1, 2. (a) Taunimanima na sibodia asie hebiagumu dainai dahaka e varamu? (b) Dahaka dainai siboda baita hebiagu karana baita herevalaia na namo?

SIBODA BAITA HEBIAGU o boga-auka karana na Dirava ena lauma huahuana ta. (Gal. 5:22, 23) Iehova na haheitalai hereadaena una kara ihahedinaraina ai. To, taunimanima na dia ḡoevadae dainai e hekwarahimu sibodia bae hebiagu totona. Una dainai, hekwakwanai momo e varamu badidia na sibodia asie hebiagumu. Una kara dainai sikuli o ḡaukara gabudia ai edia ḡaukara na asie kara haraḡamu eiava asie kara namonamomu. Bona taunimanima na asie hebiagumu dainai hereva dikadia e gwauraimu, e kekeromu, e daḡedaḡemu, edia headava e hadokomu, e abitorehaimu, drag e animu, e hadiburamu, e lalohisihisimu, matabodaḡa karadia daidiai e varamu goreredia e davarimu, bona e rogorogo kavamu.​—Sal. 34:11-14.

² Unu ese e hahedinaraimu, edia kara asie biagumu taudia ese sibodia bona ma haida ediai hekwakwanai e havaramu. Bona sibo asie hebiagumu karana na e bada hereamu. Laḡani 1940 ai sibo baita hebiagu karana na e stadilaia, to vanegai hetahu karana amo e davaria taunimanima ese una kara na asie hahedinaraiamu. To Dirava ena Hereva e badinaiamu taudia na asie daradaramu, badina Baibul na e gwa “dina gabedia ai”  taunimanima na “sibodia basie hebiagu.”​—2 Tim. 3:1-3; NWT.

3. Dahaka dainai Kristen taudia ese sibodia bae hebiagu karana bae hahedinaraia na namo?

³ Dahaka dainai sibomu ba hebiagu na namo? Mani badi badadia rua aita lalo. Ginigunana na, hetahu karana ta amo e davaria, sibodia edia hemami e biagumu taudia na hekwakwanai momo asie davarimu. Edia hemami na e biagu namonamomu, hebamo namodia e moalelaimu, bona dia edia hemami asie biagumu taudia heḡereḡeredia e badu haraḡamu, e lalohekwarahimu bona e lalometau momomu. Iharuana na, hahetoho idadaraina karana bona ura dikadia ibiaguna karana na mai anina bada Dirava ena lalonamo baita abia totona. Adam bona Heva edia kerere ese una na e hamomokania. (Gen. 3:6) Bona idia edia nega amo ema bona hari momo ese una kara namona na asie hahedinaraia dainai hekwakwanai momo e davari.

4. E hekwarahimu sibodia bae hebiagu taudia be dahaka ese baine hagoadadia?

⁴ Dia ḡoevadae tauna ta na sibona basine hebiagu ḡoevaḡoeva diba. Una dainai Iehova na mai dibana iena hesiai taudia na e hekwarahimu una kara bae hahedinaraia, bona e uramu baine durudia edia ura dikadia bae biagu. (1 Han. 8:46-50) Ia na Tura lalokauna ta dainai, e uramu Ia bae hesiai henia to e hekwarahimu sibodia bae hebiagu taudia, na e uramu baine hagoadadia. Ina stadi ai, Iehova ena haheitalai hereadaena baita dibamu. Danu Baibul ai haheitalai namodia bona dikadia, baita herevalaimu. Bona siboda baita hebiagu diba daladia haida baita herevalaimu.

5, 6. Edena haheitalai ese e hahedinaraia Iehova na sibona e hebiagu?

⁵ Iehova ese sibona e hebiagu karana na e hahedinaraia ḡoevaḡoeva, badina ia ese ḡau iboudiai na e kara ḡoevaḡoevamu. (Deu. 32:4) To, ita na dia ḡoḡoevadae. Una dainai, siboda baita hebiagu karana baita lalopararalaia totona, namona na Iehova ena kara baita dibaia unu amo baita tohotohoa diba. Ededia nega haida ai, Iehova ese sibona e hebiagu karana e hahedinaraia?

