1-2. (a) Dahaka dainai taunimanima ediai Aramagedono na sivarai namona? (b) Ina atikol ai ededia henanadai baita herevalaimu?

TAUNIMANIMA haida na e laloamu tanobada na nuclear tuarina ta ese be hadikaiamu. Baibul na dia unu e gwau tomamu. To Baibul ese e hadibadamu kahirakahira tuari ta be varamu bona namo be havaraiamu. Una tuari na e gwauraiamu Aramagedono, bona Baibul ese e herevalaia dalana dainai ita na e hamoaledamu. (Apok. 1:3) Aramagedono tuarina ese taunimanima na be hamauridiamu! Edena dalai?

² Baibul ese e hahedinaraiamu una tuari ese taunimanima be hamauridiamu badina gavamani edia lohia siahuna na be haoreamu. Bona kara dika taudia be haorediamu to kara maoromaoro taudia be hamauridiamu. Danu, tanobada e hadikaiamu taudia na be haorediamu. (Apok. 11:18) Unu hereva momokanidia baita lalopararalai totona, mani ini henanadai hani aita haerodia: Aramagedono anina be dahaka? Dahaka bae vara guna gabeai Aramagedono baine kau? Edena dala ai ita na Aramagedono amo bae roho mauri taudia bogaraḡidiai baita noho? Aramagedono e kahirakahiramu lalonai, edena dala ai ita na dounu Iehova baita badinaia?

3. (a) Ina hereva “Aramagedono” anina be dahaka? (b) Apokalupo 16:14, 16 heḡereḡerena, dahaka dainai Aramagedono na dia gabu korikorina ta?

³ Apokalupo 16:14, 16 ba duahi. Baibul ai “Aramagedono” na nega tamona mo e herevalaia, bona ia na Heberu gado herevana ta anina na “Megido Ororona.” (Apok. 16:16) Guna Isarel ai, Megido na hanua ta. (Ios. 17:11) Aramagedono na dia gabu korikorina ta. Una na baine vara tuarina e herevalaiamu, “tanobada idoinai hanua hanua pavapavadia” bae hebou bona Iehova bae tuari henia. (Apok. 16:14) To, ina atikol ai ina hereva “Aramagedono” na tanobada idoinai hanua hanua pavapavadia bae hebou murinai baine vara tuarina be herevalaiamu. Ede ta diba tomamu Aramagedono na laulau dalanai ia na  gabu ta e herevalaiamu? Ginigunana na, Megido na dia ororo korikorina ta e herevalaiamu. Iharuana na, Megido na gabu maraḡina dainai dia heḡereḡere “tanobada idoinai hanua hanua pavapavadia” na unuseniai edia tuari taudia ida bae hegogo bona edia tuari kohudia bae habou. Ihatoina na, ina atikol ai baita itaiamu, tanobada “pavapavadia” ese tanobada heḡeḡemadai ai Dirava ena taunimanima bae tuari henidia neganai, Aramagedono tuarina baine kau.

4. Dahaka dainai Iehova ese ena tuari badana na e gwauraia Megido?

⁴ Dahaka dainai Iehova ese ena tuari badana na e gwauraia Megido? Baibul negadiai, tuari momo na Megido bona Iesrele Kourana badinai e karava. Nega haida Iehova na ena taunimanima e durudiava tuari lalonai bae kwalimu. Haheitalai ta na, “Megido ranu badibadidiai,” Dirava ese Israel taudia edia Hahemaoro tauna Barak e durua bena ia ese Kanaan edia tuari oreana e gunalaia tauna Sisera, e hadarerea. Barak bona peroveta hahinena Debora na Iehova e tenkiu henia badina idia e durudia tuari ai e kwalimu. Idia na ane e abi eto: “Hisiu na guba amo e tuari, . . . Sisera e tuari henia. Kison sinavaina ese e arudia lao.”​—Hah. 5:19-21.

