1-2. 1 Timoteo 6:20 ai, Timoteo ese dahaka baine karaia be namo?

NEGA momo iseda kohu badadia na ma haida imadia ai ta atodiamu. Heḡereḡere, reana eda moni na bank ai ta atomu. Unu ta kara tomamu, badina dibada eda moni na basine boiomu o ta ese basine henaoamu. Una ese e hahedinaraiamu ita na mai dibada dahaka dainai tau ta imana ai kohu badadia na ma haida imadia ai atoa.

² Mani 1 Timoteo 6:20 ba duahia. Paulo ese Timoteo e hadibaia, ia ese e abia harihari ḡauna ginigunana binai: Ia na mai dibana Dirava ena gwauhamata taunimanima totodia be dahaka. Bona Timoteo e abia harihari ḡauna iharuana binai: Ia na ‘hereva baine harorolaia’ bona ‘evanelia tauna ena ḡaukara baine karaia.’ (2 Tim. 4:2, 5, NWT) Paulo ese ia e hamaoroa Dirava ese e heni harihari ḡaudia na baine gimadia. Timoteo heḡereḡerena, ita danu harihari ḡaudia haida ta abi. Unu harihari ḡaudia be dahaka? Bona dahaka dainai Iehova ese e heni harihari ḡaudia baita gimadia na namo?

3-4. Dahaka dainai hereva momokanidia na harihari ḡaudia na heheto?

³ Iehova ese Baibul amo hereva momokanidia na ita e henida. Ini hereva momokani na harihari ḡaudia badina be ita e hadibadamu edena dalai Iehova turana ai baitala bona edena dalai baita moale. Unu hereva momokani baita abi dae bona baita badinadia neganai, ita ese hahediba koikoidia bona matabodaḡa karadia iboudiai baita dadaraidia.​—1 Kor. 6:9-11.

⁴ Hereva momokani na harihari ḡauna badina ma ta binai: Iehova ese hereva momokani na “ia e tahuamu taudia” eiava manau taudia sibodia mo e henidiamu. (Heb. 11:6) Manau taudia na e abia daemu, hesiai tauna mai ena kamonai bona  mai ena kara maoromaoro ese hari ina negai Baibul amo ita e hadibadamu. (Mat. 11:25; 24:45) Idia edia heduru dainai ita ese hereva momokani anidia ta lalopararalaimu, una na hahenamo badana.​—Her. 3:13, 15.

5. Iehova ese ita be dahaka e henida danu?

⁵ Iehova ese ita e henida hahenamo ma ta binai: Ia sivaraina bona ena gwauhamata iboudiai na ma haida baita hadibalaidia. (Mat. 24:14) Unu sivarai na mai anidia bada, badina una ese taunimanima e durudiamu Iehova ena bese ai baela bena mauri hanaihanai bae abia. (1 Tim. 4:16) Herevana haroro ḡaukara na ede baita habadaia toma, to hari ina negai ita na haroro ḡaukara hereadaena ta duruamu. (1 Tim. 2:3, 4) Momokani, Dirava ida ta ḡaukara heboumu na hahenamo badana!​—1 Kor. 3:9.

6. Asie gima taudia haida ediai be dahaka e vara?

⁶ Timoteo ena negai, Kristen taudia haida na Dirava ida e ḡaukara hebouva hahenamona na se laloa bada. Dema be ina tanobada ḡaudia e ura heni bada dainai Paulo e rakatania. (2 Tim. 4:10) Fugelo bona Heremogene be haroro ḡaukara e rakatania badina e gari, asie ura Paulo e abia daḡedaḡena na idia ediai baine vara. (2 Tim. 1:15) Humenaio, Alesana, bona Fileto be aposteit taudia ai ela, bona hereva momokani e rakatania. (1 Tim. 1:19, 20; 2 Tim. 2:16-18) Mani a laloa, ini taunimanima na gunaguna lauma dalana ai e goadava, to gabeai idia ese harihari ḡaudia na e haboiodia.

7. Satana be ededia dalai ita e koida tohomu?

⁷ Satana be edena dalai ita e tohoadamu Iehova e heni ḡaudia baita dadaraidia totona? Satana ena koikoi karadia haida aita herevalai. Ia ese TV, muvi, Internet, niuspepa, buka, bona magasin amo ita laloda e hadiburaia tohomu, unu amo Iehova bona ena taravatu baita dadaraidia. Ia ese lalo-ani herevadia bona daḡedaḡe karadia amo ita e hagaridamu, unu amo haroro ḡaukara baita hadokoa. Bona ia na e uramu aposteit taudia edia “kavakava herevadia” baita kamonai henidia, unu amo hereva momokani baita rakatania.​—1 Tim. 6:20, 21.

8. Tadikaka Daniel ena ekspiriens amo dahaka o dibamu?

⁸ Bema nahuada basita tohomu, taina ruana hereva momokani baita rakataniamu. Daniel ena ekspiriens mani aita laloa. * Ia eto: “Laḡanigu 10 neganai, lau ese video games na hamatamaia. Matamanai be video games namodia. To gabeai, egu video games iboudiai vada daḡedaḡe bona demoni ḡaudia.” Unu negai, dina ta ta ai, ia ese hora 15 na video game ai e haore kavava. Daniel eto:  “Sibogu na itaiava unu video games bona nega na ḡaukaralaia kerereva dainai launa Iehova amo na daudauva. To, lalogu ai na gwauva Baibul ena taravatu na basina badinadia.” Una dainai, bema nahuada basita tohoamu, eda moale karadia daidiai, hereva momokani baita rakatania dibamu. Bema una be varamu, reana Iehova ese ita e henida harihari ḡaudia danu vada baita haboiomu.

9. 1 Timoteo 1:18, 19 ai, Paulo ese Timoteo be daika ida e haheḡereḡerea?

⁹ Mani 1 Timoteo 1:18, 19 ba duahi. Paulo ese Timoteo na soldia ta ida e haheḡereḡerea, bona ia e hagoadaia ‘tuari namona baine tuarilaia.’ Una na dia tuari korikori, lasi, to lauma tuarina. Ededia dalai Kristen taudia na soldia na heheto? Keriso ena soldia taudia ese dahaka kara bae hahedinarai na namo? Paulo ena haheitalai amo baita dibamu ḡaudia 5 mani aita herevalai. Unu ese ita be durudamu hereva momokani baita dogoatao auka totona.

10. Dirava baita lalokau henia bada badina be dahaka?

¹⁰ Dirava ibadinana ba goadalaia. Soldia namona ese biaguna e badinaiamu. Ia na be tuari goadamu e lalokau heniamu tauna o e laloa bada ḡauna baine gimaia totona. Paulo ese Timoteo e hagoadaia Dirava ibadinana karana mo baine goadalaia. (1 Tim. 4:7) Dirava e lalokau henia badamu bona e badinaiamu tauna ese hereva momokani na be dogoatao aukamu.​—1 Tim. 4:8-10; 6:6.

11. Treinin namona baita abia badina be dahaka?

¹¹ Treinin namona bavabia. Namona na soldia ta ese treinin namona baine abia, unu amo be goadamu bona ena maduna be huaia namonamomu. Timoteo na lauma dalanai e goadava badina Paulo ena sisiba e badinaia, heḡereḡere ura dikadia iboudiai e heautanidia, kara namodia e ḡava, bona tadikaka taihu e bamodia. (2 Tim. 2:22) Momokani, treinin na mai anina bada. Ura dikadia ena tuari ai baita kwalimu totona, namona na treinin namona baita abia. (Roma 7:21-25) Danu, kara gunadia baita dadarai bona kara matamatadia baita kara totona, treinin namona baita abia. (Efe. 4:22, 24) Nega haida baita hesikumu danu, to baita hekwarahi hebou gabudia baitala, unu amo tadikaka taihu baita bamodia.​—Heb. 10:24, 25.

12. Baibul baita ḡaukaralaia dalana be ede baita hanamoa toma?

¹² Soldia ese ena weapons o tuari kohudia iḡaukaralaidia daladia baine diba namonamo. Unu baine kara toma totona, nega iboudiai baine praktis be namo. Una heḡereḡerena, Dirava ena Hereva iḡaukaralaina dalana baita diba namonamo be namo. (2 Tim. 2:15) Unu dala haida be eda hebou gabudia ai baita dibadiamu. To bema ita na ta uramu ma haida lalodia baita veri hereva momokani bae laloa bada, nega iboudiai siboda ese Baibul baita stadilaia na namo. Dirava ena Hereva amo iseda abidadama baita hagoadaia be namo. Dina ta ta ai Baibul baita duahia. Bena ta duahimu ḡaudia na baita lalohadailaidia loulou bona pablikeisin ai baita hetahulaidia, unu amo Dirava ena Hereva baita lalopararalaia namonamo bona baita badinaia. (1 Tim. 4:13-15) Unu amo Baibul amo ma haida baita hadibadia namonamomu. Anina na Baibul siri ta baita duahia namonamo. Badina ta uramu idia ese una siri anina bae lalopararalaia namonamo bona bae badinaia. Nega iboudiai eda personal Baibul stadi program o schedule baita badinaia, unu amo Baibul iḡaukaralaina dalana baita diba namonamo bona ma haida baita durudia namonamomu.​—2 Tim. 3:16, 17.

13. Heberu 5:14 ai, dahaka dainai namo bona dika toadia baita dibadia be namo?

 ¹³ Namo bona dika toadia ba dibadia. Soldia ese dika e itaiamu neganai, baine komu na namo. Ita ese dika toadia idauidau baita diba danu be namo, unu amo dika baita hanaia o basita hekwakwanai. (Her. 22:3; Heberu 5:14 ba duahia.) Heḡereḡere, namona na moale karadia (recreation o entertainment) maorodia baita abi hidi. Nega momo, television program bona muvi ai matabodaḡa karadia idauidau e hedinaraimu. Ita na dibada Dirava ese matabodaḡa karadia iboudiai e inai henidiamu bona kara unuhetomadia e karamu taudia na sibodia e hahedikamu bona ma haida e hadikadiamu. Karaharaga, moale karadia dikadia baita dadarai badina kara unuhetomadia ese Dirava ta lalokau heniamu karana na bae hamanokaia diba.​—Efe. 5:5, 6.

