STADI ATIKOL 38
“Lau Dekegu Aoma, Lau ese Laḡa-Ani Baina Henimui”
“Tau boera taumui bona maduna metau taumui iboumui ai, lau dekegu aoma, lau ese laḡa-ani baina henimui.”—MAT. 11:28.
ANE 25 Hahediba Tauna Korikorina Ena Kara
INA STADI ANINA *
1. Mataio 11:28-30 heḡereḡerena, Iesu ese e karaia gwauhamatana be dahaka?
IESU ese ia e kamonai heniava taudia hutuma ediai gwauhamata namona ta e karaia. Ia na e gwa: “Lau dekegu aoma, lau ese laḡa-ani baina henimui.” (Mataio 11:28-30 ba duahi.) Ia ese e karaia gwauhamatana na mai anina bada. Hahine ta na gorere dikana ta dainai e hisihisiva bona Iesu ese ia e kara henia dalana mani aita laloa.
2. Iesu ese gorere hahinena ta be ede e kara henia toma?
2 Una hahine na e ura dikadikava heduru baine abi. Dokta momo e itadia; ia banava eto bae hanamoa. Laḡani 12 una gorere e abia, to ta ese se durua. Iehova ese Mose e henia Taravatuna heḡereḡerena, ia na bae gwauraia miro. (Lev. 15:25) Bena ia na e kamonai Iesu ese e hisihisiva taudia na baine hanamodia diba, una dainai ela ia baine tahua. E davaria neganai, ia ese ena dabua rimuna ai e dau kau, bena maoromaoro ena gorere e ore! Iesu ese iena gorere e hanamoa, bona una hahine ese e mamia Iesu na ia e lalokau henia bona e matauraia. Heḡereḡere ia e hereva henia neganai, ina hereva “Natugu” e gwauraia. Una ese hahine na laḡa-ani e henia eiava e hagoadaia!—Luka 8:43-48.
3. Ededia henanadai baita haerelaimu?
3 Mani a laloa una hahine na Iesu dekena ela. Ia na e lalogoada unu baine kara toma. Hari ina negai danu unu bamona—baita hekwarahi Iesu ‘dekena’ baitala. Hari ina negai, Iesu na dia hoa dalanai ia ‘dekena’ baela taudia edia gorere baine hanamo. To doini e noidamu, etomu: “Lau dekegu aoma, lau ese laḡa-ani baina henimui.” Ina atikol ai, ita ese henanadai faiv baita haerelaimu: Ita be edena dalai Iesu ‘dekena’ baitala diba? Iesu ena hereva, “egu maduna na paḡamui ai ba huaia”
anina be dahaka? Iesu amo dahaka baita dibamu? Dahaka dainai ita e henida ḡaukarana amo laḡa-ani baita abi? Edena dalai hanaihanai Iesu ena maduna ihuana karana amo laḡa-ani baita abi diba?“LAU DEKEGU AOMA”
4-5. Iesu ‘dekena’ baitala daladia haida be dahaka?
4 Iesu ‘dekena’ baitala dalana ta na, ia ese e gwaurai herevadia bona e kara karadia baita dibadia. (Luka 1:1-4) Ta na ita daidai unu basine kara tomamu—una na ita ta ta eda maduna. Baibul ai Iesu ena mauri e herevalaia dalana baita stadilaia. Iesu ‘dekena’ baitala dalana ma ta na, bapatiso baita abi bona Keriso ena hahediba ai baitala.
