1. Laḡani 95 C.E. lalonai aposetolo Ioane ena mauri be ede bamona?

LAḠANI 95 C.E. lalonai, aposetolo Ioane na nega aukana lalonai e nohova. Ia na buruka, Patamo motumotuna ai e nohova, bona reana una negai aposetolo na ia mo. (Apok. 1:9) Ia na e diba daḡedaḡe taudia ese kongrigeisin e hakaudia kerereva bona e hapararadiava. Una e varava dainai Kristen taudia momokanidia na hereva momokani bae rakatania diba.​—Iuda 4; Apok. 2:15, 20; 3:1,17.

2. Apokalupo 7:9-14 heḡereḡerena, Ioane be edena matahanai e itaia? (Rau 1 laulauna ba itaia.)

² Una nega aukana lalonai Ioane ese matahanai idau hereana ta e itaia. Una matahanai lalonai aneru na e hamaorodia hisihisi badana ena hahedika lai badadia bae dogodia tao ela bona Dirava ena hesiai taudia oreana bagudiai toa itorena ḡaukarana baine ore. (Apok. 7:1-3) Una orea na 144,000 taudia, idia na Iesu ida gubai bae lohia. (Luka 12:32; Apok. 7:4) Bena Ioane ese orea ma ta e gwauraia, idia na hutuma bada herea dainai, e gwa, “Na roho lao”​—reana una hereva e gwauraia badina ia na e hoa. Ioane be dahaka e ita? “Hutuma bada-herea na itadia, asi iduahidia, bese idau-idau bona iduhu idau-idau bona gado idau-idau amo, ibouboudiai na terono vairanai bona Mamoe Natuna vairanai e gini.” (Apokalupo 7:9-14 ba duahi.) Mani a laloa, reana Ioane na e moale dikadika badina e diba, nega vairai taunimanima momo ese Dirava na dala maorona ai bae tomadiho henia!

3. (a) Dahaka dainai Ioane ese e itaia matahanaina ese iseda abidadama baine hagoadaia? (b) Ina atikol ai dahaka baita dibamu?

³ Una matahanai ese Ioane ena abidadama na e hagoadaia. Iseda abidadama danu be hagoadaia badamu badina ita na una matahanai ena ḡuḡuru negana lalonai ta nohomu!  Hari ina negai, taunimanima milioni momo na Iehova e tomadiho heniamu bona e uramu hisihisi badana amo bae roho mauri bena tanobada paradaisona ai bae noho. Ina atikol lalonai, Iehova ese laḡani 80 mai kahana gunanai ena taunimanima ediai hutuma bada herea taudia e herevalaidia dalana baita dibaiamu. Bena una hutuma bada herea na kaha rua ai baita dibadiamu: (1) Hutuma bada na hutuma herea bona (2) idia na gabu idauidau amo. Unu kaha ese una helaro e uramu bae abia taudia iboudiai edia abidadama be hagoadaiamu.

4. Kristendom ese edena Baibul hahedibana asie lalopararalaia, to edena dalai Baibul Stiuden taudia na idau?

⁴ Kristendom na Baibul ese e hahedibalaiamu hereva momokanina, nega ta kamonai taudia na tanobada ai bae mauri hanaihanai, na asie hahedibalaiamu. (2 Kor. 4:3, 4) Hari ina negai, Kristendom tomadihodia momo edia hahediba na kara namo taudia iboudiai bae mase neganai, guba baela. To laḡani 1879 amo Watch Tower e halasiava Baibul Stiuden orea maraḡina ediai una na idau. Idia na e laloparara, Dirava ese tanobada ai Paradaiso baine havaraia lou bona kamonai taudia milion momo na ina tanobada ai bae noho​—dia guba ai. To, idia na nega daudau lalonai e urava bae diba namonamo unu kamonai taudia be daidia.​—⁠Mat. 6:10.

5. Baibul Stiuden taudia ese 144,000 be ede e lalopararalaidia toma?

⁵ Baibul Stiuden taudia na Baibul amo e laloparara danu taunimanima haida na “tanobada amo e hoidia” Iesu ida gubai bae lohia. (Apok. 14:3) Idia na 144,000 taudia, edia mauri e gwauhamatalaia Kristen taudia bona tanobada ai mai edia abidadama ida Dirava e hesiai henia. To Baibul Stiuden ese hutuma bada herea taudia be ede e lalodia toma?

