1. Iesu ese ita e henida harihari ḡaudia haida be dahaka?

 IESU ema tanobada neganai, ena harihari bada karana na dala idauidau ai e hahedinaraia. Heḡereḡere, nega momo hoa karadia amo taunimanima e durudiava. (Luka 9:​12-17) Iena harihari ḡauna hereadaena na ita daidai sibona ena mauri e atoa diho. (Ioa. 15:13) Iesu e toreisi lou negana amo ita na dounu e durudamu. Ena gwauhamata heḡereḡerena, Iehova e noia ena lauma helaḡa baine heni ita ihadibada bona tauhalo baine henida. (Ioa. 14:​16, 17; 16:13) Danu, kongrigeisin heboudia amo, Iesu ese heduru ḡaudia idauidau e henidamu tanobada heḡeḡemadai ai taunimanima iboudiai na hahediba taudia ai baita halaodia totona.—Mat. 28:​18-20.

2. Efeso 4:​7, 8 ai ina hereva, “taunimanima na harihari ḡaudia bamona e heni” be daidia e gwauraidiamu?

² Iesu ese ita na harihari ḡauna ma ta danu e henida. Aposetolo Paulo na ena revareva ai eto, Iesu na e dae guba neganai, ia ese “taunimanima na harihari ḡaudia bamona e heni.” (Efeso 4:8 futnout amo ba duahia. a) Paulo na e gwa Iesu ese ini harihari ḡaudia na e heni dala idauidau ai kongrigeisin bae durua totona. (Efe. 1:​22, 23; 4:​11-13) Hari ina negai, ini “harihari ḡaudia” na hesiai taudia, kongrigeisin elda, bona seket inarina taudia. b Vaia, ini tatau na dia ḡoḡoevadadae, bona nega haida na be kereremu. (Iak. 3:2) To, eda Lohiabada Iesu Keriso ese unu tadikaka na e ḡaukaralaidiamu ita bae duruda.

3. Edena dala ai baita hahedinaraia Iesu ese e heni “harihari ḡaudia” na ta durudiamu?

 ³ Iesu ese unu tadikaka e henidia maduna badana na kongrigeisin bae hagoadaia. (Efe. 4:12) To ita iboudai ese danu edia ḡaukara baita durua diba. Ini aita haheitalaia toma: Ita haida be Kingdom Hall ihaginina ḡaukarana ai ta ḡaukaramu. Ma haida be aniani, trenspot, bona dala ma haida ai ta hedurumu. Una heḡereḡerena, ita iboudai ese eda kara bona hereva amo kongrigeisin baita hagoadaia diba, unu amo hesiai taudia, elda, bona seket inarina taudia na baita durudiamu. Ina stadi amo baita dibamu edena dala ai ini tadikaka edia ḡaukara goada amo namo ta davarimu, bona edena dala ai baita hahedinaraia ini tadikaka bona Iesu na ta lalodia badamu.

HESIAI TAUDIA NA “HEDURU E HENIMU TAUDIA”

4. Kristen ginigunadia edia nega ai, hesiai taudia be ededia dala ai ma haida e durudiava?

⁴ Kristen ginigunadia edia nega ai, tadikaka haida na e abidia hidi hesiai taudia ai baela totona. (1 Tim. 3:​8, NWT) Paulo ese ena revareva ai e hahedinaraia hesiai taudia na “heduru e henimu taudia.” (1 Kor. 12:​28, NWT) Momokani, hesiai taudia na mai anina bada ḡaukaradia ai e heduruva dainai, elda taudia na mai edia nega hahediba bona mamoe ireḡudia ḡaukaradia bae kara. Heḡereḡere, hesiai taudia na reana Revareva Helaḡadia e kopedia hanaiva bona unu kope bae kara kohudia e hoiva.

