1. Edena negai Iehova ena hesiai ḡaukara ba karaia na reana be aukamu?

EDENA negai o laloamu Iehova ena hesiai ḡaukara ba karaia na be aukamu​—hekwakwanai momo negadiai o maino negadiai? Hekwakwanai negadiai, maoromaoro ita na Iehova enai ta tabekaumu. To, maino negadiai be ede heto? Una negai, reana Dirava ena hesiai ḡaukara na ta laloa boiomu, ani? Iehova ese Israel taudia e hamaorodia una na baine vara diba.​—Deu. 6:10-12.

2. King Asa ena haheitalai namona be dahaka?

² King Asa na haheitalai namona badina ia na Iehova enai e tabekauva. Nega dikadia ai bona maino negadia ai ia ese Iehova e hesiai heniava. Maragina negana amo bona ena mauri iboudiai lalodiai, Asa na mai lalona idoinai ida Iehova mo sibona e tomadiho heniava. (1 Han. 15:14) Asa ese una e hamomokania dalana ta binai: Ia ese Iuda ai tomadiho koikoi iboudiai e hadokoa. Baibul etomu: “Ia ese dirava idaudia edia ihaboulaina patadia bona atai gabudia helaḡadia e abidia oho, bona au-tubua e hagaridia, bona kaivakuku e utudia.” (2 Sis. 14:3, 5) Danu, ia ese tubuna hahinena, Maaka, ena kwini dagina e kokia. Dahaka dainai? Badina Maaka ese taunimanima e hagoadadiava kaivakuku ta bae tomadiho henia.​—1 Han. 15:11-13.

3. Ina atikol ai edena henanadai baita haerelaiamu?

³ Asa ese e karaia ḡauna ma ta binai: Ia ese tomadiho momokani e haginia lou, oibe, ia ese Iuda taudia e durudia Iehova e lou henia. Iehova ese Asa bona Israel taudia e hanamodia dainai, idia na maino ai e nohova. * Asa ena lohia  laḡanidia 10 lalodiai, “tano na e laḡa aniva.” (2 Sis. 14:1, 4, 6) Ina atikol ai baita itaiamu, Asa na una maino negana be ede e ḡaukaralaia toma. Una murinai, baita itaiamu Kristen ginigunadia ese maino negana ta be ede e ḡaukaralaia toma. Dokonai, ina henanadai baita haerelaiamu: Bema eda tano ai Iehova ta tomadiho heniamu, una maino negana be ede baita ḡaukaralaia toma?

4. 2 Sisiga 14:2, 6, 7 ai, Asa ese maino negana ta be ede e ḡaukaralaia toma?

⁴ 2 Sisiga 14:2, 6, 7 ba duahi. Asa ese taunimanima e hamaorodia, Iehova ese “maino” na idia e henidia. To Asa dibana ina na dia laḡa-ani negana. Ia ese ḡaukara e hamatamaia heḡereḡere hanua, magu, kohoro, bona geiti e hagini. Ia ese Iuda taudia e hamaorodia: “Tano na doini iseda.” Una anina be dahaka? Anina binai: Taunimanima na Dirava ese e henidia tanona ai bae loaloa diba, ruma bae hagini diba, bona daḡedaḡe taudia garidia na basie gari. Asa ese taunimanima e hagoadadia una maino negana bae ḡaukaralaia namonamo.

5. Dahaka dainai Asa ese ena ami a hagoadaia?

⁵ Danu, Asa ese una nega lalonai ena ami e hagoadaia. (2 Sis. 14:8) Una anina be Asa ese Iehova e dadaraia, a? Lasi. Asa dibana, namona na king ese taunimanima baine haheḡaeḡaedia, vaira negadia ai hekwakwanai idauidau bae hanaidia totona. Danu ia dibana, Iuda ai una maino negana na basine mia daudau, bona una na e momokani.

6. Kristen ginigunadia ese maino negana ta be ede e ḡaukaralaia toma?

⁶ Ena be nega momo Kristen ginigunadia ese daḡedaḡe e davariva, to nega haida na maino negadia. Unu maino negadiai hahediba be dahaka e kara? Idia na mai goadadia ida sivarai namona e harorolaiava. Baibul e gwaumu, idia na Iehova “garina e gariva.” Nega iboudiai idia ese sivarai namona e harorolaiava, bona idia na e hutuma e laova. Momokani, maino negadiai, Iehova ese hahediba taudia edia haroro ḡaukara na e hanamoa.​—Apos. 9:26-31.

7-8. Maino negana ta ai, Paulo bona ma haida be dahaka e kara? Ba herevalaia.

⁷ Nega bona gabu idauidau ai, Kristen taudia ginigunadia ese sivarai namona e harorolaiava. Heḡereḡere nega ta, Paulo na e itaia Efeso taudia baine haroro henidia na ḡau badana, so ia na una siti ai e noho bona haroro ḡaukara e karaia.​—1 Kor. 16:8, 9.

