Laḡani 1923 ai, Dirava ena orea ese sensi haida e kara unu amo Bible Student e durudia lalotamona ai bae tomadiho hebou. Bible Student ese The Watch Tower ai wiki ta ta ena Ḡuriḡuri Bona Dirava Ihanamona Hebouna ai e herevalaiva siridia e halasi matama. Danu, idia ese kalenda ta e printia, lalonai na wiki ta ta heboudia ai bae herevalai siridia bona sibodia edia stadi bona ruma bese stadi ai bae abi anedia e atodia.

Bible Student edia hebou lalodiai haroro ḡaukara ai e davariva ekspiriens e herevalaiva, Iehova e tenkiu heniava, ane e abiva, eiava e ḡuriḡuriva. Taihu Eva Barney na laḡanina 15, 1923 ai e bapatiso. Ia na e gwa: “Una nega ai bema oi na o urava ekspiriens ta ba heni, oi na ba gini tore bena bao gwa: ‘Lau ese Lohiabada na tenkiu heniamu badina lau daigu ai ḡau namodia e kara.’” Tadikaka haida na e urava ḡau momo bae herevalai. Taihu Barney na ma e gwa: “Tadikaka Godwin ese Lohiabada ihanamona herevadia momo e urava baine gwaurai. To ia adavana ese hebou ihakauna tadikakana e itaiava e hesikuva neganai, tadikaka Godwin ena kouti e veriava, bena tadikaka Godwin na e helai dihova.”

Hua ta ta ai, kongrigeisin na nega tamona spesel Ḡuriḡuri Bona Dirava Ihanamona Hebouna e abiava. The Watch Tower, April 1, 1923 ḡauna ese una hebou na ini e herevalaia toma: “Namona na hebou kahana na haroro ḡaukara ena ekspiriens bona tadikaka ihagoadadia herevadia bae gwaurai. . . . A dibamu una ese tadikaka taihu edia hetura karana na be hagoadaiamu.”

Vancouver, Canada ai, laḡanina 19 pablisa ta, Charles Martin na unu hebou ese e durua bada. Ia na e gwa: “Unu hebou amo lau ese haroro ḡaukara ai baina gwaurai herevadia na dibadia. Nega momo, tadikaka taihu na haroro ḡaukara ai e davariva ekspiriens e gwauraiva. Unu ese e durugu haroro ai baina gwaurai herevadia bona taunimanima edia ekskius herevadia baina hanai daladia na diba.”

Iehova ena orea ese “haroro dinadia” e abidia hidiva, unu amo lalotamona ai bae haroro. The Watch Tower, April 1, 1923 ḡauna, na eto: “Ita iboudai na lalotamona ai baita ḡaukara totona  . . . , ai ese Tuesday, May 1, 1923 a abia hidi haroro ḡaukara baita karaia. Bena hua ta ta ena Tuesday ginigunana ai . . . kongrigeisin taudia iboudiai na bae haroro.”

Matamata taudia danu una e harorova. Taihu Hazel Burford, una nega ai laḡanina na 16, na e gwa: “Pepa ta ladana Bulletin lalonai haroro herevadia e atova, ai ese baia ita bona baia lalotao. a Lau bona tubugu tauna na unu haroro herevadia a badinava.” To, Taihu Burford na e hoa badina tadikaka haida na asie ura baine haroro. Taihu Burford na e gwa: “Tadikaka burukana ta na se urava lau ese taunimanima baina hereva henidia. Una nega ai, haida na asie lalopararava Bible Student iboudiai, ‘uhau bona ulato’ danu, ese Ihavarada Tauna Badana bae hanamoa.” (Sal. 148:​12, 13) To Taihu Burford na dounu e harorova. Laḡani haida muridiai, ia na Gilead Skul ena klas iharuana ela bona Panama ai misinari ḡaukara e karaia. Gabeai, tadikaka na e laloparara matamata taudia danu bae haroro diba.

Hebou badadia ese tadikaka taihu edia lalotamona e habadaia. Unu hebou badadia ai, haroro dinana ta e abia hidiva. Heḡereḡere, Winnipeg, Canada ai, hebou badana ela taudia iboudia e hadibadia March 31 na una siti ai bae haroro. Unu haroro dinadia ai momo e haroro henidia bona anina namona e vara. August 5, Winnipeg ai hebou badana ma ta e heabi neganai, taunimanima 7,000 mai kahana ela. Canada ai e heabi hebou badadia iboudiai amo una na namba badana.

Iehova ena taunimanima edia hebou badana ma ta na August 18-26, 1923 Los Angeles, California ai e heabi. Una hebou badana vairana wikidia ai Bible Student ese niuspepa ai una hebou badana e advatais bona invateisin pepadia 500,000 mai kahana e hariharilai. Bona sain badadia na pablik transpot bona motuka haida ai e kapadia kau.

