1. Iehova ese ena hesiai taudia be ede e lalodia tomamu?

 IEHOVA ese ena hesiai taudia ediai e varamu ḡaudia iboudiai na e itamu. Ia na mai dibana iseda moale bona lalohisihisi ḡaudia. (Sal. 37:18) Danu, ia na e moalemu bema ita na ta hekwarahimu ia ta hesiai heniamu, herevana hisihisi ta davarimu! Dia una mo, to ia na e ura dikadikamu ita baine duruda bona baine hagoadada.

2. Iehova ese lalohisihisi taudia daidiai dahaka be karamu, bona edena dala ai ena heduru amo namo baita davarimu?

² Salamo 147:3 na e gwaumu, Iehova ese lalohisihisi taudia “berodia e kumidiamu.” Ina siri ai, Iehova ese mai hebogahisina ida e lalohisihisimu taudia e durudia dalana e hahedinaraia. Ita be dahaka baita kara Iehova ena heduru amo namo baita davari? Mani ina haheitalai a laloa. Mai ena diba doktana ta na bero tauna baine durua ena bero baine namo totona ḡau momo be karamu. To, una bero tauna baine namo totona, dokta ena hahekau herevadia na baine kamonai namonamo bona baine badinadia. Una heḡereḡerena, namona na Iehova ena hahekau herevadia baita badina unu amo ta dara dokomu negadiai namo baita davari dibamu. Ina atikol lalonai, baita itaiamu Iehova ese e lalohisihisimu taudia daidiai dahaka e gwaurai bona iena sisiba baita badinadia daladia baita herevalaimu.

 IEHOVA ESE E HADIBADAMU ITA NA E LALODA BADAMU

3. Dahaka dainai haida na e laloamu idia na asi anidia?

³ Hari ina negai, taunimanima momo ese ma haida na asie lalokau henidiamu. Idia ese ma haida asie kara namo henidiamu dainai, momo na e laloamu idia na asi anidia. Taihu ta ladana Helen a na e gwa: “Na tubu daekau ruma besena ai lalokau na lasi. Tamagu na e daḡedaḡeva bona nega momo e hamaoroguva lau na asi anigu.” Reana oi danu Helen heḡereḡerena, haida ese asie kara namo henimumu, e kara auka henimumu bona e uramu ba mamia oi na ta ese se lalokau henimumu. Bema unu bamona, oiemu ai na reana be aukamu bavabiadae haida ese oi na e lalokau henimumu.

4. Salamo 34:18 ena hereva heḡereḡerena, Iehova ese lalohisihisi taudia be ede e lalodia tomamu bona e gwauhamata dahaka baine kara?

⁴ Herevana haida ese se kara namo henimumu, to bavabia dae Iehova ese oi na e lalokau henimumu bona e lalomu badamu. Ia na “lalo-hisihisi taudia dekedekediai.” (Salamo 34:18 ba duahia.) Bema oi na o ‘dara-dokomu,’ ba helalotao Iehova na emu kara namodia e itamu bona e boirimu ia dekena baola. (Ioa. 6:44) Ia na hanaihanai noho heḡaeḡae oi baine durumu badina e lalokau henimumu.

5. Haida ese se lalodia badava taudia na Iesu ese e kara henidia dalana amo dahaka ta dibamu?

⁵ Iesu ena haheitalai ilalodia karana amo Iehova ena hemami baita dibaiamu. Iesu tanobada ai e nohova neganai, ma haida ese se lalodia badava taudia na ia ese e kara namo henidiava. (Mat. 9:​9-12) Gorere badana ta e abia hahinena ta na e urava baine namo dainai, Iesu ena dabua e dogoatao, Iesu ese e hagoadaia bona ena abidadama dainai e hanamoa. (Mar. 5:​25-34) Iesu ese Tamana ena kara na e hahedinaraidia ḡoevaḡoeva. (Ioa. 14:9) Una dainai, namona na bavabia dae Iehova ese oi na e lalomu  badamu bona emu kara namodia na e itamu, emu abidadama bona emu lalokau ia enai danu.

