1. Iesu na ena hanuaboi ginigabena ai ena hahediba ediai dahaka mai anina bada herevana e gwauraia?

IESU na ena hanuaboi ginigabena ai, ena hahediba ida e herevaherevava neganai, ia ese lalokau na nega 30 heḡereḡerena e gwauraia. Ena hahediba e hamaorodia bae “helalokau heheni” na namo. (Ioa. 15:12, 17) Edia helalokau heheni karana amo taunimanima na bae diba idia na Keriso ena hahediba taudia korikoridia. (Ioa. 13:34, 35) Una lalokau na dia hebogahisi kava hemamina amo bae hahedinaraia. Iesu ese e herevalaia lalokauna na, sibodia edia ura bae dadarai lalokauna. Ia na eto: “Lalokau herea-daena binai, ta ese ena mauri baine atoa diho, turana daidiai. Egu haheḡani ba badina, unu amo lau turagu ai baola.”​—Ioa. 15:13, 14.

2. (a) Dirava ena hesiai taudia bogaraḡidiai dahaka kara e hahedinaraimu? (b) Ededia henanadai baita haerelaimu?

² Hari ina negai, momo na e dibamu Iehova ena hesiai taudia na e helalokau hehenimu bona lalotamona ai e nohomu. (1 Ioa. 3:10, 11) Ta moalemu badina ena be edia bese, iduhu, gado bona mauri daladia na idauidau, to Keriso ena lalokau e hahedinaraiamu! To, reana baita henanadaimu: ‘Ina negai dahaka  dainai lalokau na mai anina bada? Iehova bona Iesu na mai lalokaudia ida ita e hagoadadamu? Edena dala ai Keriso ena lalokau, “goada e havaraiamu” ḡauna, baita hahedinaraia?’​—1 Kor. 8:1.

3. Ini “nega dikadia” ai taunimanima ediai be dahaka e varamu?

³ Ini “nega dikadia” ai mauri na “hekwarahi ai bona lalo-hisihisi ai e honu honu” dae dainai, momo na e lalometaumu bona mauri e hesikulaiamu. (Sal. 90:10; 2 Tim. 3:1-5) Ripoti haida ese e hahedinaraimu laḡani ta ta ai taunimanima 800,000 mai kahana na sibodia e hematamu​—sekeni 40 lalodiai ta na e masemu. Kristen taudia haida danu e lalometaumu bona sibodia e hematamu.

4. Baibul negadia ai daidia be e urava bae mase?

⁴ Baibul negadia ai, Dirava ena hesiai taudia haida danu hekwakwanai momo e davariva dainai e urava bae mase. Heḡereḡere, Iobu na mai ḡanaḡanana ida e gwa: “Egu mauri na inai henia badamu; baina mauri hanaihanai asina uramu.” (Iobu 7:16; 14:13) Iona na ena asainment ai ḡau haida e idau neganai e lalohisihisi, una dainai eto: “Taunabunai, Iehova e, lau na noimumu, egu mauri avabia oho, badina be baina mase be namo, baina mauri na dika.” (Iona 4:3) Danu, nega ta peroveta tauna Elia na enai e vara ḡauna dainai e ura baine mase. Eto: “Iehova e, egu mauri avabia oho.” (1 Han. 19:4) To, Iehova ese ena hesiai taudia na e lalodia badava bona e urava bae mauri. Una dainai se gwau henidia, a lalokau ai e durudia e urava bae mase lalohadaina bae dadaraia, bona e hagoadadia mai abidadamadia ida Ia bae hesiai henia totona.

5. Dahaka dainai hari ina negai tadikaka bona taihu baita lalokau henidia na namo?

⁵ Hari ina negai, eda tadikaka bona taihu ediai hekwakwanai idauidau e varamu dainai baita hagoadadia na namo. Haida na daḡedaḡe e davarimu bona e kirikirilaidiamu. A Haida be edia ḡaukara gabudiai e gwauraidia dikamu eiava e maumauraidiamu. Eiava e hesikumu badina ovataim e karamu o edia ḡaukara na bada herea. To ma haida na edia ruma bese lalonai hekwakwanai e davarimu, reana adavadia na dia witnes taudia. Unu hekwakwanai bona ma ḡau haida daidiai, kongrigeisen lalonai momo na e hesikumu bona e lalomanokamu. Daidia ese lalomanoka taudia bae durudia bae goada totona?

