1. Idaunegai Dirava ese ena hesiai taudia be ede e hagoadadia toma?

 BAIBUL ese Dirava e hesiai henia taudia na e gwauraidiamu abidadama taudia. To nega haida idia na e hemamiva idia na asi goadadia. Heḡereḡere, King David na nega haida e hemamiva ena goada na “ororo aukana na heto,” a nega haida be e gariva dainai ‘kudouna e hetahava.’ (Sal. 30:7) Samson na Dirava ena lauma helaḡa ena heduru dainai, ena goada na e bada herea, to e laloparara bema Dirava ena heduru na lasi ia na bema manoka “taunimanima iboudiai heḡereḡeredia.” (Hah. 14:​5, 6; 16:17) Unu abidadama tataudia na Iehova ena heduru dainai e goada.

2. Dahaka dainai aposetolo Paulo na e gwa na manokamu negadiai na goadamu? (2 Korinto 12:​9, 10)

² Aposetolo Paulo danu e laloparara Iehova ena amo goada baine abi na namo. (2 Korinto 12:​9, 10 ba duahidia.) Ita momo heḡereḡereda, Paulo na e gorereava. (Gal. 4:​13, 14) Nega haida kara namo ikarana na e urava, to se heḡereḡereva. (Roma 7:​18, 19) Bona nega haida be e lalohekwarahiva badina asi dibana ia enai be dahaka be varamu. (2 Kor. 1:​8, 9) To Paulo na ena manoka negadiai e goadava. Edena dala ai? Iehova ese Paulo na goada e henia ena hekwakwanai baine haheaukalaidia.

3. Ina atikol ai ededia henanadai baita haerelaimu?

³ Iehova na e gwauhamata ita danu baine hagoadada. (1 Pet. 5:10) To ia ena amo goada na basita abi dibamu bema kara ta basita karaiamu. Haheitalai ta na ina: Motuka ena enjin ese  motuka e haheauamu. To namona na motuka itarina tauna ese akselareita baine moia, unu amo e uramu gabuna bainela. Una heḡereḡerena, Iehova na heḡaeḡae ita goada baine henida, to ena heduru baita abia helaoreana namona na ḡau haida baita kara. Iehova be dahaka e heni ita baine hagoadada? Iena amo una goada baita abia totona, dahaka baita kara? Iehova ese idaunegai peroveta tauna Iona, Iesu sinana Maria bona aposetolo Paulo e hagoadadia dalana baita haeroamu amo, unu henanadai haeredia baita dibamu. Bena Iehova ese hari ina negai ita e hagoadadamu daladia baita dibamu.

4. Ededia dala ai Iehova ena amo goada baita abi?

⁴ Iehova ena amo goada baita abi dalana ta na ia baita ḡuriḡuri henia, bena ia ese “siahu herea-daena” be henidamu. (2 Kor. 4:7) Bona goada baita abi dalana ma ta be iena Hereva baita duahia bona baita laloa dobu. (Sal. 86:11) Iena Hereva na “mai siahuna.” (Heb. 4:12) Iehova bo ḡuriḡuri heniamu bona iena Hereva bo stadilaiamu neganai, hekwakwanai bo haheaukalaimu, bo moalemu, bona asainmen aukana bo haḡuḡuruamu. Iehova ese peroveta tauna Iona e hagoadaia dalana mani aita laloa.

5. Dahaka dainai Iona na Iehova ena amo goada baine abi na namo?

⁵ Peroveta tauna Iona na Iehova ena amo goada baine abi na namo. Ia na e gari dainai Iehova ese e henia asainmen amo e heau. Una dainai lai gubana ta lalonai, ia bona ma haida na kahirakahira edia mauri e haboio. Ia na bouti amo e tahoa dobi neganai, gwarume badana ta ese e hadonoa. O laloamu una negai Iona ena hemami be ede bamona? Ia be e laloava unuseniai baine mase, a? Ia be e laloava Iehova ese e rakatania, a? Reana una nega ai Iona na e lalohekwarahi bada.