5 Iesu ‘dekena’ baitala dalana ma ta na, bema heduru ta uramu, elda taudia dekedia baitala na namo. Iesu na “herahia” taudia e ḡaukaralaidiamu iena mamoe bae naridia totona. (Efe. 4:7, 8, 11; Ioa. 21:16; 1 Pet. 5:1-3) Heduru baita abi totona ita na elda taudia dekedia baitala guna na ḡau badana. Basitato elda taudia na ita ta lalomu ḡaudia bona eda dabu ḡaudia iboudiai na mai dibadia. Tadikaka ta ladana Julian na ini e gwau toma: “Lau na gorere dainai Betele ḡaukara na rakatania, bona turagu ta ese e hamaorogu, namona na elda baina noidia bae vadivadigu bona bae hagoadagu totona. Matamanai, na lalova idia ese lau bae vadivadigu na asi anina. To gabeai elda na noidia bae durugu, bona lau e vadivadigu karana dainai egu mauri lalonai una na basina laloaboio.” Julian e vadivadia elda taudia raruosi heḡereḡeredia, Iehova e badinaiamu elda taudia ese ita na bae duruda diba “Keriso darana” baita abia; anina na ena lalohadai bona kara baita tohotohomu bona baita lalopararalaidiamu. (1 Kor. 2:16; 1 Pet. 2:21) Ita edai una na idia edia harihari ḡauna hereadaena.
“EGU MADUNA NA PAḠAMUI AI BA HUAIA”
6. Iesu ese ina hereva “egu maduna na paḡamui ai ba huaia” e gwauraia neganai, iena hereva anina be dahaka?
6 Iesu ese ina hereva: “Egu maduna na paḡamui ai ba huaia” e gwauraia neganai, reana iena hereva anina na “Egu hahekau dalana bavabia dae.” Eiava reana ena hereva anina na “Lau ida una maduna baita huaia, bona Iehova dainai baita ḡaukara hebou.” Unu hereva ruaosi anidia na baita ḡaukara.
7. Mataio 28:18-20 heḡereḡerena, ita e henida ḡaukarana be dahaka, bona baita abia dae momokani ḡauna be dahaka?
7 Iehova enai eda mauri ta gwauhamatalaia bona ta bapatiso neganai, Iesu ena noinoi ta abia dae. Una noinoi herevana na taunimanima iboudiai ese bae abia dae diba. Mai momokanidia ida e uramu Dirava bae hesiai henia taudia na Iesu ese basine dadaraidia. (Ioa. 6:37, 38) Keriso murinai e rakamu taudia iboudiai na Iehova ese Iesu e henia ḡaukarana e karaiamu, una na hahenamo badana. Baita abia dae momokani Iesu na hanaihanai ita be durudamu.—Mataio 28:18-20 ba duahi.
“LAU DEKEGU” BAOMA DIBA BAVABI
Iesu e kara heḡereḡerena haida ba hagoadaia (Paragraf 8-11 ba ita) *
8-9. Dahaka dainai manau taudia na e urava Iesu dekena baela, bona ededia henanadai na siboda ese baita lalo?
8 Manau taudia na Iesu dekena ela. (Mat. 19:13, 14; Luka 7:37, 38) Dahaka dainai? Iesu ena kara bona Farisea taudia edia kara edia idau aita laloa. Unu tomadiho igunalaina taudia ese lalokau na asie hahedinaraiava bona e hekokorokuva. (Mat. 12:9-14) To, Iesu na lalokau bona manau e hahedinaraiava. Farisea taudia na e urava taunimanima ese bae hanamodia bona edia dagi dainai e heaḡiva. Iesu ese e hahedinaraia una na dia kara maorona, bona ena hahediba taudia e hadibadia bae manau bona haida bae hesiai henidia. (Mat. 23:2, 6-11) Farisea taudia ese haida na e biagudia aukava dainai taunimanima ese e gari henidiava. (Ioa. 9:13, 22) Iesu na mai lalokauna ida taunimanima e kara henidia bona ena hereva namodia dainai haida e hagoadadia.
9 Iesu amo ḡau haida ome diba, a? Sibomu ba henanadai: ‘Lau be asina badu haraḡamu bona na manaumu, eiava? Taunimanima ese se lalo badamu ḡaukaradia be mai egu ura ida na karamu, eiava? Lau ese haida na kara namodia henidiamu, eiava?’