 Saturday, August 25 ai, Tadikaka Rutherford ese tok ladana “Sheep and Goats,” e heni. Una tok ai e hahedinaraia “mamoe” anina na tanobada paradaisona ai mauri hanaihanai bae abia taudia. Danu ena tok ma ta ai, gwaubou ladana “A Warning” e gwauraia. Una gwaubou ai Kristendom taudia e sisiba hendia bona kudou maoro taudia e hagoadadia “Babulono Badana” amo bae raka lasi. (Apok. 18:​2, 4) Tanobada heḡeḡemadai Bible Student ese una gwaubou pepapepana milion momo e hariharilai.

Una hebou badana ena dina ginigabena ai, Tadikaka Rutherford, ese pablik tok ta e heni, sinadona na: “All Nations Marching to Armageddon, but Millions Now Living Will Never Die.” Bona una tok e kamonai taudia na 30,000 mai kahana. Bible Student na e diba hutuma na be laomu dainai Los Angeles ena steidiem matamatana e rentia. Bona idia na e ura taunimanima iboudiai ese program bae kamonai dainai, steidiem ena loudspeaker system e ḡaukaralaia, una nega ai una na technology matamatana. Bona momo na reidio amo una program e kamonaia.

Laḡani 1923 ai haroro ḡaukara na Africa, Europe, India, bona South America ai e bada. India ai, tadikaka A. J. Joseph na adavana bona natudia 6 e naridiava lalonai, ia ese Hindi, Tamil, Telugu, bona Urdu gado ai buka ihahanaina ḡaukarana e durua.

Sierra Leone ai, Tadikaka Alfred Joseph bona Leonard Blackman na heduru e urava dainai eda hedkwota Brooklyn, New York ai tadikaka e tore henidia. April 14, 1923 ai, edia noinoi haerena e abia. Alfred na e gwa: “Saturday hanuaboi ai, ta ese e rin henigu.” E rin tauna na e henanadai eto: “Oi ese heduru taudia bae vasi totona Watch Tower Society o tore henidia, a?” Alfred eto: “Oibe.” Tadikaka William R. Brown na e gwa: “Idia ese e siaia tauna na lau.” Ia na e rin dinana ai e ginidae Caribbean amo adavana Antonia, bona natuna kekenidia, Louise bona Lucy ida. Tadikaka na maoromaoro ela tadikaka Brown ena famili ida e hedavari henidia.

Alfred ma e gwa: “Sunday daba ai, lau bona Leonard na Baibul a herevalaiava lalonai, tau latana ta a itaia iduara badinai gini. Una na  Tadikaka Brown. Ia na hereva momokani e ura henia dikadikava dainai, e ura Sunday daba ai pablik tok na ia ese baine heni.” Hua ta lalonai, Tadikaka Brown na e laohai bukadia iboudiai e hariharilai. Se daudau ia ese buka 5,000 mai kahana e abi, gabeai ma buka momo e oda. To momo na mai dibadia Tadikaka Brown na dia buka e hoihoilaiva tauna. Ena hesiai ḡaukara lalonai, tok e heniva negadiai Baibul na e ḡaukaralaia momova, una dainai taunimanima ese ladana e hatoa Bible Brown.

Barmen, Germany ai, brens ofes na maraḡi dainai tadikaka na e ura una gabu bae rakatania. Bona e kamonai France ami na una siti be abiamu. Bible Student ese Magdeburg ai bildin badana ta e davaria, bona una na heḡereḡere printin ḡaukaradia bae kara. June 19 ai, tadikaka ese printa kohudia bona kohu ma haida e habou bona edia Betele matamatana Magdeburg ai e laohaidia. Tadikaka ese hedkwota e hadibaia idia na vada Betele matamatana ai. Murina dinana ai, niuspepa haida ai France ami ese Barmen siti e abia sivaraina e halasia. Tadikaka ese Iehova e tenkiu henia badina ia ese idia e durudia bona e gimadia.

Brazil ai, haroro ḡaukara dainai gabu momo ela tadikakana, George Young ese brens matamatana ta e haginia bona unuseniai The Watch Tower na Portuguese gado ai e halasia. Hua haida lalodia ia ese buka bona magasin 7,000 mai kahana e hariharilai. Sarah Ferguson na e moale dikadika tadikaka Young ese ia bona ena famili e vadivadidia. Ia na laḡani 1899 amo The Watch Tower e duahia, to do se bapatiso. Hua haida muridiai, Taihu Ferguson bona natuna 4 na e bapatiso.

Laḡani dokona ai, The Watch Tower December 15, 1923 lalonai Bible Student ese lalotamona ai Iehova itomadiho henina ena namo e herevalaia, eto: “Ta itaiamu kongrigeisen taudia edia abidadama na goada . . . Una dainai laḡani 1924 totona baita heḡaeḡae bona mai moaleda ida Iehova baita hesiai henia.”

Laḡani 1924 ai danu Bible Student ese ḡau namodia momo e moalelai. Betele tadikakadia na hua haida lalodiai Staten Island ai ruma haida e hagini, bona Brooklyn hedkwota amo una gabu na dia daudau. Laḡani 1924 matamana ai, una ḡaukara e haorea, bona una ese tadikaka bogaraḡidiai lalotamona e habadaia bona dala matamatana ai sivarai namona iharorolaina ḡaukarana e durua.