Taim eiava hora o uramu ba diba neganai, oi be dahaka bo karamu? Reana emu dina ḡauna o klok bo itaiamu. Bema turamu ta ese taim baine henanadailaia, oi be ede bo haere tomamu? Taim igwauraina daladia na idauidau. Ededia dala ai?

Heḡereḡere, dina tubua murina ai taim na hora tamona bona 30 miniti. Reana bo gwaumu una na 1:30. Eiava reana taim na bo gwauraiamu 13:30 badina emu noho gabuna bona kastom ai taim na unu o gwauraia tomamu. Taim unu e gwauraia tomamu taudia na 24-hour klok e badinaiamu. Gabu haida ai, momo ese una taim na e gwauraiamu “half two,” anina na 30 miniti murinai 2 oklok baine abia.

Oi na Baibul o duahiamu tauna ta dainai, reana o uramu ba diba, ‘Baibul negadia ai taunimanima ese taim be ede e gwauraia tomava?’ Idia ese taim na dala momo ai e gwauraiva. Genese ela Malaki ai e tore herevadia haida na “daba,” “dina tubua” bona “adorahi.” (Gen. 8:11; 19:27; 43:16; 1 Han. 18:26) To, nega haida ai be taim korikori e toredia.

Baibul negadia ai, gabu momo ai gima taudia e ḡaukaralaidiava. Idia na nega momo hanuaboi ai e gimava. Iesu do se vara negana ai, Israel taudia ese hanuaboi na kaha toi ai e haria bona e gwauraia gima negadia. (Sal. 63:6, NWT) Hahemaoro Taudia 7:19 ai “malokihi” e herevalaia. To Iesu ena nega amo, Iuda taudia ese Greek bona Roma edia hanuaboi gima negadia hani e ḡaukaralai matamava.

Evanelia bukadia ai unu gima negadia na nega momo e herevalai. Heḡereḡere, Iesu na ranu latana amo ena hahediba e gui vanaḡina e raka henia negana na, Baibul ese e gwauraia “kokoroku e tai” horana eiava daba kahanai. (Mat. 14:25) Iesu na parabole ta ai, eto: “Ruma biaguna na bema diba guna edena hora ai henao tauna bema mai, ia na bema gima, bena ena ruma basinema darea.”​—⁠Mat. 24:43.

Iesu ese hanuaboi ena gima negadia hani e herevalai, ena hahediba e hereva henidia neganai, eto: “Taunabunai, umui danu ba gima, badina be ruma biaguna baine lou mai negana na asi dibamui: adorahi ai, eiava malokihi ai, eiava kokoroku baine tai ai, eiava daba ai.” (Mar. 13:35) Gima negana ginigunana na, “adorahi,” una na dina e diho negana ela bona hanuaboi 9 oklok. Gima negana iharuana be, “malokihi,” una be hanuaboi 9 oklok ela 12 oklok. Gima negana ihatoina be, “kokoroku baine tai” eiava daba kahana, una na hanuaboi 12 ela bona daba 3 oklok. Reana Iesu na una gima negana ihatoina, kokoroku e tai negana ai, e ḡuia. (Mar. 14:72) Gima negana ihahanina be, “daba,” una be daba 3 oklok ela bona daba 6.

Ena be hari ina negai dina ḡaudia eiava klok na Baibul negadia ai asie ḡaukaralaiva, to dala ma haida ai dina bona hanuaboi horadia e gwauraiva.