⁸ Laḡani 49 C.E. ai, peritome hepapahuahuna e hamaoromaoroa murinai, Paulo bona Kristen taudia ma haida na e ura una nega ai haroro ḡaukara bae karaia na namo. (Apos. 15:23-29) Disisin na kongrigeisin iboudiai ese e kamonaia murinai, Paulo bona ma haida ese Iehova ena hereva na e harorolaia goadagoadava. (Apos. 15:30-35) Una dainai dahaka e vara? Baibul e tomu: “[Kongrigeisin] iboudiai edia abidadama e goada e laova, bona dina iboudiai ekalesia taudia na e hutuma e laova.”​—Apos. 16:4, 5.

9. Hari tano momo ai be dahaka e varamu? Bona ita be ede baita henanadai toma?

⁹ Hari tano momo ai, haroro ḡaukara na baita karaia dibamu. Emu tano be unu heto danu, a? Bema oibe, sibomu ba henanadai, ‘Lau ese ina freedom o maino negana be ede na ḡaukaralaia tomamu?’ Ina nega dokonai, tanobada ibounai, Iehova ena taunimanima edia haroro ḡaukara o hahediba ḡaukara na e bada e laomu, ḡuna na dia unu heto. (Mar. 13:10) Ina ḡaukara lalonai, ḡau momo baita kara diba.

10. 2 Timoteo 4:2 ai, dahaka baita kara be namo?

¹⁰ Oi ese maino negana be ede o ḡaukaralaia toma? (2 Timoteo 4:2 ba duahia.) Oi ese o laloamu oi eiava emu ruma tauna ta ese ina haroro ḡaukara, reana painia ḡaukara bo karaia dibamu, a? Hari, namona na moni bona kohu momo basita tahu​—hisihisi bada hereana ai, moni o kohu ese ita na basie hamauridamu.​—Her. 11:4; Mat. 6:31-33; 1 Ioa. 2:15-17.

11. Pablisa haida be dahaka e karamu, taunimanima momo bae haroro henidia totona?

¹¹ Pablisa momo na gado matamatana ta e dibaiamu, unu amo haroro ḡaukara bona hahediba ḡaukara ai bae ḡaukaralaia diba. Dirava ena orea ese iseda buka na gado idauidau ai e halasimu, una haroro ḡaukara baita habadaia totona. Heḡereḡere, 2010 ai, iseda buka na gado idauidau 500 ai e halasi. To hari, unu buka na gado idauidau 1,000 mai kahana ai e halasimu.

12. Taunimanima ese Basileia sivaraina na edia gado korikori ai e kamonaiamu neganai, edia hemami be ede heto? Ekspiriens ta a gwauraia.

¹² Taunimanima ese Dirava ena Hereva na edia gado korikori ai e kamonaiamu neganai, edia hemami be ede heto? Memphis, Tennessee, U.S.A. ai, rijinol hebouna ta ese taihu ta e durua sivaraina mani aita itaia. Una hebou ai tok e heniva tadikakadia na Kinyarwanda gado ai e herevava​—una na Rwanda, Congo (Kinshasa), bona Uganda taudia edia gado. Rijinol hebouna murinai, Kinyarwanda gado mai dibana taihuna e vasi gwau: “United States  nama negana amo ema bona hari na laḡani 17 muridiai, ina na nega ginigunana rijinol hebouna ta ena program ibounai name lalopararalaia.” Momokani, taihu na ena gado ai e kamonaia program ibounai ese lalona e hagoadaia. Oi danu o uramu gado matamatana ta ba dibaia, unu amo emu gabu taudia ba durudia diba, a? Eiava oi o uramu gado matamatana ta ba dibaia badina emu kongrigeisin ena teritori ai e nohomu taudia haida na una gado mai dibadia, a? Emu hekwarahi dainai gabeai bo moalemu.

13. Russia ai iseda tadikaka taihu ese maino negana be ede e ḡaukaralaia toma?

¹³ Tano haida ai, iseda tadikaka bona taihu bae haroro na auka, badina gavamani ese eda haroro ḡaukara na e taravatua. Heḡereḡere, Russia ai eda tadikaka taihu aita lalodia. Lagani momo lalodiai idia ese daḡedaḡe e haheaukalaia ela bona March 1991 ai gavamani ese taravatu e kokia. Una negai, Russia ai pablisa iboudiai na 16,000. To laḡani 20 muridiai, pablisa iboudiai na 160,000 mai kahana. Momokani, maino neganai eda tadikaka ese haroro ḡaukara na e karaia goadagoada. Madi, una maino negana na se mia daudau. Herevana una tano ai dahaka sensi e vara, to tadikaka ese tomadiho momokani karadia na dounu e goadalaimu. Nega bona dala idauidau ai, idia ese doini Iehova e hesiai heniamu.

14-15. Asa iduruna totona, Iehova ese ena siahu be ede e hahedinaraia toma?

