1. Edena dalai Dirava idibana karana ese moale e havaraiamu?

 MOALE korikorina na dia ta abiamu bena e ore haragamu hemamina. To ia na taunimanima ta ena mauri ibounai lalonai baine abia moalena. Edena dalai? Iesu na ena Ororo Harorona ai una e herevalaia, eto: “Dirava idibana totona e hitolomu taudia na e moalemu.” (Mat. 5:3; NWT) Iesu na mai dibana taunimanima ediai Ihavaradia Tauna, Iehova Dirava bae dibaia bona bae tomadiho henia urana na mia. Bona Iehova na “moale Diravana” dainai, ia e tomadiho heniamu taudia danu bae moale diba.​—1 Tim. 1:11; NWT.

2-3. (a) Iesu ena hereva heḡereḡerena, daidia be bae moale diba? (b) Ina atikol ai dahaka baita herevalaimu, bona dahaka dainai una na mai anina bada?

² O laloamu ita be nega namodia ai mo baita moalemu, a? Lasi. Iesu ena Ororo Harorona ai e gwauraia herevana ta ese una na e hahedinaraia ḡoevaḡoeva. “Taitai taudia”​—edia kara dikadia daidiai e lalohisihisi bada hereamu eiava edia mauri ai metau ḡaudia idauidau daidiai e lalometaumu taudia​—na bae moale diba. Iesu na ‘kara maoromaoro daidiai e daḡedaḡe henidiamu taudia’ eiava Keriso e badinaiamu dainai e ‘uduguiraidiamu’ taudia ediai danu una hereva tamona e gwauraia. (Mat. 5:4, 10, 11) To, nega unu bamodiai moale korikorina be ede baita davaria toma?

³ Iesu ese ita na e hadibadamu dia mauri lalonai ta abimu ḡau namodia amo moale korikori baita davariamu, to Dirava idibana bona ia ihetura henina karana amo una baita davariamu. (Iak. 4:8) Edena dalai unu baita kara toma diba? Ina atikol ai,  moale korikorina baita davariamu daladia toi baita herevalaimu.

4. Moale korikorina baita davaria dalana ginigunana be dahaka? (Salamo 1:1-3)

⁴ DALA GINIGUNANA: Moale korikorina baita abia totona, namona na Baibul baita duahia bona baita stadilaia. Iesu ese Dirava ena Hereva na aniani ida e haheḡereḡerea. Vaia, taunimanima bona animal na bae mauri totona, bae aniani na namo. To, taunimanima ese mo Dirava ena Hereva bae duahia bona bae stadilaia bona unu bae kara toma na mai anina bada. Una dainai Iesu na e gwa: “Dia aniani amo mo taunimanima basie mauri, a Dirava uduna amo e lasimu herevadia iboudiai amo danu.” (Mat. 4:4) Una dainai, namona na dina iboudiai Dirava ena Hereva hereadaena, Baibul baita duahia. Salamo itorena tauna na e gwa: “A Iehova ena taravatu ia ese e moalelaiamu, ena taravatu e laloa boimu, e laloa ranimu.”​—Salamo 1:1-3 ba duahi.

5-6. (a) Baibul amo dahaka ta dibamu? (b) Baibul iduahina karana ese ita be ede e duruda tomamu?

⁵ Iehova ese ita na e lalokau henidamu dainai Baibul amo e hadibadamu dahaka baita kara eda mauri baita moalelaia totona. Baibul ai iena ura ita edai ta dibaiamu. Ta dibamu Ia be ede baita hetura henia toma bona dahaka baita kara eda kara dikadia baine gwautao. Bona Ia ese vaira nega totona e gwauhamatalaia helaro hereadaena ta dibaiamu. (Ier. 29:11) Baibul ta stadilaiamu amo unu hereva momokani ta dibadiamu karana ese e hamoaledamu!