6. Dahaka ba kara bema oi na o mamiamu ta ese se lalomumu?

⁶ Dahaka ba kara bema nega momo o mamiamu oi na ta ese se lalomumu? Baibul ai Iehova ese oi e lalomu badamu siridia ba duahidia bona ba lalodia dobu. b (Sal. 94:19) Haida ida sibomu basio haheḡereḡere, bona basio kara diba ḡaudia na basio lalo. Iehova ese ita na se doridamu basita kara diba ḡaudia baita kara. (Sal. 103:​13, 14) Bema guna ta ena abuse karana dainai o lalohisihisimu, basioto una na oi emu kerere! Ba helalotao, Iehova ese unu e kara tomamu taudia na be hahemaoro henidiamu, to e hahisidia taudia na Iehova ese be durudiamu. (1 Pet. 3:12) Sandra, ia na maraḡina ai e daḡedaḡe heniava, na e gwa, “Nega iboudiai Iehova na noia baine durugu egu kara namodia baina itadia.”

7. Edena dala ai eda mauri ai e vara ḡaudia amo haida baita durudia diba?

⁷ Basio daradara Iehova ese baine ḡaukaralaimu diba, ma haida ba durudia. Ia ese e henimu hahenamo ta na haroro ḡaukara ai Ia ida ba ḡaukara hebou. (1 Kor. 3:9) Emu mauri ai e vara ḡaudia daidiai ma haida edia hemami bona hisihisi na bo lalopararalaidiamu. Danu, bo durudia dibamu. Helen, paragraf 3 ai ta herevalaia taihuna, na heduru e abi dainai, hari ia ese ma haida be durudia namonamo dibamu. Ia na e gwa: “Guna na mamiava lau na dia heḡereḡere. To Iehova ena lalokau na mamia bona ia ese e ḡaukaralaigumu ma haida baina durudia.” Hari Helen na mai moalena ida e regular painiamu.

IEHOVA NA E URAMU IA ESE EDA DIKA E GWAUTAOMU KARANA BAITA ABIA DAE

8. Isaia 1:18 ai Iehova ese ita be dahaka e hamaorodamu?

⁸ Iehova ena hesiai taudia haida na guna eiava bapatiso murinai e kara kereredia daidiai e lalohekwarahimu. To baita helalotao Iehova ese ita na e lalokau henida badamu bona mauri davana e heni eda dika baine gwautao. Una dainai, ia na e uramu ena harihari ḡauna na baita abia dae. Iehova na e gwa: “Aoma, ita padadai eda hereva aita hamaoromaoroa.” c (Isaia 1:​18, Nega Matamata Trensleisin). Una dainai Iehova ida eda hereva ta hamaoromaoroamu murinai, eda kara dikadia na e gwautaomu. Ta moalemu badina Tamada lalokauna Iehova ese eda kara dikadia na e laloboio vaitanimu! To iseda kara namodia hari e lalotaomu.—Sal. 103:​9, 12; Heb. 6:10.

9. Dahaka dainai guna ta kara kara dikadia na basita lalodia loulou?

⁹ Bema guna o kara ḡaudia daidiai o lalohekwarahimu, namona na hari o karamu ḡaudia bona vaira nega ai ba kara diba ḡaudia ba lalodia. Mani aposetolo Paulo ena haheitalai aita laloa. Ia na e lalohisihisi badina guna Kristen taudia e daḡedaḡe henidiava, to e diba Iehova ese ena dika na vada e gwautao. (1 Tim. 1:​12-15) Ia ese ena kara dika gunadia e lalodia loulouva, eiava? Lasi. Una heḡereḡerena, ia ese Iuda tomadihona ai e karava ḡaudia na se lalodia louva. (Fili. 3:​4-8, 13-15) To, iena hesiai ḡaukara na e karaia goada-goadava bona vaira negana e laloava. Paulo heḡereḡerena, guna o kara ḡaudia na basio haidaudia dibamu. To, hari ina nega ai Iehova ba hamoalea diba bona vaira nega ai ena gwauhamata heḡereḡerena be havaramu ḡau namodia ba lalodia.

10. Dahaka baita kara bema eda kara gunadia ese ma haida e hahisidia?

¹⁰ Reana o lalohisihisimu badina guna o kara ḡaudia daidiai ma haida na o hahisidia. Dahaka ese baine durumu diba? Dala ba tahu una  hekwakwanai ba hamaoromaoroa, bona o hahisidia taudia ba sori henidia. (2 Kor. 7:11) Iehova ba noia o hahisidia taudia baine durudia. Ia ese idia bona oi baine durumui diba dounu Iehova ba hesiai henia bona maino ai ba noho.

