1. Dahaka dainai Iehova e tomadiho heniamu taudia na moale taudia? (Rau 17 ai laulau ba itaia.)

IEHOVA ENA WITNES taudia na moale taudia. Edia hebou badadia, maraḡidia, bona edia moale hebou negadia ai e herevaherevamu bona e kirimu. Dahaka dainai e moalemu? Badina badana na Iehova, “moale Diravana” na mai dibadia, ia e hesiai heniamu, bona e ḡaukara goadamu ia bae tohotohoa. (1 Tim. 1:11, NWT; Sal. 16:11) Dirava na baita moale badi namodia momo e henidamu dainai e uramu baita moale.​—Deu. 12:7; Koh. 3:12, 13.

2, 3. (a) Moale anina be dahaka? (b) Dahaka dainai nega haida asita moalemu?

² Oi danu o moalemu, a? Edena dala ai emu moale ba habadaia diba? Moale anina na ta “lalona ai e mia hanaihanaimu hemami namona, eiava ta ese ḡau namona ta e abiamu eiava e uramu baine abia neganai e mamiamu hemami namona.” Baibul ese e hahedinaraiamu moale korikori anina na bema ta na Iehova ese baine hanamoa. To, ina tanobada ai mauri na asita moalelaiamu. Dahaka dainai?

³ Lalometau e havaramu ḡaudia, heḡereḡere eda lalokau tauna ta e masemu, ta orea amo e atoa sirimu, ta ena headava  e dikamu eiava ena moni ḡaukara amo e hadokoamu neganai asita moalemu. Ruma bese lalonai heiriheiri bona hepapahuahu karadia ese noho namo baine hadikaia diba. Ḡaukara bona sikuli ai bamoda ese e kirikirilaidamu, eda abidadama dainai e hahisidamu, eiava dibura rumana ai e atodamu, bona eda gorere e badamu, eiava se namomu eiava ta lalometaumu neganai asita moalemu. To, Iesu Keriso, “moale bona Siahu Bada Tauna,” ese taunimanima na tauhalo e henidiamu bona e hamoalediamu. (1 Tim. 6:15, NWT; Mat. 11:28-30) Iesu ena Ororo Harorona ai baita moale badidia haida na e herevalai, ena be Satana ena tanobada dikana ai hekwakwanai idauidau ta davarimu.

4, 5. Edena dala ai baita moale hanaihanai?

⁴ Iesu ese e herevalaia ḡauna ginigunana na mai anina bada: “Dirava idibana totona e hitolomu taudia na e moalemu, badina guba Basileia na idia edia.” (Mat. 5:3, Nega Matamata Baibel) Edena dala ai ta hahedinaraiamu una sisiba na ta laloa badamu? Baita hahedinaraia dalana na Dirava ena hereva baita stadilaia, ena haheḡani baita badina, bona moale Diravana itomadiho henina karana baita atoa guna. Unu baita kara tomamu neganai eda moale na be badamu. Eda abidadama, Iehova ese e gwauhamatalai ḡaudiai na be goadamu. Bona ita, tomadiho momokani tauda, ese Baibul ai “helaro namona” e gwauraiamu ḡauna na mai moaleda ida baita nariamu.​—Tito 2:13.

⁵ Baita moale hanaihanai totona, ḡau badana na eda hetura karana Iehova ida baine goada. Aposetolo Paulo na eto: “Nega idoidiai Lohiabada [Iehova] lalonai ba moale. Ma na gwau loumu: ba moale.” (Fili. 4:4) Iehova itura henina karana baita moalelaia totona, ia ese e henidamu aonegana baita tahua na namo. Baibul na ini e gwau tomamu: “Aonega e davariamu tauna na namo, bona lalo-parara e abiamu tauna danu; Ia na mauri auna, e dabaia taomu taudia ediai; e dogoa taomu taudia na moale taudia e gwauraidiamu.”​—⁠Her. 3:13, 18.

