TANOBADA heḡeḡemadai, elda taudia ese edia hesiai ḡaukara Dirava ena taunimanima bogaraḡidiai na e laloa badamu. Idia na hahenamo ta ita iboudai edai! To vanegai, orea ese senisi haida e kara. Elda taudia burukadia edia maduna badadia haida na elda eregabedia e henidia. Edena dala ai?

Una dala matamatana na iniheto, seket taudia bona tiokratik sikulidia e hakaumu tadikakadia na laḡanidia 70 e abimu neganai unu hesiai ḡaukaradia na basie kara. Danu, elda taudia laḡanidia 80 e abimu neganai edia asainmen haida na elda eregabedia bae henidia, heḡereḡere Brens Komiti ena kodineita eiava kongrigeisen elda oreana ena kodineita ḡaukarana. Unu elda taudia burukadia ese una dala matamatana be ede e laloa toma? Idia ese Iehova bona ena orea e badinaia!

Laḡani 49 lalodiai Brens Komiti ena kodineita ḡaukarana e karaia tadikakana, Ken, na eto: “Una disisen na na abia dae. Badina una daba ai, lau na ḡuriḡuri amo Iehova na hamaoroava, eregabe tadikakana ta ese kodineita ḡaukarana baine karaia na namo.” Tanobada heḡeḡemadai tadikaka burukadia mai edia abidadama na Ken heḡereḡerena e karamu. Momokani, tadikakadia ihesiai henina  karana na e moalelaiamu dainai, matamanai na e lalohisihisimu.

Esperandio, guna ena kongrigeisen ai elda oreana ena kodineita ḡaukarana e karaiava tadikakana, na eto: “Una senisi dainai taina na lalohisihisi.” To ma e gwa: “Egu gorere na e bada e laova dainai tauanigu baina naria na namo.” To, Esperandio na doini mai ena abidadama ida Iehova e hesiai heniamu bona ena kongrigeisen ai ia na hahenamo ta.

Laḡani daudau seket ḡaukara e karaia to edia hesiai ḡaukara e haidau tadikakadia be ede bamona? Allan, laḡani 38 lalodiai seket ḡaukara e karaia tadikakana, na eto, “Na kamonai neganai, na hoa.” To, e laloparara eregabe tadikakadia na unu ḡaukara bae hadibalaidia na mai ena namo, bona ena hesiai ḡaukara na dounu e goadalaiamu.

Russell, laḡani 40 lalodiai seket ḡaukara bona tiokratik sikulidia e nariva tadikakana, na e gwa, matamanai ia bona adavana na e lalohisihisi. “Emai hahenamo na a moalelaiava bona a mamiava emai goada na heḡereḡere una ḡaukara dounu baia karaia totona.” Russell bona adavana ese e diba ḡaudia na kongrigeisen ai e ḡaukaralaimu, bona mai moaledia ida pablisa ida e ḡaukara heboumu.

Ena be emu hemami na dia unu ataiai ta herevalaidia taudia edia hemami heḡereḡerena, to 2 Samuel ai e herevalaia sivaraina ese baine durumu edia hemami ba lalopararalaia totona.

King David natuna Absalom e gwau-edeede negana aita laloa. David na Ierusalem e heautania bena ela Mahanaim, Ioridane Sinavaina ena mairiveina kahanai. Unuseni ai David bona ia e bamoa taudia ese mauri iduruna ḡaudia haida bae abi na namo. O helalotaomu dahaka e vara?

Una gabu ai e nohova tataudia tatoi ese mahuta ḡaudia, aniani idauidau, bona bae ḡaukaralai kohudia haida e laohai. Idia ta na Barasilai. (2 Sam. 17:27-29) Absalom ena gwau-edeede karana e ore neganai, David na Ierusalem baine lou lao, bona Barasilai ese e bamoa ela bona Ioridane ai. David ese e noia Ierusalem baela. Danu king ese aniani e henia, ena be Barasilai na “taga bada tauna,” bona unu aniani baine abia dae na asi anina. (2 Sam. 19:31-33) To David ese Barasilai ena kara namodia na e moalelai bona ena amo sisiba namodia baine abi na namo. Momokani, king ena ruma ai baine noho bona baine ḡaukara na hahenamo namona ta!

Barasilai na mai ena manau bona lalo-maoromaoro ida e hahedinaraia ia laḡanina na 80. Bena ma eto: “Ḡau namodia bona ḡau dikadia baina hididia diba a?” Ena hereva anina be dahaka? Barasilai laḡanina na bada dainai ḡau momo na mai dibana. Bona dounu sisiba namodia na baine heni diba, “tau badadia” ese gabeai King Rehoboam e sisiba henia heḡereḡerena. (1 Han. 12:6, 7;  Sal. 92:12-14; Her. 16:31) Una dainai Barasilai ena hereva, ‘namo bona dika iabi hididia,’ ese e hahedinaraia ia na vada e buruka dainai ena goada na mai hetoana. Ma eto laḡanina na vada bada dainai aniani mamidia na se mamiva bona se kamonai namonamova. (Koh. 12:4, 5) Una dainai Barasilai na David e noia eregabe tauna Kimuhamu hari Ierusalem baine laohaia, ia na reana Barasilai natuna.​—⁠2 Sam. 19:35-40.

