1. Edena dala ai siboda eda namo baita lalo bada karana ese eda manau karana baine hadikaia diba?

DAHAKA DAINAI Dirava ena Hereva amo ta dibamu ḡaudia baita badina na mai hekwarahina? Badi ta na kara maorona baita karaia totona baita manau, to una manau karana e hadikaiamu ḡaudia na momo. Ini “dina gabedia ai,” taunimanima na ‘sibodia e heura henimu; moni e mata ḡaniḡani henimu; e heaḡimu; e hekokorokumu,’ bona “sibodia se heabiagumu.” (2 Tim. 3:1-3; NWT) Dirava ena hesiai tauna ese unu kara na e inai henimu, to unu kara e karamu taudia ese edia mauri e moalelaiamu karana be itaiamu neganai, reana be vaḡeḡemu. (Sal. 37:1; 73:3) Reana ta na be lalomu: ‘Una be mai badina ta dainai ma haida edia namo baina lalo guna, a? Bema sibogu “maraḡi herea tauna” ai baina hahelao, ma haida ese be matauraigumu, eiava? (Luka 9:48) Siboda eda namo baita lalo badamu neganai, kongrigeisen lalonai eda hetura karana bona kara namodia be hadikaia dibamu. To Baibul ai haheitalai namodia e hahedinarai taudia  sivaraidia baita stadilaimu bona baita tohotohomu neganai, hahenamo baita davarimu.

2. Guna Dirava e abidadama heniava taudia edia sivarai amo dahaka ta dibamu?

² Bema ta uramu abidadama taudia baita tohotohodia, namona na sivaraidia baita stadilai. Edena dala ai idia na Dirava turana ai ela, ena lalonamo e abia, bona goada e abi ena ura bae haḡuḡurua totona? Edia sivarai baita stadilaimu neganai, una ese eda abidadama be hagoadaiamu.

3, 4. (a) Edena dala ai Dirava ena hahediba herevadia ta abimu? (b) Dahaka dainai baita gwau dibamu Dirava ena hahekau herevadia amo diba mo baita abi na dia heḡereḡere?

³ Ita ese Baibul, eda Kristen pablikeisen idauidau, eda websait, JW Broadcasting, bona eda hebou badadia bona maraḡidia amo sisiba namodia bona treinin ta abimu. To Ioane 4:34 ai Iesu ena hereva heḡereḡerena, Dirava ena hahekau herevadia amo dia diba mo baita abi. To dahaka danu? Iesu na eto: “Agu aniani binai, e siaigu Diravana ena ura baina karaia, iena ḡaukara baina haḡuḡurua.”

⁴ Iesu enai, lauma aniani na Dirava ena hahekau dalana ibadinana karana. Edena dala ai una na aniani heḡereḡerena? Aniani namona ta aniamu neganai tauanida e duruamu bona e hagoadaiamu, una heḡereḡerena Dirava ena ura baita karaiamu neganai, eda abidadama be hagoadaiamu mauri hanaihanai baita abia totona. Nega ta mai hesikumu ida haroro ḡaukara hebouna ta ola, to haroro murinai goada mamina o abia bona o moale, a?

5. Mai aonegada ida baita kara ena hahenamo be dahaka?

⁵ Dirava ese e hadibadamu ḡaudia baita badinamu neganai, una na aonega karana. (Sal. 107:43) Aonega iabina totona e hekwarahimu taudia na davana namona e abiamu. Una na ta “ura henimu ḡaudia ta” ida basita haheḡereḡerea diba. “Ia na mauri auna, e dabaia taomu taudia ediai; e dogoataomu taudia na moale taudia e gwauraidiamu.” (Her. 3:13-18) Iesu na eto: “Ina na boma diba bona boma kara, boma namo.” (Ioa. 13:17) Bema hahediba taudia na Iesu ese e hadibadia ḡaudia bae badina neganai, bae moale hanaihanai. Idia ese ena hahediba herevadia bona ena kara na dia una negana ai mo e badina. To edia mauri lalonai e badinava.

