1-2. Kohelete 11:6 ese haroro ḡaukara be ede e herevalaia toma?

TANO haida ai, taunimanima na sivarai namona e kamonaimu bona e ura heniamu. Momokani, idia na sivarai unuhetomadia daidiai e hitolomu . To ma tano haida ai, taunimanima ese Dirava o Baibul na asie laloa badamu. Emu gabu taudia be ede heto? Herevana ta e kamonai o lasi, to Iehova na e uramu haroro ḡaukara baita karaia hanaihanai ela bona ia baineto, ‘Ḡaukara na vada ba hadokoa.’

² Haroro ḡaukara na baita karaia ela bona Iehova ese e makaia negana korikori ai baine doko eiava “dokona vada baine kau.” (Mat. 24:14, 36) To hari ina negai, ‘basita hesiku’ sisibana be ede baita badinaia toma? *​—Kohelete 11:6 ba duahia.

3. Ina atikol ai be dahaka baita herevalaimu?

³ Stadi atikol 36 ai ita na ḡau hani ta herevalaidia, unu ese ita bae duruda “taunimanima ihaoda-henidia” taudia namodia ai baitala totona. (Mat. 4:19) Ina atikol ai baita herevalaimu daladia toi ese be hagoadadamu, nega dikadia lalodiai haroro ḡaukarana baita karaia hanaihanai. Bona baita itaiamu dahaka dainai (1) iseda mauri ai haroro ḡaukara sibona mo baita atoa ḡuna, (2) baita haheauka, bona (3) iseda abidadama baita hagoadaia na mai anidia bada.

4. Dahaka dainai Iehova ese ita e henida ḡaukarana sibona mo baita atoa ḡuna na mai anina bada?

⁴ Iesu ese ena hahediba taudia e hamaorodia dina gabedia ai be dahaka be varamu bona taunimanima be dahaka be karamu. Ia ese idia e hamaorodia, eto: “Ba gima.” (Mat. 24:42)  Ḡau momo herea ese Noa ena negai e nohova taudia lalodia e hadibura dainai, idia ese Noa ena sisiba na asie kamonai henia​—hari ina negai danu ita laloda bae hadibura ḡaudia na momo herea. (Mat. 24:37-39; 2 Pet. 2:5) Una dainai, ita na ta uramu Iehova ese ita e henida ḡaukarana sibona mo baita atoa ḡuna.

5. Aposetolo Edia Kara 1:6-8 ai, haroro ḡaukara ena bada be ede e herevalaia toma?

⁵ Hari ina negai, namona na haroro ḡaukara sibona mo baita atoa ḡuna. Iesu na e peroveta eto, ia baine mase murinai ina ḡaukara na basine doko to baine bada ela bona tanobada heḡeḡemadai. (Ioa. 14:12) Iesu e mase murinai, ena hahediba taudia haida ese haoda ḡaukara na e lou henia. Iesu na mase amo e tore isi lou murinai, ia ese hoa karana ta e karaia, unu amo ena hahediba taudia haida e durudia gwarume momo herea e veri. Una murinai, Iesu ese idia e hamaorodia, namona na taunimanima ihaoda-henidia ḡaukarana sibona mo bae atoa ḡuna. (Ioa. 21:15-17) Iesu na guba do sela neganai, ia ese ena hahediba taudia e hamaorodia ia e hamatamaia ḡaukarana na Israel ena boda baine hanaidia ela bona tanobada heḡeḡemadai. (Apos. 1:6-8 ba duahi.) Laḡani momo muridiai, Iesu ese vairai o “Lohiabada ena dina” ai baine vara ḡauna na Ioane enai e haheitalaia. * Matahanai lalonai, aposetolo Ioane ese e itaia ḡauna ta binai: Aneru ta ese “mia-hanaihanai sivaraina namona na tanobada ai e nohomu taudia ediai e laohai, bese iboudiai, iduhu iboudiai, gado iboudiai, tano iboudiai e harorolai henidia.” (Apok. 1: 10; 14:6) Oibe, Iehova na e uramu ina ḡaukara badana baita karaia hanaihanai ela bona ia baineto, ‘Ḡaukara na vada ba hadokoa.’