6. Iona 2:​1, 2, 7 ai heḡereḡerena, gwarume bogana lalonai Iona be dahaka e kara?

⁶ Iona na gwarume bogana lalonai dahaka e kara? Ia na e ḡuriḡuri. (Iona 2:​1, 2, 7 ba duahidia.) Ena be Iona ese Iehova ena hereva na se badinaia, to e helalokerehai bona mai manauna ida Iehova e ḡuriḡuri henia, una dainai e diba Iehova ese baine haere henia. Danu, Iona na Toretore Helaḡadia edia hereva e lalodia dobu. Unu ta gwau tomamu badina Iona ena ḡuriḡuri, Iona karoa 2 ai herevadia na Salamo ai e tore herevadia heḡereḡeredia. (Iona 2:​2, 5 na Salamo 69:1; 86:7 ida ba haheḡereḡeredia.) Una ese e hahedinaraiamu, Iona na unu hereva na mai dibana namonamo. Nega aukana lalonai ia ese unu hereva e lalodia dobu dainai, e diba Iehova ese ia na baine durua. Gabeai, Iehova ese e hamauria neganai, Iona na vada heḡaeḡae Iehova ena amo baine abia ḡaukarana ma ta baine haḡuḡurua.—Iona 2:10–3:4.

7-8. Edena dala ai tadikaka ta na ena hekwakwanai lalodiai goada e abi?

⁷ Iona ena haheitalai ese ita baine duruda diba, eda hekwakwanai lalodiai baita haheauka. Heḡereḡere, Taiwan ai tadikaka ta ladana, Zhiming, b na gorere momo e haheaukalai. Dia una mo to ena abidadama dainai ena ruma bese ese e daḡedaḡe henia. Ia na Iehova ena amo goada baine abi totona, e ḡuriḡuri bona Baibul e stadilaia. Ia na e gwa: “Nega haida hekwakwanai na lalodiava dainai, sibogu egu stadi na asina karaiava.” To ia na se hesiku, badina e gwa: “Ḡau ginigunana na, Iehova na ḡuriḡuri heniava, bena egu earphone amo Kingdom anedia na hakala heniva. A nega haida be, unu ane na abiva ela bona  lalogu e hamainoava bena egu stadi na hamatamaiava.”

⁸ Sibona ena stadi karana ese Zhiming na dala idauidau ai e durua. Heḡereḡere, ia na opareisen badana ta e abia murinai, nesi ta ese e hamaoroa iena red blood cell na e diho dainai rara baine abi na namo. Ena opareisen do se abia hanuaboina ai, ia na taihu ta ena ekspiriens e duahia, una taihu bona ia edia opareisen na heḡereḡere. Una taihu ena red blood cell na e diho herea, to rara na se abi bona e namo. Una ekspiriens ese Zhiming ena abidadama na e hagoadaia.

9. Hekwakwanai ta dainai o lalohekwarahimu neganai, dahaka ba kara? (Laulau danu ba itadia.)

⁹ Hekwakwanai ta dainai o lalohekwarahimu neganai, Iehova enai emu hemami igwauraina be auka, a? Eiava o hemamimu asi goadamu sibomu emu stadi ba karaia, a? Ba helalotao Iehova ese oiemu hekwakwanai na e lalopararalaiamu. Ena be ḡuriḡuri kwadoḡina ta bo gwauraiamu, to bavabia dae Iehova ese oi na be durumumu. (Efe. 3:20) Bema gorere dainai ba duahiduahi o ba stadi na auka, reana Baibul bona Baibul pablikeisin edia odio rekodin ba kamonai. Danu reana jw.org ai ane ta ba hakalaia eiava vidio ta ba itaia diba. Iehova bo ḡuriḡuri heniamu bona ia ese e henimu heduru daladia ai iena haere bo tahuamu neganai, ia ese be hagoadamumu.

10. Edena dala ai tadikaka taihu ese ita bae hagoadada diba?

¹⁰ Iehova ese Kristen tadikaka taihu amo ita baine hagoadada diba. Hekwakwanai ta davarimu eiava asainmen ta ihaḡuḡuruna ai ta hekwarahimu neganai, idia ese be durudamu. (Kol. 4:​10, 11) Ita na ta uramu ‘dika negadia ai’ turada ese bae duruda. (Her. 17:17) Ta lalomanokamu negadia ai, eda tadikaka taihu ese tauani dalana ai eda dabu ḡaudia be henimu, tauhalo be henidamu, bona be durudamu Iehova baita hesiai henia. Mani aita itaia edena dala ai Iesu sinana Maria na ma haida ese e durua.

