1-2. (a) Iehova ena hesiai taudia ese e daradaralaimu ḡaudia haida be dahaka? (b) Ina atikol ai dahaka baita herevalaimu?

 ITA IBOUDAI na nega haida ta daradaramu. Heḡereḡere, mani witnes merona ta a laloa, reana ini be lalo tomamu, ‘Iehova ese lau e lalogumu, eiava?’ Reana una dainai e daradaramu baine bapatiso eiava lasi. Eiava eregabe tadikakana ta mani a laloa, ia na lalona e hadaia Iehova ihesiai henina karana baine atoa guna, to dia moni ḡaukara badana. To hari, iena ruma bese na moni dalana ai e hekwakwanaimu, reana be daradaramu ia be abi hidi maorona e karaia, eiava lasi. Eiava mani taihu burukana ta a laloa. Reana e lalomanokamu badina ena goadana na dia heḡereḡere guna e karava ḡaudia baine kara. Nega ta ini o lalo toma: ‘Iehova ese lau e lalogumu, eiava? Iehova dainai na kara abi hididia be dounu mai anidia, eiava? Iehova ese lau dounu be ḡaukaralaigumu, eiava?’

² Bema henanadai unu bamodia haeredia basita abimu, unu ese eda abidadama Iehova enai be hamanokaiamu, bona ia itomadiho henina karana baita hadokoa dibamu. Ina atikol ai, ita ese Baibul ena hahekau herevadia haida baita herevalaimu, unu ese be durudamu ini daradara e havaramu lalohadaidia baita hamaoromaoro: (1) Iehova ese lau e lalogumu, eiava? (2) Iehova dainai na kara abi hididia be mamaoro, eiava? (3) Iehova enai lau dounu mai egu ḡaukara, eiava?

 EMU DARADARA IHAMAOROMAORONA DALANA

3. Edena dala ai eda daradara baita hamaoromaorodia?

³ Eda daradara baita hamaoromaoro dalana ta na, Dirava ena Hereva ai unu henanadai haeredia baita tahu. Bema unu baita kara tomamu, baita goadamu, eda hetura karana Iehova ida be goadamu, bona eda ‘abidadama ai baita gini tutuka-tutukamu.’—1 Kor. 16:13.

4. Edena dala ai ‘ḡau iboudiai baita diba namonamo’? (1 Tesalonika 5:21)

⁴ Tesalonika Ginigunana 5:21 ba duahia. Baibul ese e hagoadadamu ‘ḡau iboudiai baita diba namonamo.’ Edena dala ai una baita karaia? Namona na ta abi daemu ḡaudia na Baibul amo baita hamomokanidia. Heḡereḡere, matamanai tame herevalaia mero matamatana mani aita laloa. Ia na e daradaramu, Dirava ese la be e lalomu, eiava. Ia ese una lalohadai baine abia dae be maoro, a? Lasi. Namona na ena daradara ḡauna baine hamaoromaoroa totona, Dirava ena lalohadai baine tahua.

5. Edena dala ai Iehova ese eda henanadai e haerelaimu?

⁵ Baibul ta duahiamu neganai, una na vaitani Iehova ese ita e hereva henidamu. To, bema ta uramu Iehova ena amo haere maorona baita abia, namona na Baibul baita duahia bona ḡau ma haida baita kara. Heḡereḡere, eda henanadai bae haerelai siridia baita tahu bona baita stadilai. Iehova ena orea ese e halasimu pablikeisin idauidau ai, hetahu karadia haida baita kara. (Her. 2:​3-6) Iehova baita ḡuriḡuri henia, bona baita noia baine duruda eda henanadai haerena baita davaria totona. Bena Baibul ai baita badina diba ena hahekau bona heduru herevadia baita tahu. Danu, Baibul ai abidadama taudia sivaraidia baita duahi, badina idia danu ita heḡereḡereda.

6. Edena dala ai Kristen heboudia ese baine duruda eda daradara ḡaudia baita hamaoromaoro?

⁶ Eda Kristen heboudia ai danu, Iehova ese ita e hereva henidamu. Bema hanaihanai Kristen heboudia baita laomu, reana ta ena tok eiava haere amo eda daradara ḡauna baita hamaoromaoroa dibamu. (Her. 27:17) Mani eda henanadai haida haeredia baita davari daladia aita herevalai.

IEHOVA ESE LAU E LALOGUMU, EIAVA?

7. Haida be edena henanadai e laloamu?

⁷ Nega ta ini do lalo toma, ‘Iehova ese lau e lalogumu, a?’ Bema bo lalomu oi na asi animu, bo hemamimu oi na dia heḡereḡere guba bona tanobada e karaia Diravana ida ba hetura. King David danu unu e lalo toma. Ia na e hoa Iehova ese ita taunimanima na e lalodamu. Una dainai e gwa: “Iehova e, taunimanima be dahaka oi ese o haḡereamu? Taunimanima natuna be daika, oi ese o laloamu?” (Sal. 144:3) Una henanadai haerena be edeseniai bo davariamu?