⁶ Ita na mai dibada Baibul na dina ta ta ai eda mauri baine durua sisibadia amo e honu. Sisiba baita badinamu neganai, baita moalemu.  Emu mauri ai hekwakwanai ta dainai o lalomanokamu neganai, nega bada bavato Iehova ena Hereva ba duahia bona ba laloa dobu. Iesu na e gwa: “Dirava ena hereva e kamonaimu bona e badinamu taudia hari bae moale.”​—Luka 11:28; NWT.

7. Dirava ena Hereva iduahina karana baita moalelaia totona, dahaka baita kara be namo?

⁷ Dirava ena Hereva o duahiamu lalonai, o duahiamu ḡauna na ba moalelaia. Baita haheitalaia totona, oiemu ai ina de vara, a? Ta ese oi o ura henia dikadikamu anianina ta baine nadua. To, reana oi na o ḡavamu eiava ḡau haida o lalomu dainai aniani na bo hadonoa haraḡaharaḡamu, bona aniani mamina na basio moalelaiamu. Emu aniani bo haoreamu murinai, readia bo lalopararamu oi na o aniani haraḡaharaḡa bena bo lalomu metairametaira boma aniani hari namo, unu amo aniani na boma moalelaia. Una na Baibul iduahina karana ida baita haheḡereḡerea diba, nega haida ta duahi haraḡaharaḡamu dainai, hereva anina na asita abia namonamomu, ani? Nega bavato Dirava ena Hereva iduahina karana ba moalelaia; e vara ḡaudia na lalomu ai ba piksaia, taunimanima gadodia reḡedia be ede bamona, bona o duahiamu ḡauna na ba lalohadailaia. Unu bo kara tomamu neganai, bo moalemu.

8. “Hesiai tauna mai ena abidadama bona aonega” ese ena ḡaukara be ede e haḡuḡurua tomamu? (Futnout danu ba itaia.)

⁸ Iesu ese “hesiai tauna mai ena abidadama bona aonega” e abia hidi lauma aniani na nega korikori ai baine henida, bona lauma dalanai na e ubuda namonamomu. * (Mat. 24:45; NWT) Hesiai tauna mai ena abidadama ese e halasimu lauma aniani kahana badana na Revareva Helaḡadia amo. (1 Tes. 2:13) Unu lauma aniani ese be durudamu Iehova ena lalohadai Baibul ai baita dibamu. Una dainai, Gima Kohorona bona Noga! magasin bona atikol idauidau na jw.org ai ta duahimu. Ita na wiki lalodiai bona wiken ai eda hebou daidiai ta heḡaeḡaemu. Bona hua ta ta ai bema JW Broadcasting^® ena program na e atoa, ta itaiamu. Bema nega baita atomu Baibul baita duahiamu bona baita stadilaiamu, una ese ita na be durudamu moale korikorina baita davaria dalana iharuana baita badinaiamu.

9. Moale korikorina baita davaria dalana iharuana be dahaka?

⁹ DALA IHARUANA: Moale korikorina baita abia totona, namona na Iehova ena taravatu baita badina. Salamo itorena tauna na e gwa: “Iehova garina e garimu taudia iboudiai na [e moalemu, NWT]; idia na iena dala ai e rakamu.” (Sal. 128:1) Iehova garina baita gari anina na baita matauraia bada bona ia ihabaduna karadia na basita kara. (Her. 16:6) Una dainai, nega iboudiai baita hekwarahi Iehova ese Baibul ai e atoa taravatudia, maoro bona kerere ai, baita badina totona. (2 Kor. 7:1) Ita na baita moalemu bema Iehova ese e ura henimu ḡaudia baita karamu bona e inai henimu ḡaudia baita inai henimu.​—Sal. 37:27; 97:10; Roma 12:9.

10. Roma 12:2 ena hereva heḡereḡerena, ita be dahaka baita kara?

¹⁰ Roma 12:2 ba duahia. Reana ta na mai dibana Iehova na mai ena maoro baine gwa dahaka be maoro bona dahaka be kerere, to ia sibona ese danu Iehova ena taravatu baine badina na namo. Heḡereḡere, ta na reana mai dibana gavamani na mai ena maoro dala ai speed limit bae ato. To, reana ia na basine uramu unu taravatu baine badina. Una dainai, be taritarimu neganai spidi ai be heaumu. Eda kara amo baita hahedinaraia ita na ta abia daemu Iehova  ena dala ibadinana na mauri dalana hereadaena. (Her. 12:28) David na unu e hemami toma: “Mauri dalana oi ese o haheitalaigumu; oi vairamu ai moale e ḡuḡurumu, oi imamu idibana ai moale ḡaudia na e mia hanaihanaimu.”​—Sal. 16:11.

