1. Dahaka dainai ta dibamu Dirava ena Hereva na mai siahuna? (Rau 23 ai laulau ba itaia.)

ITA na Iehova ena taunimanima dainai, mai dibada Dirava ena hereva na “e maurimu, bona mai siahuna.” (Heb. 4:12) Ita momo na Dirava ena Hereva ese eda mauri e haidaua. Eda tadikaka bona taihu haida na guna e henaohenaova, drag e aniva, eiava matabodaḡa karadia e karava. Ma haida na lada bada e abi eiava taḡa taudia ai ela, to e mamiava edia mauri na asi anina. (Koh. 2:3-11) Unu bamona taudia na gabeai Baibul ena hereva ese edia mauri e haidaua bona mauri dalana ai e raka. Ekspiriens unu bamodia momo na Gima Kohorona ai kaha ta ladana “The Bible Changes Lives” ai reana do duahi bona o moalelai. Danu, ena be Kristen tauna ta ese hereva momokani na baine abia dae, to ia na dounu Baibul ese be duruamu lauma dalana ai baine goada totona.

2. Aposetolo edia negai edena dala ai Dirava ena Hereva ese momo e durudia?

² Hari ina negai momo na Dirava ena Hereva e stadilaiamu dainai, edia mauri e haidauamu karana be baita daradaralaia, a?  Lasi! Ekspiriens unu bamodia dainai ita ese aposetolo edia negai guba helarona e abia taudia baita lalodia. (1 Korinto 6:9-11 ba duahi.) Aposetolo Paulo ese Dirava ena Basileia basie abia taudia e herevalaidia murinai, e gwa: “Umui haida danu gunaguna unu heto.” To, Dirava ena Hereva bona iena lauma helaḡa ena heduru amo idia ese edia mauri e haidau. Idia haida na hereva momokani e abia dae murinai, e hekwarahi edia lauma dalana e hadikaia ḡaudia bae hanaidia totona. Baibul na e gwa e horoa Kristen tauna ta na murimuri ai e atoa, to gabeai e abia vareai lou. (1 Kor. 5:1-5; 2 Kor. 2:5-8) Tadikakada ese Dirava ena Hereva ena heduru amo edia hekwakwanai idauidau e hahanaidia karana ese ita na e hagoadadamu, ani?

3. Ina stadi ai dahaka baita herevalaimu?

³ Dirava ena Hereva na mai siahuna bona Ia ese e henida dainai, namona na baita ḡaukaralaia namonamo. (2 Tim. 2:15) Ina stadi ai, ita ese gabu toi ai Dirava ena Hereva baita ḡaukaralaia namonamo dalana baita herevalaiamu, unu na (1) eda mauri ai, (2) haroro ḡaukara ai, bona (3) platfom amo ta hahedibamu neganai. Unu ese be durudamu Tamada lalokauna guba ai baita lalokau henia bona baita hanamoa, badina ia ese eda namo ihabadana dalana e hadibadamu.​—Isa. 48:17.

4. (a) Dirava ena Hereva ese baine duruda totona dahaka baita kara na namo? (b) Edena negai emu Baibul duahiduahi o karaiamu?

⁴ Bema ta uramu Dirava ena Hereva ese baine duruda, namona na baita duahia hanaihanai. (Ios. 1:8) Momokani, ita momo na eda mauri lalonai ta bisi bada hereamu. To, namona na eda maduna idauidau eiava ma ḡau ta ese eda Baibul duahiduahi karana na basine koua. (Efeso 5:15, 16 ba duahi.) Iehova ena taunimanima momo na nega idauidau ai edia Baibul duahiduahi e karamu, daba ai, adorahi ai eiava hanuaboi ai. Idia na salamo itorena tauna heḡereḡerena, e gwaumu: “Emu taravatu na ura henia lalodikamu; ia na egu haero-haero ḡauna dina idoinai.”​—Sal. 119:97.

5, 6. (a) Dahaka dainai lalo dobu karana na mai anina bada? (b) Edena dala ai baita lalo dobu diba? (c) Dirava ena Hereva o duahiamu bona o laloa dobumu dainai dahaka namo o davari?

⁵ Baibul baita duahia mo na dia heḡereḡere, ḡau badana na ta duahimu ḡaudia baita lalodia dobu. (Sal. 1:1-3) Unu amo Baibul ai e miamu aonega herevadia na eda mauri ai baita badinadia diba. Ena be Dirava ena Hereva na e printia ḡauna amo eiava mobael amo baita duahia, to ta uramu baita duahia herevana na kudouda ai baine vareai bona baine duruda.

