1, 2. (a) Solomon be edena mai anina bada ḡaukarana e abia? (b) Dahaka dainai David na Solomon dainai e lalohekwarahi?

SOLOMON na e haḡania Ierusalem ai ruma badana ta ihaginina ḡaukarana baine naria, una na dubu helaḡa. Una dubu “hairaina baine hereadae vaitani; harina bona hairaina herevadia na tano idoidiai” lalodiai bae dibaia. Mai anina bada ḡauna na, una dubu helaḡa na “Dirava Iehova ena dubu.” Iehova na e gwa Solomon ese una ḡaukara baine naria.​—1 Sis. 22:1, 5, 9-11.

² King David na mai dibana Dirava ese Solomon na baine durua, to Solomon na ‘eregabe, bona ḡaukara ai do se manada.’ Dubu ihaginina ḡaukarana ai baine boga auka diba eiava? Ia na eregabe bona do se manada dainai una ḡaukara be haḡuḡuruamu eiava? Baine kwalimu totona, namona na baine boga auka bona baine ha ḡaukara.

3. Solomon be tamana ena boga auka karana amo dahaka e diba?

³ Solomon na tamana ena amo boga auka karana e dibaia. David meronai, ia ese daḡedaḡe animal e heatu henidia tamana ena mamoe baine naridia totona. (1 Sam. 17:34, 35) Ia ese Goliata e tuari henia neganai boga auka karana e hahedinaraia. Oibe, David na Dirava ena heduru dainai nadi maraḡina ta amo Goliata e hadarerea.​—1 Sam. 17:45, 49, 50.

4. Dahaka dainai Solomon baine boga auka na namo?

 ⁴ Una dainai gabeai David ese Solomon e hagoadaia baine boga auka bona dubu helaḡa baine haginia na maoro! (1 Sisiga 28:20 ba duahia.) Bema Solomon na basinema boga auka, gari karana ese bema butua tao dainai dubu na basinema haginia.

5. Dahaka dainai baita boga auka na namo?

⁵ Solomon heḡereḡerena, Iehova ese baine duruda na namo baita boga auka bona ḡaukara baita haḡuḡurudia. Una dainai, idaunegai boga auka karana e hahedinaraia taudia edia haheitalai haida baita lalodia na namo. Bena boga auka karana baita hahedinaraia bona eda ḡaukara baita haḡuḡuru daladia baita lalodia diba.

6. Iosef ena boga auka karana amo dahaka o dibamu?

⁶ Mani Iosef ena boga auka karana a laloa, Potifara adavana ese e dibaḡania bae mahuta hebou neganai e dadaraia. Ia na mai dibana bema baine dadaraia neganai dika bada herea baine davari diba. Herevana una na baine vara diba, to ia ese boga auka karana e hahedinaraia bona kara haraḡa una hahine ena amo e heau oho.​—Gen. 39:10, 12.

7. Rahaba ena boga auka karana mani a herevalaia. (Rau 28 ai laulau ba itaia.)

⁷ Boga auka karana e hahedinaraia tauna ma ta na Rahaba. Israel edia hasinadoa taudia na ena ruma ela neganai, reana bema gari dainai basinema abidia dae. To Iehova e abidadama henia dainai, mai ena boga auka ida unu hasinadoa taudia raruosi e hunidia bona e durudia hanua bae rakatania. (Ios. 2:4, 5, 9, 12-16) Rahaba na e abia dae Iehova na Dirava momokanina, bona mai dibana Iehova ese una tano na Israel taudia baine henidia. Ia ese taunimanima ma haida, bona Ieriko pavapavana ena tuari taudia ida garidia na se gari. To, iena kara dainai ia bona ena ruma bese na e mauri.​—Ios. 6:22, 23.

8. Edena dala ai Iesu ena boga auka karana ese ena aposetolo e durudia?

⁸ Iesu ena abidadama aposetolo taudia danu boga auka karana e hahedinaraia. Idia ese Iesu ena boga auka karana na e itaia. (Mat. 8:28-32; Ioa. 2:13-17; 18:3-5) Una ese e durudia bae boga auka totona. Sadukea taudia ese e daḡedaḡe henidia neganai, idia ese Iesu ladana ai e hahedibava karana na se hadokoa.​—Kara 5:17, 18, 27-29.

