1-2. Peroveta tauna Hagai ese edena heude-heude karana iseda negai baine vara e herevalaia?

“MINITI haida lalodiai, stoa bona bildin gunadia na e kohu.” “Taunimanima iboudiai na e gariva . . . Taunimanima haida na e gwa una na miniti rua lalodiai e vara. Lauegu ai, una na vaitani hora momo lalodiai e vara.” Unu hereva na laḡani 2015 ai Nepal ai e vara tano mareremarere amo e roho mauri taudia haida edia hereva. Bema emu ai dikadika unuhetomana ta be varamu, basio laloa boio haraḡa dibamu.

² To ina harihari ita na tano mareremarere idauna ta ta mamiamu, una na dia siti o hanua tamona mo e haheudeamu. To, bese iboudiai e haheudediamu bona laḡani momo lalodiai una na e varamu. Una heude-heude karana na peroveta tauna Hagai ese e perovetalaia, eto: “Iehova Sabaota ini e gwau tomamu: Asi vanahana guba bona tanobada bona davara bona tano kaukauna baina haheude-heudedia lou.”​—Hag. 2:6.

3. Edena dalai Hagai ese e gwauraia heude-heude karana na dia tano mareremarere ta heḡereḡerena?

³ Hagai ese e gwauraia heude-heude karana na dia hari ina negai e varamu tano mareremarere heḡereḡerena, unu tano mareremarere ese dika mo e havaramu. To, Hagai ese e gwauraia heude-heude karana be namo e havaraiamu. Iehova na e gwa: “Bese iboudiai baina haheude-heudedia, bena bese iboudiai edia taḡa na bae siaidia mai, bena ina dubu na baina hahairaia ḡuḡuru.” (Hag. 2:7) Hagai ena negai e nohova taudia ediai una peroveta herevana anina be dahaka? Bona hari ita eda negai una anina be dahaka? Unu henanadai baita herevalaimu  bona baita dibamu edena dalai hari ina negai bese iboudiai e haheude-heudedia ḡaukarana baita durua.

4. Dahaka dainai Iehova ese ena taunimanima ediai peroveta tauna Hagai e siaia?

⁴ Peroveta tauna Hagai na Iehova ese ḡaukara badana ta e henia. Una do se vara neganai e vara ḡaudia mani aita lalo. Hagai na laḡani 537 B.C.E. ai Babulono amo Ierusalem e lou lao tauna ta. Ierusalem e lou lao murinai, unu abidadama taudia ese maoromaoro Iehova ena ruma o dubu badina e haginia. (Esr. 3:8, 10) To se daudau, hekwakwanai ta e vara. Daḡedaḡe karana dainai, e lalomanoka bona ḡaukara na e hadokoa. (Esr. 4:4; Hag. 1:1, 2) Una dainai laḡani 520 B.C.E. ai, Iehova ese Hagai e siaia baine durudia bona baine hagoadadia, unu amo dubu ihaginina ḡaukarana bae haḡuḡurua. *​—Esr. 6:14, 15.

5. Dahaka dainai Hagai ena hereva ese Dirava ena taunimanima e hagoadadia?

⁵ Hagai ese e gwauraia herevana ese Iuda taudia e hagoadadia edia abidadama Iehova enai bae hagoadaia. Peroveta tauna na mai goadana ida ini hereva amo e lalometauva Iuda taudia e hagoadadia, eto: “A boga auka! Iehova Sabaota na e tomu, A ḡaukara, badina be lau na umui ida.” (Hag. 2:4) Ina hereva “Iehova Sabaota” ese idia na e hagoadadia. Iehova ena aneru oreana lalonai tuari taudia na momo herea, una dainai Iuda taudia na bae kwalimu totona Iehova enai bae tabekau na namo.

6. Hagai ese e gwauraia heude-heude karana amo dahaka e vara?

⁶ Iehova ese Hagai e siaia Iuda taudia baine hamaorodia Ia ese bese iboudiai baine haheude-heudedia. Una matahanai ese dubu e haginiava taudia e hagoadadia badina Iehova ese Parasa​—una negai tanobada idoinai e lohiaiava besena​—baine udeudea. Una dainai dahaka baine vara? Ḡau ginigunana na, Dirava ena taunimanima ese dubu ihaginina ḡaukarana bae haorea. Bena, idau bese taudia na idia ida una e haginia lou dubuna ai Iehova bae tomadiho henia. Una hereva ese Dirava ena taunimanima na e hagoadadia bada!​—Sek. 8:9.