6. Iehova ese ena hesiai taudia be edena dala ai e hagoadadiamu?

⁶ Iehova na ena hesiai taudia e hamaorodiamu, ena lalokau idia ediai baine mia hanaihanai. Abidadama Israel taudia na Iehova ena hereva e kamonai neganai, una ese e hagoadadia bada. Eto: “Oi davamu na bada lau vairagu ai; na matauraimumu, na ura henimumu. . . . Basio gari, badina be lau na oi ida.” (Isa. 43:4, 5) Oi na Iehova ena hesiai tauna ta dainai, bavabia dae momokani Iehova na oi e lalokau henimu badamu. * Dirava ena Hereva ese tomadiho ḡoevana e tahuamu taudia na ini e gwauhamata henidia toma: “Ia na tuari lohiana, kwalimu e henimu; ia ese baine moalelaimu mai moale-badana ida.”​—Sef. 3:16, 17.

7. Iehova ena lalokau be edena dala ai sina ta ese natu e reḡuamu karana ida heḡereḡere? (Rau 12 ai laulau ba itaia.)

 ⁷ Ena be Iehova ena taunimanima na hahetoho idauidau bae davari, to Ia na e gwauhamata baine hagoadadia. Eto: “Ratana ba topoa, ia ese baine dagiramui, bona tuina ai baine haroho-harohomui. Sinana ese tauna e haloamu merona na heto, lau ese umui taumui baina halodia.” (Isa. 66:12, 13) Una na laulau herevana namona ta​—sina lalokauna ta ese natuna maraḡina e rosia eiava tuina ai e haroho-harohoamu! Una haheitalai amo ta dibamu Iehova na mai lalokauna ida ena hesiai taudia e reḡudiamu. Momokani oi na Iehova ese e lalomu badamu bona e lalokau henimumu.​—Ier. 31:3.

8, 9. Edena dala ai Iesu ena lalokau ese e hagoadadamu?

⁸ Kristen taudia momokanidia na ina badi dainai e dibamu Dirava ese e lalokau henidiamu: Ia ese “tanobada ini e lalokau henia tomamu: Natuna vara-edeana vada eme heni, bae abidadama henia taudia iboudiai basie mase, a mauri hanaihanai bae abia.” (Ioa. 3:16) Danu, Iesu ena lalokau e hahedinaraia dalana na ita daidai ena mauri e heni! Bona una lalokau karana ese e hagoadadamu! Baibul na e gwauhamata ‘nega dikadika eiava lalo-hisihisi’ ese “Keriso ena uraheni amo” basine bibida oho diba.​—Roma 8:35, 38, 39.

⁹ Dika idauidau ta davarimu neganai eda goada e oremu, ta lalohisihisimu, eiava lauma dalanai ta manokamu, to Keriso ena lalokau ese goada e henidamu baita haheauka totona. (2 Korinto 5:14, 15 ba duahi.) Danu, iena lalokau ese goada e henidamu basita hesiku Iehova ena hesiai ḡaukara ikaranai, herevana dikadika e varamu, daḡedaḡe ta davarimu eiava ta lalohisihisimu.

10, 11. E lalomanokamu taudia be daidia ese bae durudia diba? Ba herevalaia.

¹⁰ Iehova na Kristen kongrigeisen amo e hagoadadamu. Ita ta ta ese Iehova ena lalokau baita hahedinaraia totona, eda tadikaka taihu baita lalokau henidia bona lauma dalanai baita durudia bona baita hagoadadia. (1 Ioa. 4:19-21) Aposetolo Paulo ese Kristen taudia e haḡanidia, eto: “Ba hahealo heheni, ba hahegoada heheni, ina harihari o karamu  heḡereḡerena.” (1 Tes. 5:11) Oibe, kongrigeisen taudia iboudiai​—dia elda taudia mo​—ese tadikaka taihu bae hagoadadia karana amo Iehova bona Iesu bae tohotohodia diba.​—Roma 15:1, 2 ba duahi.