6. Baibul Stiuden ese hutuma bada herea be ede e lalodia toma?

⁶ Ioane ese ena matahanai lalonai, orea ta e itaia, “terono vairanai bona Mamoe Natuna vairanai e gini.” (Apok. 7:9) Unu hereva daidiai Baibul Stiuden taudia na e laloa hutuma bada herea taudia na 144,000 taudia heḡereḡeredia, guba ai bae noho. Bema 144,000 bona hutuma bada herea taudia na guba ai bae noho, idia edia idau be dahaka? Baibul Stiuden na e laloava hutuma bada herea taudia na tanobada ai Dirava asie badinaia momokaniva Kristen taudia. Ena be edia mauri lalodiai kara kereredia asie karava, to idia haida na dounu Kristendom dubudia e laova. Baibul Stiuden na e laloava unu Kristen taudia edia lalokau Dirava enai na dia bada dainai idia na dia heḡereḡere Iesu ida bae lohia. Una ese e hahedinaraia idia na guba ai dia terono latadiai bae helai to terono vairanai bae gini.

7. Baibul Stiuden na e laloava daidia na Laḡani 1,000 lalonai tanobada ai bae noho, bona abidadama taudia ediai be dahaka baine vara?

⁷ To daidia be tanobada ai bae noho? Baibul Stiuden na e laloava, 144,000 bona hutuma bada herea taudia na guba baela murinai, taunimanima milion momo na tanobada ai mauri bae abia bena Keriso Ena Laḡani 1,000 Lohia Negana hahenamodia bae moalelai. Baibul Stiuden na se laloa unu taunimanima milion momo na Iehova bae hesiai henia guna gabeai Keriso Ena Lohia Negana baine matama. To, e laloava unu taunimanima na Laḡani 1,000 lalonai Iehova bae dibaia. Bena una murinai, Iehova ena taravatu bae badina  taudia na tanobada ai bae mauri hanaihanai, to gwau-edeede taudia na bae ore. Bona e laloava una negai haida na tanobada “lohiadia” ai baela​—idia haida na (Keriso tanobada ai do se vara neganai e mase abidadama taudia)​—idia na Laḡani 1,000 dokonai guba baela.​—Sal. 45:16.

8. Baibul Stiuden na e lalova ededia orea toi na Dirava ena ura heḡereḡerena hahenamo bae abi?

⁸ Una dainai, Baibul Stiuden na e laloava orea na toi: (1) 144,000, idia na Iesu ida guba ai bae lohia; (2) hutuma bada herea, idia edia lalokau Dirava enai na dia bada dainai guba ai Iesu ena terono vairanai bae gini bona (3) taunimanima milioni momo na tanobada ai, Keriso Ena Laḡani 1,000 Lohia Negana lalonai Iehova bae dibaia. * To gabeai, Iehova ese ena nega korikori ai e durudia unu hereva anidia e lalopararalai.​—Her. 4:18.

9. (a) Edena dalai tanobada ai hutuma bada herea na “terono vairanai bona Mamoe Natuna vairanai” bae gini? (b) Dahaka dainai laloparara matamatana Apokalupo 7:9 ai na maoro?

⁹ Laḡani 1935 ai, Iehova ena Witnes na Ioane ese ena matahanai lalonai e itaia hutuma bada herea anina e lalopararalaia namonamo. Idia na e laloparara hutuma bada herea na “terono vairanai bona Mamoe Natuna vairanai” bae gini, anina na dia guba ai unu bae kara toma. Badina una na laulau herevana mo. Ena be hutuma bada herea na tanobadai bae noho, to idia na “terono vairanai” bae gini diba, anina na bae abia dae Iehova na ḡau iboudiai Lohiana bona edia kamonai karana amo bae hahedinaraia Iena Lohia dalana na e matauraiamu. (Isa. 66:1) Idia na “Mamoe Natuna vairanai” bae gini, anina na Iesu ena mauri idavalaina boubouna bae abidadama henia. Una heḡereḡerena, Mataio 25:31, 32 ese e hahedinaraiamu Iesu na terono hereadaena latanai baine helai neganai, “bese iboudiai”​—kara dika taudia danu​—na “ia vairanai bae haheboudia.” Ta lalopararamu, unu bese iboudiai na dia guba ai to tanobada ai. Una laloparara matamatana na maoro. E hahedinaraiamu dahaka dainai Baibul na se gwa hutuma bada herea na bae dae guba. To orea tamona mo e gwauhamata henia guba ai bae mauri hanaihanai​—una na 144,000 taudia, idia na Iesu ida “king . . . ai baela bona tanobada bae lohiaia.”​—Apok. 5:10, NWT.

