1. Edena dala ai Dirava ena taunimanima na lalokau ai e nohomu?

DIRAVA ena taunimanima na lauma dalanai ruma bese badana ta bona edia kara badana na lalokau. (1 Ioa. 4:16, 21) Nega momo una lalokau na dia dala badadia ai mo to dala maraḡidia heḡereḡere, hereva bona kara namodia ai danu e hahedinaraimu. Ma haida baita lalodia badamu bona baita bogadia hisimu neganai, ita na ‘Dirava baita haḡoiamu’ natuna lalokaudia na heheto.​—Efe. 5:1.

2. Iesu ese Dirava ena lalokau be ede e hahedinaraia toma?

² Iesu ese Tamana na e tohotohoa ḡoevaḡoeva. Iesu na eto: “Tau boera taumui bona maduna metau taumui iboumui ai, lau dekegu aoma, lau ese laḡa-ani baina henimui . . . badina be lau na manada bona lalo-manau taugu.” (Mat. 11:28, 29) ‘Ogoḡami taudia baita lalodiamu’ karana amo Keriso ena haheitalai baita tohotohoa neganai, Tamada guba ai ese be lalonamo henidamu bona baita moalemu. (Sal. 41:1) Mani aita itaia, ita ese edena dala ai  ruma bese lalonai, kongrigeisen ai, bona haroro ḡaukara ai ma haida baita lalodia bada.

3. Headava tauna enai, edena dala ai ma haida ilalopararalaidia bona ilalodia bada karana na e ḡaukara heboumu? (Rau 28 ai laulau ba itaia.)

³ Tatau ese ma haida ilalodia bada karana ruma bese lalonai bae hahedinaraia na namo. (Efe. 5:25; 6:4) Heḡereḡere, adavadia ida ‘e noho heboumu dalana bae haeroa.’ (1 Pet. 3:7) Ma haida ilalopararalaidia bona ilalodia bada karana na e ḡaukara heboumu. Heḡereḡere, laloparara tauna na mai dibana adavana, ia iduruna hahinena, na dala momo ai ia ena amo idau, to ia ese hahine na se hereaia. (Gen. 2:18) Namona na hahine ena hemami baine laloa bada, bona mai hematauraina ida baine kara henia. Canada ai, hahine ta ese adavana na ini e herevalaia toma: “Ia ese egu hemami na e laloa badamu bona nega ta se gwa, ‘Unu asio lalo toma.’ Danu ia na e kamonai namonamomu tauna. Hekwakwanai ta ihamaoromaorona ai e durugumu neganai, mai hebogahisina ida unu e kara tomamu.”

4. Tau ta ese hahine ma haida baine kara henidia neganai, edena dala ai adavana baine laloa bada?

⁴ Tau ese hahine ma haida e kara henidiamu neganai adavana ena hemami na e laloa badamu. Ia ese na se ḡahusidiamu bona se ha uradia kavamu; intanet bona social media e ḡaukaralaimu negadiai danu unu na se kara tomamu. (Iobu 31:1) Oibe, ia na adavana e badinaiamu, dia e lalokau heniamu mo dainai, to Dirava e lalokau heniamu bona kara dika e inai henimu dainai unu e kara tomamu.​—Salamo 19:14; 97:10 ba duahi.

5. Edena dala ai hahine ese adavana baine laloa bada diba?

⁵ Tau ese ia kwarana, Iesu Keriso, ena haheitalai baine tohotohoa neganai, adavana baine durua ia “baine matauraia” totona. (Efe. 5:22-25, 33) Unu amo bema tau na tiokratik madunadia dainai nega bada baine ḡaukaralaia, eiava ḡau haida daidiai baine lalohekwarahi, hahine ese hemataurai karana baine hahedinaraia diba. Britain ai, tau ta na e gwa: “Nega haida, adavagu na egu kara amo e dibamu lau na mai egu hekwakwanai. Una neganai, ia ese Hereva Lada-isidia 20:5 ena hahekau herevana e badinaiamu, bona e narimu ela bona nega maorona ai egu lalohadai na ienai na gwaurai hedinaraimu.”