10. Iesu be dahaka e kara dainai taunimanima na e ura ia ida bae ḡaukara hebou?
10 Iesu na ia ida e ḡaukara hebouva taudia e kara namo henidia bona idia na se gariva ia ida bae ḡaukara. Bona idia ihadibadia karana na e moalelaia. (Luka 10:1, 19-21) Ia ese ena hahediba taudia e hamaorodia henanadai bae heni, bona ia na e urava edia lalohadai baine diba. (Mat. 16:13-16) Tubutubu ḡaudia na basie dika totona e reḡudia namonamomu heḡereḡerena, Iesu ese ena hahediba danu e hadibadia namonamova. Idia ese Iesu amo e dibava ḡaudia na edia mauri lalodiai e badinava bona edia ḡaukara na e kara namonamova.
Emu kara namo dainai haida na be uramu oi turamu ai baela
Haroro ḡaukara ba ḡoadalaia
Ba manau bona ba gaukara goada *
11. Siboda ese ededia henanadai baita lalo?
11 Oi be bosi ta eiava tama ta, a? Bema oibe, sibomu ba henanadai: ‘Ḡaukara gabunai bona rumai lau ese taunimanima be ede na kara henidia tomamu? Lau ese maino na hahedinaraiamu, a? Ma haida na hagoadadiamu henanadai karana bae manadalaia, eiava? Lau be mai lalogu ibounai ida idia edia lalohadai na hakala henidia namonamo, eiava?’ Ita na asita uramu Farisea taudia baita tohotohodia; edia kara e henanadailaiva taudia na e badu henidiava bona edia lalohadai asie e abi daeva taudia na e daḡedaḡe henidia.—Mar. 3:1-6; Ioa. 9:29-34.
“DO BAE LAḠA-ANI”
12-14. Dahaka dainai Iesu ese e henida ḡaukarana amo laḡa-ani eiava goada baita abi diba?
12 Dahaka dainai Iesu ese ita e henida ḡaukarana amo laḡa-ani eiava goada baita abi diba? Badi na momo, to haida mo baita herevalaimu.
13 Ita e gunalaidamu taudia na hegunalai taudia namodia. Iehova, eda Hegunalai Tauna Hereadaena ese ena hesiai taudia na se kara auka henidiamu. Ta karamu ḡaukaradia na e lalo badamu. (Heb. 6:10) Goada e henidamu e henida maduna baita huaia totona. (2 Kor. 4:7; Gal. 6:5) Iesu, eda King, na haheitalai namona. (Ioa. 13:15) Bona ita e naridamu elda taudia na bae hekwarahi Iesu, “mamoe ireḡudia tauna badana” bae tohotohoa. (Heb. 13:20; 1 Pet. 5:2) Idia na e hekwarahimu kara namodia bae hahedinarai, e hagoadadamu, bona mai lalo goadadia ida e hadibadamu bona e hakaudamu.
14 Ita turada na tura namodia. Orea ma haida ese ita ta mamiamu lalokauna na asie mamiamu bona ta karaiamu ḡaukarana na asie karaiamu. Mani a laloa: Ita ida ta ḡaukara heboumu tadikaka bona taihu na edia mauri ai kara namodia e hahedinaraimu, bona se lalomu idia ese haida na e hereadia. Ena be mai edia diba, to se hekokorokumu. Idia ese ita e lalodamu na dia ḡaukara hebou taudia mo to idia turadia danu. Una lalokau na goada dainai, idia na ita daidai mai edia ura ida edia mauri e henimu!