Barasilai na buruka dainai se ura una hahenamo baine abia dae, bona una ese e hahedinaraia ia na e lalo maoromaoro. Paragraf matamadiai e hahedinaraia orea ese e karaia senisi badina ta be una. Hari ina negai, ta lalopararamu, dia taunimanima tamona ena mauri dalana bona diba mo e lalomu, Barasilai enai e vara heḡereḡerena. To tanobada heḡeḡemadai mai edia abidadama ida elda ḡaukarana e karaiamu taudia edia namo e lalomu.

Unu Kristen tadikaka burukadia na e itaiamu vaira neganai Iehova ena orea na baine goada diba bema idia ese laḡani momo lalodiai e huava madunadia na eregabe tadikakadia ese bae huadia. Nega momo, tadikaka burukadia ese eregabe taudia e hadibadiamu, Barasilai ese natuna e hadibaia bona aposetolo Paulo ese Timoteo e hadibaia heḡereḡeredia. (1 Kor. 4:17; Fili. 2:20-22) Ini eregabe tadikakadia ese e hamomokania idia na “herahia” tataudia, bona “Keriso tau-anina” o kongrigeisen bae hagoadaia diba.​—⁠Efe. 4:8-12; Numera 11:16, 17, 29 ba itaia.

Tanobada heḡeḡemadai Dirava ena taunimanima edia kongrigeisen ai, edia maduna haida e hari tadikakadia momo ese Iehova ihesiai henina ḡaukaradia ma haida e karamu eiava e habadamu.

Laḡani 19 lalodiai seket ḡaukara e karaia tadikakana, Marco, na e gwa: “Egu noho dalana matamatana ese e durugumu emai kongrigeisen ai e nohomu taihudia adavadia, dia Witnes tataudia, baina durudia totona.”

Geraldo, laḡani 28 lalodiai seket ḡaukara e karaia tadikakana, na e gwa: “Emai ura matamatana na manoka taudia baia durudia bona Baibul stadi momo baia karadia.” Ena ripoti ai e hahedinarai ia bona adavana ese Baibul stadi 15 e karamu bona manoka taudia momo na hari hebou e laomu.

Allan, matamanai e herevalaia tauna, na eto: “Hari ai na mai emai dala haroro ḡaukarana baia habadaia totona. Ai ese pablik haroro, bisnes teritori, bona dekemai taudia iharoro henidia ḡaukarana na a moalelaimu, bona idia rarua na Kingdom Hall e maimu.”

Bema emu goada na heḡereḡere bona Dirava ena taunimanima bogaraḡidiai asainmen matamatana ta o abia, dala namona ma ta ai ba heduru diba. Iehova ena ḡaukara ba durua diba bona o diba ḡaudia na kongrigeisen ai eregabe tataudia ba hadibalaidia. Russell, matamanai e herevalaia tauna, na eto: “Iehova ese eregabe taudia na e hadibadiamu bona e ḡaukaralaidiamu. Edia hahediba namodia bona mamoe ireḡudia dalana ese tadikaka oreana na e duruamu!”​—⁠Maua ladana “Eregabe Tadikakadia Ba Durudia Namonamo Ela Bona Maduna Bae Hua Diba” ba itaia.

Bema oi na hesiai ḡaukarana ma ta o karaiamu, lalohadai maorona bavabia na namo. Mai kudoumu idoinai ida o karaia ḡaukarana ese taunimanima momo vada e durudia, bona dounu unu ba kara toma. Idia ese e lalokau henimumu, bona dounu e lalokau henimumu.

Mai anina bada ḡauna na, oi ese Iehova kudouna na o hamoalea hanaihanaimu. Ia ese “emui ḡaukara bona emui lalokau ia ladana dainai vada o hahedinarai, helaḡa taudia o durudiava bona o durudiamu” karana  na basine laloaboio. (Heb. 6:10) Una siri ese e hadibadamu Ia na e gwauhamata ta karamu ḡaukaradia daidiai baine hanamoda. Oibe, Iehova ihamoalena totona guna bona hari o karamu ḡaudia na basine lalodia boio!

To bema ataia ai ta herevalai ḡaudia ta na emu ai se vara eiava emu asainmen se haidaua be ede bamona? Una hahekau herevana na dounu mai anina bada emu ai. Edena dala ai?

Bema hari ena asainmen e haidaua tadikaka goadana ta ida o ḡaukara heboumu, laḡani momo lalodiai e diba ḡaudia amo heduru bada bo abi dibamu. Iena amo sisiba ba tahu. Ba noia ena heduru herevadia baine gwaurai. Bona hari ena asainmen matamatana ai ena diba e ḡaukaralaiamu dalana ba haeroa.

Ena be oi na vada buruka bona dala matamatana ai hesiai ḡaukara o karaiamu, eiava oi na tadikaka o taihu ta bona idia amo heduru o abimu, ba helalotao Iehova ese laḡani momo ia e badinaiava bona dounu e hesiai heniamu taudia na e lalodia badamu.