11-12. (a) Ta lalohekwarahimu eiava ta lalomanokamu neganai, dahaka dainai baita henahua toho? (b) Moale karadia ta abi hidimu neganai, Filipi 4:8 ese ita be ede be duruda tomamu?

¹¹ Ta lalohekwarahimu eiava ta lalomanokamu neganai, reana ta uramu ḡau ta baita karaia eda hekwakwanai basita laloa totona. Vaia unu baita hemami tomamu, to namona na baita henahua toho Iehova e inai heniamu karana ta basita karaia.​—Efe. 5:10-12, 15-17.

¹² Aposetolo Paulo ese Filipi Kristen taudia e tore henidia neganai, e hamaorodia hanaihanai “maoromaoro, . . . ḡoevaḡoeva, . . . lalokau, [bona] haridia namodia ḡaudia” bae haerodia. (Filipi 4:8 ba duahia.) Ena be Paulo na dia moale karadia e herevalaimu, to namona na ia e tore herevadia ese ita bae duruda moale karadia ai abi hidi maorodia baita kara. Mani ina ba tohoa: Siri ai ina hereva, “ḡaudia” o itaiamu neganai, ba haidaua bena gabunai “ane,” “muvi,” “buka,” eiava “vidio games” bavato. Unu bo kara tomamu neganai be durumumu bo itaiamu ededia be Dirava ese e abi daemu bona ededia be se abi daemu. Ita na ta uramu eda mauri ai Iehova ena kara maoromaoro taravatudia baita badina. (Sal. 119:1-3) Bena mai laloda mamina ḡoevana ida, moale korikorina baita davaria dalana ihatoina baita badinaiamu.​—Apos. 23:1.

13. Moale korikorina baita davaria dalana ihatoina be dahaka? (Ioane 4:23, 24)

¹³ DALA IHATOINA: Namona na emu mauri ai Iehova itomadiho henina karana bavatoa guna. Iehova na ita e Havarada Tauna dainai, Ia baita tomadiho henia na maoro. (Apok. 4:11; 14:6, 7) Una dainai, eda mauri ai mai anina bada ḡauna na Iehova ese e abi daemu dalana heḡereḡerena ai ia baita tomadiho henia, una na “lauma ai bona momokani ai.” (Ioane 4:23, 24 ba duahi.) Ita na ta uramu Dirava ena lauma helaḡa ese eda tomadiho karana baine biagua, unu amo eda tomadiho na Baibul ese e herevalaia dalana ida baine heḡereḡere. Ena be ta nohomu gabuna ai eda ḡaukara na e taravatua eiava e koua, namona na eda tomadiho karana na baita atoa guna. Hari, eda tadikaka taihu 100 mai kahana na e hadiburadia badina idia na Iehova ena Witnes dainai. * Ena be idia na dibura ai, mai moaledia ida dala e tahumu bae ḡuriḡuri, bae stadi, bona ma haida ediai Dirava bona ena Basileia bae herevalaia. Ladada e hadikamu eiava e daḡedaḡe henidamu neganai, baita moale badina dibada Iehova na ita ida bona Ia ese be hanamodamu.​—Iak. 1:12; 1 Pet. 4:14.