6. Eda moale baine mia hanaihanai totona dahaka be mai anina bada?

⁶ To, eda moale baine mia hanaihanai totona, ḡau badana na Dirava ena hereva baita duahia bona baita badinaia. Unu baita kara tomamu ena namo na Iesu ese e herevalaia, eto: “Ina na boma diba bona boma kara, boma namo.” (Ioa. 13:17; Iakobo 1:25 ba duahia.) Una na mai anina bada bema ta uramu lauma dalanai baita goada bona eda moale baine mia hanaihanai. To, ede baita moale toma bema lalometau e havaramu ḡaudia na momo? Iesu ena Ororo Harorona ai e gwauraia ḡauna ma ta mani aita herevalaia.

7. Edena dala ai e taitaimu taudia bae moale diba?

⁷ “Taitai taudia [na do bae moale], badina be taudia bae halodia.” (Mat. 5:4, NWT) Haida na be lalomu, “Edena dalai e taitaimu taudia na bae moale?’ Iesu na dia badi idauidau daidiai e taitaimu taudia e herevalaidia. Badina kara dika taudia danu ‘nega dikadia ai e varamu’ ḡaudia daidiai e taitaimu. (2 Tim. 3:1) To idia na sibodia edia namo mo e lalomu dainai, Iehova ena amo e daudaumu bona asie moalemu. Iesu ese e herevalaidia taudia na lauma ḡaudia e lalo badamu taudia. Idia na e taitaimu badina taunimanima momo na Dirava e dadaraiamu.  Danu, e dibamu idia na dia ḡoḡoevadadae bona tanobada heḡeḡemadai ai e varamu ḡau dikadia daidiai e lalohisihisimu. Unu ḡau daidiai e taitaimu taudia na Iehova ese e haḡerediamu, bona ena hereva amo e hagoadadiamu, e hamoalediamu bona e hamauridiamu.​—Esekiel 5:11; 9:4 ba duahi.

8. Manada tauna baine moale dalana mani a herevalaia.

⁸ “Manada taudia be nanamo [“bae moale,” NWT], badina be idia ese tanobada bae abia.” (Mat. 5:5) Edena dala ai manada tauna na do baine moale? Haida na hereva momokani e dibaia murinai edia mauri e haidau. Guna, idia na hereva auka, heai momo bona daḡedaḡe taudia. A hari, idia na ‘tau matamatana vada e hahedokilaia’ bona “hebogahisi, gado namo, manau, manada, haheauka” karadia e hahedinaraimu. (Kol. 3:9-12) Una dainai, idia na maino, moale bona lalokau taudia. Danu, Baibul na e gwauhamata idia ese “tano bae abia.”​—Sal. 37:8-10, 29.

9. (a) Edena dalai “manada taudia . . . ese tanobada bae abia”? (b) Dahaka dainai “kara maoromaoro hitolona e hitolomu bona ranu-masena e ranu masemu” taudia na bae moale?

⁹ Edena dalai manada taudia ese “tanobada bae abia”? Iesu ena hahediba, lauma amo e horodia taudia, ese tanobada bae abia dalana na hahelaḡa taudia ai baela bona tanobada bae lohiaia. (Apok. 20:6) A guba helarona basie abiamu taudia ahudia na tanobada ai bae noho hanaihanai. Idia na do bae ḡoevadae, maino bona moale ai bae noho. Idia na e moalemu badina “kara maoromaoro hitolona e hitolomu bona ranu-masena e ranu masemu.” (Mat. 5:6) Tanobada matamatana ai Dirava idibana totona e hitolomu taudia bona kara maoromaoro e ura heniamu taudia na do bae moale. (2 Pet. 3:13) Dirava ese kara dikadia iboudiai baine haoredia neganai, kara maoromaoro taudia edia moale na kara dika taudia ese ma basie hadikaia lou.​—Sal. 37:17.

10. Ta baita bogaiahisi anina be dahaka?

¹⁰ “Hebogahisi taudia be nanamo [“bae moale,” NWT], badina be idia danu bae bogadia hisi.” (Mat. 5:7) Heberu gado ai hebogahisi anina na “ma haida edia hemami baita lalo bada bona baita durudia.” Una heḡereḡerena, Grik gado herevana e hahanaia anina na, ta baita bogaia hisi o ena hemami baita lalopararalaia. To, hebogahisi na dia hemami ai mo baita hahedinaraia. Baibul ese e hadibadamu hebogahisi na eda kara amo baita hahedinaraia.