6. Iseda mauri ai haroro ḡaukara baita atoa ḡuna totona, dahaka baita kara be namo?

⁶ Iseda mauri ai haroro ḡaukara baita  atoa gunamu bema Iehova ese ita e durudamu daladia na baita lalohadailaidia louloumu. Heḡereḡere, ia ese lauma aniani idauidau na printed bona electronic pablikeisin, audio bona vidio rekodin, bona Internet broadcast amo e halasimu. Mani ina a laloa: Iseda official website ai, gado idauidau 1000 mai kahana ai e hahanai infomeisin bo duahi dibamu! (Mat. 24:45-47) Ena be politikol, dubu, bona moni o kohu daidiai taunimanima e heiriheirimu, to tanobada heḡeḡemadai Dirava ena hesiai taudia 8-milioni mai kahana na lalotamona ai e nohomu. Heḡereḡere, Friday, April 19, 2019 ai, tanobada heḡeḡemadai, Iehova ena Witnes iboudiai ese dina siri tamona e herevalaia hebou. Una hanuaboina ai, hutuma 20,919,041 e hebou, Iesu ena mase ena Memorial e abia. Kara inihetomadia ta itamu, ta durumu, o ta lalohadailai louloumu daidiai, ta uramu iseda mauri ai haroro ḡaukara baita atoa ḡuna.

7. Edena dala ai Iesu ena haheitalai ese ita e durudamu iseda mauri ai haroro ḡaukara baita atoa ḡuna totona?

⁷ Eda mauri ai haroro ḡaukara baita atoa ḡunamu dalana ma ta na, Iesu ena haheitalai baita tohotohoa. Ia na hereva momokani igwaurai-hedinaraina ḡaukarana sibona mo e atoa ḡunava. (Ioa. 18:37) Ena be Satana ese “tanobada basileiadia idoidiai mai hairaidia” e harihari henia, to Iesu ese e dadarai, bona ena be haida ese king ai bae halaoa eto, to Iesu ese una danu e dadaraia. (Mat. 4:8, 9; Ioa. 6:15) Ia ese moni o kohu e dadarai, bona dagedage taudia garidia danu se gariva. (Luka 9:58; Ioa. 8:59) Hahetoho lalodiai, namona na Paulo ena sisiba baita laloatao bona iseda mauri ai haroro ḡaukara baita atoa ḡuna. Aposetolo tauna ese Kristen taudia e hagoadadia Iesu ena haheitalai bae tohotohoa, unu amo idia na basie hesiku bona basie manoka!​—Heb. 12:3.

8. Haheauka taudia be dahaka e karamu? Dahaka dainai baita haheauka na namo?

⁸ Haheauka taudia na e narimu ela bona sensi e varamu. Reana ita danu ta haheaukamu, hekwakwanai ta baine doko negana ta nariamu, eiava ḡau namona ta baine ḡuḡuru negana na doini ta nariamu. Peroveta tauna Habakuku na e urava Iuda ai dagedage karadia haida na bema ore. (Hab. 1:2) Iesu ena hahediba taudia na e laloava Basileia na una negai baine hedinarai bena Roma dagedage taudia bogaragidiai idia baine hamauridia. (Luka 19:11) Ita danu ta narimu ela bona dina ta ai Dirava ena Basileia ese kara dika taudia baine haoredia bena kara maoromaoro taudia ese tanobada matamatana bae noholaia. (2 Pet. 3:13) To, namona na baita haheauka bona Iehova ese e abia hidi negana baita naria. Mani aita itaia ededia dala ai Iehova ese ita e hadibadamu baita haheauka.

9. Ededia haheitalai ese e hahedinaraiamu, Iehova na e haheauka Diravana?

⁹ Iehova na haheauka Diravana. Ia ese nega taina bada e heni dainai, Noa ese lagatoi e karaia bona taunimanima e hadibadia abata na baine kau. (2 Pet. 2:5; 1 Pet. 3:20) Iehova ese Sodoma bona Gomora ai dagedage taudia baine hadikadia ena disisin e karaia neganai, Abraham na henanadai momo e heni, to Dirava na e hakala. (Gen. 18:20-33) Ena be laḡani momo lalodiai Israel taudia e gwau-edeedeva, to Iehova na e haheaukava. (Neh. 9:30, 31) Hari danu Iehova na e haheaukamu badina ta itaiamu ia ese nega taina bada e heni taunimanima iboudiai bae “helalo kerehai”  totona. (2 Pet. 3:9; Ioa. 6:44; 1 Tim. 2:3, 4) Iehova e haheauka nohomu lalonai, namona na haroro ḡaukara bona hahediba ḡaukara baita karaia hanaihanai. Bona Dirava ese Baibul amo haheauka karana na ita e hadibalaidamu.