6. Dahaka dainai ta dibamu ḡaudia baita badina hanaihanai na namo?

⁶ Hari ina negai ta dibamu ḡaudia baita badina na mai anina bada. Ini aita haheitalaia toma, makenika ta na mai ena tulu, kohu ma haida, bona mai ena diba. To unu ḡau baine ḡaukaralai neganai, una ese baine durua diba. Bema ia na guna makenika ḡaukarana e karaia bona diba e abi, namona na hanaihanai una diba baine ḡaukaralaia, unu amo ena diba baine habadaia bona makenika tauna namona ai bainela. Una heḡereḡerena, reana matamanai na baita moalemu badina Baibul ai ta duahi ḡaudia ta badinava. To, baita moale hanaihanai totona, mai manauda ida dina ta ta ai Iehova ena hahediba herevadia baita badina.

7. Eda laloparara ihabadana totona, Baibul sivaraidia be ede baita lalodia toma?

⁷ Ina stadi ai, eda manau karana bae tohoa ḡaudia haida bona idaunegai abidadama taudia ese unu hekwakwanai e hahanai daladia baita herevalaimu. Lauma dalana ai baita goada totona unu sivarai baita diba mo na dia heḡereḡere. Una dainai unu poin ta ta ba badina daladia ba haerodia, bona ibadinadia ai basio halahe.

8, 9. Kara 14:8-15 ai e herevalaia sivaraina ese aposetolo Paulo ena manau karana be ede e hahedinaraia toma? (Rau 3 ai laulau ba itaia.)

⁸ Dirava ena ura na “taunimanima iboudiai bae mauri bona hereva momokani bae diba.” (1 Tim. 2:4) Hereva momokani do asie diba taudia iboudiai be ede o lalodia tomamu? Aposetolo Paulo na sinagoga ai dia Iuda taudia mo e haroro henidiava, to Dirava sivaraina mai dibadia taudia danu. Dirava koikoidia e tomadiho henidiava taudia edia kara ese ena manau karana na e tohoa.

⁹ Heḡereḡere, Paulo ena misinari laolaona ginigunana ai, Lukaonia taudia ese ia bona Banaba na lada bada taudia heḡereḡeredia e hanamodiava​—edia dirava koikoidia Deo bona Hereme e nemaidia. Paulo bona Banaba be e hanamodiava dainai e heaḡiva, a? E vadivadidia hanuadia rua ai daḡedaḡe e davari dainai unu e hanamodia toma karana e moalelaia, a? Idia be e lalo una kara ese taunimanima baine durudia sivarai namona bae kamonaia totona, a? Lasi! Idia na haraḡa herea edia dabua e dare bona e heau lasi hutuma bogaraḡidiai e lolo, eto: “Dahaka dainai ini o kara tomamu? Ai danu taunimanima mo; daramai danu umui daramui heḡereḡeredia.”​—Kara 14:8-15.

10. Edena dala ai Paulo bona Banaba ese e hahedinaraia idia bona Lukaonia taudia na heḡereḡere?

¹⁰ Paulo bona Banaba na mai dibadia idia danu dia ḡoḡoevadae, to asie gwa edia tomadiho dalana na unu dirava koikoidia e tomadiho henidiava taudia edia heḡereḡeredia. Idia raruosi na Dirava ese e siaidia misinari ḡaukarana bae karaia. (Kara 13:2) Idia be lauma helaḡa amo e horodia bona helaro namona ta e abia, a? Oibe, to Paulo bona Banaba na e laloparara Lukaonia taudia danu una hahenamo bae abia diba bema sivarai namona bae kamonai.