10. Laḡani 1,000 do se matama neganai, dahaka dainai hutuma bada herea ese Iehova bae dibaia na ḡau badana?

¹⁰ Laḡani 1935 amo, Iehova ena Witnes taudia na e laloparara Ioane ena matahanai ai e itadia hutuma bada herea na abidadama Kristen taudia bona edia helaro na tanobada ai bae mauri hanaihanai. Hutuma bada herea na hisihisi badana amo bae roho mauri totona, namona na Laḡani 1,000 do se matama ai, Iehova bae dibaia guna. Idia na edia abidadama ai bae gini goada na namo, una dala amo ‘unu dika amo bae roho mauri’ bena Keriso Ena Laḡani 1,000 Lohia Negana baine matama.​—Luka 21:34-36.

11. Dahaka dainai Baibul Stiuden taudia haida na e laloa Laḡani 1,000 baine ore murinai haida na guba baela?

¹¹ To tanobada ai haheitalai namona e hahedinaraiava taudia na Laḡani 1,000 baine ore murinai baela guba, una lalohadai be ede e laloa tomava? February 15, 1913 Watchtower ese una lalohadai e gwauraia. Readia haida na e lalo, ‘Dahaka dainai  idaunegai abidadama taudia na bae toreisi lou bena tanobada ai mauri bae abia, to se goada momokani Kristen taudia na guba ai bae mauri?’ To, una lalohadai na ini lalohadai kereredia rua amo e vara: (1) hutuma bada herea na guba baela bona (2) hutuma bada herea na edia abidadama do se goada momokani Kristen taudia.

12-13. Horoa taudia bona hutuma bada herea ese davadia be ede e laloa tomamu?

¹² To, tame herevalaia bamona, laḡani 1935 amo, Iehova ena Witnes taudia na e laloparara Aramagedono amo bae roho mauri taudia na Ioane ena matahanai ai e itadia hutuma bada herea taudia. Idia na ina tanobada ai “hisihisi badana amo” baema, bona bae lolo badabada, baeto “Hahemauri na iseda Dirava, terono ai e helaimu Diravana, bona Mamoe Natuna, ediai.” (Apok. 7:10, 14) Dia una mo, to Baibul ena hahediba na bae toreisi lou bena guba maurina bae abia taudia na “ḡau namo-hereana” bae abia, una ese idaunegai abidadama taudia davadia e hereaia. (Heb. 11:40) Una dainai tadikaka ese taunimanima e hagoadadia Iehova bae hesiai henia bona edia helaro na mauri hanaihanai tanobada ai bae abia.

¹³ Hutuma bada herea na edia helaro dainai e moalemu. Idia na e laloparara Iehova ese baine abia hidi ia e tomadiho heniamu taudia be edeseniai ia bae hesiai henia, guba ai o tanobada ai. Horoa taudia bona hutuma bada herea na mai dibadia, idia na Iehova ena harihari bada, Iesu Keriso ena mauri idavalaina boubouna dainai, davadia do bae abi.​—Roma 3:24.

14. Laḡani 1935 murinai, dahaka dainai haida na hutuma bada herea e perovetalaia herevana baine ḡuḡuru na e daradaralaiava?

¹⁴ Laḡani 1935 ai, Iehova ena taunimanima lalodia e parara murinai, haida na dounu e daradarava tanobada helarona bae abia taudia edia namba be ede baine bada toma. Heḡereḡere, Ronald Parkin laḡanina na 12 neganai, hutuma bada herea anina maorona e hedinarai. Ia na eto: “Una nega ai, tanobada heḡeḡemadai pablisa nambana na 56,000 bamona, bona idia momo na horoa taudia. Una dainai na laloava hutuma bada herea edia namba na dia bada.”

15. Edena dalai hutuma bada herea ihaboudia ḡaukarana na e bada?

¹⁵ To, laḡani haida muridiai, misinari na e siaidia tano momo ela, bona Iehova ena Witnes taudia edia namba na e bada e laova. Bena, laḡani 1968 lalonai, ina buka The Truth That Leads to Eternal Life a ḡaukaralaia bena taunimanima ida  Baibul a stadilaia. Una buka ese Baibul ena hereva momokani na dala haraḡanai e herevalaia dainai manau taudia momo e veridia, dia guna bamona. Laḡani foa lalodiai, hahediba taudia matamatadia 500,000 mai kahana na e bapatiso. Latin America bona tano ma haida ai, Katolik Dubu ena siahu e ore e laova bona Eastern Europe bona Africa tanodia haida ai iseda ḡaukara e kehodia lou neganai, taunimanima milion momo na e bapatiso. (Isa. 60:22) Vanega laḡani lalodiai, Iehova ena orea na tulu idauidau e halasi, unu amo taunimanima bae durudia Baibul ena hahediba maorodia bae diba. Asita daradaramu hutuma bada herea​—hari edia namba 8 milion mai kahana​—na vada e haboudia.

