LAḠANI 1930 lalodiai, tamagu bona sinagu​—James bona Jessie Sinclair​—na ela Bronx, New York Siti ena taoni ta. Idia bamodia Willie Sneddon, na Scotland amo ela. Tatoiosi e hedavari matama neganai, edia bese e herevalaidiava. Una negai lau na do asina vara.

Sinagu ese Willie e hamaoroa, Tuari Badana do se vara ai, ia tamana bona kakana edia dingi na North Sea ai bomu (o mine) ta ai e tatakau neganai, e maloa mase. Willie ese e hamaoroa, “Tamamu na hel ai!” Willie na Iehova ena Witnes ta, bona ena hereva dainai sinagu na e ura Baibul ena hereva momokani baine diba.

Willie ese e gwauraia herevana dainai, Sinagu na e lalohisihisi badina mai dibana tamana na tau namona. To Willie na ma eto: “Bema ba gwaumu Iesu na hel ela, oi bo moalemu?” Sinagu ese dubu ena hahediba herevana e laloa lou, e gwa Iesu na hel ela bena dina ihatoina ai e toreisi lou. Una dainai, e lalo, ‘Bema hel na lahi gabuna bona unuseniai kara dika taudia e hahisidiamu, dahaka dainai Iesu na unu ela?’ Una nega amo sinagu na e ura hereva momokani baine dibaia. Bronx Kongrigeisen edia hebou ela matama bona laḡani 1940 ai e bapatiso.

Una negai, Kristen tama sina na asie hagoadadiava natudia ida Baibul bae stadilaia. Lau maraḡigu ai, sinagu na hebou e laova bona wiken ai e harorova neganai, tamagu ese e nariguva. Laḡani haida muridiai, lau bona tamagu na sinagu ida hebou ala matama. Sinagu na sivarai namona e harorolaia goadagoadava bona kamonai taudia momo ida Baibul e stadilaiava. To, nega ta iena stadi taudia haida edia stadi na e karadia hebouva badina edia noho gabudia na kahikahi. Egu sikuli holidei negadiai haroro ḡaukara ai na bamoava. Una dala amo, egu diba Baibul ai na e bada bona ma haida ihadibadia dalana na dibaia.

Maraḡigu ai hereva momokani na asina laloa badava. To, laḡanigu e 12 neganai, Basileia iharorolaina pablisana ai nala bona una nega amo haroro ḡaukara na  karaia hanaihanaiva. Laḡanigu e 16 neganai, egu mauri na Iehova enai na gwauhamatalaia, bona July 24, 1954 ai, Toronto, Canada ai e heabi hebouhebouna ai na bapatiso.

Emai kongrigeisen ai tadikaka haida na Betele ai e ḡaukarava eiava e nohova. Idia ese lau na e hagoadagu. Baibul ena hereva momokani e herevalaiava dalana ese lalogu na e veria. Ena be egu sikuli hahedibadia na e urava iunivesiti bainala, to lau na na ura Betele bainala. Una dainai, Toronto hebouhebouna ai, Betele aplikeisen ta na heni. Laḡani 1955 ai, Yankee Stadium, New York Siti ai e heabi hebouhebouna ai, Betele aplikeisen ma ta na heni. Se daudau, laḡanigu e 17 neganai, e boirigu Brooklyn Betele ai baina ḡaukara, una na September 19, 1955 ai. Egu dina iharuana Betele ai, lau na 117 Adams Street ai buka e karava gabunai na ḡaukarava. Gabeai, buka e habouva misinina ta (gathering machine) na ḡaukaralaiava, una misini ese rau 32 bukadia na e hakapudiava bena misini ma ta ese e turidia hebouva.

Buka e karava gabunai hua ta na ḡaukara murinai, e siaigu Magazine Department ai baina ḡaukara, badina taipi-taipi dalana na mai dibagu. Una negai, tadikaka bona taihu na adres bae taipi totona stencil (auri palakadia maraḡidia) e ḡaukaralaiva, bena Gima Kohorona bona Awake na e urava taudia ediai e siaiva. Hua haida muridiai, Shipping Department ai na ḡaukarava. Una dipatmen ena ovasia, Klaus Jensen, ese e noigu motuka tari tauna baina bamoa, buka bona magasin boksidia na kada edia hetu gabuna (docks) baia laohai bena tanobada heḡeḡemadai bae siaidia. Danu, magasin ma haida na post office baia laohai  unu amo United States ai kongrigeisen iboudiai ediai bae siai. Tadikaka Jensen na e gwa, una ḡaukara ese tauanigu na baine hagoadaia. Egu weight na 57 kilogram heḡereḡerena bona tauanigu na dia bada. Buka na post office bona kada edia hetu gabuna a laohaiva karana ese tauanigu na e hagoadaia. Momokani, tadikaka Jensen na mai dibana dahaka ese baine durugu!

Magazine Department ese kongrigeisen edia magasin oda danu e karava. Una dainai unu magasin e hahanai gadodia na diba, unu na Brooklyn ai e printiva bona e siaiva tano ma haida. Ena be unu gado momo na asi dibagu, to na moale badina magasin momo na gabu daudaudia e siai laova. Una negai na asina diba, lau na laḡani haida muridiai unu gabu haida baina vadivadidia.

