorediamu. (Apok. 16:14, 16) Una tuari na dia tanobada ai Dirava e tomadiho heniamu taudia ese bae karaia, to ia ena guba tuari oreana ese una tuari bae karaia—Apok. 19:11-15.
3. ISRAEL TAUDIA ESE IEHOVA E ABIDADAMA HENIA TAUDIA NA ASIE HAMASEDIA
Hari ina negai tuaridia ai asi edia kerere taudia be e hamauridiamu, Iehova ese Rahaba bona ena ruma bese e hamauridia heḡereḡerena, a?
Gunaguna, Israel edia tuari taudia na nega momo Dirava e abidadama heniava taudia ediai hebogahisi karana e hahedinaraiava bona Iehova ese e hamaorodiava bae hamasedia taudia mo e hamasediava. Mani haheitalai rua a lalodia. Ena be Iehova ese Israel taudia e haḡanidia Ieriko hanuana bae hadikaia, to Rahaba bona ena ruma bese na edia abidadama dainai e hamauridia. (Ios. 2:9-16; 6:16, 17) Gabeai, Gibeon taudia ese Dirava igari henina karana e hahedinaraia neganai, Gibeon hanuana ibounai na asie hadikaia.—Ios. 9:3-9, 17-19.
Hari ina negai, bese idauidau e tuarimu neganai abidadama e hahedinaraiamu taudia na asie hamauridiamu. Bona nega haida, asie edia kerere taudia na e hamasediamu.
4. ISRAEL TAUDIA NA TUARI AI DIRAVA ENA TARAVATU BAE BADINA
Gunaguna, Iehova na e ura Israel tuari taudia na tuari ai iena hahekau daladia bae badina. Heḡereḡere, nega haida Dirava ese e hamaorodiava tuari totona hanua ta bae lao henia neganai ‘maino bae gwaurai henidia guna.’ (Deu. 20:10) Danu, Iehova ena ura na Israel tuari taudia na tauanina dalana ai bae ḡoeva bona Iehova ena kara maoromaoro taravatudia bae badina na namo. (Deu. 23:9-14) Israel taudia badidiai e nohova besedia na tuari ai hanua ta e hadarereava neganai, una hanua hahinedia na e hadikadiava, to Iehova ese Israel taudia na e taravatudia unu na basie kara toma. Idia ese hanua ta bae hadarerea neganai, e abia mauri hahinena na basie adavaia ela bona hua ta baine ore.—Deu. 21:10-13.
Hari ina negai, tano momo na gwaubou e karamu tuari totodia e atomu taravatudia haida bae badina. Ena be unu e kara tomamu amo asie tuarimu taudia bae gimadia, to madi, bese idauidau ese nega momo unu taravatu na e utudiamu.
5. DIRAVA NA ENA BESE DAIDIAI E TUARI
Hari ina negai Dirava be bese idauidau daidiai e tuarimu, Ieriko ai Israel taudia daidiai e tuari heḡereḡerena, a?
Gunaguna, Iehova na Israel taudia daidiai e tuariva, bona nega momo hoa dalanai e hakwalimudiava. Heḡereḡere, edena dalai Iehova ese Israel taudia e durudia Ieriko hanuana e hadarerea? Iehova ena haheḡani heḡereḡerena, Israel taudia na “e lolo lalodika. Bena hanua maḡuna e heḡiḡi dobi” neganai, idia na haraḡa herea e raka vareai bona hanua e abia. (Ios. 6:20) Bona Amoro taudia be ede e hadareredia toma? “Iehova ese medu hetaridia badadia guba amo e hadihodia idia latadiai . . . Medu hetarina amo e mase taudia ese Israel taudia edia dare amo e mase taudia na e hereadia.”—Ios. 10:6-11.
Hari ina negai, Iehova na tanobada besedia daidiai se tuarimu. Ia ena Basileia, Iesu ese baine lohiaia ḡauna, na “dia ina tanobada ḡauna.” (Ioa. 18:36) To, Satana na tanobada gavamanidia iboudiai e biagudiamu. Tanobada ai e varamu tuari dika rohorohodia ese Satana ena kara dikadia e hahedinaraimu.—Luka 4:5, 6; 1 Ioa. 5:19.
KRISTEN TAUDIA MOMOKANIDIA NA HEROHEMAINO TAUDIA
Tame herevalaia heḡereḡerena, iseda negai e varamu ḡaudia na idaunegai Israel taudia ediai e vara ḡaudia amo idau. To, ita na dia unu badi 5 mo daidiai tuari ai asita vareaimu. Badi ma haida danu. Heḡereḡere, Dirava na e peroveta dina gabedia ai, ia ese e hadibadia taudia na “tuari daladia” basie hadibadia. Una dainai, idia na tuari lalodiai na basie vareai. (Isa. 2:2-4) Danu, Keriso na e gwa ena hahediba taudia na “dia tanobada ena,” una dainai tanobada ena heiriheiri karadia amo bae gini siri.—Ioa. 15:19.
Keriso ese ia murinai e rakamu taudia e hadibadia ḡau ma haida danu bae kara. E hadibadia badu bona tuari bae havara karadia na bae dadarai. (Mat. 5:21, 22) Danu, e hadibadia “herohemaino taudia” ai baela bona inaidia bae lalokau henidia.—Mat. 5:9, 44.
Edena dalai unu baita kara toma? Vaia, asita uramu tuari ai baita vareai, to nega haida ta mamiamu kongrigeisin ai ta be ta inai heniamu, a? Namona na baita hekwarahi hemami unu bamodia na baita dadarai.—Iak. 4:1, 11.
Bese idauidau edia heiriheiri karadia lalodiai na basita vareai, to baita ḡaukara goada maino ai baita noho bona baita helalokau heheni. (Ioa. 13:34, 35) Iehova ese tuari baine haorea vaitani negana ta nariamu lalonai, namona na laloda baita hadai tanobada amo baita gini siri.—Sal. 46:9.
^ Nega haida, Israel iduhudia na e hetuari heheniva, to Iehova ese una kara na se moalelaiava. (1 Han. 12:24) To ma nega haida ai, Iehova ese iduhu e hetuari heheniva karana na e abi daeva, badina iduhu haida ese ia na asie badinaiava o kara dika rohorohodia e karava.—Hah. 20:3-35; 2 Sis. 13:3-18; 25:14-22; 28:1-8.