5. Edena dalai Aramagedono tuarina na idau Barak ese e tuarilaia tuarina amo?

⁵ Barak bona Debora edia ane dokonai ini e gwau toma: “Iehova e, inaimu idoinai unu bae mase toma! A e ura henimumu taudia na Dina heḡereḡerena bae tata dae roha.” (Hah. 5:31) Aramagedono ai, Dirava ese inaina na unu baine haoredia toma a Dirava e lalokau heniamu taudia na do baine hamauridia. To unu tuari ruaosi na mai edia idau. Aramagedono tuarina ai, Dirava ena taunimanima na basie tuarimu. Tuari kohudia danu basie dogotaomu. Idia na Iehova bona iena guba tuari oreana ediai bae heabidadama bena goada bae davari.​—Isa. 30:15; Apok. 19:11-15.

6. Edena dalai Dirava ese Aramagedono ai ia inaina do baine haoredia?

⁶ Edena dalai Dirava ese Aramagedono ai ia inaina do baine haoredia? Ia ese dala idauidau baine ḡaukaralai. Heḡereḡere, ia ese tano laga, aisi mai meduna ida, bona kevaru baine ḡaukaralai diba. (Iobu 38:22, 23; Esek. 38:19-22) Ia ese inaina na baine hadaradaradia bena sibodia bae hetuari heheni. (2 Sis. 20:17, 22, 23) Bona ia ese ena aneru baine ḡaukaralaidia kara dika taudia baine haoredia totona. (Isa. 37:36) Herevana Dirava na dahaka baine ḡaukaralai, to ta dibamu ia na do baine kwalimu. Inaina iboudiai na baine haoredia. Bona kara maoromaoro taudia iboudiai na baine hamauridia.​—Her. 3:25, 26.

7-8. (a) Tesalonika Ginigunana 5:1-6 heḡereḡerena, tanobada ena hegunalai taudia be edena hereva be gwauraiamu? (b) Dahaka dainai una na koikoi herevana dika hereana?

⁷ “Lohiabada [‘Iehova,’ NWT] ena dina” do se kau ai, “maino” bona noho “namo” herevana bae gwauraia guna. (1 Tesalonika 5:1-6 ba duahi.) 1 Tesalonika 5:2 lalonai “Lohiabada ‘Iehova’ ena dina” na “hisihisi badana” e herevalaiamu. (Apok. 7:14) Hisihisi badana baine hematama negana be ede baita dibaia tomamu? Baibul na e gwaumu tanobada pavapavadia ese “maino” bona noho “namo” be gwauraiamu. Una na toa ta, be hahedinaraiamu hisihisi badana na be matamamu.

⁸ Una toa na e perovetalaia herevana “maino” bona noho “namo” herevana. Dahaka dainai tanobada ena hegunalai taudia ese una hereva bae gwauraia? Tomadiho igunalaina taudia be idia ida be ḡaukara heboumu, a? Reana. To, una “maino” bona  noho “namo” herevana na lauma dikadia edia koikoi herevana ta. Una na koikoi herevana dika hereana badina taunimanima be koidiamu bena be laloamu idia na e noho namonamomu, to lasi, una neganai hisihisi badana be varamu, bona una na nega ta ai se vara ḡauna. Oibe, “hebuatari ese baine lasidia tao, hekamonai ese rogorogo hahinena e lasia taomu na heto.” To Iehova e badinaiamu taudia ediai be dahaka be varamu? Reana matamanai idia na be hoamu, to una dina totona idia na vada heḡaeḡae.

9. Dirava ese Satana ena tanobada be nega tamona ibounai be haoreamu, a?

⁹ Iehova ese Satana ena tanobada na dia ibounai nega tamona be haoreamu, Noa ena negai e kara heḡereḡerena. Ia ese kaha rua ai be karaiamu. Ginigunana, Babulono Badana, tomadiho koikoi iboudiai e laulaulaia ḡauna be haorea gunamu. Bena, Aramagedono tuarina ai, ia ese Satana ena tanobada kahana orena; una na politikol, tuari taudia, bona bisnes oreadia be haorediamu. Mani unu kaha rua anidia aita herevalai.

10. Apokalupo 17:1, 6 bona 18:24 heḡereḡeredia, dahaka dainai Iehova ese Babulono Badana baine haorea?

¹⁰ “Ariara hahinena badana . . . ihahemaoro-henina.” (Apokalupo 17:1, 6; 18:24 ba duahi.) Babulono Badana ese momo e hakaudia kereremu dainai idia ese Dirava ladana na asie matauraiamu. Ena hahediba koikoidia amo Dirava na e ḡoreamu. Ia ese Iehova na se abidadama heniamu to ariara hahinena heḡereḡerena, tanobada gavamanidia ida e ḡaukara heboumu. Ena siahu dainai ia e badinaiamu taudia na e hametaudiamu. Bona taunimanima momo e hamasediamu, Dirava ena hesiai taudia danu. (Apok. 19:2) Edena dalai Iehova ese Babulono Badana baine haorea?