¹¹ Kongrigeisen lalonai haida na lalohadai momo karana ese e hagorerediamu, una dainai dokta amo heduru bona muramura maorodia bae abi na namo. (Luka 5:31) Momokani, kongrigeisen ai elda bona ma haida na dibadia idia na dia dokta. To, edia ḡaukara na mai anina bada, idia ese ‘lalo-hesiku taudia bae hagoadadia, manoka taudia bae imudadia,’ bona ‘taunimanima iboudiai bae haheauka henidia.’ (1 Tes. 5:14) Kristen taudia iboudiai ese hebogahisi bona haheauka karana bae hahedinaraia na namo, bona hahegoada herevadia bae gwaurai, unu amo e manoka taudia bae hagoadadia. Oi be o hekwarahimu ma haida ba hagoadadia eiava? Dahaka ḡau ma haida ba kara diba unu amo lalomanoka taudia ba durudia namonamo?

12. Kongrigeisen ta ese taihu ta e durua dalana mani ba herevalaia.

¹² Edena dala ai lalometau taudia na lalokau ai baita hagoadadia? Europe ai, taihu ta na eto: “Nega haida na sibogu baina hemata lalohadaidia na abimu. To egu kongrigeisen taudia ese e durugumu. Tadikaka bona taihu ese hanaihanai e hagoadagumu bona e lalokau henigumu. Ena be haida mo mai dibadia lau na lalometau gorerena ese e abigu, to kongrigeisen taudia ese hanaihanai e durugumu. Tadikaka ta adavana ida na vaitani tamagu bona sinagu. Idia ese e narigu namonamomu, bona dina bona hanuaboi e haerogumu.” Momokani, iboudai eda heduru daladia na idauidau. To mai laloda ibounai ida baita hedurumu neganai, e lalometaumu tauna na be goadamu. *

13. Bema ta uramu haida baita hagoadadia dahaka baita kara diba?

¹³ Baita kamonai namonamo. (Iak. 1:19) Mai eda hebogahisi ida baita kamonai na lalokau karana ta. Henanadai maorodia baita ḡaukaralai, unu amo tadikakada ena hemami baita lalopararalaiamu. Bena unu amo hebogahisi baita hahedinaraiamu bona baita hagoadaiamu. Vairamu toana ese baine hahedinaraia o duruamu tauna na o laloa badamu. Ena hemami e herevalaiamu neganai, ba haheauka bona ena hereva basio utua na namo. Bo kamonai namonamomu neganai, ena hemami korikori bo lalopararalaiamu. Bona una ese be duruamu oi na baine abidadama henimu bona be uramu emu hahegoada herevadia baine kamonai. Unu baita kara tomamu neganai, e manoka taudia na be hagoadadia dibamu.

14. Dahaka dainai maumau karana baita dadaraia na namo?

¹⁴ Maumau karana baita dadaraia. Lalometau taudia baita maumauraidiamu neganai, edia lalometau baita habadaiamu bona lalokau ai baita hagoadadiamu na auka. “E hereva haraḡa-haraḡamu tauna ena hereva na dare e hegwadamu na heto, a aonega tauna malana ese hahemauri e mailaiamu.” (Her. 12:18) Ena be asita uramu e lalometaumu tauna ihahisina herevadia baita gwaurai, to nega  haida asita lalo namonamomu dainai eda hereva ese e hahisidiamu. Lalokau ai haida baita hagoadadia totona, namona na edia hemami baita lalo bona edia hekwakwanai baita lalopararalaia.​—Mat. 7:12.

