1. Dahaka dainai Iehova baita matauraia na ḡau badana?

ITA ese Iehova baita matauraia * na ḡau badana badina ia na ita e Havarada Tauna. Una dainai, ia na mai ena maoro ita baine hamaoroda dahaka baita kara. (Apok. 4:11) To Iehova baita matauraia badina ta na, iena lohia dalana na hereadae. Histri lalonai siahu taudia momo na edia siahu dainai taunimanima e lohiadiamu. Edia lohia dalana bona Iehova ena lohia dalana baita haheḡereḡerediamu neganai baita itaiamu Iehova na aonega, lalokau, hebogahisi, bona hariharibada Lohia tauna hereadaena.​—Eso. 34:6; Roma 16:27; 1 Ioa. 4:8.

2. Iehova baita matauraia totona Heberu 12:9-11 ese ededia badi haida e herevalaimu?

² Iehova na e uramu ia baita kamonai henia, dia ta gari heniamu dainai to ta lalokau heniamu bona ta dibamu ia na ita Tamada lalokauna. Paulo ese Heberu taudia e tore henidia revarevana lalonai, e hahedinaraia namona na Tamada baita “matauraia” badina eda namo totona e hadibadamu.​—Heberu 12:9-11 ba duahi.

3. (a) Edena dalai baita hahedinaraia Iehova na ta matauraiamu? (b) Ededia henanadai baita haerelaimu?

³ Ita ese Iehova ta matauraiamu dalana ta na ta hekwarahimu ḡau iboudiai lalodiai ia ta kamonai heniamu bona siboda eda laloprara ai asita tabekaumu. (Her. 3:5) Iehova ena kara namodia ta dibamu neganai ita edai na basine aukamu ia baita matauraia totona. Dahaka dainai? Badina unu kara namodia na ia e kara gaudia iboudiai lalodiai e hedinaraimu. (Sal. 145:9) Eda diba Iehova enai be badamu neganai, eda lalokau ienai danu be badamu. Iehova baita lalokau heniamu neganai, ita ese baita kara diba ḡaudia bona basita kara diba ḡaudia baita  lalopararalaimu. Danu, baita hekwarahi Iehova ena lalohadai bona hemami baita diba, unu amo kara namo baita ura heniamu bona kara dika baita inai heniamu. (Sal. 97:10) To, nega haida Iehova ikamonai henina na be aukamu. Dahaka dainai? Bona elda taudia, tama, bona sina na Gavana Nehemia; King David; bona Maria, Iesu sinana edia haheitalai amo dahaka be dibamu? Ina atikol ese unu henanadai be haerelaimu.

4-5. Roma 7:21-23 heḡereḡerena, dahaka dainai Iehova imatauraina na be aukamu?

⁴ Nega haida be aukamu Iehova baita matauraia badina ginigunana na, ita iboudai na kara dika ai ta vara bona dia ḡoevadae. Una dainai nega haida Dirava na basita kamonai heniamu. Adamu bona Heva ese Dirava e gwau-edeede henia bona taravatu huahuana e ania murinai, e laloa idia sibodia ese namo bona dika bae abi hidi. (Gen. 3:22) Adamu bona Heva heḡereḡeredia, hari momo ese Dirava na asie kamonai heniamu bona e laloamu idia na mai edia maoro sibodia ese maoro bona kerere bae abi hidi.

⁵ Ena be Iehova na mai dibada bona ta lalokau heniamu, reana edai na be aukamu Ia baita matauraia totona. Aposetolo Paulo enai unu e vara toma. (Roma 7:21-23 ba duahi.) Paulo heḡereḡerena, ita na ta uramu Iehova vairanai kara maorodia baita kara. To namona na hanaihanai baita ḡaukara goada kara dikadia ikaradia urana baita dadaraia.

6-7. Edena badi iharuana ese e hahedinaraiamu nega haida be aukamu Iehova baita matauraia totona? Haheitalai ta ba gwauraia.

⁶ Nega haida be aukamu Iehova baita matauraia badina iharuana na, eda gabu ena kastom karadia bona eda gabu taudia edia lalohadai. Taunimanina ese e lalomu ḡaudia momo na dia Iehova ena lalohadai heḡereḡerena, una dainai baita hekwarahi edia lalohadai na basita tohotoho. Ina haheitalai aita laloa.