8. Samuel Ginigunana 16:​6, 7, 10-12 heḡereḡerena, Iehova ese taunimanima ediai be dahaka e itamu?

⁸ Baibul ese e hahedinaraiamu, haida ese e lalodia maraḡimu taudia na Iehova ese e lalodia badamu. Heḡereḡere, Iehova ese Samuel e siaia Iese natuna ta baine horoa Israel edia pavapava ai bainela. Iese na natuna memerodia 8 amo 7 mo e boiridia Samuel bae hedavari henia. a A ia natuna dokona David be se boiria. To, Iehova ese David e abia hidi. (1 Samuel 16:​6, 7, 10-12 ba duahidia.) Iehova na mai dibana ḡoevaḡoeva David na Iehova e lalokau henia badava merona.

9. Dahaka dainai bavabia dae, Iehova ese oi na e lalomumu? (Laulau danu ba itaia.)

⁹ Iehova ese oi e lalomu daladia mani a lalo. Eda hekwakwanai heḡereḡeredia ai heduru  herevadia e henimu. (Sal. 32:8) Ia na unu baine kara toma diba badina oi na e dibamu namonamo. (Sal. 139:1) Bema oi ese Iehova ena sisiba bo badinaiamu bona bo itaiamu una ese oi na e durumumu, bo abia dae momokanimu ia ese oi na e lalomu badamu. (1 Sis. 28:9; Apos. 17:​26, 27) Iehova ese emu hekwarahi bona emu kara namodia na e itaiamu bona e uramu ia turana ai baola. (Ier. 17:10) Bema oi na bo uramu Iehova turana ai baola, Ia na be moalemu.—1 Ioane 4:19.

GUNA IEHOVA DAINAI NA KARA ABI HIDIDIA BE DOUNU MAI ANIDIA, EIAVA?

10. Guna ta kara abi hididia ta lalomu neganai, ededia henanadai bae vara diba?

¹⁰ Haida na edia mauri lalonai e kara abi hididia e lalo loumu neganai, e daradaramu idia be abi hidi maorona e karaia, eiava. Reana Iehova ihesiai henina karana bae habadaia totona, idia ese moni ḡaukara namona eiava bisnes namona e dadaraia. Hari laḡani momo vada e ore bona readia turadia gunadia e itadiamu moni dalana ai na asie hekwarahimu. Una dainai, haida na ini be lalo tomamu: ‘Iehova dainai na kara abi hididia be mai anina bada, eiava? Unu abi hidi daidia hahenamo haida na readia, a?’

11. Salamo 73 e torea tauna be dahaka ese lalona e hahekwarahia?

¹¹ Bema henanadai unu bamodia ese lalomu e hahekwarahiamu, Salamo 73 e torea tauna ena hemami ba laloa. Ia ese haida e itadiava edia mauri na namo, ḡau momo herea e moalelaiva, bona asie lalohekwarahiva. (Sal. 73:​3-5, 12) Unu e itava ḡaudia daidiai, e laloava Iehova ihesiai henina ḡaukarana na dia abi hidi maorona. Ia na “dina idoinai” una lalohadai kererena ese e hahisiava. (Sal. 73:​13, 14) Una lalohadai kererena be ede e hamaoromaoroa toma?

12. Salamo 73:​16-18 heḡereḡerena, edena dala ai Salamo 73 e torea tauna ese ena lalohadai kerena e hamaoromaoroa?

 ¹² Salamo 73:​16-18 ba duahidia. Salamo 73 e torea tauna na Iehova ena dubu helaḡa ela. Ia na una gabu namona ai dainai baine lalohadai namonamo diba. E laloparara ena be haida edia mauri na namo herea, to idia na asi edia helaro namona. Una ese lalomaino e henia, badina e diba Iehova isiaina baine lao heni karana na abi hidi hereadaena. Una dainai, lalona e hadaia dounu Iehova baine hesiai henia.—Sal. 73:​23-28.

13. Bema guna o kara abi hididia daidiai o daradaramu, dahaka ba kara diba? (Laulau ba itaia.)

¹³ Salamo itorena tauna bamona, oi danu Dirava ena Hereva amo lalomaino na bavabia diba. Edena dala ai? Mani o abi hahenamodia a lalo, heḡereḡere, Iehova ese oi na e lalonamo henimumu, to Ia asie hesiai heniamu taudia ediai unu hahenamo na lasi. Idia na edia moni ḡaukara ai mo e tabekaumu, badina asi edia vaira nega helarona. To, Iehova ese oi na ḡau namodia momo e henimumu, bona e gwauhamata vaira nega ai ma ḡau namodia momo baine henimu. (Sal. 145:16) Danu, mani ina danu ba laloa: Bema abi hidi idauna ta tama karaia, ita tama diba hari eda mauri be ede bamona, a? Reana lasi. To mai dibada ḡauna bina: Dirava bona dekedia taudia e lalokau henidiamu dainai abi hidi e kara taudia na, moale korikorina e davariamu.