16. Hutuma bada herea taudia be ede amo e haboudia?

¹⁶ Ioane na ena matahanai ai e itaia, hutuma bada herea na “bese idau-idau bona iduhu idau-idau bona hanua idau-idau bona gado idau-idau amo” ema. Idaunegai peroveta tauna Sekaria ese unu e perovetalaia toma. Ia na ini e gwau toma: “Unu dinadia ai tatau gwauta, gado idau-idau iboudiai besedia amo, ese Iuda tauna ta ena dabua bae dogoa tao, baeto, ‘Mani oi  ida aitala, badina be ai na vada a kamonai, Dirava na dekedekemui ai.’”​—Sek. 8:23.

17. Bese bona gado iboudiai taudia idurudia totona, Iehova be dahaka vada e kara?

¹⁷ Iehova ena Witnes taudia na e dibamu, gado iboudiai taudia ihaboudia totona, sivarai namona na gado momo ai bae harorolaia na namo. Laḡani 130 mai kahana lalodiai ita ese Baibul stadi pablikeisin vada ta hahanaidia, to hari gado momo ai ita ese gado ihahanaina ḡaukara badana ta karaiamu. Una ese e hahedinaraiamu, hari ina negai Iehova ese hoa dalanai​—⁠bese iboudiai amo hutuma bada herea e haboudiamu. Ta moalemu, badina Baibul bona Baibul pablikeisin na gado momo ai e halasimu, bona tanobada heḡeḡemadai hutuma bada herea na mai lalotamonadia ida Iehova e tomadiho heniamu. Taunimanima na mai dibadia Witnes taudia na haroro ḡaukara e karaia goadagoadamu bona e helalokau hehenimu. Una ese iseda abidadama e hagoadaiamu!​—Mat. 24:14; Ioa. 13:35.

18. (a) Isaia 46:10, 11 heḡereḡerena, dahaka dainai basita daradara Iehova ese hutuma bada herea e perovetalaia herevana na vada e ḡuḡuru? (b) Dahaka dainai tanobada ai bae noho taudia ese una na asie lalohisihisilaiamu?

¹⁸ Badi momo daidiai hutuma bada herea e perovetalaia herevana baita moalelaia! Asita dardaramu badina Iehova ese ina peroveta herevana na dala heredaena ai e haḡuḡurua. (Isaia 46:10, 11 ba duahi.) Hutuma bada herea na Iehova ese e henidia helarona dainai e moalemu. Ena be idia na Dirava ese se horodia bona Iesu ida guba ai basie lohiamu, to una na se lalohisihisilaiamu. Baibul lalonai, Dirava ena lauma helaḡa ese e hakaudiava tatau bona hahine momo edia sivarai ta duahimu; ena be idia na dia 144,000 taudia. Ioane Bapatiso na idia ta. (Mat. 11:11) Ma ta na David. (Apos. 2:34) Idia bona ma haida na bae toreisi lou bona tanobada paradaisona ai bae mauri. Idia iboudiai bona hutuma bada herea na Iehova bona iena lohia siahuna bae badinaia.

19. Edena dalai Ioane ena matahanai e ḡuḡurumu karana ese e hadibadamu ita na nega oromana dokonai ta nohomu?

¹⁹ Ina na nega ginigunana, Dirava ese taunimanima milion momo e haboudia ia bae tomadiho henia helaoreana. Herevana eda helaro na guba ai eiava tanobada ai, namona na taunimanima momo baita durudia idia na “mamoe idaudia” ai baela. (Ioa. 10:16) Kahirakahira, Iehova ese e perovatalaia hisihisi badana amo taunimanima e hahisidiamu gavamanidia bona tomadiho oreadia baine haoredia. Hutuma bada herea taudia ediai una na hahenamo badana​—idia na tanobada ai Iehova bae hesiai henia ela bona hanaihanai!​—Apok. 7:14.