15. Ita ese eda ḡaukara be ede baita laloa toma?
15 Ita ese ta karaiamu ḡaukarana na ḡaukara namo hereana. Ita ese Iehova Dirava ena hereva momokani na taunimanima ta hadibalaidiamu bona Diabolo ena koikoi herevadia na ta gwaurai hedinaraimu. (Ioa. 8:44) Satana ese koikoi herevadia amo taunimanima e koidiamu dainai idia na e laloamu edia mauri na asi anina. Heḡereḡere: Ia na e uramu baita abia dae Iehova ese eda kara dikadia na basine gwautaomu bona se lalokau henidamu. Unu ese taunimanima e koidiamu! Keriso ‘dekena’ ta laomu neganai, iseda kara dika na e gwaudiataomu. Hereva momokanina binai: Iehova ese ita iboudai e lalokau henidamu. (Roma 8:32, 38, 39) Taunimanima ta durudiamu Iehova enai bae tabekau bona edia mauri ai ḡau haida e haidaumu neganai, ta moalemu!
IESU ESE E HENIDA ḠAUKARANA AMO HANAIHANAI GOADA BAITA ABI
16. Edena dalai Iesu ese e henida maduna na idau maduna ma haida amo?
16 Iesu ese e henida maduna ena metau na idau ma maduna haida amo. Haheitalai ta na ina: Dina ta ta eda moni ḡaukara amo ta loumu ruma neganai ta hesikumu bona asita moalemu. To Iehova bona Keriso edia hesiai ḡaukara ta karaiamu neganai, ta moalemu. Ena be moni ḡaukara amo ta loumu ruma bona ta hesikumu, to dounu kongrigeisin heboudia na ta laomu. Nega momo hebou muridiai ta loumu ruma neganai, goada mamina ta abiamu. Danu, nega ta atomu haroro ḡaukara ta karaiamu bona siboda ese Baibul ta stadilaiamu neganai e hagoadadamu.
17. Ita ese baita lalopararalaia ḡauna be dahaka bona dahaka na mai anina bada?
17 Namona na baita laloparara ita ta ta eda goada na mai hetoana. Una dainai baita kara ḡaukaradia na baita lalodia namonamo na mai anina bada. Heḡereḡere: Readia kohu itahuna karana ai eda nega bona goada baita haore kavamu. Taḡa tauna ta ese ina henanadai: “Ede baina kara toma mauri hanaihanai iabina totona?” e gwauraia neganai, Iesu ena haere mani aita laloa. Taḡa tauna ese Taravatu na e badinaiava. Reana ia na tau namona ta badina Mareko ena Evanelia bukanai e gwa Iesu ese “e ura henia.” Iesu ese una taḡa tauna na e noia eto, “Emu kohu ba ha hoi, . . . Bena murigu ai bame raka.” Ia na e urava Iesu baine badinaia, to ena “taḡa” daidiai e daradara. (Mar. 10:17-22) Una dainai, Iesu ese e henia maduna na e dadaraia bona “Taḡa” isiaina e lao heniva. (Mat. 6:24) Bema una na oi, edena boma abia hidi?
18. Eda mauri lalonai dahaka baita ato guna na namo bona dahaka dainai?
18 Namona na eda mauri lalonai mai anidia bada ḡaudia baita ato guna. Dahaka dainai? Unu amo eda goada na ḡau maorodia daidiai baita ḡaukaralaia. Eregabe tauna ta ladana Mark na ini e gwau toma: “Laḡani momo lalodiai, na laloava egu mauri ai ḡau momo asina tahuva. Na painiava, to nega momo moni bona mauri namona na lalohadailaiva. To na urava baina diba dahaka dainai egu mauri ai ḡau momo na lalova bona asina moaleva. Bena na laloparara egu nega bada na dia Iehova na heniava, to sibogu egu ura ḡaudia iabidia helaoreana na ḡaukaralaiava.” Mark ese ena lalohadai bona mauri dalana e haidaua unu amo Iehova ihesiai henina karana e habadaia. Mark eto: “Nega haida moni dainai na lalo hekwarahimu to Iehova bona Iesu edia heduru dainai egu hekwakwanai na asi na lalodiamu to Iehova ena hesiai ḡaukara na goadalaiamu.”