11. Samaria tauna ena parabole amo dahaka ta dibamu?

¹¹ Luka 10:30-37 ba duahi. Iesu ena parabole ai e herevalaia Samaria tauna ena sivarai ese hebogahisi anina korikori e hahedinaraia. Samaria tauna na bero e davari tauna e bogaia hisi dainai, ia iduruna totona kara haida e kara. Iesu ese una parabole e herevalaia murinai, eto: “Aola, oi danu unu ma ba ha kara toma.” Una dainai, reana siboda baita henanadai: ‘Lau be unu na kara tomamu, a? Lau be Samaria tauna heḡereḡerena ma haida na bogadia hisimu, a? Eiava hisihisi e davarimu taudia na bogadia hisimu bona idurudia totona kara haida na karamu, a? Heḡereḡere, lau ese tadikaka taihu burukadia, vabu bona ihareha, tamadia o sinadia dia Witnes taudia, na durudiamu, a? Lau ese “manoka taudia” na hagoadadiamu, a?’​—1 Tes. 5:14; Iak. 1:27.

12. Edena dala ai hebogahisi karana ese moale e havaraiamu?

 ¹² Edena dala ai hebogahisi karana ese moale e havaraiamu? Ma haida baita bogadia hisimu neganai, ḡau ihenina ena moale baita mamiamu. Danu, ta dibamu una ese Iehova e hamoaleamu. (Kara 20:35; Heberu 13:16 ba duahia.) Hebogahisi karana e hahedinaraiamu tauna na King David ese ini e herevalaia toma: “Iehova ese e gimaiamu bona e hamauriamu; tano ai namo e gwauraiamu.” (Sal. 41:1, 2) Ma haida baita bogadia hisimu neganai, Iehova ese ita danu be bogada hisimu bona baita moale hanaihanaimu.​—Iak. 2:13.

13, 14. Dahaka dainai laloda bae ḡoevaḡoeva na mai anina bada?

¹³ Iesu na eto: “Lalodia ḡoḡoeva-ḡoḡoeva taudia be nanamo [“bae moale,” NWT], badina be idia ese Dirava bae itaia.” (Mat. 5:8) Laloda bae ḡoevaḡoeva totona, namona na eda lalohadai bona ura bae ḡoeva. Eda lalohadai bae ḡoeva na namo, unu amo Iehova ese eda tomadiho karana baine abia dae.​—2 Korinto 4:2 ba duahia; 1 Tim. 1:5.

¹⁴ Lalodia ḡoevaḡoeva taudia edia hetura karana Iehova ida na bae moalelaia diba. Ia na eto: “Edia dabua e huri taudia be nanamo.” (Apok. 22:14) Edena dala ai baita gwau dibamu idia na “edia dabua e huri?” E horodia taudia ese “edia dabua e huri” anina na Iehova matanai vada e ḡoeva, bona guba ai bae mauri bona bae moale hanaihanai. Danu, tanobada ai bae noho hutuma bada taudia ese edia hetura karana Dirava ida na bae moalelaia diba. Badina idia ese “edia dabua na Mamoe Natuna rarana ai e huri, e hakurokuro.”​—Apok. 7:9, 13, 14.

15, 16. Edena dala ai lalodia ḡoḡoeva-ḡoḡoeva taudia ese “Dirava bae itaia” diba?

¹⁵ Edena dala ai lalodia ḡoevaḡoeva taudia ese “Dirava bae itaia?” Badina ia na eto: “Asi tauna ta ese baine itagu bona baine mauri.” (Eso. 33:20) Grik gado ai ina hereva “itaia” e hahanaia anina na “laloda matana amo baita itaia, baita lalopararalaia, bona baita dibaia.” ‘Lalodia matadia’ amo Dirava e itaiamu taudia na ia e dibaiamu, bona ena kara namodia e ura henimu. (Efe. 1:18) Iesu ese Dirava ena kara namodia e hahedinarai ḡoevaḡoeva, una dainai ia na eto: “Vada eme itagu tauna ese Tamagu danu vada eme itaia.”​—Ioa. 14:7-9.

