1. Lalokau tauna ta orea amo e atoa lasimu neganai haida be ede e hemami tomamu?

O LALOKAU heniamu tauna ta be kongrigeisin amo e atoa lasi, a? Lalohisihisina na bada herea! Taihu ta ladana Hilda na e gwa: “Adavagu ida laḡani 41 a headava murinai e mase neganai, na laloa una na dika herea. * To natugu merona ese kongrigeisin, adavana bona natuna e rakatanidia neganai, na mamia una na dika, dika herea!”

2-3. Salamo 78:40, 41 heḡereḡerena, Iehova ena hesiai taudia ese ia e rakataniamu neganai, ia be ede e hemami tomamu?

² Iehova ena ruma bese amo aneru haida ese ia e rakatania neganai, Iehova na e lalohisihisi bada herea! (Iuda 6) Bona Ia ese e lalokau henidiava taudia, Israel besena, e gwau-edeede loulouva neganai, mani iena hisihisi a laloa. (Salamo 78:40, 41 ba duahi.) Namona na ba diba Tamada lalokauna guba ai danu e hisihisimu bema ta lalokau heniamu tauna ta ese ia e rakataniamu. O mamiamu hisihisina na e lalopararalaiamu. Bona ia na mai ena lalokau ida oi bavabia diba hahegoadana bona heduruna be henimumu.

³ Bema ta na Iehova ihesiai henina karana e hadokoamu neganai, Iehova ena heduru baita abia totona baita kara diba ḡaudia na ina atikol ai be herevalaimu. Danu kongrigeisin amo e atodia lasi taudia edia ruma bese baita durudia daladia baita herevalaimu. To ḡau ginigunana na, baita dadaraia lalohadaina aita herevalaia.

4. Tama sina momo edia hemami be ede bamona natu ese Iehova e rakataniamu neganai?

⁴ Natu lalokauna ta ese Iehova e rakataniamu neganai, tama  sina na e lalomu dahaka ḡau ma haida bema kara, natudia bema durua hereva momokani ai dounu bema noho. Tadikaka ta ladana Luke, na natuna merona orea amo e atoa lasi neganai, e gwa: “Una na lauegu kerere. Hanuaboi ai asina mahuta namonamova. Nega haida na taiva bona kudougu na e hisihisiva.” Hekwakwanai unu bamona enai e vara taihuna ta ladana Elizabeth, na nega momo e lalova: “Lau be dahaka na kara kerere? Na mamiava natugu na hereva momokani na asina hadibaia namonamo.”

5. Ta ese Iehova e rakataniamu be daika ena kerere?

⁵ Namona na baita helalotao Iehova ese ura kwalimu na ita ta ta e henida. Anina na ita ta ta baita abi hidi ia baita badinaia o lasi. Ena be matamata taudia haida tamadia sinadia na dia orea ai, to abi hidi e kara Iehova bae hesiai henia, bona doini Iehova e hesiai heniamu. Haida be maraḡidiai tamadia sinadia ese Baibul ena hahekau herevadia amo e hadibadia, to gabeai e bada neganai Iehova e rakatania. Ita ta ta na abi hidi baita kara Iehova baita hesiai henia. (Ios. 24:15) Una dainai, tama sina, bema natumui na Iehova e rakatania bona o lalohisihisimu, namona na ina lalohadai na basio abia, ‘Ina na lauegu kerere’!

6. Tama o sina ese Dirava e rakataniamu neganai, natu be ede e hemami tomamu?

⁶ Nega haida, tama o sina ese hereva momokani bona ena ruma bese e rakatanidiamu. (Sal. 27:10) Tama sina edia haheitalai e lalo badamu natudia ediai, una na auka herea. Taihu ta ladana Esther, tamana na orea amo e atoa lasi, na e gwa: “Nega momo na taiva badina na laloparara ia na dia hereva momokani amo e raka siri mo, to ia na lalona e hadaia Iehova baine rakatania. Tamagu na na lalokau heniamu dainai, orea amo e atoa lasi neganai, nega momo ia dainai na lalohekwarahiva, bona kudougu e hetahava.”