10. Iakobo 5:7, 8 ai, dahaka dainai biru tauna na haheitalai namona?

¹⁰ Iakobo 5:7, 8 ba duahi. Biru tauna ese e hadoamu ḡauna e nariamu karana ese ita e hadibadamu, ede baita haheauka toma. Momokani, tubutubu ḡaudia haida be e tubu haragamu. To, fruit o aniani e havaramu tubutubu ḡaudia edia tubu negana na taina daudau. Tubutubu ḡaudia unuhetomadia Israel ai na hua 6 lalodiai be tubumu. October ai medu e dokomu murinai, biru taudia ese uhe e hadomu, bona April ai medu e dokomu murinai, idia vada e geigeimu. (Mar. 4:28) Namona na biru tauna ena haheauka karana baita tohotohoa. To, unu baita kara tomamu na mai hekwarahina.

11. Haroro ḡaukara ai, haheauka karana ese ita be ede baine duruda toma?

¹¹ Ena be ita na dia ḡoevadae, to nega momo ta uramu eda ḡaukara anina baita itaia haraḡa. Vaia, bema ta uramu tubutubu ḡaudia bae tubu namonamo bona huahua baine havara, namona na nega iboudiai baita reḡua namonamo​—baita ḡeiḡei, baita hadohado, baita raua, bona baita dairia. Taunimanima baita hadibadia ḡaukarana na unu heto. Taina ruana Baibul stiuden baita durudia ela bona ma haida ilalokau henidia dalana bae dibaia. Haheauka taudia na asie lalomanokamu, herevana haida ihadibadia na mai hekwarahina. Bona ena be haida bae kamonai, to dounu baita haheauka. Baibul stiuden ta basita doria abidadama ai baine tubu totona. Nega haida ai, Iesu ena hahediba herevadia haida anidia na aposetolo taudia ese asie lalopararalaidia haraḡava. (Ioa. 14:9) Baita helalotao: Hadohado bona dairidairi ḡaukarana be ita ese ta  karaiamu, to Dirava ese anina e havaraiamu.​—1 Kor. 3:6.

12. Varavarada o eda ruma taudia ta haroro henidiamu neganai, haheauka karana be ede baita hahedinaraia toma?

¹² Varavarada o eda ruma taudia ta haroro henidiamu neganai, reana haheauka ihahedinaraina na auka. To Kohelete 3:7 ena sisiba baita badinaia diba. Etomu: “Asi reḡereḡeda baita noho na mai negana, baita herevahereva na mai negana.” Iseda kara namodia amo idia baita haroro diba, to danu, nega iboudiai baita heḡaeḡae hereva momokani na idia ediai baita gwauraia hedinarai totona. (1 Pet. 3:1, 2) Mai haheaukada ida taunimanima iboudiai​—bona varavarada o eda ruma taudia​—baita haroro henidia bona baita hadibadia namonamo.

13. Daidia edia haheauka karana baita tohotohoa diba?

¹³ Baibul negadiai bona iseda negai e nohomu taudia edia haheauka karana baita tohotohoa. Habakuku e ura dagedage karana na bae doko, to e haheauka badina ini e gwau toma: “Lau na baina gini, baina gima, kohoro ai baina gini.” (Hab. 2:1) Paulo e ura ena hesiai ḡaukara na baine “haḡuḡurua.” To, ia na e haheauka badina nega iboudiai ia ese ‘sivarai namona e gwauraia hedinarai.’​—Apos. 20:24.

14. Daidia edia haheauka karana baita tohotohoa diba?

¹⁴ Gilead skul murinai, tadikaka ta mai adavana ida na tano ta ela​—unuseniai Iehova ena Witnes na dia momo, bona dubu na dia momo. Taunimanima momo na asie urava Baibul bae stadilaia. To, tadikaka bona taihu ida Gilead skul e haorea hebou taudia be tano ma haida ai anina namona e havaraiava, edia Baibul stiuden momo Iehova ena Witnes ai e laova. To tadikaka bona taihu na mai haheaukadia ida haroro ḡaukara e karaiava, herevana momo asie kamonaiva. Laḡani 8 lalonai haida mo e kamonaiva, bona hari idia na e moalemu badina edia Baibul stiuden haida na e bapatiso. Baibul negadiai bona iseda negai e nohomu taudia amo dahaka ta dibaiamu? Idia na asie hesiku bona asie manoka, to edia haheauka dainai Iehova ese e hanamodia. “Edia abidadama bona edia haheauka daidiai ahudia vada e abi taudia” baita tohotohodia na namo.​—Heb. 6:10-12.