11. “Daḡedaḡe animal kakakakana” be dahaka, bona Dirava ese edena dalai be ḡaukaralaiamu Babulono Badana be haoreamu?

¹¹ Iehova ese “daḡedaḡe animal kakakakana ta . . . doana na gwauta” amo “ariara hahinena badana” baine haorea. Una daḡedaḡe animal na United Nations oreana e laulaulaiamu. Doa gwauta ese hari ina negai politikol oreadia e laulaulaidiamu, idia ese una orea e  duruamu. Dirava ena nega korikori ai, politikol oreadia ese Babulono Badana bae hadikaia. Idia ese “ena ḡau iboudiai bae koki bona kopina kavakava bae rakatania” anina na ena kohu iboudiai bae henao bona ena dika ibounai bae hahedinaraia. (Apok. 17:3, 16, NWT) Una na be vara haraḡamu​—dina tamona ai be varamu ḡauna na heto​—bona Babulono Badana e badinaiamu taudia na be hoamu. Idia ese iena hereva be laloa loumu, ia na eto: “Lau na pavapava na heto na helaimu, lau na dia vabu, Tai badina egu ai basine kau.”​—Apok. 18:7, 8.

12. Tanobada besedia be dahaka basie karamu, bona dahaka dainai?

¹² Dirava ena taunimanima na unu tanobada besedia ese basie haorediamu. Idia na Iehova ena taunimanima bona iena haheḡani e badinaia Babulono Badana amo e raka siri. (Apos. 15:16, 17; Apok. 18:4) Idia na e ḡaukara goada ma haida e durudia bena idia danu Babulono Badana amo e raka siri. Una dainai Iehova ena taunimanima na ia ida basie “hisihisi hebou.” To edia abidadama na dounu be tohoamu.

13. (a) Gog be daika? (b) Esekiel 38:2, 8, 9 heḡereḡerena, dahaka ese Gog baine doria Dirava ena taunimanima baine tuari henidia?

¹³ Gog do baine tuari. (Esekiel 38:2, 8, 9 ba duahi.) Iehova ese tomadiho koikoi iboudiai baine haoredia murinai, Iehova ena taunimanima sibodia mo tanobada ai bae noho. Una neganai, Satana na be badu dikadikamu. Ena badu be hahedinaraiamu dalana na ia ese demoni “edia hereva mirodia” be ḡaukaralaimu. Bena unu hereva koikoidia daidiai tanobada besedia na be hegiromu Iehova ena taunimanima be tuari henidiamu. (Apok. 6:13, 16) Una tanobada besedia na: “Gog, Magog tanona tauna.” Idia ese Iehova ena taunimanima bae tuari henidia neganai, Aramagedono tuarina vada baine matama.​—⁠Apok. 16:16.

14. Gog ese be lalopararalaiamu ḡauna be dahaka?

¹⁴ Gog na iena goada ai mo be tabekaumu. (2 Sis. 32:8) To ita be eda Dirava Iehova enai baita tabekaumu, tanobada taudia na be laloamu una na kavakava karana. Dahaka dainai unu be lalo tomamu?  Badina Babulono Badana, guna ena siahu na bada, to “daḡedaḡe animal” mai “doana gwauta” ese e haorea, una dainai Iehova ena taunimanima danu baine haoredia diba! (Apok. 17:16) Gog na be laloamu iena kwalimu na haraḡa. “Dagadaga ese tano e ḡovaia ahumu na heto,” ia ese Iehova ena taunimanima be tuari henidiamu. (Esek. 38:16) Davara Kakakakana ai Farao enai e vara heḡereḡerena, Gog na be lalopararamu ia na asi ena heau mauri gabuna ta badina ia na Iehova e tuari heniamu.​—Eso. 14:1-4; Esek. 38:3, 4, 18, 21-23.