6. Edena dala ai ita iboudai ese natu baita hagoadadia ma haida bae lalodia bada, bona edena dala ai namo bae davari?

⁶ Tama sina be hemataurai hehenimu neganai, natudia ediai haheitalai namona be hahedinaraiamu. Momokani, tama sina edia maduna badana na natudia bae hadibadia ma haida bae lalodia bada totona. Heḡereḡere, tama sina ese natudia bae hadibadia Kingdom Hall ai na basie gadara. Moale hebou negadiai, tama sina ese natudia bae hamaorodia aniani iabinai taunimanima badadia bae abi guna. Momokani, kongrigeisen taudia iboudiai ese tama sina bae durudia diba. Heḡereḡere, natu ta ese kara namona ta e karaiamu​—reana iduarada e kehomu​—⁠neganai, baita hanamoa na namo. Unu baita kara tomamu neganai, ia na be moalemu bona be dibamu “ḡau ihenina be namo bada, ḡau iabina be namo maraḡi.”​—Kara 20:35.

7. Edena dala ai Iesu ese taia-kudima tauna e laloa bada, bona Iesu ena haheitalai amo dahaka ta dibamu?

⁷ Nega ta Iesu na Hanua Gwauta ela neganai, taunimanima ese “taia-kudima bona lanalana tauna ta ia dekena e hakaua lao.” (Mar. 7:31-35) Iesu ese una tau na dia taunimanima vairadiai e hanamoa, to “e hakaua  siri” bona e hanamoa. Dahaka dainai? Una tau na ena gorere dainai hutuma vairadiai e hemaraiva. Reana Iesu ese una na e lalopararalaia dainai, hehuni ai e hanamoa. Momokani, hoa dalanai gorere na basita hanamo dibamu. To namona na ita ese tadikakada edia dabu ḡaudia bona edia hemami baita lalopararalai. Aposetolo Paulo na eto: “Baita helalolai heheni, bena baita hahealo heheni, lalokau bona kara namodia baita havara.” (Heb. 10:24) Iesu ese una taia-kudima tauna ena hemami na e lalopararalaia bona mai hematauraina ida e durua. Una na haheitalai namona ita edai!

8, 9. Ededia dala ai burukadia bona gorere taudia baita lalodia bada? (Haheitalai haida a herevalai.)

⁸ Burukadia bona gorere taudia baita lalodia bada. Kristen kongrigeisen ena kara badana na lalokau, una kara na asi hetoana. (Ioa. 13:34, 35) Una lalokau ese baine hagoadada burukadia bona gorere taudia baita durudia Kristen heboudia baela bona sivarai namona bae harorolaia totona. Baita durudia ena be edia goada na mai hetoana. (Mat. 13:23) Michael, wilsea ai mo e helaiva tauna, ese ena ruma bese bona ena haroro grup tadikakadia edia heduru karana na e moalelaia bada. Ia na eto: “Idia ese e duruguva dainai, hebou momo na laova bona na haroro hanaihanaiva. Pablik harorona na na ura heniamu.”

⁹ Betele momo ai e nohomu tadikaka bona taihu haida na buburuka bona gogorere. Betele ai ovasia ese unu abidadama hesiai taudia na e lalodia badamu dainai, dala e kara revareva bae tore bona telefon amo bae haroro. Bill, laḡanina 86 bona ia na gunika gabudiai e nohomu taudia revareva amo e haroro henidiamu, na ini e gwau tomamu: “Revareva baia tore ḡaukarana na a moalelaiamu.” Nancy, laḡanina na kahirakahira 90 be abiamu, na eto: “Na laloamu revareva itorena karana na dia envalope ai mo ba udadia. To ina na haroro ḡaukara. Taunimanima ese hereva momokani bae dibaia na namo!” Ethel, laḡani 1921 ai e vara, na eto: “Egu mauri lalonai hisihisi na mamimu. Dina haida na hekwarahimu baina heḡoeva totona.” To, ia ese telefon harorona na e moalelaiamu bona mai ena lou henia namodia haida. Barbara, laḡanina na 85, na e gwaumu: “Egu gorere dainai, haroro ḡaukara baina karaia hanaihanai na auka. To telefon haroro ese e durugumu ma haida baina hereva henidia. Tenkiu, Iehova!” Laḡani ta lalonai, unu burukadia na haroro ai hora 1,228 e ḡaukaralai, revareva 6,265 e tore, telefon amo taunimanima 2,000 e hereva henidia, bona pablikeisen 6,315 e hariharilai! Momokani, edia hekwarahi dainai Iehova na e moalemu!​—Her. 27:11.