15. Abidadama ese baine hagoadaia haroro ḡaukara baita karaia dalana ginigunana be dahaka?

¹⁵ Abidadama ese baine hagoadaia daladia rua mani aita herevalai. Ginigunana: Ita ese ta harorolaiamu sivaraina na ta abia daemu dainai, ta ura badamu una sivarai na taunimanima momo herea ediai baita harorolaia. Baibul ai gwauhamata herevadia iboudiai na ta abidadama henidiamu. (Sal. 119:42; Isa. 40:8) Iseda negai Baibul ena peroveta herevadia e gugurumu na matada ai vada ta ita. Taunimanima na Baibul ena sisiba e badinaia bona sensi e karamu na matada ai ta itamu. Unu amo ta hamomokaniamu, taunimanima iboudiai ese Basileia sivaraina namona bae kamonaia na ḡau badana.

16. Salamo 46:1-3 ai, edena dalai Iehova bona Iesu iabidadama henidia karana ese be durudamu baita haroro totona?

¹⁶ Iharuana: Ita ese ta harorolaiamu sivaraina Biaguna, Iehova, bona iena Basileia ena King Iesu na baita abidadama henidia. (Ioa. 14:1) Herevana dahaka baine vara, to nega iboudiai Iehova na iseda roho-mauri gabuna bona iseda goada. (Salamo 46:1-3, ba duahi.) Danu, ita na dibada Iesu na guba amo haroro ḡaukara e gunalaiamu, bona ia na Iehova amo e abia siahuna e ḡaukaralaiamu.​—Mat. 28:18-20.

17. Nega iboudiai baita haroro badina be dahaka? Ekspiriens ta mani a gwauraia.

¹⁷ Abidadama dainai ita na dibada Iehova ese eda hekwarahi be hanamoamu, nega haida baita hoamu danu. (Koh. 11:6) Heḡereḡere, dina ta ta ai, hutuma e lao mai lao maimu neganai, iseda carts o teibol ai iseda buka e itamu. Una be haroro dalana namona ta, a? Oibe! November 2014  Our Kingdom Ministry ai, atikol ta na university student ta e herevalaia​—una kekeni na e ura Iehova ena Witnes edia history baine torea. Ia na Kingdom Hall ta se davaria, to university campus ai iseda carts o teibol ai iseda pablikeisin namona ta e davaria bena iena essay e torea. Gabeai, ia na e bapatiso, bona hari regula painia ḡaukara e karaiamu. Ekspiriens unuhetomadia ese e doridamu nega iboudiai baita haroro, badina doini ta itaiamu taunimanima ese Basileia sivaraina bae kamonaia be namo.

18. Dahaka dainai ta dibamu Iehova ena dina na basine leitimu?

¹⁸ Dibada, Basileia iharorolaina ḡaukarana na nega korikori ai be dokomu. Noa ena negai e vara ḡauna aita laloa. Iehova ese e hamomokania, ia na Timekeeper o nega e badinaia ḡoevaḡoevamu Diravana. Matamanai, Iehova na eto, laḡani 120 muridiai Abata na e vara.’ (Gen. 6:3) Bena laḡani momo muridiai, Iehova ese Noa e hamaoroa lagatoi baine karaia. Reana Noa ese lagatoi na laḡani 40 o lagani 50 lalodiai e karaia murinai Abata vada e matamaia. Herevana taunimanima na asie kamonaiva, to Noa ese Abata sivaraina na dounu e harorolaiava ela bona dokonai, Iehova ese e hamaoroa animal iboudiai na lagatoi lalonai baine hakaudia vareai. Bena nega korikori ai, “Iehova ese iduara e koua.”​—Gen. 7:1, 2, 16, NWT.

19. Dahaka be varamu bema haroro ḡaukara basita hesikulaiamu?

¹⁹ Kahirakahira, Iehova ese Basileia iharorolaina ḡaukarana be kouamu; ia ese Satana ena nega oromana dikana ena ‘iduara be kouamu,’ bena kara maoromaoro taudia ese be noholaiamu tanobada matamatana be havaraiamu. Una nega ta nariamu lalonai, namona na Noa, Habakuku bona asie hesiku taudia ma haida baita tohotohodia. Iseda mauri ai haroro ḡaukara sibona mo baita atoa ḡuna, baita haheauka, bona Iehova bona ena gwauhamata iboudiai ediai iseda abidadama baita hagoadaia.