7. Hari ina negai ita be edena ḡaukara ta duruamu? A herevalaia.

⁷ Hari ina negai Hagai ena peroveta herevana anina be dahaka ita edai? Iehova ese bese iboudiai na ma e udeudediamu, bona hari ia ese ita danu e ḡaukaralaidamu una ḡaukara baita karaia. Mani ina e vara ḡauna aita laloa: Laḡani 1914 ai, Iehova ese Iesu Keriso na iena guba Basileia Pavapavana ai e halaoa. (Sal. 2:6) Una Basileia e gini sivaraina na sivarai dikana tanobada e lohiaiamu taudia ediai. Una anina na “idau bese edia nega”​—Iehova ese tanobada ai e abidia hidi bae lohia tauna ta na lasi negana​—na de ore. (Luka 21:24) Iehova ena taunimanima na una e diba neganai, laḡani 1919 amo, idia ese e hahedinaraia taunimanima edia helaro tamona na Dirava ena Basileia. Una “Basileia sivaraina namona” e harorolaiamu karana ese tanobada idoinai e hamarerea.​—Mat. 24:14.

8. Salamo 2:1-3 heḡereḡerena, bese momo ese una sivarai be ede e laloa toma?

⁸ Taunimanima ese una sivarai be ede e laloa toma? Momo ese e dadaraia. (Salamo 2:1-3 ba duahi.) Tanobada besedia na e badu. Idia na asie ura Iehova ese e abia hidi Lohiana  bae abia dae. Idia na e laloamu ita ese ta harorolaiamu Basileia sivaraina na dia “sivarai namona.” Gavamani haida ese eda haroro ḡaukara na e taravatua! Ena be tanobada besedia e lohiadiamu taudia momo na e gwaumu Dirava e hesiai heniamu, to asie uramu edia dagi bae rakatani. Iesu ena negai e nohova lohia taudia heḡereḡeredia, hari ina negai lohia taudia ese Iesu e badinaiamu taudia e daḡedaḡe henidiamu karana amo Iehova ese e Horoa Tauna e inai heniamu.​—Apos. 4:25-28.

9. Ena be taunimanima na asie uramu bae kamonai, to Iehova be dahaka baine kara?

⁹ Ena be taunimanima na asie uramu bae kamonai, to Iehova be dahaka baine kara? Salamo 2:10-12 ai haerena na ina: “Pavapava e, ba aonega; tanobada lohiamui e, ba diba. Iehova ba toma henia diho mai garimui, bona mai heude-heudemui ida. Ia aena palapaladia ba harahudia, baine badu henimui bena dala ai ba mase na garina; badina be ena badu e vara haraḡamu. Ia e abidadama heniamu taudia be nanamo.” Iehova ese ia e inai heniamu taudia ediai dala e kehoamu. Lalodia bae haidau bona Iehova ena Basileia bae abia dae diba. To, nega na da be oremu. Ita na ina nega oromana ena “dina gabediai ta nohomu.” (2 Tim. 3:1; Isa. 61:2) Hari na taunimanima ese hereva momokani bae dibaia bona abi hidi maorona bae karaia haraḡa negana.

10. Hagai 2:7-9 ai, bese iboudiai baine haheude-heudedia ḡaukarana ese taunimanima haida be ede e durudia tomamu?

¹⁰ Hagai na e peroveta Dirava ese bese iboudiai baine haheude-heudedia, una kara ese taunimanima haida na e durudiamu. Ia na e gwa una heude-heude karana dainai, “bese iboudiai edia taḡa [kudou-maoro taudia]” na baema Iehova bae tomadiho henia. * (Hagai 2:7-9 ba duahi.) Isaia bona Mika danu e peroveta “dina gabediai” una na baine vara.​—Isa. 2:2-4; Mika 4:1, 2.

11. Tadikaka ta na Basileia sivaraina e kamonaia matama neganai dahaka e kara?

 ¹¹ Tadikaka Ken, hari headquarter ai e ḡaukaramu, na tanobada e hamarereamu sivarai namona e kamonai neganai, e karaia ḡauna mani aita laloa. Laḡani 40 gunanai, Basileia sivaraina e kamonaia matama negana na doini e laloatao ḡoevaḡoevamu. Ken na e gwa: “Dirava ena Hereva amo hereva momokani na kamonai matama neganai, na moale badina na diba ita na ina nega oromana ena dina gabedia lalonai ta nohomu. Dirava ena lalonamo bona mauri hanaihanai baina abia totona, ina tanobada dikana baina rakatania bona Dirava ena kaha ai baina gini auka na namo. Iehova na ḡuriḡuri henia bena maoromaoro unu na kara toma. Tanobada na heautania bona Dirava ena Basileia, basine marere diba ḡauna, ena hegima karana na abia dae.”

