1-2. (a) Hereva Lada-isidia 16:31 heḡereḡerena, tadikaka taihu iahudia be ede baita lalodia toma? (b) Ina atikol ai ededia henanadai baita haerelaimu?

UNITED STATES ena park ta ai reana tano ai diamond haida bo davarimu. To, unu diamond na do asie haḡoevadia bona asie utudia, idia na una gabu nadidia ma haida heḡereḡeredia. Una dainai, raka hanai taudia ese be itadiamu neganai, basie dibamu unu na dava bada nadidia.

² Unu diamond heḡereḡeredia, tadikaka taihu iahudia na dala haida ai dava bada kohudia na heto. Dirava ena Hereva ese iahu huidia na havava ḡauna ida e haheḡereḡerea. (Hereva Lada-isidia 16:31 ba duahia; 20:29) To, nega haida unu iahudia na baita lalodia boio dibamu. Iahudia e lalodia badamu matamata taudia ese mai anina bada ḡaudia be dibamu, una ese taḡa korikori na e hereaia. Ina atikol ai, henanadai toi baita haerelaimu: (1) Dahaka dainai Iehova ese mai edia abidadama iahudia e lalodiamu dava bada kohudia na heto? (2) Dahaka dainai Iehova ena orea lalonai iahudia bae noho na mai anina bada? Bona (3) dahaka baita kara diba edia haheitalai amo diba baita abi?

3. Salamo 92:12-15 heḡereḡerena, dahaka dainai Iehova ese mai edia abidadama iahudia na e lalodia badamu?

³ Mai edia abidadama iahudia na Iehova Dirava ese e lalodia badamu. Ia na mai dibana idia be taunimanima ede bamodia, bona edia kara namodia na e lalodia badamu. Ia na be moalemu, bema iahudia ese laḡani momo lalodiai edia hesiai  ḡaukara amo e diba ḡaudia, na matamata taudia bae hadibalaidia. (Iobu 12:12; Her. 1:1-4) Danu, Iehova ese edia haheauka karana na e laloa badamu. (Mal. 3:16) Edia mauri lalonai hekwakwanai idauidau e davari, to dounu Iehova e abidadama henia. Edia vaira nega helarona na goada, dia hereva momokani e diba matama negana heḡereḡerena. Bona Iehova ese e lalokau henidiamu, badina ena be idia na de buruka “sene audia” na heto, to dounu Ia ladana na e harorolaiamu.​—Salamo 92:12-15 ba duahi.

4. Ededia hereva ese tadikaka taihu iahudia baine hagoadadia diba?

⁴ Bema oi na do buruka o laomu, namona na bavabia dae Iehova ese guna o kara hesiai ḡaukaradia na e lalotaomu. (Heb. 6:10) Oi ese haroro ḡaukara na mai emu goada ida o durua dainai, Tamada gubai na e moalemu. Hekwakwanai idauidau o haheaukalaiva, Baibul ena kara maoromaoro taravatudia o badinava, Iehova ena orea lalonai mai anina bada ḡaukaradia o karava, bona ma haida o hadibadiava. O ḡaukara goada Iehova ena orea ese e kara sensidia o badina. Fultaim hesiai ḡaukara e kara taudia o durudia bona o hagoadadia. Iehova Dirava ese e lalokau henimu badamu o badinaia dainai. Ia na e gwauhamata “ia e badinaiamu taudia na basine rakatanidia”! (Sal. 37:28, NWT) Ia na e gwa: “Ela bona huimui bae buruka, lau ese baina rosimui eva-eva.” (Isa. 46:4) Una dainai, basioto oi na do burukamu dainai, Iehova ena orea lalonai emu ḡaukara na da asi anina. Lasi. Oi na e lalomu badamu!

5. Iahudia be dahaka bae laloatao na namo?

⁵ Iehova ena orea lalonai iahudia na dala idauidau ai bae heduru diba. Ena be edia goada na dia guna bamona, to laḡani momo lalodiai diba bada herea e abi. Iehova ese idia na dala idauidau ai baine ḡaukaralaidia diba, guna bona hari ina nega haheitalaidia ese una e hahedinaraia.

6-7. Baibul ai ededia iahudia be Iehova e badinaia dainai ia ese e hanamodia? A herevalaia.

⁶ Baibul lalonai abidadama taudia momo sivaraidia baita duahi dibamu; idia na Iehova e  hesiai henia ela bona e buruka. Heḡereḡere, Mose laḡanina 80 bamona neganai Iehova ena peroveta ḡaukarana e karaia bona Israel besena e gunalaia. Iehova ese Daniel na dounu e ḡaukaralaia peroveta ḡaukarana baine karaia, ena be ia laḡanina na 90 e hanaia. Aposetolo Ioane danu laḡanina na 90 e hanaia to Dirava ese e ḡaukaralaia Apokalupo bukana e torea.