11. Peroveta tauna Iona ena haheitalai amo dahaka ta dibamu? (Laulau danu ba itaia.)

¹¹ Emu kerere gunadia amo diba bavabi, bona mai emu ura ida Iehova ese baine ḡaukaralaimu dalana bavabia dae. Peroveta tauna Iona ena haheitalai mani aita laloa. Dirava ese Iona e hamaoroa Nineve bainela, to ia na gabu ma ta ela. Iehova ese Iona e matahakani henia, bona ia na ena kerere amo diba e abi. (Iona 1:​1-4, 15-17; 2:​7-10) Iehova na dounu peroveta tauna Iona e ḡaukaralaia. Dirava ese ma e hamaoroa Nineve bainela, bona una nega ai Iona ese ena hereva e badinaia. Ena be e karaia kererena dainai e lalohisihisi, to una ese Iona na se koua Iehova ese e henia asainmen baine karaia.—Iona 3:​1-3.

IEHOVA ESE ENA LAUMA HELAḠA AMO TAUHALO E HENIDAMU

12. Edena dala ai eda lalokau tauna ta ta haboioamu neganai, Iehova ese maino e henidamu? (Filipi 4:​6, 7)

¹² Metau ta davarimu neganai, Iehova na ena lauma helaḡa amo tauhalo e henidamu. Mani Ron bona Carol edia ekspiriens aita laloa. Idia natudia merona na sibona e hahemase. Idia na e gwa: “Ai na guna hekwakwanai aukadia a hanaidia, to ai emai ai ina na auka herea. Hanuaboi momo na asia mahutava dainai, Iehova a ḡuriḡuri henia loulouva bona ia ese e henimu mainona a mamia.” (Filipi 4:​6, 7 ba duahidia.) Bema hekwakwanai badana ta dainai o dara dokomu, namona na ḡuriḡuri amo emu hemami ibounai na Iehova ba hamaorolaia. Oi ese nega idauidau ai ia ba hereva henia diba bona miniti eiava hora momo lalodiai ia ba hereva henia diba. (Sal. 86:3; 88:1) Iehova ba noia loulou ena lauma helaḡa baine henimu. Ia na hanaihanai oi be durumumu.—Luka 11:​9-13.

13. Edena dala ai lauma helaḡa ese baine duruda Iehova baita tomadiho henia? (Efeso 3:16)

¹³ Oiemu ai e vara hahetohona ta dainai o mamiamu oi na dia heḡereḡere ḡau ta ba karaia, a? Iehova ese ena lauma helaḡa amo goada be henimumu dounu ia ba tomadiho henia. (Efeso 3:16 ba duahia.) Mani taihu Flora ena ekspiriens aita laloa. Ia na adavana ida misinari ḡaukarana e karaiava, to gabeai adavana na e heudahanai dainai e divos. Ia na e gwa: “Ia e karaia karana dainai na lalohisihisi bada herea bona daragu na e doko. Iehova na ḡuriḡuri henia bona na noia iena lauma helaḡa amo goada baine henigu baina haheauka. Iehova ese tauhalo e henigu bona ena be matamanai na laloamu una hekwakwanai ihanaina na auka herea, to iena heduru dainai goada e henigu baina haheauka.” Flora na e mamiamu Dirava ese ia e durua ena abidadama ia enai baine hagoadaia, bona e abia daemu ena hahetoho iboudiai lalodiai Dirava ese na be duruamu. Flora na e gwa Iehova ese ia e durua dalana na Salamo 119:32 ese e herevalaia ḡoevaḡoeva, eto: “Lau na mai egu ura bada ida emu taravatu heḡereḡerena ai do baina raka, badina be oi ese lalogu vada o kehoa.”

14. Edena dala ai Dirava ena lauma helaḡa ese baine duruda diba?

¹⁴ Iehova o noiamu ena lauma helaḡa baine henimu murinai, dahaka ba kara? Dirava ena lauma helaḡa baita abia ḡaukaradia baita kara. Heḡereḡere, hebou ilao henidia karana bona haroro ḡaukara. Hanaihanai Baibul ba duahia, unu amo lalomu na Iehova ena lalohadai amo ba hahonua. (Fili. 4:​8, 9) Baibul o duahiamu lalonai, hahetoho e davari taudia sivaraidia bona Iehova ese e durudia bae haheauka daladia ba lalodia dobu. Sandra, matamanai tame herevalaia taihuna, na hekwakwanai momo e davari dainai, e hisihisi bada. Ia na e gwa: “Iosef ena sivarai ese lau na e hagoadagu. Ena be hahetoho momo e davari bona haida ese se  kara namo henia, to una ese ena hetura karana Iehova ida na se hamanokaia.”—Gen. 39:​21-23.