9. Timoteo Iharuana 1:7 ese ta boga aukamu badina be ede e herevalaia toma?

⁹ Iosef, Rahaba, Iesu, bona aposetolo taudia ese e hahedinaraia idia lalodia na goada dainai kara namodia e kara. Idia na dia hekokoroku dainai boga auka karana e hahedinaraia. To idia na Iehova enai e tabekau dainai e boga auka. Ita danu nega haida boga auka karana baita hahedinaraia na namo. Nega unu bamodia ai Iehova enai baita tabekau na mai anina bada. (2 Timoteo 1:7 ba duahia.) Boga auka karana baita hahedinaraia gabudia rua mani aita herevalai, una na eda ruma bese ai bona kongrigeisen ai.

10. Dahaka dainai Kristen memero kekeni bae boga auka na namo?

¹⁰ Kristen memero kekeni na Iehova bae hesiai henia totona hahetoho momo e davarimu dainai bae boga auka na namo. Solomon ese dubu helaḡa e haginia neganai mai ena boga auka ida e kara abi hididia amo diba bae abi bona ena haheitalai bae tohotohoa diba. Ena be Kristen memero kekeni ese tamadia sinadia amo heduru bae abi diba, to abi hidi badadia na sibodia ese bae kara na namo. (Her. 27:11) Idia ese hebamo namodia, moale karadia maorodia, kara ḡoevadia, bona bae bapatiso totona abi hidi bae kara neganai bae boga auka na  namo. Badina idia ese Satana, Dirava e inai heniamu tauna, e tuari heniamu.

11, 12. (a) Edena dala ai Mose na haheitalai namona boga auka karana ai? (b) Edena dala ai memero kekeni ese Mose ena haheitalai bae tohotohoa diba?

¹¹ Memero kekeni ese bae karaia abi hidi badana ta na vaira neganai bae kara ḡaudia iabi hididia karana. Tano haida ai, memero kekeni na e doridiamu sikuli badadia baela bona dava bada moni ḡaukaradia bae kara. Tano ma haida ai, moni hekwakwanaidia dainai memero kekeni na bae laloa tauanina dalanai edia ruma bese bae durudia na ḡau badana. Bema una hekwakwanai ta emu ai e varamu, Mose ena haheitalai ba laloa na namo. Ia na Farao natuna ese e naria dainai, lada bada bona kohu momo bema habou diba. Ta dibamu ia na ena Aigupto ruma besena, ena hahediba taudia, bona Farao ena sisiba taudia ese lalona e ania. To Mose na mai ena boga auka ida tomadiho ḡoevana totona e gini. Aigupto ena taḡa e rakatania neganai, Mose na Iehova e abidadama henia. (Heb. 11:24-26) Una neganai Iehova ese e hanamoa, bona mai dibada vaira neganai danu hahenamo momo be abimu.

¹² Una heḡereḡerena, mai edia boga auka ida lauma ḡaudia bona Basileia iduruna ḡaukaradia e ato gunamu memerodia bona kekenidia, na Iehova ese baine hanamodia. Ia ese edia ruma bese edia dabu ḡaudia baine henidia diba. Aposetolo edia negai, Timoteo na lauma ḡaudia e lalo badava, bona oi danu unu ba kara toma diba. *​—Filipi 2:19-22 ba duahi.

13. Edena dala ai taihu ta na boga auka karana ese e durua?

¹³ Alabama, U.S.A. ai, taihu ta na ena mauri ai lauma ḡaudia baine ato guna totona boga auka karana baine hahedinaraia na namo. Ia na ini e gwau toma: “Na bada neganai, lau na hemarai kekenigu. Kingdom Hall ai taunimanima baina hereva henidia na auka, bona idau taudia edia iduara ai baina pidipidi na auka.” Una taihu na tamana sinana bona kongrigeisen taudia haida ese e durua dainai, regula painia ḡaukara e karaia. Ia na ini e gwau toma: “Satana ena tanobada na e uramu sikuli badadia, lada bada, moni, bona kohu momo baita abi. Nega momo, unu ḡau idavaridia na auka bona lalohekwarahi bona lalohisihisi mo e havaramu. To, Iehova ihesiai henina karana ese e hamoalegumu bona ḡau momo na haḡuḡurumu.”