11. Dahaka dainai Maria ese Iehova ena heduru baine abi na namo?

¹¹ Maria na Iehova ena ura baine karaia totona  Iehova ena heduru baine abi na namo. Mani a laloa aneru Gabriel ese Maria e hamaoroa baine rogorogo neganai, reana Maria na e lalohekwarahi badina ia na do se headava. Danu e hamaoroa ia baine havaraia merona na mesia ai bainela, to ia be sibona natuna ta do se naria. Bona ia na Iosef ida do asie headava dainai, ede baine hamaoroa toma ia na rogorogo?—Luka 1:​26-33.

12. Luka 1:​39-45 heḡereḡerena, Maria ese heduru be ede e abi toma?

¹² Maria na una asainmen aukana baine haḡuḡurua totona heduru be ede amo e abi? Ia na haida edia amo heduru e tahu. Heḡereḡere, aneru Gabriel e nanadaia ienai bae vara ḡaudia baine herevalai. (Luka 1:34) Una murinai, ia na “Iuda ororodia hanuana ta” ela varavarana Elisabet baine vadivadia. Una laolao na namo badina Elisabet ese hereva namodia amo Maria e hanamoa, bona lauma helaḡa ena heduru amo Elisabet ese Maria baine havaraia merona dainai peroveta hereva namona ta e gwauraia. (Luka 1:​39-45 ba duahidia.) Maria na e gwa Iehova “imana ese ena goada vada e hahedinaraia.” (Luka 1:​46-51) Iehova ese Gabriel bona Elisabet edia amo Maria e hagoadaia.

13. Bolivia ai taihu ta be edena dala ai tadikaka taihu edia amo heduru e abi?

¹³ Maria heḡereḡerena, oi danu tadikaka taihu edia amo heduru bavabi diba. Bolivia ai taihu ta ladana Dasuri na tadikaka taihu ese e durua. Ia tamana na gorere badana ta dainai hospele ai e noho neganai, ia ese e naria. (1 Tim. 5:4) Una na maduna badana bona mai hekwarahina. Ia na e gwa, “Nega momo na lalova una maduna na basina huaia diba.” Ia be haida edia amo heduru e tahu, a? Matamanai heduru na se tahu. Ia na e gwa, “Lau na asina ura tadikaka taihu baina hahekwarahidia. Bona ini na lalo toma, ‘Namo Iehova ese be durugumu.’ To gabeai na laloparara lau na sibogu egu goada ai egu hekwakwanai na urava baina hanaia badina ma haida edia heduru na asina tahuva.” (Her. 18:1) Una dainai Dasuri na turana haida e tore henidia bona enai e vara ḡauna e herevalaia. Ia na e gwa, “Tadikaka taihu ese lau na e durugu bada. Idia ese aniani haida e laohai hospele bona Baibul siridia amo e hagoadagu. Na moalemu badina ita na dia siboda, ita na Iehova ena ruma bese badana lalonai. Una ruma bese na ita ta hisihisimu neganai eda hemami na e lalopararalaimu bona e hagoadadamu idia ida Iehova baita hesiai henia.”

14. Dahaka dainai elda taudia edia heduru baita abidae na namo?

¹⁴ Iehova ese goada e henidamu dalana ta na elda taudia e ḡaukaralaidiamu. Idia na Iehova ena harihari ḡaudia dala idauidau ai ita e durudamu. (Isa. 32:​1, 2) Una dainai o lalohekwarahimu neganai, elda taudia edia heduru ba tahu. Bona idia ese e henimu heduruna na bavabidae, badina idia edia amo Iehova ese oi na be hagoadamumu.

15. Kristen taudia e hagoadadiamu helarona be dahaka?

¹⁵ Baibul ena gwauhamata ese goada baine henida diba dounu Iehova baita hesiai henia. (Roma 4:​3, 18-20) Ita Kristen tauda eda helaro na baita mauri hanaihanai—haida be tanobada paradaisona ai bona ma haida be guba basileiana ai be mauri hanaihanaimu. Una helaro ese ita na baine hagoadada hekwakwanai idauidau baita haheaukalai, sivarai namona baita harorolaia, bona kongrigeisin ai asainmen idauidau baita karadia. (1 Tes. 1:3) Aposetolo Paulo danu una helaro ese e hagoadaia.