12. Edena dalai ini dina gabediai Iehova ena lauma dubuna na hairai amo e honu?

¹² Momokani Iehova ese ena taunimanima na e hanamodiamu. Ini dina gabediai, ta itaia Ia e tomadiho heniamu taudia edia namba na e bada herea. Laḡani 1914 ai ita na tausen haida mo. Hari Dirava e tomadiho heniamu taudia na 8 milion mai kahana, bona laḡani ta ta ai milion momo na e maimu ita ida Memorial hebouna ta karaiamu. Unu amo Iehova ena lauma dubuna ariarana tanobada ai​—o tomadiho ḡoevana ai​—“bese iboudiai edia taḡa” o kudou-maoro taudia momo herea na e vareaimu. Idia ese edia kara e haidaumu dainai, Iehova ladana na e hahelaḡaiamu.​—Efe. 4:22-24.

13. Eda namba e tubumu karana ese ededia peroveta herevadia ma haida e haḡuḡurumu? (Rau 1 ai laulau ba itaia.)

¹³ Eda namba e tubumu karana ese peroveta herevadia ma haida e haḡuḡurumu, heḡereḡere ta na Isaia karoa 60 ai. Siri 22 ai e gwaumu: “Gabe tauna na iduhu ta ai bainela, bona maraḡi-maraḡina na bese badana mai goadana ai bainela. Lau binai Iehova; negana korikorina ai lau ese baina havaraia haraḡa.” Tomadiho ḡoevana ai taunimanima edia namba e bada e laomu dainai, ḡau namona ta e vara. Ini “bese idauidau edia taḡa” o taunimanima na mai edia diba bona ura ida “Basileia sivaraina namona” iharorolaina ḡaukarana e  duruamu. Una dainai, Isaia ese e gwauraia, “Basileia idau-idau ratadia” o edia diba na Iehova ena taunimanima ese e ḡaukaralaimu. (Isa. 60:5, 16) Ini dava bada tadikaka bona taihu edia heduru dainai, haroro ḡaukara na tano 240 lalodiai e karaiamu, bona pablikeisin na gado 1,000 mai kahana ai e halasimu.

14. Hari taunimanima ese dahaka abi hidi bae kara na namo?

¹⁴ Ina dina gabediai bese iboudiai e haheude-heudediamu karana ese taunimanima e doridiamu abi hidi ta bae karaia. Idia be Dirava ena Basileia be duruamu o ina tanobada ena gavamani be abidadama henidiamu? Una na taunimanima iboudiai ese bae karaia abi hidina. Ena be Iehova ena taunimanima na e nohomu tanona ena gavamani ena taravatu e badinamu, to idia na tanobada ena politikol karadia amo e gini sirimu. (Roma 13:1-7) E dibamu Dirava ena Basileia sibona ese taunimanima edia hekwakwanai baine haorea. Una Basileia na dia ina tanobada ḡauna.​—Ioa. 18:36, 37.

15. Apokalupo bukana ese e hahedinaraia Dirava ena hesiai tauna na ia ibadinana karana ai, dahaka hahetoho badana be abiamu?

¹⁵ Apokalupo bukana ai Dirava ena hesiai taudia ese ina dina gabediai Dirava ibadinana karana ai be davariamu hahetohona e herevalaia. Una hahetoho karana ese ita na be tohoda bada hereamu. Ina tanobada ena politikol oreadia na be uramu idia baita tomadiho henidia bona se uramu idia bae durudia taudia na be daḡedaḡe henidiamu. (Apok. 13:12, 15) Idia ese ‘taunimanima iboudiai kikina badana, taḡa taudia bona ogoḡami taudia, ura kwalimu taudia bona e ḡuidia taudia, na toa ta be henidiamu, imadia idibadia ai eiava bagudia ai be karamu.’ (Apok. 13:16) Idaunegai hesiai taudia ediai toa ta e karaiava, una ese e hahedinaraiava idia biagudia be daidia. Una heḡereḡerena, iseda negai taunimanima danu laulau dalanai toa ta be abiamu imadia ai eiava bagudia ai. Edia lalohadai bona kara ese be hahedinaraimu idia na politikol oreadia e badinadiamu bona e durudiamu.

