1. Malaki 3:16 ena hereva heḡereḡerena, Iehova be edena buka e toreamu, bona una buka lalonai be dahaka e hetore?

 LAḠANI tausen tausen lalodiai, Iehova na buka hereadaena ta e toreamu. Witnes tauna ginigunana, Abel *, bona ia murinai e vara abidadama taudia ma haida ladadia na una buka ai e hetore. (Luka 11:50, 51) Una nega amo ema hari, Iehova na una buka ai lada milion momo vada e toredia. (Malaki 3:16 ba duahia.) Baibul ese una buka na e gwauraia “mauri bukana.”​—Apok. 3:5; 17:8.

2. Daidia ladadia be mauri bukana ai e hetore, bona edena dalai Dirava ese ladada na una buka ai baine torea diba?

² Una buka hereadaena lalonai ladadia e hetore taudia na Iehova garina e garimu, ia e tomadiho heniamu, bona ia ladana e laloa badamu taudia. Idia na mauri hanaihanai bae abia taudia. Hari ina negai, Iehova ese ladada na una buka ai be torea dibamu bema ia turana namodia ai baita laomu, bona Iesu Keriso ena boubou ḡauna baita abidadama heniamu. (Ioa. 3:16, 36) Ita iboudai ta uramu ladada na una buka ai baine hetore​—herevana eda helaro na guba ai eiava tanobada ai baita noho.

3-4. (a) Bema hari ita ladada na mauri bukana ai e hetore, anina be mauri hanaihanai baita abia dibamu, a? Anina a herevalaia. (b) Ina atikol bona atikol gabena ai dahaka baita herevalaimu?

 ³ Una anina be buka ai ladadia e hetore taudia iboudiai be mauri hanaihanai vada be abiamu, a? Iehova ese Mose e hamaorolaia herevana amo haere baita dibamu. