1, 2. (a) Edena dala ai Iehova ese taunimanima e kara henidia dalana na siahu taudia edia amo idau? (b) Ina atikol ai dahaka baita herevalaimu?

NEGA momo siahu taudia ese ma haida e ‘lohiadiamu,’ bona e biagudia aukamu. (Mat. 20:25; Koh. 8:9) To Iehova na dia idau! Ena be ia na Siahu Idoinai Diravana, to dia ḡoevadae taudia na e lalodia badamu. Ia na e hebogahisimu bona eda namo e lalo badamu. Eda hemami e lalopararalaiamu bona eda dabu ḡaudia e henimu. “Ia vada e helalo une, ita na tano ḡahuna mo,” una dainai se doridamu basita kara diba ḡaudia baita kara totona.​—Sal. 103:13, 14.

² Baibul ai Iehova ese ena hesiai taudia e lalodia bada sivaraidia momo e herevalai. Mani unu sivarai toi aita herevalai. Ginigunana na, Dirava ese mero matamatana Samuel e laloa bada dainai e durua Hahelaḡa Tauna Badana Eli enai hahemaoro herevana ta baine gwauraia totona; iharuana na, Iehova na mai haheaukana ida Mose e durua badina Mose na e mamiava ia na dia heḡereḡere Israel taudia baine gunalaidia; bona ihatoina na, Dirava ese  Israel taudia e lalodia badava dainai Aigupto amo e hakaudia lasi. Unu sivarai baita lalodiamu neganai, Iehova ena kara amo baita diba ḡaudia bona eda mauri ai baita badina diba daladia baita haero.

3. Hanuaboi ta ai Samuel enai be dahaka e vara, bona una ese dahaka henanadai e havaraia? (Rau 23 ai laulau ba itaia.)

³ Samuel na maraḡinai dubu helaḡa ai “Iehova isiaina e lao heniva.” (1 Sam. 3:1) Hanuaboi ta Samuel e mahuta murinai, ḡau idauna ta e vara. * (1 Samuel 3:2-10 ba duahi.) Ia ese gado ta e kamonaia ia ladana e hatoava. Samuel na e laloa una na Hahelaḡa Tauna Badana Eli gadona, una dainai e heau ela dekena bona e gwa: “Lau o ina, o boirigu.” A Eli na eto ia na se boi. Nega ihatoinai una ḡau e vara neganai, Eli e laloparara una na Dirava ese Samuel e boi heniava. Una dainai Samuel e hadibaia ede baine haere toma, bona Samuel na unu e kara toma. Dahaka dainai Iehova na matamanai, ena aneru amo, Samuel enai sibona se hegwaurai hedinarai? Baibul ese una na se gwauraia, to e vara ḡauna ese e hahedinaraia Dirava ese Samuel na e laloa bada. Edena dala ai?

4, 5. (a) Dirava ese Samuel e henia ḡaukarana be ede e laloa toma, bona daba ai be dahaka e kara? (b) Una sivarai amo Iehova enai dahaka ta dibamu?

⁴ Samuel Ginigunana 3:11-18 ba duahi. Iehova ena Taravatu ese natu e haḡanidia, burukadia, edia bese lohiana danu, bae matauraidia. (Eso. 22:28; Lev. 19:32) O laloamu, Samuel be daba ai, Eli dekena ela bona asi garina ida Dirava ena hahemaoro hereva aukana e hamaorolaia, a? Lasi! Momokani, Baibul na e gwa, Samuel na “e gari e kamonai herevadia Eli baine hamaorolaia.” To, Dirava ese Eli enai e hahedinaraia Ia na Samuel e boi heniava. Una dainai Eli ese Samuel e hamaoroa baine hereva. Eli na eto: “E hamaoromu ḡauna egu ai [basio] hunia.” Una dainai, Samuel na mai hematauraina ida “hereva iboudiai e hamaorolaia.”

⁵ Samuel ena hereva dainai Eli na se daradara. Badina unu bamona herevana ta na “Dirava ena hesiai tauna” ta ese Eli na vada e hamaoroalaia. (1 Sam. 2:27-36) Samuel bona Eli edia sivarai amo Iehova ese taunimanima e lalodia badamu karana bona ena aonega ta dibamu.

6. Dirava ese Samuel e durua dalana amo dahaka ta dibamu?

⁶ Oi be do matamata, a? Bema oibe, Samuel ena sivarai ese e hahedinaraiamu o davarimu hekwakwanaidia bona emu hemami na Iehova ese e lalopararalaiamu. Reana o hemaraimu bona emu ai na auka taunimanima badadia vairadiai Basileia sivaraina ba herevalaia eiava turamu edia amo ba idau. Namona na ba diba Iehova na e uramu baine durumu. Una dainai ḡuriḡuri amo emu lalohekwarahi na Ienai ba herevalai. (Sal. 62:8) Baibul ese e herevalaidia matamata taudia, heḡereḡere Samuel, edia haheitalai ba lalodia. Bona Kristen taudia​—matamata taudia bona burukadia​—ba hereva henidia, badina reana o davarimu hekwakwanaidia na idia ese vada e hanaidia. Oibe, Iehova ese e durudia daladia, na emu ai be herevalaimu, reana unu na asie lalo daladia haida.

7, 8. Edena dala ai Iehova ese Mose e laloa bada?

⁷ Mose laḡanina 80 neganai, Iehova ese ḡaukara badana ta e henia. Mose ese Israel taudia na Aigupto ena iḡui amo baine hamauridia. (Eso. 3:10) Una ḡaukara e henia neganai e hoa, badina laḡani 40 lalodiai Midian ai mamoe ireḡuna ḡaukarana e karaiava.  Mose na eto: “Lau be daika Farao dekena bainala bona Israel taudia Aigupto amo baina hakaudia lasi?” Dirava ese e hagoadaia, eto: “Lau ese baina bamomu.” (Eso. 3:11, 12) Bona e gwauhamata henia, eto: Israel tau-badadia ese ‘bae hakala henia.’ To, Mose na e haere, eto, “Idia na basie kamonai henigu.” (Eso. 3:18; 4:1) Mose na Dirava ese baine durua karana e daradaralaia! To Iehova na e haheauka. Bona Mose ma e hagoadaia. Ia ese Mose na siahu e henia hoa karadia baine kara. Baibul lalonai, ia na taunimanima ginigunana una siahu e abia.​—Eso. 4:2-9, 21.

⁸ To Mose na dounu e hahekorava, e tomava ia na asi hereva dibana. Dirava ese e haere henia, eto: “Lau be udumu ai baina noho, ba gwaurai herevadia baina henimu.” Mose ese Dirava ena Hereva e abia dae, a? Lasi, badina mai manauna ida Dirava e noia idauna ta baine siaia. Una dainai, Iehova na e badu. To, Ia ese Mose ena hemami na e laloa bada, una dainai Aaron e abia hidi Mose ena gwaukau tauna ai bainela.​—Eso. 4:10-16.

9. Edena dala ai Iehova ena haheauka bona hebogahisi karana ese Mose e durua?

⁹ Una sivarai amo Iehova enai dahaka ta dibamu? Ia na Siahu Idoinai Diravana dainai, Mose bema hagaria diba ena hereva baine badinaia haraḡa totona. To, Iehova na e haheauka bona e hebogahisi, bona e manau hesiai tauna e hadibaia baine durua. Una kara ese Mose e durua, a? Oibe! Mose na hegunalai tauna namona ai ela, badina mai manauna ida ma haida e kara henidiava bona e lalodia badava, Iehova ese e kara henia heḡereḡerena.​—Num. 12:3.

10. Iehova ese ma haida e lalodia badamu karana baita tohotohoamu neganai, una ese edena dala ai be durudamu?

¹⁰ Ini sivarai amo ta dibamu ḡaudia be edena dala ai baita badina diba? Oi be headava tauna ta, tama o sina ta, eiava kongrigeisen elda ta, a? Bema oibe, oi na mai emu siahu o dagi. To, mai anina bada ḡauna na Iehova ba tohotohoa bona emu henari henunai e nohomu taudia o kara henidiamu neganai ba lalodia bada, ba bogadia hisi,  bona ba haheauka. (Kol. 3:19-21; 1 Pet. 5:1-3) Ba ḡaukara goada Iehova bona Iesu, ba tohotohodia, una neganai ma haida ese be ura henimumu bona be uramu oi ese ba hagoadadia. (Mat. 11:28, 29) Bona emu haheitalai namona na ma haida ese be tohotohoamu.​—Heb. 13:7.

11, 12. Iehova ese Israel taudia na Aigupto amo e hakaudia lasi neganai, edena dala ai idia na asie gari?

¹¹ Laḡani 1513 B.C.E. ai, Israel taudia ese Aigupto e rakatania neganai, iboudiai na 3 milion mai kahana. Idia na uru idauidau taudia, haida na maraḡidia, burukadia, gorere taudia bona disable. Unu hutuma bada Aigupto amo bae lasi totona, mai ena laloparara bona ma haida edia namo e lalo badamu Hegunalai Tauna ta ese baine gunalaidia na namo. Iehova na Mose ena amo una e karaia. Unu amo, Israel taudia na mai moaledia ida e noholaiava hanuana e rakatania.​—Sal. 78:52, 53.

¹² Iehova be dahaka e kara dainai ena taunimanima na asie gari? Ia ese idia na “tuari taudia edia orea” heḡereḡerena Aigupto amo e hakaudia lasi. (Eso. 13:18, NWT) Edia raka dalana amo Israel taudia na e diba momokani edia Dirava ese e gunalaidiava. Danu, Iehova na idia vairadiai e hedinarai dalana na ‘dina ai ori dubuna amo e hakaudia,’ bona hanuaboi ai “lahi mamana amo.” (Sal. 78:14) Una na vaitani, Iehova na e gwauva: “Basio gari. Lau na umui ida baina hakaumui bona baina gimamui.” Momokani, gabeai una ese Israel taudia na e hagoadadia!