16. Dahaka dainai hari Iehova ta badinaiamu karana baita hagoadaia na namo?

¹⁶ Ita ese una toa baita abia bona politikol gavamanidia baita durudia, eiava? Una toa basie abiamu taudia na hekwakwanai idauidau bona dika be davarimu. Apokalupo bukana na ma e gwa: “Ta basine hoihoi diba, hari toa . . . e abia tauna mo sibona.” (Apok. 13:17) To Dirava ena taunimanima na mai dibadia Dirava ese Apokalupo 14:9, 10 ai e gwauraia toana bae abia taudia ediai dahaka be karamu. Una toa na basie abia daemu, to imadiai ina be toreamu, “Iehova ena.” (Isa. 44:5) Hari na nega maorona baita hahedinaraiamu Iehova ta badinaiamu karana na goada. Bema unu baita kara tomamu, Iehova na mai moalena ida be gwaumu, ita na ia ena!

17. Iehova ena haheauka karana ai dahaka baita laloatao na namo?

¹⁷ Ini dina gabedia lalodiai Iehova na deme haheauka daudau herea. Se uramu ta baine mase. (2 Pet. 3:9) Ia ese taunimanima iboudia na nega e henidiamu bae helalo-kerehai bona abi hidi maorona bae karaia. To iena haheauka na mai hetoana. Abi hidi maorona basie karaiamu taudia ediai be varamu ḡauna na Mose ena negai Farao enai e vara ḡauna heḡereḡerena. Iehova ese Farao e hamaoroa, eto: “Imagu bama toia roro, siahuna korikorina amo bama hahisimui, boma mase ore. A ina dainai vada na hamaurimu: egu siahu baina haheitalaimu bena tanobada idoinai lau ladagu bae heatolaia helaoreana.” (Eso. 9:15, 16) Bese iboudiai  na be dibamu Iehova sibona mo Dirava korikorina. (Esek. 38:23) Una be ede be vara tomamu?

18. (a) Hagai 2:6, 20-22 ai edena heude-heude karana ma ta e herevalaia? (b) Ede ta diba tomamu Hagai ena hereva na vaira negai baine ḡuḡuru?

¹⁸ Hagai ena nega amo, laḡani handred haida muridiai, aposetolo Paulo na lauma helaḡa ena hahekau henunai e hahedinaraia Hagai 2:6, 20-22 ena hereva na vaira negai baine ḡuḡuru. (Ba duahi.) Paulo na e gwa: “A harihari eme gwau hamata, etomu, Nega gabena ai dia taunimanima mo to guba danu baine haheude-heudea. Una hereva ‘nega gabena’ anina binai: baine haheude-heude ḡaudia baine abi oho, e kara ḡaudia bunu; a basie heude-heude ḡaudia na do bae mia.” (Heb. 12:26, 27) Ina heude-heude karana na dia Hagai 2:7 ai e herevalaia ḡauna heḡereḡerena, ina heude-heude karana anina na, Iehova ena lohia dalana e dadaraiamu taudia, Farao heḡereḡerena taudia, na baine haoredia vaitani.

19. Dahaka be basine heude-heude, bona ede ta diba tomamu?

¹⁹ Dahaka be basine heude-heudemu, o basine hekokimu? Paulo na ma e gwa: “Se heude-heudemu basileiana na tame abia dainai, Dirava baita hanamoa, bona baita toma henia diho mai hematauraida ida bona mai garida ida, ia ihamoalena.” (Heb. 12:28) Oibe, ina heude-heude dokona murinai, Dirava ena Basileia mo basine mareremu. To be ginimu ela bona hanaihanai!​—Sal. 110:5, 6; Dan. 2:44.

20. Taunimanima be edena abi hidi bae karaia bona ede baita durudia toma?

²⁰ Nega na basita haorea! Taunimanima ese abi hidi ta bae karaia na namo: Idia be tanobada ese e gwauraiamu maurina bae maurilaia, dokona na mase, eiava edia mauri na Dirava ena ura heḡereḡerenai bae maurilaia, dokona na mauri hanaihanai? (Heb. 12:25) Eda haroro ḡaukara amo taunimanima baita durudia diba una abi hidi badana ai edena bae abia hidi. Namona na kudou-maoro taudia baita durudia Dirava ena Basileia ena kaha ai bae gini. Bona namona na eda Lohiabada Iesu ena hereva baita laloatao, eto: “Basileia sivaraina namona na tanobada idoinai bae harorolaia, bese iboudiai ihadibalaidia; bena dokona vada baine kau.”​—Mat. 24:14.