10. Dahaka baita kara diba unu amo eda tadikaka taihu ese Kristen heboudia bae moalelaia?

¹⁰ Kristen heboudiai ma haida edia namo baita lalo bada. Ta uramu eda tadikaka bona taihu na hebou bae moalelaia. Una dainai, ḡau badana na ta ta ena namo baita lalo bada. Edena dala ai? Dala ta na hebou negana korikori ai baita ginidae unu amo ma haida edia kamonai karana basita hadikaia. Vaia ḡau haida daidiai nega haida baita leitimu. To bema hanaihanai ta leitimu, namona na ḡau haida baita haidau, unu amo ta hahedinaraiamu tadikaka taihu edia namo na ta lalo badamu. Baita helalotao, eda hebou na Iehova bona ia Natuna ese e heḡaeḡaelai. (Mat. 18:20) Idia baita matauraidia na mai anina bada!

11. Dahaka dainai hebou ai tok e henimu tadikakadia ese 1 Korinto 14:40 ena sisiba bae badinaia na mai anina bada?

¹¹ Tadikakada baita lalodia bada dalana ma ta be, ina haheḡani baita badinaia: “Ḡau idoidiai ba kara namonamo, ba kara ḡoevaḡoeva.” (1 Kor. 14:40) Hebou ai tok e henimu tadikakadia ese edia nega bae badina na mai anina bada. Unu amo dia ia murinai tok baine heni tadikakana mo e laloamu to kongrigeisen  taudia iboudiai e lalodiamu. Tadikaka bona taihu haida na gabu daudaudia ai e nohomu. Ma haida be reana pmv be abimu. Bona reana ma haida adavadia na dia Witnes taudia, bona mai lalohisihisidia ida adavadia edia lou be nariamu.

12. Dahaka dainai elda taudia baita matauraidia bona baita lalokau henidia na namo? (Maua ladana “Ihakauda Taudia Baita Lalodia Bada” ba itaia.)

¹² Elda taudia na kongrigeisen e reḡuamu bona hesiai ḡaukara e goadalaiamu dainai baita matauraidia bona baita lalokau henidia na namo. (1 Tes. 5:12, 13 ba duahi.) Momokani, oi daimuai e ḡaukara goadamu dainai o moalemu. Una dainai mai laloda idoinai ida baita ḡaukara hebou bona baita durudia. “Badina be idia ese umui laumamui e gimadiamu, edia kara anidia bae gwaurai hedinarai taudia na heheto.”​—Heb. 13:7, 17.

13. Iesu ese taunimanima e kara henidia dalana amo dahaka ta dibamu?

¹³ Isaia ese Iesu e perovetalaia eto: “Siriho pou basine hakwaidua, bona gida basine habodoa; ia na hahemaoro ḡoevaḡoeva baine halasia mai momokanina ida.” (Isa. 42:3) Iesu ese taunimanima edia hemami na e lalo badava. Ia ese lalometau bona daradoko taudia edia hemami na e lalopararalaidia badina idia na vaitani baine bodo gidana na heto. Una dainai e bogadia hisiva bona mai manauna ida e kara henidiava. Danu, natu maraḡidia ese danu e ura heniava. (Mar. 10:14) Momokani, eda lalohadai bona hahediba daladia na dia Iesu e karava heḡereḡerena! To, namona na eda teritori ai e nohomu taudia edia namo baita lalo bada. Una anina na haroro negadiai ta hereva henidiamu dalana bona negana baita lalo.