⁶ Satana e gwau-edeede neganai, Iehova ese sibona e hebiagu karana mani a laloa. Una hekwakwanai baine hamaoromaoroa na namo. Diabolo ena hepapahuahu karana dainai, Dirava e badinaiava anerudia na e badu bona e lalohisihisi. Reana oi danu Satana ese e havara hisihisidia daidiai bo lalohisihisimu. To, Iehova ese na se hahemaoro henia haraḡa. Ia ese una na e haeroa namonamo bena una hekwakwanai ihamaoromaorona dalana e karaia. Ia na se badu haraḡa bona mai ena maoromaoro ida Satana e hahemaoro henia. (Eso. 34:6; Iobu 2:2-6) Dahaka dainai? Iehova ese nega e heni badina se uramu ta baine mase to ‘e uramu iboudiai bae helalo kerehai.’​—2 Pet. 3:9.

7. Iehova ena haheitalai amo dahaka ta dibamu?

⁷ Iehova na sibona e hebiagu karana amo ta dibamu, namona na eda hereva bona eda kara nahuadia baita toho, bona basita haraḡa-haraḡa. Mai anina bada abi hidina ta o uramu ba karaia neganai, abi hidi maorona ba karaia totona nega bada lalonai ba lalohadailaia namonamo. Dirava ba noia aonega baine henimu unu amo hereva maorona ba gwauraia o kara maorona ba karaia. (Sal. 141:3) Badu e varamu neganai, kara kereredia baita kara dibamu. Ita momo na ta hereva haraḡa eiava asita lalo namonamo bena ta kara karadia daidiai, dounu ta lalohisihisimu!​—Her. 14:29; 15:28; 19:2.

8. (a) Edia kara e biagu taudia sivaraidia be edeseniai baita davari diba? (b) Iosef na Potifara adavana ese lalona e veria neganai, dahaka e kara? (Rau 3 ai laulau ba itaia.)

⁸ Ededia Baibul sivaraidia ese eda kara baita biagua ena namo e hahedinaraia? Reana hahetoho negadiai edia kara e biagu taudia haida do lalodiamu. Idia ta na Iakob natuna Iosef. Ia na Potifara​—Farao ena gadi e naridiava tauna badana​—ena ruma ai e ḡaukarava neganai sibona ena kara e biagua. Potifara adavana na e itaia Iosef na “raho-namo” dainai, lalona iverina karadia e kara. Dahaka ese Iosef e durua iena lalo veri karadia baine dadarai? Mai dibada, ia ese una lalo ani karana basine dadaraia neganai bae vara ḡaudia na e lalodia guna. Bona sibodia e noho neganai, ia na e heau oho. Bona eto: “Ina kerere badana baina karaia, Dirava vairanai baina kara havara, be edeheto?”​—Gen. 39:6, 9; Hereva Lada-isidia 1:10 ba duahia.

9. Edena dala ai ba heḡaeḡae diba hedibaḡani ba dadarai totona?

⁹ Iosef ena haheitalai amo dahaka ta dibamu? Dirava ena taravatu baita utua diba hahetohodia amo baita heau oho na namo. Haida na Witnes taudia ai do asi ela neganai, e aniani momova, e kekerova, kuku o drag e aniva, matabodaḡa karadia, bona kara dika ma haida e karava. Ena be de bapatiso, to nega haida dounu be uramu guna e kara karadia ma bae kara lou. To, bema hedibaḡani ta davarimu, baita gini goada totona namona na una hedibaḡani ese lauma dalanai baine hadikada dalana baita laloa guna. Dina ta ta ai ba davari diba hedibaḡanidia bona ba dadarai daladia ba haero. (Sal. 26:4, 5; Her. 22:3) Bema unu bamona hedibaḡanina ta o davariamu neganai, Iehova ba noia aonega baine henimu bona baine durumu sibomu ba hebiagu totona.

10, 11. (a) Sikuli ai memero kekeni momo ediai be dahaka e varamu? (b) Dahaka ese Kristen memero kekeni baine durudia diba kara dika bae dadarai totona?