14. Ededia nega ai Kristen tama sina ese boga auka karana bae hahedinaraia na namo?

¹⁴ Kristen tama sina danu bae boga auka na namo. Heḡereḡere, reana emu bosi na hanaihanai oi be hamaoromumu adorahi ai eiava wiken ai ba ovataim​—unu nega na o ato tabe emu ruma bese ena tomadiho ba karaia, haroro ḡaukara ba karaia, bona Kristen heboudia baola. Namona na mai emu boga auka ida una noinoi herevana ba dadaraia bona natumu ediai haheitalai namona ba hahedinaraia. Eiava reana kongrigeisen ai tama sina haida ese natudia na se koudiamu ḡau haida bae kara bona unu na oi so uramu natumu ese bae kara ḡaudia. Reana unu tama sina ese be nanadaimumu dahaka dainai so uramu natumu na unu ḡau bae kara. Oi be mai emu boga auka bona aonega ida emu lalohadai bo herevalaia dibamu, a?

15. Salamo 37:25 bona Heberu 13:5 ese tama sina be ede e durudia tomamu?

¹⁵ Natuda na lauma ḡaudia bae ato totona baita durudia neganai, boga auka karana baita hahedinaraia. Heḡereḡere, tama sina haida na basie uramu natudia bae hagoadadia painia ḡaukara bae kara, pablisa dia momo gabudia baela, Betele ai bae vareai, eiava konstraksen ḡaukara bae kara. Reana e laloamu  be burukamu neganai natudia ese basie naridiamu. To, tama sina namodia na boga auka karana e hahedinaraiamu bona Iehova ena gwauhamata e abidadama henimu. (Salamo 37:25; Heberu 13:5 ba duahi.) Una dainai, boga auka karana ba hahedinaraia bona Iehova enai ba tabekau dalana ta na natumu ba durua unu baine kara toma.​—1 Sam. 1:27, 28; 2 Tim. 3:14, 15.

16. Edena dala ai tama sina haida ese natudia e durudia lauma ḡaudia bae ato guna, bona dahaka namo e havaraiamu?

¹⁶ United States ai, tau ta mai adavana ida ese natudia na e durudia edia mauri lalonai lauma ḡaudia bae ato guna. Tau na eto: “Natumai do asie hereva bona asie raka neganai, ai ese painia ḡaukara bona kongrigeisen iduruna ḡaukaradia ai a moalelaiva ḡaudia a herevalaiva. Hari idia na unu ḡaukara e uramu bae kara. Natumai na edia mauri lalonai lauma ḡaudia e ato guna dainai una ese e durudia Satana ena tanobada ai e varamu hahetohodia e dadarai bona Iehova ena hesiai ḡaukara e laloa bada.” Mai natuna rarua tadikakana ta na ini e gwau toma: “Tama sina momo na edia goada, moni bona kohu e ḡaukaralaimu natudia bae durudia gadara idauidau ai bae vareai, moale karadia bae kara, bona sikuli baela totona. To bema eda goada, moni bona kohu baita ḡaukaralaimu natuda baita durudia hesiai ḡaukaradia bae kara neganai, idia na Iehova be badinaia namonamomu. Natuda ese hesiai ḡaukaradia be karamu bona idia ida baita ḡaukara heboumu neganai, baita moale badamu.” Natudia e durudiamu lauma ḡaudia bae lalo bada tama sina na Dirava ese baine hanamodia.

17. Kristen kongrigeisen ai boga auka karana ba hahedinaraia daladia haida mani a herevalai.

¹⁷ Kongrigeisen ai danu boga auka karana baita hahedinaraia na namo. Heḡereḡere, elda taudia ese kerere badana ta e hamaoromaoroamu neganai, eiava ena gorere e badamu tauna ta e duruamu neganai, boga auka karana bae hahedinaraia na namo. Elda taudia haida na dibura rumadia e vadivadimu, dibura taudia na lauma dalanai bae durudia totona. Asie headava taihudia be dahaka bae kara na namo? Edia hesiai ḡaukara bae habada diba, heḡereḡere painia  ḡaukara, pablisa dia momo gabudia baela, Local Design/Construction bae durua, bona Basileia Evanelia Sikuli baela diba. Haida na Gilead Sikuli baela diba.