5. Hari ina nega ai hesiai taudia be ededia dala haida ai e hedurumu?

⁵ Mani hesiai taudia ese kongrigeisin lalonai e karamu mai anina bada ḡaukaradia aita lalo. (1 Pet. 4:10) Heḡereḡere, kongrigeisin ena akaunt eiava teritori inarina ḡaukarana e duruamu, kongrigeisin ena pablikeisin oda e karaiamu bona e siaiamu, audio bona video kohudia e narimu, atendent ḡaukarana e karaiamu, eiava Kingdom Hall meintenens ḡaukarana e duruamu. Ini ḡaukara iboudiai na mai anidia bada, badina una ese kongrigeisin e duruamu haroro ḡaukara bae karaia namonamo bona hebou ta ta bae moalelai. (1 Kor. 14:40) Danu, hesiai taudia haida na Mauri Bona Hesiai Ḡaukara Hebouna ai kaha haida e narimu bona pablik tok e henimu. Hesiai tauna ta na grup ovasia e duruamu tauna ai bae abia hidi diba. Nega haida be elda ese hesiai tauna ta e boiriamu ia ida mamoe vadivadi haida bae kara hebou.

6. Dahaka dainai hesiai taudia edia ḡaukara goada karana na ta laloa badamu?

⁶ Hesiai taudia edia ḡaukara ese kongrigeisin be ede e durua tomamu? Taihu ta Bolivia ai na e gwaumu: “Hesiai taudia dainai, lau ese kongrigeisin heboudia na moalelaimu. c Edia ḡaukara namona dainai, ane na abimu, na haeremu, tok na kamonaimu, bona e haheitalaimu laulau bona vidio amo ḡau momo na dibamu. Idia ese hebou gabuna e laomu taudia edia seifti na e laloa badamu bona videoconference amo ruma ai e kontek taudia e durudiamu hebou bae itaia totona. Hebou muridiai gabu ihaḡoevana, kontribiusin iduahina, bona eda pablikeisin iheḡaeḡaelaina ḡaukaradia e durumu. Edia ḡaukara na na laloa badamu!” Colombia ai taihu ta ladana na Leslie, bona adavana na elda ta. Ia na e gwa: “Lau adavagu na hesiai taudia ese asainmen idauidau ai e duruamu. Bema idia mo lasi, lau adavagu na reana bema bisi bada herea. Edia ḡaukara goada-goada bona heduru namona dainai, na uramu baina tenkiu henidia.” Momokani, ita iboudai danu ta uramu eda hesiai taudia edia ḡaukara namona dainai, baita tenkiu henidia.—1 Tim. 3:13.

7. Edena dala ai baita hahedinaraia hesiai taudia na ta lalodia badamu? (Laulau danu ba itaia.)

⁷ Momokani hesiai taudia na ta lalodia badamu, to Baibul ese ita na e hagoadadamu: “Tenkiu karana ba hahedinaraia.” (Kol. 3:​15, NWT) Finland ai elda ta ladana Kshish′tȯf ese ena tenkiu karana na ini e hahedinaraia tomamu: “Lau  ese kadi ta eiava text message ai Baibul sirina ta na toreamu bona una hesiai tauna ena kara ta ese lau e hagoadagu, eiava ena ḡaukara na laloa badamu herevana ta na toreamu.” New Caledonia ai Paskal bona Jael be nega momo hesiai taudia daidiai e ḡuriḡurimu. Paskal na e gwaumu: “Ai na eda hesiai taudia daidiai a ḡuriḡurimu; Iehova a tenkiu heniamu bona a noiamu kongrigeisin ai hesiai taudia baine hanamodia bona baine durudia.” Iehova ese ḡuriḡuri unu bamodia na e kamonaimu, una dainai kongrigeisin na namo be davarimu.—2 Kor. 1:11.