⁷ Gabu haida ai, eregabe taudia na e doridiamu edia mauri lalonai moni momo bae tahu. Taihu ta ladana Mary * enai unu e vara toma. Iehova do se dibaia neganai, ia na sikuli namona ta ai e sikuliva, edia tano ai ma sikuli haida amo una na sikuli namona ta. Mary na ena famli ese e doriava moni ḡaukara namona ta baine abia unu amo moni momo baine abi bona taunimanima ese bae matauraia. Ia danu unu e ura tomava. To ia ese Iehova e dibaia bona e lalokau henia matama neganai, ena abi hidi na e haidaua. Ia na e gwa: “Nega haida na urava dala baina tahu moni momo baina habou, to na diba una ese be kougumu Iehova baina hesiai henia totona. Egu ai ‘lasi’ igwauraina na e aukava badina egu ruma bese ai, tamagu bona sinagu na moni ḡaukara namona e karamu taudia bona lau na sikuli namona ta ai na sikuli. Lau na Iehova na noiava baine durugu, iena hesiai ḡaukara baine hadikaia moni ḡaukarana baina dadaraia.”​—Mat. 6:24.

8. Dahaka baita herevalaimu?

⁸ Matamanai tame herevalaia heḡereḡerena, Iehova baita matauraia na ḡau badana. Iehova ese maduna e henidia taudia heḡereḡere, elda taudia, tama, bona sina ese Dirava ena hahekau dalana bae badinaia na namo, unu amo idia ese haida bae durudia diba. Mani Baibul ai haheitalai haida aita herevalai, unu ese be hadibadamu eda maduna be ede baita hua toma unu amo Iehova baita hamoalea.

9. Nehemia enai be dahaka e vara?

⁹ Iehova ese elda taudia na maduna badana ta e henidia ena taunimanima bae reḡudia. (1 Pet. 5:2) Elda taudia na Nehemia ese Iehova ena taunimanima e kara henidia dalana amo ḡau ta bae dibaia. Nehemia na Iuda ena gavana dainai, iena siahu na bada. (Neh. 1:11; 2:7, 8; 5:14) Mani Nehemia ese e davari hekwakwanaidia haida aita lalo. Ia na e laloparara Iuda taudia ese dubu helaḡa na asie matauraiava, bona Taravatu heḡereḡerena idia ese Levi taudia bae henidia ḡaudia na se heniva. Iuda taudia ese Sabati taravatuna na asie badinaiava, bona tatau haida na Iehova asie tomadiho heniava hahinedia e adavadia. Una nega aukana lalonai Gavana Nehemia ese kara ta baine karaia na namo.​—Neh. 13:4-30.

10. Unu hekwakwanai e vara neganai, Nehemia be dahaka e kara?

¹⁰ Nehemia ese ena siahu na se ḡaukaralaia kerere bona taunimanima na se doridia iena lalohadai bae badinaia totona. To ia na ḡuriḡuri karana amo Iehova ena heduru e tahua bona Iehova ena Taravatu na taunimanima e hadibalaidiava. (Neh. 1:4-10; 13:1-3) Nehemia na taunimanima ida e ḡaukara hebouva bona e durudiava Ierusalem habana bae haginia lou totona.

11. Tesalonika Ginigunana 2:7, 8 heḡereḡerena, elda taudia ese kongrigeisin taudia be ede bae kara henidia toma?

¹¹ Ena be elda taudia ese e davarimu hekwakwanaidia na dia Nehemia ena heḡereḡerena, to dala momo ai Nehemia ena haheitalai bae tohotohoa diba. Heḡereḡere, e ḡaukara goadamu tadikaka bona taihu bae durudia. Bona se lalomu edia maduna dainai idia ese ma haida na e hereadia. To kongrigeisin ai idia ese tadikaka bona taihu na e kara namo henidiamu. (1 Tesalonika 2:7, 8 ba duahi.) Mai manaudia bona lalokaudia ida ma haida e hereva henidiamu. Andrew, laḡani daudau elda maduna e huaia tadikaka na e gwa: “Na diba elda tauna ta na bema hebogahisi bona lalokau karana be hahedinaraiamu, kongrigeisin taudia na be moalemu. Unu kara ese kongrigeisin taudia na be durudiamu elda taudia ida bae ḡaukara hebou namonamo totona.” Laḡani daudau elda maduna e huaia tadikakana ma ta na eto: “Na hekwarahi Filipi 2:3 ena sisiba baina  badinaia bona hanaihanai na lalova haida ese lau na e hereagu. Una ese lau na e durugu haida basina doridia egu hereva bae kamonai.”