¹⁴ Asa ena negai, maino negana na gabeai e doko. Ami goadana ta​—tatau 1 milioni mai kahana bamona​—na Etiopia amo ema. Una ami e gunalaiava tauna, Sera, e laloava ia bona ena ami ese Iuda taudia na  bae hadareredia. To, King Asa na ami ena namba ai se tabekau, to ia na Dirava, Iehova enai e tabekau. Asa e ḡuriḡuri, eto: “Iehova e, emai Dirava, a kahamai; badina be emu ai a hetao kaumu, bona oi ladamu ai ini hutuma baia tuari henidia.”​—2 Sis. 14:11.

¹⁵ Ena be Sera ena ami ena namba ese Asa ena ami ena namba e hanaia, to Asa dibana Iehova ena siahu na bada herea bona ena taunimanima be durudiamu. Bona Iehova ese ena taunimanima na e durudia, bona Etiopia ena ami e haoredia.​—2 Sis. 14:8-13.

16. Edena dalai ta dibamu maino negana na basine mia daudaumu?

¹⁶ Ena be asi dibada gabeai ita ta ta edai be dahaka be varamu, to dibada Dirava ena taunimanima edia maino negana na basine mia daudaumu. Iesu e peroveta eto, dina gabediai, ena hahediba taudia na ‘bese iboudiai ese be inai henidiamu.’ (Mat. 24:9) Bona Paulo eto: “Keriso Iesu lalonai Dirava ibadinana bae ura taudia iboudiai na daḡedaḡe do bae hisihisilai.” (2 Tim. 3:12) Satana na “e badu dikadikamu,” bona iena badu na ita edai be halasimu danu.​—Apok. 12:12.

17. Ededia dalai ita ese hahetoho baita davarimu?

¹⁷ Vaira negadiai, ita ta ta na hahetoho baita davarimu. Baibul etomu: “Unu dinadia ai hisi bada-herea bae vara, Dirava ese tanobada e karaia negana amo hisi unuhetomadia asie vara ema bona harihari.” (Mat. 24:21) Una negai, iseda ruma taudia ese ita be daḡedaḡe henidamu bona gavamani ese iseda ḡaukara be taravatuamu. (Mat. 10:35, 36) To Asa heḡereḡerena, ita na Iehova enai baita tabekau, ia ese baine duruda bona baine gimada totona, a?

18. Heberu 10:38, 39 ai, dahaka ese baine duruda baita heḡaeḡae totona?

¹⁸ Iehova na ita e haheḡaeḡaedamu, unu amo iseda abidadama baine goada. Ia ese “hesiai tauna mai ena kamonai bona mai ena kara maoromaoro” e duruamu nega korikori ai lauma aniani baine halasia, unu amo ita bae duruda baita gini goada totona. (Mat. 24:45) To, namona na ita ta ta danu baita hekwarahi Iehova baita abidadama  henia totona.​—Heberu 10:38, 39 ba duahi.

19-20. 1 Sisiga 28:9 ai, ededia henanadai baita heni be namo? Dahaka dainai henanadai unuhetomadia baita heni be namo?

¹⁹ King Asa heḡereḡerena, namona na Iehova baita “tahua.” (2 Sis. 14:4; 15:1, 2) Ita ese Iehova ta dibaia bona ta bapatiso negana amo, una hetahu karana vada e matama. Baita hekwarahi nega iboudiai Iehova baita lalokau henia. Una baita dibaia totona, reana siboda baita henanadai:‘Nega iboudiai lau be kongrigeisin heboudia na laomu, a?’ Iehova ena orea ena hebou ta laomu negadiai, lauma dalanai goada matamata ta abimu bona tadikaka taihu edia habamo namona ta moalelaiamu. (Mat. 11:28) Reana ma siboda baita henanadai: ‘Dina ta ta ai, lau be Baibul na stadilaiamu, a? Eiava bema lau na egu ruma bese ida na nohomu, wiki ta ta lalodiai, ai be ruma bese ena tomadiho a karaiamu, a? Eiava bema lau na sibogu na nohomu, lau ese Baibul na stadilaiamu, a? Danu, nega iboudiai lau ese haroro ḡaukara bona hahediba ḡaukara na karaiamu, a?

²⁰ Dahaka dainai ita siboda ese henanadai unuhetomadia baita heni na namo? Baibul etomu: “Iehova ese taunimanima iboudiai lalodia e tahudiamu, bona lalo-hata bona lalo-hadai iboudiai na dibana.” (1 Sisiga 28:9 ba duahia.) Bema ita ese ta itaiamu eda plan, kara, o lalohadai baita sensi na ḡau badana, namona na Iehova baita noia baine duruda senisi baita kara. Hari na nega namona siboda baita heḡaeḡae, gabeai bae vara hahetohodia baita hanaidia totona. Ḡau ta ese oi basine koumu na namo, to maino negana na ba ḡaukaralaia namonamo.