7. Tamadia o sinadia murimuri ai e atodia memerodia bona kekenidia be Iehova ese ede e lalodia tomamu?

⁷ Memero kekeni e, bema tamamu o sinamu na murimuri ai e atoa, ai ese emu hisihisi danu a mamiamu! Namona na ba diba Iehova danu emu hisihisi na mai dibana. Ia ese e lalokau henimumu bona ia o badinaiamu karana na e laloa badamu, bona ai tadikaka taihu ese danu a lalomu badamu. Danu, ba helalotao, oi tamamu o sinamu ena abi hidi na dia oiemu kerere. Matamanai tame herevalaia heḡereḡerena, Iehova ese taunimanima iboudiai na ura kwalimu e henidia sibodia abi hidi bae kara. Una dainai e gwauhamata bona e bapatiso taudia ta ta ese “ena maduna ena maduna bae hua” na namo.​—Gal. 6:5.

8. Emu lalokau tauna ta na Iehova baine lou henia negana o nariamu lalonai, dahaka ba kara diba? (Maua ladana “ Iehova Ba Lou Henia” ba itaia danu.)

⁸ O lalokau heniamu tauna ta na Iehova e rakataniamu neganai, oi na bo uramu dina ta ia ese Iehova baine lou henia. To una nega o nariamu lalonai dahaka ba kara diba? Namona na ba hekwarahi emu abidadama ba hagoadaia. Unu bo kara tomamu neganai, oi na haheitalai namona bo hahedinaraiamu emu ruma bese taudia ma haida ediai bona reana murimuri ai e atoa tauna enai danu. Bona goada bo abimu emu lalohisihisi ba haheaukalaia totona. Mani ba kara diba ḡaudia haida aita herevalai.

9. Ededia dalai Iehova ena amo goada baita abi diba? (Maua ladana “ Bema O Lalokau Henia Tauna ta Iehova E Rakatania, Bae Hagoadamu Siridia” ba itaia danu.)

⁹ Emu abidadama ihagoadanai o karamu ḡaudia na hanaihanai ba kara. Oi sibomu emu abidadama bona emu ruma bese taudia ma haida edia abidadama ba hagoadaia na mai anina bada. Edena dalai unu ba kara toma? Hanaihanai Dirava ena Hereva ba duahia bona ba laloa dobu, bona Kristen heboudia baola karana amo Iehova amo goada bavabi. Joanna, tamana bona kakana kekenina ese hereva momokani e rakatania, na e gwa: “Baibul ese e herevalaidia taudia, Abigail, Eseta, Iobu, Iosef, bona Iesu sivaraidia na duahimu neganai egu lalohekwarahi na e oremu. Edia haheitalai ese e hagoadagumu bona e durugumu lalohadai maorodia baina abi. Eda original songs ese danu e hagoadagumu.”

10. Salamo 32:6-8 ese lalometau baita haheaukalaia dalana be ede e hahedinaraia toma?

¹⁰ Emu lalohekwarahi ḡaudia na Iehova ba hamaorolaia. O Lalometaumu negadiai, dounu ba ḡuriḡuri henia. Eda lalokau Diravana ba noia baine durumu emu hekwakwanai na ia ese e lalomu heḡereḡerenai ba laloa, bona ‘baine hadibamu, bona emu raka dalana baine hadibalaimu.’ (Salamo 32:6-8 ba duahi.) Momokani, Iehova enai emu hemami korikori ba gwauraia hedinarai na mai hisihisina. To, Iehova ese kudoumu ena hisihisi na e lalopararalaia ḡoevaḡoevamu. Ia ese e lalokau henimu badamu bona e uramu kudoumu ai e miamu ḡaudia ba hamaorolaia.​—Eso. 34:6; Sal. 62:7, 8.

11. Heberu 12:11 heḡereḡerena, dahaka dainai Iehova ese mai lalokau ida e henimu matahakani baita abia dae? (Maua ladana “ Orea amo Ta e Atoa Lasimu Karana Na Iehova Ena Lalokau Karana” ba itaia danu.)