KONGRIGEISIN ELDA NA “BOGARAḠIMUI AI E ḠAUKARA GOADAMU”

8. Dahaka dainai Paulo na ena revareva ai e gwa elda taudia na e “ḡaukara goadamu”? (1 Tesalonika 5:​12, 13, NWT)

⁸ Kristen ginigunadia edia nega ai elda taudia na e ḡaukara goadava kongrigeisin bae durua. (1 Tesalonika 5:​12, 13 ba duahidia; 1 Tim. 5:17) Idia ese kongrigeisin e ‘reḡuava’—hebou e hakauva bona elda oreana ai disisen e kara hebouva. Bona mai edia lalokau ida edia tadikaka bona taihu e sisiba henidiava, unu amo edia abidadama ai bae gini tutuka. (1 Tes. 2:​11, 12; 2 Tim. 4:2) To danu ini tatau na e ḡaukara goadava edia ruma bese bae naridia bona edia hetura karana Iehova ida bae hagoadaia.—1 Tim. 3:​2, 4; Tito 1:​6-9.

9. Hari ina nega ai elda taudia edia maduna haida be dahaka?

⁹ Hari ina nega ai elda taudia na ḡaukara momo e karamu. Idia na sivarai namo iharorolaina taudia. (2 Tim. 4:5) Elda taudia na e haroro goadagoadamu, eda teritori ai haroro ḡaukara e nariamu, bona treinin e henidamu edena dala ai haroro bona hahediba ḡaukarana baita karaia namonamo. Idia na mai edia hebogahisi bona lalokau ida hahemaoro ḡaukarana e karaiamu. Kristen tauna ta ese kara dika badana ta e karaiamu neganai, elda taudia na e ḡaukara goadamu ia bae durua ena hetura karana Iehova ida baine hanamoa lou. To danu, idia ese kongrigeisin baine ḡoeva dalana na e laloa badamu. (1 Kor. 5:​12, 13; Gal. 6:1) Elda taudia edia maduna badana na mamoe serina bae reḡua. (1 Pet. 5:​1-3) Idia ese Baibul amo e heḡaeḡaelai tok namodia e henimu, e ḡaukara goadamu kongrigeisin taudia bae dibadia namonamomu, bona mamoe vadivadi e karamu. Elda ma haida na Kingdom Hall construction bona maintenance ḡaukaradia ai e hedurumu, haida be rijinol hebou inaridia ḡaukaradia e gunalaimu, ma haida be Hospital Liaison Committee bona Patient Visitation Group ḡaukaradia e karamu, bona asainmen ma haida. Momokani, elda taudia na ita daidai e ḡaukara goadamu!

10. Dahaka dainai elda taudia edia ḡaukara goada karana baita laloa bada?

¹⁰ Iehova na e peroveta elda taudia ese ena taunimanima na bae reḡudia namonamo dainai, “basie gari lou bona kudoudia basie hetaha lou.” (Ier. 23:4) Finland ai taihu ta ladana Johanna ese gorere badana ta e davaria neganai, una hereva anina na e mamia momokani. Taihu na eto: “Lau ese ma haida ediai egu hemami baina herevalaia na auka. To nega ta lau asi dibagu namonamo elda ta enai egu lalohekwarahi ḡaudia na herevalai neganai, ia na mai haheaukana ida e hakalava, bona lau daigu ai e ḡuriḡuri, bona e hamaorogu Iehova ese lau na e lalokau henigumu. Ena be ia ese e gwaurai herevadia iboudiai na asina lalodiataomu, to lau ese na laloataomu ḡauna na, una nega ai egu lalohekwarahi ibounai e ore. Dibagu Iehova ese nega korikori ai una tadikaka e siaia lau baine durugu.” Emu kongrigeisin elda taudia ese oi be ede e durumu toma?