13, 14. (a) Iehova na Israel taudia e lalodia bada dainai dahaka e kara Davara Kakakakana ai? (b) Edena dala ai Iehova ese Aigupto taudia ediai ena siahu e hahedinaraia?

¹³ Esodo 14:19-22 ba duahi. Mani a laloa oi na unuseniai, Farao ena tuari oreadia bona Davara Kakakakana bogaraḡidiai gini bona asi dibamu dahaka ba kara. Bena Dirava ese kara ta e karaia. Ori dubuna na e heabi isi taruha murina kahana ela, unu amo Aigupto taudia e koudia bona dibura ai nonoho. To, emu taruha taudia na diari ai nonoho! Bena Mose o itaia imana e toia roro davara daenai, bona ist kahana amo e maiva lai gubana ese davara e hapararaia. Bena oi, emu ruma bese, emu animal, bona taunimanima iboudiai ida tano kaukauna amo o raka hanai. Haraḡa herea, ḡau ta o lalopararalaia. Davara tanona na dia kopukopu eiava dedidedi, to kaukau bona auka dainai, ba raka hanai na asi hekwarahina. Unu amo, e raka metairametairava taudia danu bae hanai namonamo.

¹4 Esodo 14:23, 26-30 ba duahi. Una e varava lalonai, Farao​—hekokoroku bona kavakava tauna​—na mai baduna ida idia e ḡavadia. Bena, Mose ese imana ma e toia roro lou davara daenai. Una neganai, haba heḡereḡerena e gini ranudia na e moru. Farao bona ena tuari oreana na davara ese e koudia. Ta se roho mauri!​—Eso. 15:8-10.

15. Una sivarai amo Iehova enai dahaka o dibamu?

¹⁵ Ina sivarai amo ta dibamu Iehova na ḡau iboudiai e kara namonamomu Diravana​—una kara ese baine duruda basita gari totona. (1 Kor. 14:33, NWT) Danu, Iehova na mai ena lalokau ida mamoe e regumu tauna heḡereḡerena ena taunimanima na dala idauidau ai e naridia namonamomu. Mai hebogahisina ida e rosidiamu, bona inaidia edia amo e gimadiamu. Ina nega oromana dokona e kahikahimu lalonai, una ese ita na e hagoadadamu.​—Her. 1:33.

16. Iehova ese Israel taudia e hamauridia dalana ta laloa loumu karana ese edena dala ai e durudamu?

¹⁶ Hari ina negai danu, Iehova ese ena taunimanima iboudiai na lauma bona tauani  dalanai e naridiamu. Bona baine vara hisihisi badana e kahirakahiramu lalonai danu dounu baine naridia. (Apok. 7:9, 10) Una dainai, ena be Dirava ena taunimanima na matamata taudia, burukadia, tauanidia kahadia didika eiava disable taudia, to hisihisi badana lalonai basie gari. * To, bae moale! Idia ese Iesu Keriso ena hereva bae laloatao, eto: “Ba gaga isi, badina be ihamaurimui vada baine kahikahi.” (Luka 21:28) Idia na bae diba momokani Gog​—bese idauidau edia siahu ese idaunegai Farao ena siahu e hereaia​—ese baine tuari henidia neganai, Dirava ese baine gimadia diba. (Ese. 38:2, 14-16) Dahaka dainai Dirava ena taunimanima na basie gari? Badina mai dibadia Iehova ena kara na se idaumu. Ia ese ma baine hamomokania idia na e lalodia badamu bona Ihamauridia Tauna.​—Isa. 26:3, 20.

17. (a) Baibul ai Iehova ese ena taunimanima e naridia sivaraidia ese edena dala ai baine duruda diba? (b) Stadi gabena ai dahaka baita herevalaimu?

¹⁷ Ina atikol ai, tame herevalai sivaraidia haida ese e hahedinaraiamu Iehova na ena taunimanima e bogadiahisimu, e lalodia badamu, e reḡudiamu, e hakaudiamu, bona e hamauridiamu. Unu sivarai ba haerodia neganai, Iehova ena kara namodia ma haida ba lalodia. Unu bo kara tomamu neganai unu kara namodia na daramu bona kudoumu ai bo lalodia badamu, bona emu lalokau bona abidadama Dirava enai na be hagoadaiamu. Stadi gabena ai, ma haida ilalodia bada karana ai Iehova baita tohotohoa diba daladia baita herevalaimu. Ita ese ruma bese, Kristen kongrigeisen, bona haroro ḡaukara ai una kara baita hahedinaraia daladia baita herevalaimu.