14. Daniel ese video game edia dika e dibadia ena namo be dahaka?

¹⁴ Paragraf 8 ai tame herevalaia tadikakana, Daniel, ese daḡedaḡe bona demoni video game edia dika na e dibaia matama. Ia ese Watchtower Library ai heduru e tahua, badina e ura una kara baine hadokoa. Bena dahaka e vara? Ia ese video game dikadia e hadoko. Bona ia ida e gadara hebouva taudia e dadaraidia. Daniel eto: “Una video game na hadokoa murinai, lau na mai egu nega murimuri ai ḡau ma haida baina kara bona kongrigeisin taudia baina bamodia diba.” Hari, Daniel na painia ḡaukara e karaiamu bona ia na elda ta.

15. Dahaka dainai sivarai koikoidia baita dadarai be namo?

¹⁵ Namona na aposteit taudia edia koikoi herevadia edia dika baita dibaia, Timoteo e kara heḡereḡerena. (1 Tim. 4:1, 7; 2 Tim. 2:16) Heḡereḡere, reana aposteit taudia ese iseda tadikaka be sivarailaidia koikoimu eiava Iehova ena orea ladana be hadikaiamu. Koikoi hereva unuhetomadia ese eda abidadama baine hamanokaia diba. Namona be aposteit taudia edia koikoi herevadia baita dadarai. Dahaka dainai? Badina unu sivarai koikoidia e haripiumu taudia “lalodia e kereremu bena hereva momokani vada e rakatanimu taudia.” Idia na e uramu “henanadai bona hepapahuahu” bae hamatama. (1 Tim. 6:4, 5) Bona idia na e uramu edia hahedika herevadia bona koikoi karadia baita abi dae, bena iseda tadikaka baita dadaraidia.

16. Ita laloda bae hadibura ḡaudia be dahaka, bona baita dadaraidia na namo?

 ¹⁶ Lalomu bae hadibura ḡaudia ba dadaraidia. Timoteo na “Keriso Iesu ena tuari tauna namona na heto,” badina ia na haroro ḡaukara sibona mo e atoa gunava, bona ia na se ura moni ḡaukara o kohu ese lalona bae hadiburaia. (2 Tim. 2:3, 4) Timoteo heḡereḡerena, ita na asita uramu kohu o moni ese laloda bae hadiburaia. Iehova ilalokau henina karana, o Dirava ena Hereva iura henina karana, o taunimanima ma haida baita durudia urana na “taḡa ena koikoi siahuna” ese baine hadikaia diba. (Mat. 13:22, NWT) Namona na iseda mauri basita hametaua, to iseda nega bona goada idoinai ida Dirava ena Basileia baita durua.​—Mat. 6:22-25, 33.

17-18. Iseda lauma dalana bae hadikaia ḡaudia be ede baita dadaraidia toma?

¹⁷ Ba heḡaeḡae bena kara ta ba karaia haraḡa. Nega bada lalodiai soldia na plan e karamu, unu amo dika negana ai kara ta baine karaia haraḡa diba. Bema ita na ta uramu Iehova ese e henida ḡaudia baita gimadia, namona na dika negadiai, kara ta baita karaia haraḡa. To dahaka ese ita baine duruda diba? Nega bada lalodiai plan baita kara, bena dika negana ai ita na mai dibada dahaka baita kara.

¹⁸ Haheitalai ta mani a laloa: Nega momo draiva na e hadibadiamu fire extinguishers o lahi habodo ḡaudia na edia motuka ai bae uda kau. Dahaka dainai? Bema lahi baine vara, idia ese bae habodoa haraḡa. Ita danu nega bada lalonai baita heḡaeḡae guna, unu amo dika negadiai kara ta baita karaia haraḡa​—heḡereḡere bema Intanet ta ḡaukaralaiamu, o muvi ta o TV program ta itaiamu lalonai, matabodaḡa laulauna, o daḡedaḡe laulauna, o aposteit taudia edia sivarai ta baine hedinarai taku, ita ese baita dadaraia haraḡa. Bema hekwakwanai ta do se vara lalonai baita heḡaeḡaemu, ita ese eda lauma dalana baita gimaia haraḡamu bona nega iboudiai Iehova matanai kara maorona baita karaiamu.​—Sal. 101:3; 1 Tim. 4:12.

19. Bema Iehova ese ita e henida ḡaudia baita gimadiamu, dahaka hahenamo baita davarimu?

¹⁹ Iehova ese ita e henida ḡaudia na baita gimadia​—ḡaudia bini, Dirava ena Hereva momokanidia bona ma haida baita hadibadia ḡaukarana. Unu baita kara tomamu neganai, laloda mamina be namomu, eda mauri baita moalelaiamu, bona mai moaleda ida ma haida baita durudiamu Iehova bae dibaia totona. Bona Dirava ese baine duruda, ita e henida ḡaudia baita gimadia totona.​—1 Tim. 6:12, 19.