12. Dahaka dainai elda taudia bae manau na ḡau badana?

¹² Iehova na manau Diravana dainai elda taudia bae manau na ḡau badana. Ena be Iehova na Siahu Ibounai Lohiabadana, to “e igo dobimu, . . .  e dabumu taudia na kahu gabuna amo e veridia isimu.” (Sal. 18:35; 113:6, 7) Baibul na e gwaumu Iehova ese hekokoroku taudia na e inai henidiamu.​—Her. 16:5.

13. Dahaka dainai elda ta ese ena hereva bona ena hereva dalana nahuadia baine toho na namo?

¹³ Elda tauna ese Iehova baine matauraia dalana ta na, ena hereva bona ena hereva dalana nahuadia baine toho. Bema unu basine kara tomamu ia basine matauraiamu tauna na be hereva auka heniamu. (Iak. 1:26; Gal. 5:14, 15) Andrew, paragraf 11 ai tame herevalaia tadikakana, na eto: “Nega haida tadikaka bona taihu na hemataurai karana se hahedinaraiva neganai, na urava baina hereva auka henidia. To lau ese Baibul ai abidadama taudia edia haheitalai na lalodia dobu, bona una ese e durugu manau karana baina hahedinaraia na ḡau badana.” Elda taudia na Iehova imatauraina karana be hahedinaraiamu bema tadikaka taihu bona elda taudia ma haida be hereva henidiamu neganai lalokau bona kara namo be hahedinaraiamu.​—Kol. 4:6.

14. Iehova ese tama be dahaka maduna e henidia, bona e uramu idia be dahaka bae kara?

¹⁴ Iehova ese tama na ruma bese kwarana ai e halaoa bona ia na e uramu tama ese natu baine hadibaia bona baine matahakani henia. (1 Kor. 11:3; Efe. 6:4) Anina na tama ese ena maduna na dia ena ura dalanai baine ḡaukaralaia. Iehova na ruma bese e Havaraia Tauna dainai, ia na e uramu tama iboudiai ese iena ura dalanai edia ruma bese taudia bae kara henidia. (Efe. 3:14, 15) Tama ese Iehova na be matauraiamu bema ena maduna na Dirava ese e moalelaiamu dalanai be ḡaukaralaiamu. King David ena mauri sivaraina be stadilaiamu neganai ḡau momo be dibamu.

15. Dahaka dainai tama ediai King David na haheitalai namona?

¹⁵ David na Iehova ese maduna e henia dia ena ruma bese mo to Israel besena ibounai danu baine gunalaia totona. David na king dainai, iena siahu na bada. To nega haida, ia ese ena siahu na e ḡaukaralaia kerere, bona kerere badadia haida e kara. (2 Sam. 11:14, 15) To ia ese Iehova ena matahakani na e abia dae unu amo e hahedinaraia Ia na e matauraia. Ḡuriḡuri amo ena hemami na  Iehova e hamaorolaia. Bona e ḡaukara goada Iehova ena sisiba baine badinaia. (Sal. 51:1-4) Danu, ia na e manau badina sisiba namodia na dia tatau edia amo mo to hahine edia amo danu e abi dae. (1 Sam. 19:11, 12; 25:32, 33) David na ena kara kereredia e lalopararalai bona ena mauri ibounai lalonai Iehova ihesiai henina karana na ḡau badana ai e halaoa.

16. David ena haheitalai amo tama be dahaka bae diba?

¹⁶ Tama na King David ena haheitalai amo ini mai anina bada ḡaudia bae diba: Iehova ese e henimui madunana na ba huaia namonamo. Emui kerere na ba gwaurai hedinarai, bona Baibul ena sisiba namodia na bavabi dae. Bema unu bo kara tomamu bona bo manaumu, emu ruma bese taudia ese be matauraimumu. Emu ruma bese ida o ḡuriḡurimu neganai, lalomu ai e miamu ḡaudia na Iehova enai ba gwaurai hedinarai bena idia na bae diba oi na Iehova enai o tabekaumu. To, emu mauri lalonai Iehova ihesiai henina karana na ḡau badana ai ba halaoa. (Deu. 6:6-9) Emu ruma bese taudia ediai oiemu haheitalai na harihari ḡauna heredaena ta.