11. Edena dala ai ba hahedinaraia oi ese elda taudia na o lalodia badamu? (Laulau danu ba itaia.)

¹¹ Iehova na e uramu mai laloda idoinai ida elda taudia “edia ḡaukara dainai” eda tenkiu karana baita hahedinaraia. (1 Tes. 5:​12, 13) Finland ai e nohomu taihu ta ladana Henrietta na e gwa: “Elda taudia na mai edia ura ida ma haida e durudiamu, to basitato edia nega bona goada na asi hetoadia eiava edia mauri ai hekwakwanai na  asie davarimu. Nega haida na hamaorodiamu: ‘Oi mai dibamu dahaka? Oi na elda namona. Na uramu una na ba diba.’” Türkiye d ai e nohomu taihu ta ladana Sera na e gwa: “Elda taudia danu e uramu haida ese bae hagoadadia, unu amo edia ḡaukara na dounu bae karadia diba. Una dainai, reana hahenamo herevadia na kadi ta ai baita tore bona baita henidia, idia ida baita aniani hebou, bona haroro ḡaukara ai baita bamodia.” Emu kongrigeisin ai e ḡaukara goadamu eldana ta mai dibamu, a? Reana dala ba tahu ia enai emu tenkiu karana ba hahedinaraia.—1 Kor. 16:18.

SEKET INARINA TAUDIA ESE ITA E HAGOADADAMU

12. Kristen ginigunadia edia nega ai, daidia ese danu kongrigeisin e hagoadaiava? (1 Tesalonika 2:​7, 8)

¹² Keriso Iesu ese tadikaka ma haida danu e abidia hidi kongrigeisin na dala ma haida ai bae durua. Iena hahekau henunai, Ierusalem ai e nohova elda taudia ese Paulo, Banaba, bona tadikaka ma haida e siaidia kongrigeisin bae vadivadidia. (Apos. 11:22) Dahaka dainai? Hesiai taudia bona elda taudia e abidia hidi badina heḡereḡerena; idia ese kongrigeisin bae hagoadaia. (Apos. 15:​40, 41) Unu tadikaka na ḡau momo e dadarai una ḡaukara bae karaia totona. Ena be nega haida edia mauri na bema haboioa diba, to idia ese ma haida ihadibadia bona ihagoadadia helaoreana, una ḡaukara e goadalaiava.—1 Tesalonika 2:​7, 8 ba duahidia.

13. Seket inarina tauna ena maduna haida be dahaka?

¹³ Seket inarina taudia na gabu momo e loamu. Haida edia laolao na kilomita handred momo heḡereḡerena; kongrigeisin ta amo bae lao kongrigeisin ma ta. Wiki ta ta ai, seket tauna na tok haida e henimu, mamoe vadivadi e karamu, painia taudia edia hebou, elda edia hebou, bona haroro grup heboudia e  hakaumu. Seket bona rijinol heboudia edia tok e heḡaeḡaelaimu. Painia skul ai e hahedibamu bona seket lalonai painia taudia ida e heboumu. Dia una mo, to nega haida brens ofis ese e henimu mai anina bada ḡaukaradia danu e karamu.

14. Dahaka dainai eda seket inarina taudia edia ḡaukara goada karana na baita laloa bada?

¹⁴ Kongrigeisin be seket taudia edia ḡaukara namona amo dahaka namo e davarimu? Türkiye ai e nohomu tadikakana ta ese seket inarina taudia edia vadivadi na ini e herevalaia toma: “Edia vadivadi ese lau e hagoadagumu nega baina ato egu tadikaka bona taihu baina durudia. Lau ese seket inarina taudia momo vada na hedavari henidia; to nega ta se gwa idia na asi edia nega lau bae hereva henigu.” Matamanai tame herevalaia taihu ta ladana Johanna, na seket inarina tauna ta ida haroro negana ai e ḡaukara hebou, to ruma iboudiai asi taudia. Una taihu na e gwa: “Una dina na basina laloa boio diba. Lau tadigu raruosi na emai gabu e rakatania bona gabu ma ta ela dainai, na misidiava. Seket tauna ese e hagoadagu eto, ena be Iehova ena hesiai ḡaukara dainai hari lau na nohomu gabuna na egu ruma bese bona turagu edia amo na daudau, to tanobada matamatana ai, ita na idia ida baita nohomu bona baita moale heboumu ela bona hanaihanai.” Oibe, ita momo na seket inaridia taudia edia heduru namodia na dounu ta lalodiataomu.—Apos. 20:37–21:1.