¹¹ Elda ese e karaia abi hidina baita abia dae. Ta murimuri ai e atoamu karana na Iehova ese ena orea e haheauamu dalana ta. Mai  lalokauna ida matahakani e henimu badina na ita iboudai eda namo dainai, kerere e karaia tauna danu. (Heberu 12:11 ba duahia.) Elda taudia edia hahemaoro karana be maumauraiamu tauna na se uramu kerere tauna ena kerere baine gwaurai hedinarai tauna. E vara ḡaudia iboudiai na asi dibada. Aonega karana na, baita abia dae una hahemaoro e karaia elda taudia na e hekwarahi Baibul ena hahekau herevadia e badina bona “Iehova” totona hahemaoro e karaia.​—2 Sis. 19:6.

12. Haida na Iehova ena matahakani dalana e abia dae dainai, dahaka namo e davari?

¹² Elda taudia ese o lalokau heniamu tauna murimuri ai e atoa karana bo abia daemu neganai, ia bo duruamu Iehova baine lou henia. Elizabeth, matamanai tame herevalaia taihuna na e gwa, “Natumai merona basia hereva henia bona basia bamoa na auka herea. To, Iehova e lou henia neganai, ia na e gwa murimuri ai e atoa na maoro. Gabeai, ia na e gwa ḡau momo e diba dainai e moale. Na laloparara Iehova ena matahakani na baina lalodia bada.” Adavana Mark na e gwa: “Natumai na eto orea ai baine lou neganai, e hamaorogu ia e ura baine lou badina ta na ai ese Iehova ena taravatu a badinadia dainai. Na moalemu badina Iehova ese e durumai baia badinaia totona.”

13. Dahaka ese baine durumu diba emu lalohisihisi ba haheaukalaia?

¹³ Emu hemami e lalopararalaiamu taudia ba hereva henidia. Lalohadai maorona bavabia totona oi bae durumu diba lo Kristen taudia ba bamodia. (Her. 12:25; 17:17) Joanna, matamanai tame herevalaia taihuna, na e gwa: “Na mamiava lau na sibogu. To, bae durugu diba tadikaka bona taihu na hereva henidiava karana ese e durugu na haheauka.” To, kongrigeisin ai bema haida ese be hamaoromumu herevadia ese emu hemami be hadikaiamu be ede bamona?

14. Dahaka dainai ‘baita haheauka heheni’ bona eda ‘dika baita hegwau tao heheni’ na namo?

¹⁴ Tadikaka taihu ediai haheauka karana ba hahedinaraia. Momokani, dia taunimanima iboudiai na hereva maorodia be gwauraimu. (Iak. 3:2) Ita iboudai na dia ḡoḡoevadae, una dainai haida na e hekwarahimu hereva maorodia bae gwaurai, eiava e gwauraimu herevadia ese oi na be hahisimumu. Aposetolo Paulo ena sisiba ba laloatao, e gwa: “Ba haheauka heheni. Ta ese bamona baine habadelaia negana ai, emui dika ba hegwau tao heheni.” (Kol. 3:13) Taihu ta, varavarana na orea amo e atoa lasi, na e gwa: “Iehova ena heduru amo tadikaka edia dika na gwautao badina e urava bae hagoadagu to reana se dibava edia hereva ese e hahisiguva.” Kongrigeisin be dahaka bae kara Iehova dounu e abidadama heniamu ruma bese taudia bae durudia totona?

15. Edia lalokau tauna ta orea amo e atoa lasi ruma bese taudia be dahaka ese baine durudia diba?

¹⁵ Dounu Iehova e badinaiamu ruma bese taudia na ba kara namo henidia. Taihu ta ladana Miriam, na taihuna orea amo e atoa lasi murinai, hebou ilao henina karana dainai  e lalohekwarahiva. Ia na e gwa: “Tadikaka taihu ese bae gwaurai herevadia dainai na gariva. To, tura namodia ese egu hisihisi na e mamia danu bona taihugu na asie gwau henia. Idia daidiai na tenkiumu, badina egu lalometau negana ai na mamiava lau na dia sibogu.” Taihu ma ta na e gwa: “Natumai merona orea amo e atoa lasi murinai tadikaka taihu ese e hagoadamaiva. Haida na e gwau hedinaraiva asi dibadia dahaka bae gwaurai. Lau ida a taiva eiava revareva e tore heniguva. Edia kara ese e durugu bada herea!”