17. Iehova ese sina be dahaka maduna e henidia?

¹⁷ Iehova ese ruma bese lalonai sina na maduna ta e henia, bona ia na mai ena maoro natu baine matahakani henidia. (Her. 6:20) Sina ena kara bona ena hereva dainai natu na ena mauri ibounai lalonai ia na taunimanina namona ai bainela diba. (Her. 22:6) Sina ese Iesu sinana, Maria ena amo bae dibaia ḡauna aita herevalaia.

18-19. Sina ese Maria ena haheitalai amo dahaka bae diba?

¹⁸ Maria ese Dirava ena hereva na e dibaia namonamo. Ia ese Iehova na e matauraia badava bona ena hetura karana Ia ida na goada. Ena be ena mauri na baine idau, to ia na mai ena ura ida Iehova ena hahekau dalana e badinaia.​—⁠Luka 1:35-38, 46-55.

¹⁹ Sina e, umui ese Maria ena haheitalai na dala idauidau ai ba badinaia diba. Ededia dalai? Ginigunana na, Baibul istadilaina karana bona oi sibomu emu ḡuriḡuri karana amo emu hetura karana Iehova ida bo hagoadaiamu. Iharuana na, ba ḡaukara goada emu mauri lalonai emu kara haida ba haidau Iehova ba hamoalea totona. Heḡereḡere, oi tamamu bona sinamu na badu haraḡa taudia bona natudia e hereva henidiava neganai e ere dika henidiava. Una dainai oi na bo laloamu, dala unu bamona ai natumu ba hadibaia na dia kerere. Bona Iehova ena taravatu o dibadia murinai, oi na dounu bo hekwarahimu​—⁠heḡereḡere, oi o hesikumu lalonai natumu ese oi be gwau-edeede henimumu neganai​—⁠manau bona haheauka ihahedinaraina na be aukamu. (Efe. 4:31) Unu e vara tomamu neganai, namona na ḡuriḡuri  amo Iehova ena heduru ba noia. Sina ta ladana Lydia na ini e gwau toma: “Nega haida na ḡuriḡurimu unu amo natugu ese e gwau-edeede henigumu neganai baina hereva henia namonamo. Nega haida be egu hereva ba hadokoamu bena lalogu ai Iehova ba ḡuriḡuri heniamu baine durugu totona. Ḡuriḡuri karana ese lau na e durugu baina haheauka.”​—⁠Sal. 37:5.

20. Sina haida ediai edena kara bae hahedinaraia na auka, bona ededia dalai unu bae hanai diba?

²⁰ Sina haida ediai na e aukamu natudia ediai lalokau bae hahedinaraia. (Tito 2:3, 4) Sina haida e vara ruma besedia ai, tamadia bona sinadia ese natu ilalokau henidia karana na asie hahedinaraia. Bema oi o vara ruma besena na unu bamona, tamamu bona sinamu edia mauri dalana na basio tohotohoa. Sina ta ese natuna enai lalokau baine hahedinaraia karana baine dibaia na namo, unu amo ia ese be hahedinaraiamu ia na Iehova ena ura e matauraiamu. Reana, be aukamu ena lalohadai, hemami bona kara baine haidau. To ia ese ena kara na baine haidau diba, bona una ese ia bona ena ruma bese taudia be hamoalediamu.

21-22. Isaia 65:13, 14 heḡereḡerena, Iehova baita matauraiamu neganai dahaka hahenamo baita abimu?

²¹ King David na mai dibana Iehova imatauraina karana amo e varamu hahenamodia. Ia na eto: “Iehova ena hahedua herevadia vada e maoromaoro; ia ese taunimanima lalodia e hamoalediamu. Iehova ena haheḡani vada e ḡoevaḡoeva; ia ese taunimanima matadia e hapapadiamu. Idia ese oiemu hesiai tauna e sisiba heniamu; ibadinadia ahuna na bada.” (Sal. 19:8, 11) Hari ina negai, Iehova e matauraiamu taudia bona ena sisiba e dadaraimu taudia edia idau na ita ese ta itaiamu. Iehova e matauraiamu taudia na “ane bae abi, edia lalo-namo dainai.”​—Isaia 65:13, 14 ba duahi.

²² Bema elda taudia, tama, bona sina ese mai edia ura ida Iehova be matauraiamu, edia mauri na be namomu, edia ruma bese taudia na be moalemu, bona kongrigeisin taudia iboudiai na lalotamona ai be ḡaukara heboumu. To ḡau badana na idia ese Iehova be hamoaleamu. (Her. 27:11) Una na moale ḡauna hereadaena!