Laḡani 1961 ai, lau na Treasurer’s Office ai na ḡaukarava bona egu ovasia na Grant Suiter. Laḡani haida muridiai, e boirigu Nathan Knorr ena ofesi bainala, una negai ia ese tanobada heḡeḡemadai ḡaukarana e nariava. Ia ese e hamaorogu, iena ofesi ai e ḡaukarava tadikakana ta na hua ta lalonai Basileia Hesiai Ḡaukara Sikuli bainela, una murinai Service Department ai baine ḡaukara. Una dainai gabuna na abia bona Don Adams ida a ḡaukara hebouva. Gabeai na diba, Don na laḡani 1955 hebouhebouna ai egu Betele aplikeisen e abia dae tadikakana. Robert Wallen bona Charles Molohan danu una ofesi ai e ḡaukarava. Ai taumai haniosi na laḡani 50 mai kahana a ḡaukara hebou. Na moale badina unu abidadama tadikakadia ida na ḡaukara hebou!​—Sal. 133:1.

Laḡani 1970 amo, lau na e abigu hidi laḡani ta o rua lalodiai, wiki haida Watch Tower Society ena brens ofesi haida baina vadivadidia, una negai ladana na e  gwauraiava zone vadivadi. Bona tanobada heḡeḡemadai Betele famili bona misinari taudia na vadivadiava, lauma dalanai na hagoadadiava, bona brens ofesi edia ripoti na sekeva. Na moale badina Gilead Sikuli ena klas ginigunadia amo e gradueit taudia haida na hedavari henidia, bona idia na e siaidia tanodia ai dounu edia hesiai ḡaukara e karava! Una zone vadivadi ḡaukarana na moalelaia badina tano 90 mai kahana na vadivadidia.

Brooklyn ai Betele famili iboudiai na New York City ena kongrigeisen idauidau e siaidia. Lau na Bronx taonina ena kongrigeisen e siaigu. Una na kongrigeisen ginigunana bona e tubu dainai e hapararaia. Gunana na e gwauraiava Upper Bronx Kongrigeisen, bona lau na unu na laova.

Laḡani 1960 lalodiai, ruma bese ta, Latvia amo, na south Bronx ai e nohova neganai hereva momokani e abia dae, bona idia na una kongrigeisen ela. Natudia kekeni badana, Livija, na haisikuli e haorea murinai e regula painiava. Hua haida muridiai, ia na Massachusetts ela, pablisa dia momo gabuna ai baine haroro totona. Lau ese revareva amo kongrigeisen sivaraina na ienai na herevalaiva, bona ia danu revareva amo Boston ai ena haroro ḡaukara na egu ai e herevalaiva.

Laḡani haida muridiai, Livija na spesol painia ḡaukara e karaia matama. Ia na e urava ena hesiai ḡaukara baine habadaia dainai, Betele aplikeisen ta e hahonua bona laḡani 1971 ai e boiria. Na laloava reana una na toa ta Iehova ena amo! October 27, 1973 ai, a headava bona emai wedin tok na Tadikaka Knorr ese e heni. Hereva Lada-isidia 18:22 na e gwaumu: “Hahine e adavaiamu tauna ese namo e davariamu, Iehova ena hahenamo e abiamu.” Lau bona Livija na laḡani 40 mai kahana Betele ai a ḡaukara. Bona Bronx ai kongrigeisen ta dounu a duruamu.

Tadikaka Knorr ida na ḡaukara hebouva karana na moalelaia bada. Ia na hereva momokani dainai e ḡaukara goadagoadava, bona tanobada heḡeḡemadai misinari taudia na e lalodia badava. Idia momo na Witnes taudia ginigunadia e siaidia tanodia ai. To madi, laḡani 1976 ai Tadikaka Knorr na cancer gorerena e abia. Nega ta, bedi ai hekurena ai, e noigu bae printi bukadia haida baina duahi henia. Bona e hamaorogu Frederick Franz baina boiria, bena baina duahi ḡaudia na ia danu baine kamonai. Gabeai na diba, Tadikaka Franz na se roharoha namonamova dainai, Tadikaka Knorr na nega momo buka unu bamodia na ia e duahia heniava.

Tadikaka Knorr na laḡani 1977 ai mase, to ia e dibaia bona e lalokau heniava taudia na tauhalo e abi, badina mai dibadia ia na mai ena abidadama ida Dirava e hesiai henia ela bona e mase. (Apok. 2:10) Una murinai,  Tadikaka Franz ese ḡaukara e nariava.

Una negai, lau na Milton Henschel ena seketere ḡaukara na karaiava, ia na laḡani momo Tadikaka Knorr ida e ḡaukara. Tadikaka Henschel ese e hadibagu, Betele ai egu ḡaukara badana na Tadikaka Franz baina durua. Do asie printi bukadia na hanaihanai ia vairanai na duahi gunava. Tadikaka Franz ena helalotao karana na namo herea, bona e heduahiva ḡaudia na e haerodia namonamova. Na moale badina ia na durua ela bona December 1992 ai e mase!

Lau na laḡani 61 Betele ai na ḡaukara. Tamagu bona sinagu na Iehova e abidadama henia ela bona e mase, bona tanobada matamatana ai baina hedavari henidia negana na nariamu. (Ioa. 5:28, 29) Tanobada heḡeḡemadai Dirava ena taunimanima idurudia totona, abidadama tatau bona hahine ida na ḡaukara hebou na hahenamo badana, ina tanobada oromana gunana ese e henimu ḡaudia na e hereadia. Lau bona Livija na baia gwau diba, emai ful-taim hesiai ḡaukara laḡanidia lalodiai, “Iehova imoalelaina” na emai goada ḡauna ai ela.​—Neh. 8:10.

Iehova ena orea lalonai taunimanima iboudiai na heḡereḡere, bona Basileia ena hereva momokani iharorolaina ḡaukarana na dounu e karaiamu. Laḡani momo lalodiai abidadama goada tadikaka bona taihu momo ida na ḡaukara hebou na mai moalena bona una na hahenamo ta. Na durudiava horoa taudia momo na da dia tanobada ai. To, na moalemu badina Iehova ena hesiai ḡaukara ai unu abidadama goada tadikakadia ida na ḡaukara hebou.