¹⁰ Iosef enai e vara hedibaḡanina na Kristen memero kekeni momo ediai danu e varamu. Mani Kim aita laloa. Ia ida e sikuliva kekenidia momo na dia rami-hebou kekenidia, wiken ai mahuta hebou karadia e karava muridiai, turadia vairadiai unu kara na e heaḡilaiva. Kim enai sivarai unu bamodia na lasi. Ia na e gwa, ia na idau dainai e mamiava ia na “sibona bona asi turana,” bona ena uru taudia na e laloava ia na kava badina asi ena mero. To, Kim na mai dibana matamata taudia ediai mahuta hebou urana na hahetoho badana. (2 Tim. 2:22) Turana ese nega momo e nanadaiava bema ia na dounu rami-hebou kekenina eiava lasi. Una ese dala e kehoa basine mahuta hebou badina e herevalaia. Lalodia e hadaimu matabodaḡa karadia basie kara Kristen memerodia bona kekenidia na baita hanamodia, bona Iehova ese danu e hanamodiamu!

¹¹ Lalodia asie biagu dainai matabodaḡa karadia e kara taudia na Baibul ese danu e herevalaidia. Bona edia kara daidiai e vara hisihisidia danu e herevalai. Bema ta na Kim ese e davaria hahetohona e davariamu, namona na Hereva Lada-isidia karoa 7 ai e herevalaia kavakava merona enai e vara ḡauna baine laloa. Danu, Amnon ese e karaia karana bona ena dika ba laloa. (2 Sam. 13:1, 2, 10-15, 28-32) Ruma bese tomadihona ai, tama sina ese atai ai e hetore sivaraidia amo natudia bae durudia, memero o kekeni ida bae hetura neganai, aonega bona sibodia bae hebiagu karana bae hahedinaraia totona.

12. (a) Edena dala ai Iosef ese tadikakana e kara henidia neganai sibona ena hemami e biagua? (b) Ededia nega ai siboda eda hemami baita biagu na namo?

¹² Nega ma ta ai danu, Iosef na sibona ena  hemami e biagua. Iosef na e ura tadikakana kudoudia ai e mia ḡauna baine diba dainai, idia na aniani ihoidia ela Aigupto neganai se hahedinaraia ia na idia tadikakadia. Bona lalona e manokava neganai, ela hehuni gabuna ai e tai. (Gen. 43:30, 31; 45:1) Bema Kristen ta eiava tadikakada ta ese baine kara auka henida, Iosef heḡereḡerena, siboda baita hebiagu karana ese baine duruda basita badu haraḡa totona. (Her. 16:32; 17:27) Bema varavaramu ta na murimuri ai e atoa, namona na sibomu emu hemami ba biagua unu amo basio bamoa. Vaia, unu bo kara tomamu na auka, to bema baita dibamu ita na Dirava ena kara ta tohotohoamu bona ena sisiba ta badinaiamu, baita moalemu.

13. King David sivaraina amo dahaka ta dibamu?

¹³ Baibul ese King David danu e herevalaia. Ena be iena siahu na bada, to Saulo bona Simei ese e habadua neganai, ena siahu na se ḡaukaralaia kerere. (1 Sam. 26:9-11; 2 Sam. 16:5-10) To nega haida David ese ena kara danu se biagua, una na Bataseba ida e kerere bona Nabala ena mataḡaniḡani dainai e badu karana amo ta dibamu. (1 Sam. 25:10-13; 2 Sam. 11:2-4) To, David ena amo mai anina bada ḡaudia baita dibamu. Ginigunana na, Dirava ena taunimanima e gunalaidiamu taudia ese edia kara bae biagu na namo, unu amo edia siahu na basie ḡaukaralai kerere. Iharuana na, ta na basine lalo ia na hedibaḡani lalonai basine moru diba.​—1 Kor. 10:12.

14. Tadikaka ta enai be dahaka e vara, bona dahaka dainai unu bamona negadiai eda kara baita biagu na mai anina bada?

¹⁴ Sibomu emu kara ba biagua totona, dahaka ba kara diba? Mani e vara momokani sivaraina ta aita laloa. Motuka ta na Luigi ena motuka ai e tatakau. Ena be una motuka e taria tauna na kerere, to Luigi e gwau henia bona e ura baine heatu henia. Luigi ese Iehova e noia basine badu, bona una motuka e taria tauna lalona baine hakerua totona, to una tau na dounu e baduva. Ena be una tau na mai baduna ida e herevava, to Luigi ese una tau ena motuka davana baine heni totona ena motuka namba pleit bona ena fon namba e abia murinai e heau oho. Pura ta murinai, Luigi ese hahine ta e lou henia neganai e diba una hahine adavana na hari motuka e taria tauna! Una tau na e hemarai bona ena kara dainai e sori. Ia ese Luigi e hamaoroa ia hari Luigi ena motuka davana baine heni. Baibul e herevalaia neganai una tau danu e helai vareai bona e kamonai ḡaudia na e moalelai. Luigi ese una kara e lalo lou neganai, e diba aksiden neganai se badu karana na mai anina bada, a bema badu neganai dika bema vara diba.​—2 Korinto 6:3, 4 ba duahi.