15. Keriso be ede be kwalimu tomamu?

¹⁵ Keriso bona ena guba oreana ese Dirava ena taunimanima be gimadiamu bona tanobada besedia mai edia tuari oreadia ida be hamasediamu. (Apok. 19:11, 14, 15) To Iehova inaina badana Satana, tanobada besedia e koidia bena Dirava ena taunimanima e tuari henidia tauna, enai be dahaka be varamu? Ia bona ena demoni na Iesu ese guri dobu masemasena ai baine atodia, laḡani daha ta iḡui ai bae noho.​—Apok. 20:1-3.

16. (a) Edena dalai baita hahedinaraia ita na mai dibada Dirava? (b) Aramagedono ai Iehova e dibaia taudia ediai be dahaka be varamu?

¹⁶ Ena be hereva momokani ai ta noho daudau, to Aramagedono amo baita roho mauri totona, namona na baita hahedinaraia Dirava na ta dibaia bona “Lohiabada Iesu ena sivarai namo” ta badinaiamu. (2 Tes. 1:7-9) Baita hahedinaraiamu Dirava na mai dibada bema ia e uramu ḡaudia, ia ese e inai henimu ḡaudia bona iena taravatu baita dibadiamu. Dia una mo to ia baita lalokau henia, baita badinaia bona ia sibona baita tomadiho henia. (1 Ioa. 2:3-5; 5:3) Unu baita kara tomamu neganai, ‘Dirava ese be dibadamu’ bona Aramagedono amo be hamauridamu. (1 Kor. 8:3) Dahaka dainai? Badina ‘Dirava ese be dibadamu’ anina na iena lalonamo baita abiamu.

17. “Lohiabada Iesu ena sivarai namo” baita badinaia anina be dahaka?

¹⁷ “Lohiabada Iesu ena sivarai namo” na ia ese e hahedibalai hereva momokanidia iboudiai, unu na Baibul ai baita duahimu.  Bona ḡau badana na eda mauri lalonai baita badina. Anina na Basileia ḡaukaradia baita ato guna, Dirava ena kara maoromaoro taravatudia baita badina, bona Dirava ena Basileia baita harorolaia. (Mat. 6:33; 24:14) Danu Keriso tadikakana edia ḡaukara lalodiai baita durudia.​—Mat. 25:31-40.

18. Edena dalai Keriso tadikakana, e horodia taudia ese mamoe idaudia be kara namo henidiamu?

¹⁸ Kahirakahira Dirava ese e horodia taudia na idia e durudia taudia, “mamoe idaudia” be kara namo henidiamu. (Ioa. 10:16) Edena dalai? Aramagedono tuarina do se hematama neganai, 144,000 iboudiai na vada be daemu guba bena basine mase diba maurina be abiamu. Bena guba oreana ida be ḡaukara heboumu Gog be haoreamu bona Iehova ena taunimanima, “hutuma bada-herea” be gimadiamu. (Apok. 2:26, 27; 7:9, 10) Hutuma bada herea na be moalemu, badina Iehova ese e horodia taudia do tanobada ai na idia ese e durudiava.

19-20. Herevana hekwakwanai idauidau ta davarimu, to Aramagedono e kahirakahiramu lalonai edena dala ai ita na dounu Iehova baita badinaia?

¹⁹ Hari nega aukadia lalodia Iehova ena taunimanima na hahetoho momo e haheaukalaimu. Ena be unu e varamu, to baita moale diba. (Iak. 1:2-4) Ita baine duruda ḡauna ta na kudouda idoinai ida baita ḡuriḡuri. (Luka 21:36) Dina ta ta ai Dirava ena Hereva bona eda nega e perovetalaia herevadia danu baita stadilai bona baita lalodia dobu. (Sal. 77:12) Unu baita karamu bona eda haroro ḡaukara baita goadalaiamu neganai, eda abidadama bona helaro na be goadamu!

²⁰ Oi na bo moalemu badina vaira nega ai Babulono Badana na de ore bona Aramagedono tuarina na vada lasi! To mai anina bada ḡauna na, taunimanima iboudiai ese Dirava ladana be matauraiamu bona be hamomokaniamu ia baine lohia na maoro! (Esek. 38:23) Momokani, Dirava e dibaia taudia, Natuna e badinaia taudia, bona e haheauka ela bona dokona taudia ediai Aramagedono na sivarai namona.​—⁠Mat. 24:13.