15. (a) Ioane Ihatoina 5-8 ena hereva heḡereḡerena, edena dala ai baita hahedinaraia seket inarina taudia na ta lalodia badamu? (Laulau danu ba itaia.) (b) Edena dala ai baita hahedinaraia unu tadikaka adavadia na ta lalodia badamu? (Ina maua ba itaia “ Adavadia Ba Lalodiatao.”)

¹⁵ Aposetolo Ioane ese Gaio e hagoadaia e vadivadimu tadikakadia na baine abidia dae bona “edia laolao ai [baine] kahadia,” Dirava ese e moalelaiamu dalana heḡereḡerena. (3 Ioane 5-8 ba duahidia.) Unu baita  kara toma dalana ta na seket inarina tauna baita boiria ita ida baine aniani hebou. Dala ma ta be idia e vadivadimu purana ai haroro ḡaukara baita durua. Leslie, matamanai tame herevalaia taihuna ese ena tenkiu karana na ini e hahedinaraia tomamu. E gwa: “Egu ḡuriḡuri ai Iehova na noiamu edia dabu ḡaudia baine henidia totona. Danu lau adavagu ida ese idia a tore henidiamu revarevadia ai, a hamaorodiamu edena dala ai edia vadivadi ese ai e durumai.” Ba helalotao, seket inarina taudia na taunimanima, idia danu hesiku mamina be abiamu. Nega haida e goreremu, ḡau haida e lalohekwarahilaimu, bona e lalomanokamu. Una dainai, reana bo gwauraimu hereva namodia eiava bo henimu harihari ḡaudia na seket tauna ese ena ḡuriḡuri ai Iehova e noia ḡauna heḡereḡerena!—Her. 12:25.

“HARIHARI ḠAUDIA BAMONA E HENI” TADIKAKADIA BAE MOMO BE NAMO

16. Hereva Lada-isidia 3:27 ena hereva heḡereḡerena, tadikaka ese bae lalo henanadai haida be dahaka?

¹⁶ Tanobada heḡeḡemadai ai, Iehova ena orea na e ura tadikaka momo na Iesu ena “herahia” tadikakadia ai baela. Bema oi na bapatiso tadikaka ta, oi emu ai heḡereḡere dala unu bamona ai ba heduru? (Hereva Lada-isidia 3:27 ba duahia.) Oi o uramu hesiai tauna ta ai baola, a? Bema oi na hesiai tauna ta, oi o uramu elda ta ai baola bona tadikaka taihu ba durudia, a? e Oi emu ai heḡereḡere emu mauri lalonai sensi haida ba kara unu amo Basileia Evanelia Skul ai ba vareai, a? Una skul ai be henimumu treinin dainai, Iesu ese dala ma haida ai oi be ḡaukaralaimu dibamu. Bema o laloamu oi na do dia heḡereḡere, Iehova ba ḡuriḡuri henia. Ba noia ena lauma helaḡa amo baine durumu e henimumu asainmen iboudiai ba haḡuḡurudia totona.—Luka 11:13; Apos. 20:28.

17. Eda King, Keriso Iesu ese “harihari ḡaudia bamona e heni” tadikakadia edia ḡaukara goada karana ese dahaka e hamomokaniamu?

¹⁷ Iesu ese “harihari ḡaudia bamona e heni” tadikakadia e ḡaukara goada karana ese e hamomokaniamu Iesu na ini dina gabedia lalodiai ita e gunalaidamu. (Mat. 28:20) Momokani, ta moalemu iseda King na lalokau bona harihari bada tauna, bona mai dibana ita ta ta eda dabu ḡaudia be dahaka, bona heitatao taudia namodia e heni ita bae duruda. Una dainai dala baita tahu unu tadikaka ediai eda tenkiu karana baita hahedinaraia. To danu, namona na hanaihanai Iehova baita tenkiu henia, badina “harihari ḡaudia namodia iboudiai bona herahia ḡaudia ḡoeva-daedia iboudiai” na Ia ena amo e maimu.—Iak. 1:17.