16. Edena dalai kongrigeisin na hanaihanai bae heduru?

¹⁶ Dounu Iehova e badinaiamu ruma bese taudia na baita durudia hanaihanai. Idia ese hari emu lalokau bona hahegoada bae mamia na namo. (Heb. 10:24, 25) Nega haida, murimuri ai e atodia taudia edia ruma bese na e mamiamu kongrigeisin ese idia danu se bamodiamu. Asita uramu unu baine vara toma! Tamadia sinadia hereva momokani e rakatania matamata taudia baita hanamodia bona baita hagoadadia na namo. Maria, adavana na murimuri ai e atoa bona ruma bese e rakatania, na e gwa: “Tadikaka taihu haida na ema egu ruma ai e nanadu bona e durumai ruma bese stadi baia karaia. Egu hisihisi na e mamia bona a tai hebou. Haida ese lau e gwau heniguva neganai, idia na lau daigu ai e herevava. E hagoadagu bada herea!”​—Roma 12:13, 15.

17. Edena dalai elda taudia na mai edia lalokau ida heduru bae heni?

¹⁷ Elda taudia e, dala idauidau ai Iehova dounu e badinaiamu ruma bese taudia ba hagoadadia. Umui na mai emui maduna ma ta, una na edia lalokau taudia ese Iehova e rakatania tadikaka bona taihu, taudia ba ha’lo. (1 Tes. 5:14) Hebou vairadiai bona muridiai ba hagoadadia. Edia ruma ai ba vadivadidia bona idia ida ba ḡuriḡuri hebou. Haroro ḡaukara ai idia ida ba ḡaukara hebou, eiava nega haida emu ruma bese tomadiho lalonai ba boiridia. Elda taudia ese e lalohisihisimu tadikaka taihu bae bogadia hisi, bae lalokau henidia, bona bae lalodia bada na namo.​—1 Tes. 2:7, 8.

18. Petro Iharuana 3:9 heḡereḡerena, Dirava be e uramu kerere tauna be dahaka baine kara?

¹⁸ Iehova na “se uramu ta baine mase; e uramu iboumui ai ba helalo kerehai.” (2 Petro  3:9 ba duahia.) Ena be ta na kara dika badana baine karaia, to Dirava enai ena mauri na dounu mai anina bada. Mani a laloa, Iehova ese Natuna lalokauna ena boubou amo kara dika taudia iboudiai e hoidia. Iehova na mai ena lalokau ida unu bamona taudia na e tahudiamu baine durudia Ia bae lou henia totona. Ia na e uramu idia na unu bae kara toma, Iesu ese e gwauraia boio merona parabolena amo una ta dibamu. (Luka 15:11-32) Hereva momokani e rakatania taudia momo na gabeai Tamadia lalokauna Iehova e lou henia. Bona kongrigeisin ese mai edia lalokau ida e abidia dae. Elizabeth, matamanai ta herevalaia taihuna ese una moale na e mamia natuna e vareai lou neganai. Una e laloa neganai, e gwa: “Ai na a moalemu badina momo ese e hagoadamai baia haheauka badina nega ta natumai na be loumu.”

19. Dahaka dainai dounu Iehova baita abidadama henia diba?

¹⁹ Hanaihanai Iehova baita abidadama henia diba. Nega iboudiai e henidamu heduru herevadia na iseda namo totona. Ia na hariharibada tauna bona Tama lalokauna, bona ia e lalokau heniamu bona e tomadiho heniamu taudia iboudiai na e lalokau henidia badamu. Ina na ba diba, Iehova ese emu lalohisihisi negana ai oi na basine rakatanimumu. (Heb. 13:5, 6) Matamanai ta herevalaia tadikakana, Mark na e gwa, “Iehova ese ai na se rakatanimai. Hekwakwanai ta davarimu neganai ia na ita dekedekedai.” Iehova ese hanaihanai eda goada e hereaia siahuna be henidamu. (2 Kor. 4:7) Oibe, ena be o lalokau heniamu tauna ta ese Iehova baine rakatania, to oi na dounu Iehova bavabidadama henia bona bavabia dae ia na baine lou diba.