11. Ta haroromu neganai, edena dala ai Paulo ena manau karana baita tohotohoa diba?

¹¹ Edena dala ai Paulo ena manau karana baita tohotohoa? Ginigunana na, Iehova ena goada amo ta haḡuḡurumu ḡaudia daidiai haida ese bae imodaida urana baita dadaraia na namo. Siboda baita henanadai: ‘Na haroro henidiamu taudia be ede na lalodia tomamu? Lau ese taunimanima haida na inai henidia kavamu, a?’ Tanobada heḡeḡemadai Iehova ena Witnes na edia teritori ibounai lalonai sivarai namona bae kamonai kudou namo taudia e tahudiamu. Nega haida, e hekwarahimu taunimanima ese se lalodia badamu taudia edia gado bona mauri dalana bae dibaia totona. Unu Witnes taudia na se lalomu idia ese ma haida na e hereadia. To, e uramu taunimanima ta ta bae lalopararalaidia bena Basileia sivaraina amo kudoudia bae hamarere.

12. Edena dala ai Epafra ese e hahedinaraia ma haida edia namo na e lalo bada?

¹² Mai manauda ida Dirava ena dala baita badinaia dalana ma ta na, “eda abidadama tamona” taudia daidiai baita ḡuriḡuri. (2 Pet. 1:1) Epafra na unu e kara toma. Baibul ese ia na nega toi mo e herevalaia​—Paulo ena revareva lalodiai. Paulo na Roma edia dibura rumana ai e nohova neganai, Kolose Kristen taudia e tore henidia bona e hadibadia Epafra na ‘nega idoinai idia daidiai e ḡuriḡuriva.’ (Kol. 4:12) Epafra ese tadikaka na e dibadia namonamo, bona e lalodia badava. Ena be Paulo ida “iḡui ai” e nohova, to una ese se koua ma haida edia lauma dalana baine laloa bada. (File. 23) Bona ia na kara ta e karaia idia baine durudia, unu amo sibona ena namo se laloa  bada. Tadikakada daidiai baita ḡuriḡurimu bona ladadia baita gwauraimu neganai, una ḡuriḡuri na mai siahuna.​—2 Kor. 1:11; Iak. 5:16.

13. Edena dala ai emu ḡuriḡuri karana ai Epafra ena haheitalai ba tohotohoa?

¹³ Emu ḡuriḡuri ai ladadia ba gwaurai diba taudia haida mani a lalodia. Epafra heḡereḡerena, eda tadikaka bona taihu momo na edia kongrigeisen bona ruma bese ai maduna badadia e huamu taudia, abi hidi badadia e karamu taudia, bona hahetoho e davarimu taudia daidiai e ḡuriḡurimu. Momo na jw.org ai ina kaha “Jehovah’s Witnesses Imprisoned for Their Faith” ai ladadia e listi taudia daidiai e ḡuriḡurimu. (NEWSROOM > LEGAL DEVELOPMENTS kahanai ba itaia.) Danu, edia lalokau taudia e mase, vanegai disasta bona tuari amo e roho mauri taudia, bona moni ena hekwakwanai e haheaukalaimu taudia daidiai baita ḡuriḡuri. E hahedinaraia ḡoevaḡoevamu, tadikaka bona taihu momo daidiai baita ḡuriḡuri na namo bona unu ḡuriḡuri amo heduru bae abi diba. Idia daidiai baita ḡuriḡurimu neganai, baita hahedinaraiamu ita na siboda eda namo asita tahumu to haida edia namo ta tahumu. (Fili. 2:4) Iehova ese ḡuriḡuri unu bamodia na e kamonaimu.

14. Edena dala ai Iehova ese kamonai karana ai haheitalai namona e hahedinaraia?

¹⁴ Manau karana baita hahedinaraia dalana ma ta na, mai eda ura ida taunimanima edia hereva baita kamonai namonamo. Iakobo 1:19 na e gwaumu, namona na ‘hereva ikamonaina ai baita haraḡa.’ Iehova na kamonai karana ai haheitalai namona e hahedinaraia. (Gen. 18:32; Ios. 10:14) Mani Ia bona Mose edia herevahereva karana aita laloa Esodo 32:11-14 ai. (Ba duahi.) Ena be Mose ena lalohadai baine kamonai na asi anina, to Iehova ese dala e kehoa Mose ese ena hemami baine gwaurai hedinarai totona. Reana e kereremu tauna ena lalohadai ba kamonai bona ena hereva heḡereḡerena ba kara na auka, ani? To, Iehova ese mai edia abidadama ida ia e boi heniamu taudia na mai haheaukana ida e kamonai henidiamu.