IEHOVA ESE LAU DOUNU BE ḠAUKARALAIGUMU, EIAVA?

14. Dahaka dainai haida na e lalomanokamu, bona edena henanadai e laloamu?

¹⁴ Iehova ena hesiai taudia haida na buruka, gorere, eiava diseibol dainai ḡau haida  ikaradia ai na e hekwarahimu. Una dainai reana e daradaramu bema Iehova ese idia e lalodia badamu, eiava. Reana be henanadaimu, ‘Iehova ese lau dounu be ḡaukaralaigumu, eiava?’

15. Salamo 71 e torea tauna be dahaka e diba?

¹⁵ Salamo 71 e torea tauna ena hemami danu unu bamona. Ia na e ḡuriḡuri, eto: “Egu goada e oremu negana ai basio rakatanigu.” (Sal. 71:​9, 18) To ia na mai dibana bema dounu Iehova be hesiai heniamu, Iehova ese ia be gimaiamu bona be duruamu. Danu e diba, ena be ta ena goada na mai hetoana to bema mai kudouna ibounai ida ena hesiai ḡaukara be karaiamu, Iehova ese ia na be lalonamo heniamu.—Sal. 37:​23-25.

16. Ededia dala ai Iehova enai burukadia na mai anina? (Salamo 92:​12-15)

¹⁶ Bema oi na buruka, namona na Iehova ese oi e lalomumu dalana ba haeroa. Ia ese oi na be durumumu dibamu ia ba hesiai henia, ena be emu goada na mai hetoana. (Salamo 92:​12-15 ba duahidia.) Basio kara diba ḡaudia na basio lalodia, to ba kara diba ḡaudia hari ba lalo. Heḡereḡere, emu abidadama sivaraidia amo haida ba hagoadadia bona ba hahedinaraia ma haida na o lalodia badamu. Iehova ese laḡani momo lalodiai e durumu daladia bona oi ese o lalodia badamu gwauhamata namodia na ma haida ediai ba herevalai. Ba helalotao haida daidiai o gwauraimu ḡuriḡuridia na mai siahudia. (1 Pet. 3:12) Ena be eda noho daladia na idauidau, to ita iboudai na Iehova bona ma haida daidiai ḡau ta baita karaia dibamu.

17. Dahaka dainai ta karamu ḡaudia na ma haida ida basita haheḡereḡeredia?

¹⁷ Bema o lalohisihisimu badina hari oi na dia heḡereḡere Iehova ena hesiai ḡaukara lalonai guna o kara ḡaudia ba kara, namona na bavabia dae Iehova ese hari o karamu ḡaudia na  e lalo badamu. Reana bo uramu o karamu ḡaudia na ma haida e karamu ḡaudia ida ba haheḡereḡere. Unu lalohadai na ba dadaraia. Dahaka dainai? Badina Iehova na unu se kara tomamu. (Gal. 6:4) Heḡereḡere, Maria ese dehoro mai bonana namona bona dava bada ḡauna na Iesu e henia. (Ioa. 12:​3-5) A vabu ogoḡamina ta be dubu helaḡa ai moni maraḡi-maraḡidia rua e ato. (Luka 21:​1-4) To, Iesu enai una na edia abidadama e hahedinaraia dalana. Iehova o abidadama heniamu bona o lalokau heniamu dainai o karamu ḡaudia na Ia ese e laloa badamu, ena be o laloamu una na maraḡi herea.

18. Dahaka ese baine duruda eda daradara baita hamaoromaorodia totona? (Maua danu ba itaia “ Iehova Ena Hereva ese Baine Durumu Emu Daradara Ḡaudia Ba Hamaoromaorodia.”)

¹⁸ Ita iboudai na mai eda daradara ḡaudia. To tame diba, Baibul ese baine duruda diba unu daradara ḡaudia baita hamaoromaoro totona. Una dainai ba ḡaukara goada o daradaralaimu ḡaudia ba hamaoromaoro, unu amo oi na bo lalogoadamu bona basio lalohekwarahimu. Iehova ese oi na e dibamu namonamo. Ia dainai o kara ḡaudia iboudiai na e lalo badamu bona e ura dikadikamu baine hanamomu. Bavabia dae Iehova ese Ia e badinaiamu taudia iboudiai na e lalokau henidiamu bona e lalodia badamu.