15. Ededia tulu baita ḡaukaralai diba lalokau ai ma haida baita hagoadadia totona?

¹⁵ Dirava ena Hereva amo haida taudia baita halo. (Roma 15:4, 5 ba duahi.) Buka Helaḡa lalonai tauhalo bona hahegoada hereva namodia na momo. Bona ia na “haheauka bona tauhalo Diravana” ena amo ema. Baibul istadilaina bukadia amo danu hahegoada siridia baita davarimu. Ita ese Watch Tower Publications Index bona Research Guide for Jehovah’s Witnesses baita ḡaukaralai diba. Unu buka amo hahegoada siridia baita davarimu, hekwakwanai idauidau baita haheaukalai totona. Danu, ma haida edia hemami baita lalo bona lalokau ai baita hagoadadia herevadia baita davarimu.

16. Lalometau tauna ihagoadana totona ededia kara rua baita hahedinarai na namo?

¹⁶ Hebogahisi bona manau karana ba hahedinaraia. Ta ihagoadana ai unu kara ruaosi amo siboda eda ura idadaraina lalokauna baita hahedinaraia. Iehova sibona na “Tama hebogahisina, tauhalo Diravana,” bona ena hesiai taudia na e bogadia hisimu. (2 Korinto 1:3-6 ba duahi; Luka 1:78; Roma 15:13) Paulo ese haheitalai namona e hahedinaraia, eto: “Ai na bogaraḡimui ai a manauva, natuna e ubudia hahinena na heto. Unu a ura henimui tomava dainai, lalomai e urava dia Dirava ena sivarai namo mo baiama henimui, a laumamai danu; badina be a lalokau henimuiva.” (1 Tes. 2:7, 8) Dirava ena hebogahisi karana baita hahedinaraiamu neganai, lalometau tauna ena ḡuriḡuri haerena baita heni dibamu.

17. Tadikakada ediai dahaka lalohadai maorona baita abia na mai anina bada?

¹⁷ Namona na ba helalotao tadikakamu na dia ḡoevadae. Tadikakada ediai lalohadai maorona baita abia na namo. Basitato idia na hanaihanai bae kara maoromaoro. Unu bo lalo tomamu neganai bo lalohisihisimu. (Koh. 7:21, 22) Ba helalotao, Iehova na e lalopararamu ena hesiai taudia edia goada na mai hetoana. Bema ena haheitalai baita tohotohoamu, ma haida baita haheauka henidiamu. (Efe. 4:2, 32) Namona na edia ḡaukara na ma haida ida basita haheḡereḡeredia, to bae kara diba ḡaudia daidiai baita hanamodia. Una ese be hagoadadia dibamu. Hahenamo herevadia igwauraina karana ese ma haida bae hagoadadia diba, bona bae durudia edia hesiai ḡaukara helaḡana na bae “heaḡilaia” o bae moalelaia totona.​—⁠Gal. 6:4.

18. Dahaka dainai lalokau ai baita hahegoada heheni?

¹⁸ Iehova ena mamoe iboudiai na Ia bona Iesu, ena mauri e bouboulaia tauna, ediai na mai anidia bada. (Gal. 2:20) Eda tadikaka bona taihu na ta lalokau henidia badamu. Bona ta uramu mai eda lalokau bona hebogahisi ida baita durudia. Baita durudia totona, namona na “maino daladia baita tahu, bona baita hahegoada heheni.” (Roma 14:19) Ta ura dikadikamu nega vaira Paradaisona ai baita noho, una negai basita lalomanokamu! Una negai gorere, tuari, mase, daḡedaḡe, ruma bese ai e varamu hekwakwanaidia, bona lalohisihisi na do bae ore. Laḡani 1,000 lohia negana murinai, taunimanima na do bae ḡoevadae. Hahetoho ginigabena ai bae kwalimu taudia na Iehova Dirava natuna ai baela tanobada ai bona “Dirava natuna edia ura-kwalimu herea-daena bae abia.” (Roma 8:21) Una dainai lalokau ai baita hahegoada bona heduru heheni, unu amo una hahenamo baita abia.