⁷ Baibul lalonai abidadama taudia ma haida sivaraidia na se herevalai momo bona reana taunimanima ese na basie lalodiamu. To, Iehova ese idia na e lalodia bona ia e badinaia dainai e hanamodia. Heḡereḡere, Baibul ai “kara maoromaoro tauna bona Dirava garina e gariva tauna” Simeon sivaraina na taina mo e herevalaia, to Iehova ese e laloa bada bona e henia hahenamona na, Iesu beibinai e itaia bona Iesu sinana ida ediai bae vara ḡaudia e perovetalai. (Luka 2:22, 25-35) Danu, vabu peroveta hahinena Ana aita laloa. Ena be laḡanina na 84, to “Dubu Helaḡa [na] se rakataniava.” Ia na hanaihanai hebou e laova dainai e abia hahenamona na, ia danu Iesu beibinai e itaia. Iehova enai Simeon bona Ana na dava bada kohudia na heto.​—Luka 2:36-38.

8-9. Iehova ena orea lalonai, vabu be doini dahaka e karamu?

⁸ Hari ina negai, mai edia abidadama iahudia momo na haheitalai namona matamata taudia ediai. Taihu Lois Didur ena ekspiriens mani aita laloa. Ia na laḡanina 21 ai Canada ai spesol painia ḡaukara e karaia matama. Una murinai, ia bona adavana John na laḡani momo seket ḡaukara e kara. Gabeai Canada Betele ai laḡani 20 mai kahana e ḡaukara. Lois laḡanina 58 neganai, ia bona John na e siaidia Ukraine ai hesiai ḡaukara bae karaia. Idia be dahaka e kara? Idia be e laloa idia na de buruka dainai tano ma ta ai hesiai ḡaukara basie karaia diba, a? Idia ese una asainmen e abia dae, bona John na Brens Komiti ta ai ela. John e mase bena laḡani 7 muridiai, Lois na lalona e hadaia Ukraine ai dounu hesiai ḡaukara baine karaia. Hari, Lois laḡanina na da 81, doini Ukraine Betele ai e ḡaukaramu, bona Betele taudia ese na e lalokau henia badamu.

⁹ Hari ina negai, Lois heḡereḡerena vabudia na reana be lalodia reamu, dia guna adavadia e mauriva negana heḡereḡerena, to idia na dounu mai anidia bada. Iehova ese, laḡani momo lalodiai adavadia e durudia bona doini Ia e hesiai heniamu taihudia, na e lalodia badamu. (1 Tim. 5:3) Momokani, idia ese matamata taudia danu e hagoadadiamu.

10. Tony be dahaka haheitalai namona e hahedinaraia?

¹⁰ Rumai e naridiamu abidadama iahudia na Iehova ese danu e lalodia badamu. Heḡereḡere, tadikaka ta ladana Tony, ia na iahudia e naridiamu gabunai e nohomu. August 1942 ai,  laḡanina 20 neganai, Pennsylvania, U.S.A. ai e bapatiso. Se daudau, ami ai se vareai dainai dibura ruma ai laḡani rua mai kahana e noho. Ia adavana Hilda ida ese natudia raruosi na hereva momokani ai e habadadia. Laḡani momo lalodiai, Tony na kongrigeisin toi lalodiai kongrigeisin igunalaina tauna (hari e gwauraiamu elda oreana ena kodineita) ena maduna e huaia bona seket hebou e naridiava. Ia na dibura ruma e laova hebou bona Baibul stadi e karava. Ena be Tony laḡanina na 98, to dounu Iehova e hesiai heniamu. Ena goada heḡereḡerenai hesiai ḡaukara e karamu bona ena kongrigeisin e duruamu!

11. Sibodia basie henari diba tadikaka taihu iahudia be edena dalai baita lalodia bada?

¹¹ Sibodia basie henari diba tadikaka taihu iahudia be edena dalai baita lalodia bada? Namona na elda taudia ese bae durudia bae hebou bona bae haroro totona. Ita ta ta ese baita lalodia bada karana na, baita vadivadidia o baita noidia video call amo baita nohobou. Ena be sibodia basie henari diba iahudia edia noho gabuna amo edia kongrigeisin na daudau, basita lalodia boio to baita lalodia bada. Bema basita lalodiamu, baita lalodia boio dibamu. Idia haida ediai na be aukamu eiava basie uramu ediai e varamu ḡaudia bae herevalai. To bema nega baita atomu idia ida baita herevaherevamu bona Iehova ena orea lalonai e moalelai ḡaudia be herevalaimu neganai baita hakalamu, una ese be hagoadadamu.