18. Taihu badadia ese boga auka karana be ede bae hahedinaraia toma?

¹⁸ Kongrigeisen lalonai taihu badadia e nohomu na hahenamo ta. Edia ḡaukara namodia na ta moalelaimu! Ena be Dirava ena hesiai ḡaukara na asie habadaiamu dia guna heḡereḡerena, to dounu boga auka karana e hahedinaraiamu bona e ḡaukaramu. (Tito 2:3-5 ba duahi.) Heḡereḡere, bema taihu badana ta na elda taudia ese bae noia matamata taihu enai dabua maorodia ihahedokilaidia karana baine herevalaia totona. Ia ese una matamata taihu na basine gwau henia ena dabua dainai, to namona baine durua ena dabua ese ma haida baine hahekwakwanaidia o lasi baine laloa totona. (1 Tim. 2:9, 10) Una heduru dalana namona ese kongrigeisen na baine durua diba.

19. (a) Edena dala ai bapatiso tadikakadia ese boga auka karana bae hahedinaraia diba? (b) Filipi 2:13 bona 4:13 ese edena dala ai tadikaka baine durudia diba boga auka karana bae hahedinaraia?

¹⁹ E bapatiso tadikakadia ese boga auka karana bae hahedinaraia na namo. Mai edia boga auka ida e uramu maduna ma haida bae hua taudia na hahenamo ta kongrigeisen ai. (1 Tim. 3:1) To, haida na basie uramu edia hesiai ḡaukara bae habadaia. Reana tadikaka ta na guna kerere haida e kara, bona be laloamu ia na dia heḡereḡere hesiai tauna o elda maduna baine huaia. Reana tadikaka ma ta na be laloamu ia na dia heḡereḡere baine abia ḡaukarana baine haḡuḡurua. Bema oi na unu o lalo tomamu, Iehova ese baine durumu diba boga auka karana ba hahedinaraia totona. (Filipi 2:13; 4:13 ba duahi.) Ba helalotao, nega ta Mose na e laloa ia na dia heḡereḡere e abia ḡaukarana baine karaia. (Eso. 3:11) To, Iehova ese e durua dainai, Mose na e boga auka bona ena ḡaukara e haḡuḡurua. Bapatiso tadikakana danu boga auka karana baine hahedinaraia diba, bema ḡuriḡuri amo Dirava ena heduru baine tahua bona hanaihanai Baibul baine duahia. Danu boga auka karana e hahedinaraia taudia sivaraidia baine lalodia dobu. Namona na mai manauna ida elda taudia baine noidia bae hadibaia bona nega iboudiai baine heḡaeḡae heduru baine heni totona. Bapatiso tadikakamui a hagoadamuimu ba boga auka bona kongrigeisen dainai ba ḡaukara goada!

20, 21. (a) David ese Solomon be dahaka e hadibaia? (b) Dahaka baita diba na namo?

²⁰ King David ese Solomon e hadibaia Iehova na ia baine durua ela bona dubu helaḡa ihaginina ḡaukarana baine haḡuḡurua. (1 Sis. 28:20) Solomon ese tamana ena hereva na e laloatao bona e laloa bada dainai, ena be ia na eregabe bona ḡaukara ai na se manada to una ese ia na se koua. Ia na boga auka karana e hahedinaraia, e ḡaukara, bona Iehova ena heduru dainai laḡani 7 mai kahana lalonai dubu helaḡa ihaginina ḡaukarana e haḡuḡurua.

²¹ Iehova ese Solomon e durua heḡereḡerena, ita danu baine duruda diba mai eda boga auka ida eda ruma bese ai bona kongrigeisen lalonai eda ḡaukara baita haḡuḡuru totona. (Isa. 41:10, 13) Iehova itomadiho henina ai boga auka karana baita hahedinaraia neganai, baita dibamu Ia ese hari bona vaira negai baine hanamoda diba. Una dainai, “ba boga auka” bona ḡaukara “ba karaia.”