15, 16. Edena dala ai Baibul istadilaina karana ese oi bona emu ruma bese bae durumui diba sibomui ba hebiagu totona?

¹⁵ Hanaihanai Baibul istadilaina karana ese Kristen taudia baine durudia diba edia kara bae biagu totona. Dirava ese Iosua e hamaoroa herevana mani a laloa, eto: “Ina taravatu bukana herevadia na udumu ai bae mia; ia anina ba laloa boi, ba laloa rani. Unu amo ia lalonai e tore herevadia iboudiai ba badinadia bona karadia ba kara; bena emu raka baine namo bona emu kara anidia bae namo.” (Ios. 1:8) Edena dala ai Baibul istadilaina karana ese baine durumu diba sibomu ba hebiagu totona?

¹⁶ Tame herevalai ḡaudia amo tame diba, Baibul ese siboda eda kara baita biagu karana ena namo bona basita biagu karana ena dika eme hahedinaraia ḡoevaḡoeva. Iehova ese unu sivarai na mai badidia ai e tore. (Roma 15:4) Unu sivarai baita duahidia,  baita lalodia dobu, bona baita stadilaidia na aonega karana! Oi bona emu ruma bese ese ba badinadia diba daladia ba lalo. Iehova ba noia iena Hereva ba badinaia totona. Bema nega haida o mamimu sibomu so hebiagumu, namona na ba gwauraia hedinarai. Bena ba ḡuriḡurilaia, bona ba hekwarahi ba hanamoa totona. (Iak. 1:5) Bona eda pablikeisen idauidau ai heduru ma haida ba tahu diba.

17. Ededia dala ai tama sina ese natudia bae durudia diba sibodia bae hebiagu totona?

¹⁷ Edena dala ai natumu ba durudia diba sibodia edia kara bae biagu totona? Tama sina na mai dibadia natu ese una kara na asie varalaia. Natu ese kara namodia bae diba totona, tama sina ese haheitalai namona bae hahedinaraia na namo. (Efe. 6:4) Una dainai bema natumu na e hekwarahimu sibona ena kara baine biagua, namona na sibomu ba henanadai, ‘Lau be haheitalai namona na hahedinaraiamu eiava lasi?’ Namona na haroro ḡaukara, hebou ilao henina karana, bona ruma bese ena tomadiho ikarana karana edia namo na basio lalodia maraḡi. Basio gari, bao gwa lasi bema natumu ese e noiamu ḡauna na kerere! Iehova ese taravatu e ato Adam bona Heva ese bae badina​—unu taravatu daidiai Iena siahu na bae matauraia. Una heḡereḡerena, tama sina edia sisiba bona haheitalai ese natu bae durudia diba sibodia edia kara bae biagu totona. Dirava ena siahu bona ena taravatu imatauraina karana na natumui kudoudia ai bavato ḡaudia badadia.​—Hereva Lada-isidia 1:5, 7, 8 ba duahi.

18. Dahaka dainai o dibamu hebamo namodia ese namo baine havaraia diba?

¹⁸ Ena be oi na tama sina eiava lasi, to ba bamodia taudia na bavabidia hidi namonamo. Namona na kara namodia ai bae hagoadamu bona basie hakaumu kerere taudia ba bamodia. (Her. 13:20) Lauma dalanai e goadamu taudia ibamodia karana ese be durumumu dainai, idia heḡereḡeredia sibomu bo hebiagu dibamu. Bona emu kara namodia ese danu turamu na be hagoadadiamu. Sibomu bo hebiagumu karana dainai hanaihanai Dirava ena lalonamo na bo moalelaiamu bona emu lalokau taudia ida bo moale heboumu.