⁶ Edena dala ai baita lalo dobu diba?  Momo na Baibul ena karoa ta e duahiamu murinai, ini henanadai haida e lalomu: ‘Ina hereva amo Iehova enai be dahaka name diba? Ededia dala ai Dirava ena Hereva lalonai hahekau herevadia vada na badina? Egu mauri ai edena kara baina hanamoa diba?’ Dirava ena Hereva baita laloa dobumu bona baita ḡuriḡurilaiamu neganai, baita uramu ena sisiba baita badina. Unu amo Baibul na eda mauri ai baita ḡaukaralaia namonamo dibamu.​—2 Kor. 10:4, 5.

7. Haroro ḡaukara ai edena dalai Dirava ena Hereva baita ḡaukaralaia namonamo?

⁷ Dahaka ese baine duruda diba haroro ḡaukara ai Dirava ena Hereva baita ḡaukaralaia namonamo totona? Ḡau ginigunana na, ta haroromu bona ta hahedibamu neganai baita ḡaukaralaia momo. Tadikaka ta na e gwa: “Bema oi na Iehova ida ruma ta ruma ta ai o haroromu, oi mo sibomu bo herevamu eiava ia danu nega bo heniamu baine hereva, a?” Iena hereva anina bina: Haroro ḡaukara ai Dirava ena Hereva ta duahiamu neganai, una na vaitani Iehova ese ruma tauna e hereva heniamu. Siri maorona ta baita ḡaukaralaiamu karana ese ta na baine durua diba. (1 Tes. 2:13) Sibomu ba henanadai, ‘Ma haida ediai sivarai namona na herevalaiamu neganai, Dirava ena Hereva na ḡaukaralaiamu, eiava?’

8. Dahaka dainai ta haroromu neganai Baibul siridia baita duahi mo na dia heḡereḡere?

⁸ Momokani, baita haroro henidia taudia ediai Baibul sirina ta baita duahia mo na dia heḡereḡere. Dahaka dainai? Badina idia momo na Baibul ena hereva na asie lalopararalaiamu. Aposetolo edia negai bona hari ina negai heḡereḡerena. (Roma 10:2) Una dainai basitato ta duahimu siridia na taunimanima ese be lalopararalaidiamu. Namona na ta duahiamu sirina ena hereva badadia baita duahi lou, bona anidia baita  herevalai. Una dala amo Dirava ena Hereva ese kamonai taudia daradia bona kudoudia baine hamarere diba.​—Luka 24:32 ba duahi.

9. Edena dala ai baita gwauraia herevana amo ta baita durua Baibul baine matauraia? Haheitalai ta ba gwauraia.

⁹ Baibul sirina ta do asita duahia neganai baita gwaurai herevana amo, ta baita durua diba Baibul baine matauraia totona. Heḡereḡere, reana baita gwa, “Mani Ihavarada Tauna ena lalohadai ina hereva ai aita itaia.” Kristen mauri dalana asi dibana tauna ta baita hereva henia neganai, reana baita gwa, “Mani Toretore Helaḡadia ese e hadibadamu ḡauna aita itaia.” Eiava tomadiho se laloa badamu tauna ta baita haroro henia neganai, reana baita henanadai, “Nega ta ina idaunega aonega herevana do kamonai, a?” Oibe, taunimanima edia noho dalana heḡereḡerena ai eda haroro herevadia baita haidau na namo.​—1 Kor. 9:22, 23.

10. (a) Mani tadikaka ta ena ekspiriens a herevalaia. (b) Emu haroro ḡaukara ai Dirava ena Hereva ese ta e durua dalana do itaia, a?

¹⁰ Momo na e dibamu haroro ḡaukara ai Dirava ena Hereva e ḡaukaralaiamu karana ese e haroro henidiamu taudia na baine durudia diba. Mani ina haheitalai aita laloa. Tadikaka ta ese tau burukana ta e lou henia, una tau na laḡani momo lalodiai eda magasin e duahi. Tadikaka ese Gima Kohorona matamatana mo se henia, to una Gima Kohorona ai e hetore sirina ta e duahia. Ia ese 2 Korinto 1:3, 4 e duahia, una siri na e gwaumu: “Tama hebogahisina, tauhalo Diravana. Emai hisihisi iboudiai lalodiai ia ese taumai e halodiamu.” Tau burukana na unu hereva ese e hagoadaia dainai tadikaka e noia una siri baine duahia lou. Una tau na e gwa, ia bona adavana na e urava tauhalo bae abi, bona hari e uramu Baibul amo diba ma haida baine abi. Oibe, haroro ḡaukara ai Dirava ena Hereva na mai siahuna ta baine durua.​—Kara 19:20.