12. Iseda kongrigeisin lalonai be daidia baita davaridiamu?

¹² Eda kongrigeisin ai danu mai edia abidadama tadikaka taihu iahudia baita davaridiamu. New Jersey, U.S.A. ai, taihu ta ladana Harriette na laḡani momo Iehova e hesiai henia. Gabeai ela natuna kekenina ida e hanoho. Ena kongrigeisin matamatanai tadikaka taihu na nega e ato ia e dibaia, bona e davaria ia na taihu namona ta. Ia ese laḡani 1920 lalodiai hereva momokani e dibaia matama neganai, haroro ḡaukara ai e davari sivaraidia amo e hagoadadia. Unu negadiai, e ha harorova neganai, ena ise huri barasina danu e abia kauva, badina mai dibana nega ta pulis ese be abiamu. Momokani, laḡani 1933 ai ia na nega rua, dibura ai wiki ta e noho. Unu negadiai, ia adavana, dia Witnes tauna, ese natudia tatoisi e naridia. Momokani, mai edia abidadama iahudia, Harriette heḡereḡerena, na baita lalodia bada!

13. Iehova ena orea lalonai iahudia bae noho ena namo be dahaka?

¹³ Iehova ena orea lalonai tadikaka taihu iahudia edia ḡaukara na mai anina bada. Iehova ese dala idauidau ai idia bona iena orea e hanamoa daladia na e ita. Guna e kara kereredia amo mai anina bada ḡaudia e diba. Ba lalodia idia edia amo “aonega” na ranu bamona e lohilohi daemu, bona edia ekspiriens amo ḡau namodia momo bo dibamu. (Her. 18:4) Bema nega bo atomu idia bo dibadiamu, emu abidadama na be goadamu bona ḡau haida bo dibamu!

14. Deuteronomi 32:7 ese matamata taudia e hagoadadiamu dahaka bae kara?

¹⁴ Namona na nega bavato iahudia ida ba herevahereva. (Deuteronomi 32:7 ba duahia.) Ena be matadia na de valahuvalahu, metairametaira e rakamu, bona gadodia na dia gogoada, to edia ura na dounu goada, bona Iehova vairanai idia na “lada namona” e abia. (Koh. 7:1) Iehova ese e lalodia badamu badina na ba laloatao. Hanaihanai ba  matauraidia. Elisaia ba tohotohoa na namo. Ena be mai dibana kahirakahira Elia ese be rakataniamu, to dounu e ura ia ida baine noho. Nega toi Elia e hamaoroa: “Basina rakatanimu.”​—2 Han. 2:2, 4, 6.

15. Ededia henanadai be iahudia baita henidia diba?

¹⁵ Bo hahedinaraiamu iahudia na o lalodia badamu bema mai hematauraimu ida bo henanadaimu. (Her. 1:5; 20:5; 1 Tim. 5:1, 2) Heḡereḡere ini ba henanadai toma: “Oi matamatamu ai, dahaka dainai o abia dae ina na hereva momokani?” “Emu ai e vara ḡaudia ese edena dalai e durumu Iehova turana ai ola?” “Mai moalemu ida Iehova ena hesiai ḡaukara dounu ba karaia totona dahaka ese e durumu?” (1 Tim. 6:6-8) Bena edia sivarai e gwauraimu neganai ba hakala.

16. Iahu bona eregabe be herevahereva heboumu neganai, dahaka hahenamo be abi dibamu?

¹⁶ Iahu bona eregabe be herevahereva heboumu neganai, raruosi be hahegoada hehenimu. (Roma 1:12) Umui eregabe taumui na Iehova ese ena abidadama hesiai taudia e lalodia badamu karana bo laloa badamu, bona iahudia na be mamiamu idia na o lalokau henidiamu. Bona mai moaledia ida Iehova ese e hanamodia dalana be herevalaidiamu.

17. Dahaka dainai baita gwau dibamu abidadama tadikaka taihu iahudia na mai hairaidia?

¹⁷ Hairai na ta e buruka e laomu neganai e oremu, to Iehova matanai ia e abidadama heniamu iahudia edia hairai na e bada e laomu. (1 Tes. 1:2, 3) Dahaka dainai? Badina laḡani momo lalodiai, Dirava ese ena lauma helaḡa amo e hadibadia dainai edia kara e haidau, bona kara namodia e hahedinaraimu. Tadikaka taihu iahudia baita dibadia namonamomu, baita matauraidiamu, bona idia edia amo diba baita abimu neganai, dava bada ḡaudia heḡereḡeredia baita lalodiamu!

18. Atikol gabenai dahaka baita herevalaimu?

¹⁸ Kongrigeisin be goadamu badina na, dia eregabe ese iahudia bae lalodia bada karana dainai mo, to iahudia ese eregabe bae lalodia bada karana amo danu. Atikol gabenai, iahudia ese kongrigeisin lalonai eregabe taudia bae lalodia bada dalana baita herevalaiamu.