IEHOVA ESE EDA TADIKAKA TAIHU AMO TAUHALO E HENIDAMU

15. Daidia amo tauhalo baita abi diba, bona edena dala ai idia ese bae duruda diba? (Laulau danu ba itaia.)

¹⁵ Ta hisihisimu negadiai, eda tadikaka taihu amo goada ta abimu. (Kol. 4:11) Iehova ese ena lalokau na eda tadikaka bona taihu edia amo e hahedinaraiamu. Eda hemami ta gwauraimu neganai idia na e hakala namonamomu, bona nega e atomu ita bae bamoda karana ese tauhalo e henidamu. Reana Baibul siri ta amo be hagoadadamu eiava ita ida be ḡuriḡuri heboumu. d (Roma 15:4) Nega haida, reana tadikaka ta eiava taihu ta ese Iehova ena lalohadai be herevalaimu, bona una ese ita na be hagoadadamu baita haheauka. Danu, ta lalohisihisimu negadiai eda tadikaka bona taihu na dala idauidau ai ita e hedurumu, heḡereḡere aniani e henidamu.

16. Haida edia heduru baita abia totona namona be dahaka baita kara?

¹⁶ Ma haida edia heduru baita abia totona, namona na edia heduru baita noia. Tadikaka taihu ese ita na e lalokau henidamu bona e uramu bae duruda. (Her. 17:17) To idia na asi dibadia ita eda hemami eiava eda dabu ḡaudia. (Her. 14:10) Bema o lalohisihisimu, emu hemami na turamu ta enai ba gwauraia hedinarai. Bona ba hadibaia oi be o uramu ede baine durumu toma. Eiava o manadadia eldana ta o  rarua ba hereva henidia diba. Taihu haida be e uramu lo taihudia ida bae herevahereva.

17. Ededia hekwakwanai haida ese bae kouda diba heduru baita abia totona? Bona edena dala ai una baita hanaia?

¹⁷ Nega bavato tadikaka bona taihu ba bamodia. Nega haida o lalohisihisimu dainai, reana basio uramu ma haida ba bamodia. Eiava, emu hemami na se lalopararalaiamu bona edia hereva amo lalomu e hahisia. (Iak. 3:2) Tadikaka bona taihu na basio hadaudaudia, Iehova na idia be ḡaukaralaidiamu oi be hagoadamumu. Depression gorerena e haheaukalaiamu eldana ta ladana Gavin, na e gwa: “Nega momo asina uramu turagu baina hereva henidia eiava baina bamodia.” To, Gavin na e ḡaukara goadamu una hemami baine dadaraia, bona ena tadikaka e bamodiamu neganai, ena hemami na e namomu. Taihu ta ladana Amy na e gwa: “Egu kara gunadia daidiai, egu ai na e auka ma haida baina abidadama henidia. To Iehova heḡereḡerena, lau ese tadikaka bona taihu ilalokau henidia bona iabidadama henidia karana na hahedinaraiamu. Na dibamu Iehova na e moalemu bona lau danu na moalemu.”

IEHOVA ENA GWAUHAMATA AMO TAUHALO BAVABI

18. Iehova ese vaira nega ai be karamu ḡau namodia haida be dahaka, bona hari dahaka baita kara be namo?

¹⁸ Kahirakahira Iehova ese lalohisihisi e havaramu ḡaudia iboudiai bona ta mamimu hisihisidia danu be haorediamu. (Apok. 21:​3, 4) Una nega ai, hari ta mamimu hisihisidia na ma basita ‘lalodia taomu.’ (Isa. 65:17) To hari danu, ta lalohisihisimu negadia ai, Iehova ese ita na e naridamu. Iehova na dala idauidau amo e durudamu bona tauhalo e henidamu. Una dainai ena heduru baita abia dae na namo. Basio daradara badina be “ia ese e lalomuimu.”—1 Pet. 5:7.