11. Platfom amo e hahedibamu tadikakadia edia maduna be dahaka?

¹¹ Ita iboudai na ta uramu eda Kristen hebou maraḡidia bona badadia baitala. Hebou ta laomu badina badana na, Iehova baita tomadiho henia. Danu, unuseniai ta kamonaimu herevadia amo heduru bada ta abimu. Unu hebou ai tok e henimu tadikakadia ese hahenamo bada herea e moalelaimu. To danu namona na bae diba una na maduna badana ta. (Iak. 3:1) Namona na e hahedibamu neganai Dirava ena Hereva bae ḡaukaralaia momo. Bema oi na e abimu hidi platfom amo tok ba heni, edena dala ai Baibul ba ḡaukaralaia namonamo diba?

12. Edena dala ai tok heni tauna ese Baibul baine ḡaukaralaia namonamo diba?

¹² Emu tok ai Baibul ba ḡaukaralaia momo na namo. (Ioa. 7:16) Una anina be dahaka? Namona na ba henahua toho, ekspiriens, haheitalai, eiava emu hereva dalana ese o ḡaukaralaimu Baibul siridia anidia na basine hunidia. Danu, ba helalotao Baibul siridia momo ba duahi karana na dia Baibul amo hahediba karana. Siri momo baita ḡaukaralaimu neganai, kamonai tauna ese unu siri iboudia na basine lalodia tao dibamu. Una dainai, ba ḡaukaralai siridia bavabi hidi namonamo, bena ba duahidia, anidia ba gwaurai, haheitalai maorodia ba gwaurai, bona ibadinana daladia ba herevalai. (Neh. 8:8) Bema emu tok autlain na orea ese e heḡaeḡaelaia ḡauna, namona na una autlain bona e tore siridia ba stadilai namonamo. Autlain ai e hetore herevadia bona siridia e ato badidia ba lalopararalaidia.  Bena o abidia hidi siridia ba ḡaukaralai autlain ena poin badadia ba hahedinarai. (Heduru herevadia haida na Tiokratik Haroro Sikuli amo Heduru Oi Abia bukana ena stadi 21 ela 23 ai ba itadia diba.) Mai anina bada ḡauna na, Iehova ba noia baine durumu iena Hereva ba hahedinaraia namonamo totona.​—Esera 7:10; Hereva Lada-isidia 3:13, 14 ba duahi.

13. (a) Edena dala ai taihu ta na Kristen hebouna ta ai e kamonai sirina ta ese e durua? (b) Eda hebou ai Baibul e hahedibalaiamu dalana ese oi be ede e durumu tomamu?

¹³ Australia ai, taihu ta na Kristen hebouna ta ai e kamonai sirina ta ese e durua. Ena be ia na maraḡinai daḡedaḡe e davari, to Baibul ena hereva e abia dae bona ena mauri na Iehova enai e gwauhamatalaia. To, e laloava Iehova ese ia na se lalokau heniava. Gabeai, e abia dae Dirava ese ia na e lalokau heniava. Dahaka ese e durua? Eda hebou ta ai e kamonai Baibul sirina ta e laloa dobu, bona siri ma haida ida e haheḡereḡeredia neganai, una ese e durua. * Kristen hebou badadia bona maraḡidia ai e herevalai sirina ta ese oi danu unu e durumu toma, a?​—Neh. 8:12.

14. Edena dala ai baita hahedinaraia diba Iehova ena Hereva na ta laloa badamu?

¹⁴ Iehova ese ena Hereva, Baibul, e henida dainai ia baita hanamoa, ani? Ia ese mai ena lalokau ida ena Hereva mo se henida, to ia ese ena hereva na e naria namonamo dainai doini mia. (1 Pet. 1:24, 25) Una dainai, namona na hanaihanai Dirava ena Hereva baita duahia, eda mauri ai baita badinaia, bona baita ḡaukaralaia ma haida baita durudia totona. Unu amo baita hahedinaraia, una dava bada ḡauna na ta laloa badamu, bona e Torea Tauna, Iehova Dirava, ta lalokau heniamu.