19. Dahaka dainai lalohadai maorona baita abia na ḡau badana?
19 Bema ini ḡau toi baita karamu, ita na Iesu ese e henida madunana ihuanai baita goadamu. Ginigunana na, lalohadai maorona baita abia. Ita na Iehova ena ḡaukara ta karaiamu dainai, Iehova ena ura heḡereḡerena baita karaia na namo. Ita na ḡaukara tauda, bona Iehova be ita Biaguda. (Luka 17:10) Bema iena ḡaukara na eda ura dalanai baita karaiamu, baita hekwarahi badamu. Boromakau maruanena (bull) mai goadana ta na hanaihanai sibona ena ura dalana be badinaiamu neganai, be beromu, be hesikumu bona biaguna ena hahekau dalana basine badinaiamu. To bema Iehova ena ura dalana baita badinaiamu, basita kara diba ḡaudia danu baita haḡuḡurudiamu. Baita helalotao, taunimanima ta ese iena ura ihaḡuḡuruna dalana basine koua diba!—Roma 8:31; 1 Ioa. 4:4.
20. Edena badi maorona dainai Iesu ese e henida maduna na baita karaia?
20 Iharuana na, badi maorona dainai e henida ḡaukarana baita karaia. Ta uramu ita ese Tamada lalokauna, Iehova baita imodaia. Iesu ena negai e nohova taudia na e mataḡaniḡaniva bona sibodia edia ura e badinava dainai se moaleva bona Iesu ese e henidia maduna na e rakatania. (Ioa. 6:25-27, 51, 60, 66; Flp. 3:18, 19) To, Dirava e lalokau heniava bona dekedia taudia e lalokau henidiava taudia na edia mauri ibounai lalonai mai moaledia ida una maduna e huaiava, ena be edia helaro na guba ai Keriso ida bae lohia hebou. Idia heḡereḡeredia, mai moaleda ida Iesu ese e heni maduna na badi maorona dainai baita karaia.
21. Mataio 6:31-33 heḡereḡerena, Iehova ese ita be ede be duruda tomamu?
21 Ihatoina na, nega korikori ai heduru maorona baita abiamu. Eda mauri lalonai ta ḡaukara goada bona siboda eda namo itahuna maurina ta dadaraia. Iesu na e gwa ita na bae daḡedaḡe henida. To ta diba momokanimu Iehova ese be hagoadadamu hekwakwanai iboudiai baita haheaukalai helaoreana. Bema baita haheaukamu ita na baita goadamu. (Iak. 1:2-4) Mai dibada ta dabumu ḡaudia na Iehova ese be henidamu, Iesu ese be hakaudamu, bona tadikakada bona taihuda ese be hagoadadamu. (Mataio 6:31-33 ba duahi; Ioa. 10:14; 1 Tes. 5:11) Unu ese ita na be durudamu eda hekwakwanai baita haheaukalai totona.
22. Dahaka dainai eda tenkiu karana baita hahedinaraia?
22 Iesu ese una gorere hahinena na e hanamoa dinana ai goada e abi. Bema ia ese Keriso bema badinaia una goada na basinema ore. O laloamu ia be ede e kara toma? Bema una hahine na Iesu ena maduna bema huaia, bema abia hahenamona mani a laloa—ia na Iesu ida guba ai bema lohia! Ena mauri ai sibona ena ura bema dadaraia bona Keriso murinai bema raka, una na hahenamo hereadaena. Herevana eda helaro na tanobada ai eiava guba ai, mai kudouda idoinai ida Iesu ena noinoi, “dekegu aoma” vada ta abia dae dainai baita tenkiu.
ANE 5 Keriso, Eda Haheitalai
^ par. 5 Iesu na ita e noidamu ia dekena baitala. Iesu ena noinoi baita abia dae totona dahaka baita kara? Ina atikol ese una henanadai be haerelaiamu, bona be hadibadamu Keriso ida baita ḡaukara heboumu neganai goada baita abimu.