¹⁶ Tomadiho momokani taudia na Dirava ese e durudiamu dalana e dibaiamu neganai, idia na vaitani ‘Dirava e itaiamu.’ (Iobu 42:5) Danu ‘lalodia matadia’ amo Dirava ena hahenamo e itamu, unu hahenamo na mai lalodia idoinai ida ia e badinaiamu taudia baine henidia. To, e  horodia taudia bae toreisi lou bona guba maurina bae abia neganai, matadia korikori ai Iehova bae itaia.​—1 Ioa. 3:2.

17. Dahaka dainai herohemaino taudia na e moalemu?

¹⁷ Iesu na ma eto: “Herohemaino taudia be nanamo.” (Mat. 5:9) Maino e karamu taudia na e moalemu. Hahediba tauna Iakob na eto: “Kara maoromaoro anina be maino ai e hadoamu, herohemaino taudia ediai.” (Iak. 3:18) Bema kongrigeisen ai eiava ruma bese lalonai ta ida ta hepapahuahu, Dirava enai heduru baita noi baita herohemaino totona. Danu, Iehova ese ena lauma helaḡa amo be durudamu, kara maorodia baita karamu bena baita moalemu. Iesu ese e hahedinaraia maino baita kara na mai anina bada. Eto: “Taunabunai, emu boubou ḡauna pata helaḡana ai bavatoa negana ai na ba helalo une, tadikakamu enai mai emu kerere, emu boubou ḡauna pata helaḡana vairanai ba rakatania, baola, tadikakamu ida ba herohemaino guna, gabeamo ba lou lao, emu boubou ḡauna pata helaḡana latanai bavatoa.”​—Mat. 5:23, 24.

18, 19. Dahaka dainai Kristen taudia na bae moale diba ena be daḡedaḡe e davarimu?

¹⁸ “Lau daigu ai umui bae uduguiraimui, bae daḡedaḡe henimui, bae gwau dika henimui koikoi, negadia ai na do ba namo.” Iesu ena hereva anina be dahaka? Ia na ma eto: “Ba moale, ba moale hisi dae, badina be guba ai davamui baine bada; badina be e gunalaimui taudia, peroveta taudia, na unu e daḡedaḡe henidia tomava.” (Mat. 5:11, 12) Aposetolo taudia na e dadabadia bona e hamaorodia basie haroro lou neganai, idia na “kaunsil e rakatania mai moaledia ida.” Momokani, e dadabadia hisihisina na asie laloa. To, e moale “badina be Iesu ladana bagunai hisi e ani.”​—⁠Kara 5:41.

¹⁹ Hari ina negai, Iehova ena taunimanima na Iesu ladana dainai e hahisidiamu, eiava hahetoho idauidau e davarimu to mai moaledia ida e haheaukamu. (Iakobo 1:2-4 ba duahi.) Momokani, aposetolo heḡereḡeredia, e hahisidamu neganai asita moalemu. To bema Dirava baita badinaiamu, ia ese goada be henidamu baita haheauka totona. Heḡereḡere, August 1944 ai, gavamani aukana ta henunai siahu taudia ese Henryk Dornik bona kakana na dibura kamepana ta e siaidia lao. To, inaidia na e gwa: “Lalodia na basita haidau dibamu. Ena be ta hahisidiamu to dounu e moalemu.” Tadikaka Dornik na eto: “Ena be egu abidadama dainai na hisihisiva to Iehova iabidadama henina karana ese goada e heniguva dainai na moale. . . . Ḡuriḡuri loulou karana amo Iehova na raka henia kahi bona ia ese e durugu.”

20. Dahaka dainai ta uramu “moale Diravana” baita hesiai henia?

²⁰ “Moale Diravana” ena lalonamo baita abiamu neganai, ena be eda abidadama dainai daḡedaḡe baita davari, ruma bese taudia ese bae inai henida, baita gorere, eiava baita buruka to dounu baita moale diba. (1 Tim. 1:11) Danu eda Dirava, “koikoi asi dibana Diravana,” ena gwauhamata namodia dainai ta moalemu. (Tito 1:2) Iehova ena gwauhamata bae ḡuḡuru neganai, hari ta davarimu hekwakwanaidia iboudiai na basita lalodia taomu. Bainema Paradaisona ai, Iehova ena amo hahenamo momo baita abimu. Bona moale korikorina baita mamia momokanimu. Oibe, ita ese “maino ena harihari-bada” baita moalelaiamu.​—Sal. 37:11.