16. Dahaka dainai aposetolo Paulo na goada baine abi na namo?

 ¹⁶ Paulo na goada baine abi na namo. Korinto taudia e tore henidia revarevana ai eto ia na vaitani hodu manokana ta na heto. Ia na eto: “Ini amo unu amo hahedika e aru maimu . . . a daradaramu, . . . e daḡedaḡe henimaimu, . . . [bona] e haketomaimu.” Iena mauri danu kahirakahira e haboioa. (2 Kor. 4:​8-10) Paulo ese unu hereva na ena misinari laolao ihatoina ai e toredia. Unu hereva e toredia murinai, ia na hekwakwanai ma haida e davari. Hutuma ese e daḡedaḡe henia, davara ai dika e davari, e arestia, bona e hadiburaia.

17. 2 Korinto 4:​16-18 heḡereḡerena, dahaka ese Paulo e hagoadaia ena hekwakwanai e haheaukalai?

¹⁷ Paulo na vaira nega helarona e laloa bada dainai e haheauka. (2 Korinto 4:​16-18 ba duahidia.) Ia ese Korinto taudia e hamaorodia ena be tauanina na e ‘manokava,’ to ia na dounu e lalogoadava. Paulo ese guba ai baine mauri hanaihanai helarona na e laloa bada, ia enai una helaro na “mia-hanaihanai ḡauna” dainai hisihisi idauidau e haheaukalai. Paulo ese una helaro na e laloa dobu dainai, e mamia ‘daba daba idoidiai’ lalona na e goadava.

18. Dahaka ese Tihomir bona ena ruma bese e hagoadadia?

¹⁸ Bulgaria ai tadikaka ta ladana Tihomir, na vaira nega helarona ese e hagoadaia. Laḡani haida gunadiai, Tihomir tadina Zdravko na aksiden ta ai e mase. Una dainai, Tihomir na nega daudau lalonai e lalohisihisi bada. To tauhalo bae abi totona ia bona ena ruma bese na toreisi lou negana ai bae vara ḡaudia e lalo. Tihomir na e gwa: “Emai herevahereva lalonai Zdravko baine toreisi lou neganai, edeseniai baia hedavari, ededia aniani baia nadu, daidia baia vavedia ia ida baia aniani hebou, bona ia ida dina gabediai e vara ḡaudia baia herevalai.” Tihomir na e gwa, toreisi lou helarona e laloa badamu karana ese iena ruma bese na e duruamu bae haheauka bona Iehova ese ia tadina baine hatorea isi lou negana bae naria.   

19. Edena dala ai emu helaro ba hagoadaia? (Laulau danu ba itaia.)

 ¹⁹ Edena dala ai emu helaro ba hagoadaia? Heḡereḡere, bema oiemu helaro na tanobada ai ba mauri hanaihanai, namona na Baibul ai Paradaiso e herevalaiamu siridia ba duahi bona ba lalodia dobu. (Isa. 25:8; 32:​16-18) Mani tanobada matamatana ai be varamu maurina a laloa: Unuseniai be daidia o itadiamu? Dahaka reḡe o kamonaimu? Bona emu hemami be ede bamona? Una nega ba laloa totona, iseda pablikeisin ai Paradaiso laulaudia ba ita bona miusik vidiodia, heḡereḡere Nega Matamatana Be Kaumu, eiava Maino be Varamu! ba itadia. Bema tanobada matamata helarona baita laloa badamu, eda hekwakwanai na ḡau “asi metauna bona asi vanahana ḡauna” ai be laomu. (2 Kor. 4:17) Una helaro amo Iehova ese oi na goada e henimumu, emu hekwakwanai ba haheaukalaidia.

20. Ta manokamu neganai, goada be ede baita abi toma?

²⁰ Ena be ita na ta hemamimu asi goadada, to Baibul na e gwaumu “Dirava na ita ida [dainai] baita goada.” (Sal. 108:13) Iehova ese heduru ḡaudia vada e heni unu amo baita goada. Una dainai bema o uramu asainmen ta ba haḡuḡurua, hekwakwanai ta ba haheaukalaia, eiava emu hesiai ḡaukara ai dounu ba moale, namona na Iehova ba ḡuriḡuri henia goadagoada bona sibomu emu stadi karana amo iena heduru ba tahua. Danu Kristen tadikaka taihu edia heduru bavabidae. Dia una mo, hanaihanai emu vaira nega helarona ba laloa. Unu amo “siahu idoinai ese baine hagoadamui, [Dirava] siahuna herea-daena heḡereḡerena; bena ba haheauka bona ba boga auka mai moalemui ida.”—Kol. 1:11.