14. Tajikistan ai, tadikaka matamatana ta enai be dahaka e vara, bona dahaka dainai?

¹⁴ E vara momokani sivaraidia ese e hamomokaniamu herevana eda mauri daladia na idauidau, to tame herevalai daladia toi ese moale korikorina e havaraiamu. Mani laḡanina 19 tadikakana ta ladana, Jovidon Bobojonov, enai e vara ḡauna aita laloa, ia na Tajikistan amo. Ia na se ura tuari ai baine vareai. October 4, 2019 ai, pulisi ese ena ruma amo e abia bena dibura rumana ai e atoa, hua momo unuseniai e noho, bona raskol ta heḡereḡerena e kara heniava. Una hahemaoro kererena na tanobada heḡeḡemadai ai taunimanima ese e kamonaia. Ripoti ese e hahedinaraia, ia na e  dadabaiava bona e doriava baine gwauhamata una tano ena ami oreana baine badinaia bona tuari dabuadia baine hahedokilai. Una murinai, kota ese e hamaoroa ia na mai ena kerere bona e siaia dibura kamepana ai e ha noho ela bona una tano ena president ese ena dika e gwauatao bona gwaumaoro e heni dibura amo bae ruhaia. Una hekwakwanai lalonai, Jovidon na Dirava ibadinana karana e goadalaiava bona e moaleva. Edena dalai? Ia na hanaihanai lauma dalanai baine goada daladia e lalo badava.

15. Jovidon na lauma dalanai baine goada totona, ia be dahaka e karava?

¹⁵ Jovidon na dibura ai e nohova neganai, ena be asi ena Baibul eiava pablikeisin, to ia na dounu lauma aniani e abiva. Edena dalai? Tadikaka taihu ese ana aniani e laohaiva bona stoa ai e hahoidiava baegedia ai dina siridia e toreva. Unu amo ia na dina iboudiai Baibul baine duahia bona baine laloa dobu diba. Dibura ruma amo e lasi murinai, ia ese hahetoho aukadia do asie davari taudia e hagoadadia, eto: “Namona na hari ina nega ba ḡaukaralaia Baibul bona eda pablikeisin idauidau iduahidia karana amo emui diba Iehova enai ba habadaia.”

16. Jovidon be dahaka e lalo badava?

¹⁶ Eda tadikaka na Iehova ena taravatu e badinadia. Ia ese ura dikadia bona kara mirodia na e dadarai, to Iehova ese e moalelaimu ḡaudia  e lalo badava. Jovidon na Dirava ese e havara ḡaudia e moalelaiva. Daba iboudiai e nogava neganai, manu edia tai reḡedia e kamonaiva. Hanuaboi ai hua bona hisiu e itava. Ia na e gwa: “Unu na Iehova ena harihari ḡaudia bona unu ese lau na e hamoalegumu bona e hagoadagumu.” Iehova ena harihari ḡaudia lauma dalanai bona tauani dalanai baita lalodia badamu neganai, baita moalemu bona una moale ese be hagoadadamu baita haheauka totona.

17. Bema Jovidon enai e vara ḡauna na ta enai e varamu, edena dalai 1 Petro 1:6, 7 ese baine durua diba?

¹⁷ Jovidon ese danu Iehova itomadiho henina karana e atoa guna. Ia na e diba Dirava ibadinana karana na mai anina bada. Iesu na e gwa: “[Iehova] emu Dirava ba toma henia diho; ia mo sibona isiaina ba lao heni.” (Luka 4:8) Tuari taudia edia hegunalai tauna bona tuari taudia na e urava Jovidon ese ena tomadiho na basine badinaia. To, Jovidon na dina bona hanuaboi iboudiai e ḡuriḡuri goadagoadava, Iehova e noia goada baine henia bona ena abidadama karana ai basine manoka totona. Ena be Jovidon na e hahemaoro henia kerere, to ia na dounu e gini goada. Una dainai, hari ia na e moalemu badina ena be e dadabaia bona e hadiburaia, to unu ese ena abidadama e tohoa bona e hagoadaia.​—Petro Ginigunana 1:6, 7 ba duahi.

18. Edena dalai dounu baita moale diba?

¹⁸ Iehova na mai dibana moale korikorina be ede baita davaria toma. Bema unu dala toiosi bo badinamu, ena be hekwakwanai bo davarimu to oi na dounu bo moalemu. Bena oi danu bo gwau dibamu: “Iehova na edia Dirava ai e halaoamu taudia na e moalemu!”​—Sal. 144:15; NWT.