15. Haida imatauraidia karana ai edena dala ai Iehova baita tohotohoa?

¹⁵ Siboda baita henanadai: ‘Bema Iehova na mai manauna ida taunimanima e kamonai henidiamu, ia ese Abraham, Rahela, Mose, Iosua, Manoa, Elia, bona Hesekia e kamonai henidia heḡereḡerena, lau ese tadikakagu baina matauraidia, baina lalodia bada, edia lalohadai baina kamonai, bona edia lalohadai namodia baina badina be namo, a? Egu kongrigeisen eiava ruma bese lalonai ta baina durua diba, a? Dahaka baina kara na namo?​—Gen. 30:6; Hahe. 13:9; 1 Han. 17:22; 2 Sis. 30:20.

16. King David na Simei ese e habadua neganai dahaka e kara?

¹⁶ Manau karana ese danu baine duruda ma haida ese e habadudamu neganai siboda baita hebiagu totona. (Efe. 4:2) Haheitalai namona ta na 2 Samuel 16:5-13 ai. (Ba duahi.) Simei, King Saulo varavarana ta, ese David bona ena hesiai taudia e uduḡuiraidiava bona nadi amo e hododiava neganai, idia na e haheauka. David na unu e kara toma ena be mai ena siahu Simei baine hamasea. Edena dala ai David na sibona e hebiagu? Salamo 3 baita stadilaiamu neganai una baita lalopararalaia dibamu.

17. Dahaka ese David e durua dainai sibona e hebiagu, bona edena dala ai baita tohotohoa?

 ¹⁷ David ese Salamo 3 e torea, natuna Absalom ese e ura baine alaia negana ai. Siri 1 bona 2 ai e herevalai ḡaudia ese Samuel Iharuana karoa 16 ai e herevalai ḡaudia e hahedinarai. Bena Salamo 3:4 ai David ese goada e abia karana e herevalaia: “Iehova na boi heniamu, bena ena ororo helaḡana amo e haere henigumu.” Ita danu hahetoho ta davarimu neganai baita ḡuriḡuri diba. Bena, Iehova ese ena lauma helaḡa amo baine duruda diba baita haheauka. Bema ta ese baine habadumu neganai, ba boga auka bona ena dika ba gwautao be namo eiava? O abia dae momokanimu Iehova ese emu hisihisi na e itamu bona baine hanamomu diba, a?

18. Edena dala ai namo baita davari diba bema Dirava ena hahediba herevadia baita badina?

¹⁸ Mai dibada kara maorona baita karaiamu neganai hahenamo momo baita abimu. Hereva Lada-isidia 8:11 na eto, aonega na “o ura henimu ḡaudia iboudiai . . . ida basie heḡereḡere”! Ena be aonega na diba amo e varamu, to ia anina na dia una diba mo baita lalopararalaia, to abi hidi danu baita kara na namo. Dimairi ese aonega e hahedinaraiamu danu. Idia na aonega heherea badina siahu negana ai adia e haboumu. (Her. 30:24, 25) Keriso, Dirava “ena aonega” e abia tauna, na hanaihanai Tamana ihamoalena karadia e karamu. (1 Kor. 1:24; Ioa. 8:29) Dirava na mai dibana abi hidi maorodia ikaradia bona unu abi hidi ibadinadia karana na mai edia idau. Bona ia ese mai haheaukadia ida e manaumu bona kara maorodia e badinamu taudia na e hanamodiamu. (Mataio 7:21-23 ba duahi.) Una dainai, baita ḡaukara goada unu amo kongrigeisen ai mai manauda ida Dirava baita hesiai henia diba. Mai dibada kara momokanidia baita badina na mai hekwarahina bona baita haheauka na namo, to baita manaumu neganai baita moale hanaihanaimu.