14. Dahaka dainai taunimanima ta hereva henidiamu daladia na baita haero namonamo?

 ¹⁴ Taunimanima be edena dala ai baita hereva henidia? Hari, momo na “taudia e boera, bona e karoho” badina bisnes, gavamani taudia bona dubu igunalaina taudia ese se haerodiamu. (Mat. 9:36) Una dainai, taunimanima na ta ena hereva asie abi daemu bona asi edia helaro. Mai anina bada ḡauna na aonega dalanai bona gado namo ai baita hereva henidia! Momo ese eda hereva e kamonaimu badina e mamiamu idia na ta lalodia badamu, dia eda diba dainai e abida daemu.

15. Edena dala idauidau ai baita hahedinaraia eda teritori taudia na ta lalodia badamu?

¹⁵ Teritori ai ta hereva henidiamu taudia baita lalodia bada daladia na idauidau. Heḡereḡere, hahediba dalana namona ta na henanadai baita ḡaukaralai. Baita heni henanadaidia na baita haero namonamo. Painia tauna ta ena teritori ai momo na hemarai taudia, una dainai ihahemaraidia henanadaidia se ḡaukaralaiva. Anina na basie haerelai diba henanadaidia na se heniva. Heḡereḡere, henanadai ini bamodia: ‘Dirava ladana mai dibamu?’ eiava ‘O laloamu Dirava ena Basileia be dahaka?’ To ini henanadai e ḡaukaralaiva: “Baibul amo na diba Dirava na mai ladana. Bema namo una lada baina hahedinaraia?” Vaia, taunimanima na idauidau dainai edia noho daladia heḡereḡeranai baita haroro henidia. To, namona na hanaihanai baita hahedinaraia ita ese ta lalodia badamu bona ta matauraidiamu. Danu, eda teritori taudia baita dibadia namonamo.

16, 17. Edena dala ai dekeda taudia edia namo baita lalo (a) ta vadivadidiamu neganai? (b) ta hereva henidiamu neganai?

¹⁶ Ededia negai dekeda taudia baita vadivadidia na namo? Ruma ta ruma ta ai ta haroromu neganai, ruma tauna na asi dibana ita be idia baita vadivadidiamu. Una dainai, mai anina bada ḡauna na nega maorodiai baita vadivadidia. (Mat 7:12) Heḡereḡere, wiken ai, taunimanima na asi e uramu bae noga haraḡa? Bema unu bamona, emu haroro ḡaukara na reana ini ba hamatamaia toma: street bona pablik gabudiai e loamu taudia ba hereva henidia, eiava emu lou henia ba haitadia.

¹⁷ Baita noho daudau eiava? Taunimanima momo na e bisimu dainai, vadivadi ginigunana ai na basita noho daudau. Eda herevahereva karana baita ha kwadoḡia na namo. (1 Kor. 9:20-23) Idia ese be itaiamu edia noho daladia ta lalopararalaimu neganai, be uramu gabeai baita lou henidia. Namona na Dirava ena lauma huahuadia na eda haroro ḡaukara ai baita hahedinarai. Unu baita kara tomamu neganai, ita na ‘Dirava ida ta ḡaukara heboumu’, bona ia ese baine ḡaukaralaida diba ma haida baita durudia hereva momokani bae dibaia totona.​—1 Kor. 3:6, 7, 9.

18. Ma haida edia namo baita lalo badamu neganai, dahaka hahenamo baita davarimu?

¹⁸ Una dainai baita hekwarahi ruma bese lalonai, kongrigeisen ai, bona haroro ḡaukara ai ma haida edia namo baita lalo bada. Unu baita kara tomamu neganai, hari bona nega vairai hahenamo momo baita davarimu. Salamo 41:1, 2 na e gwaumu: “Ogoḡami taudia e lalodiamu tauna na namo; Iehova ese e harohoa maurimu, hekwakwanai dinana ai. . . . Tano ai namo e gwauraiamu.”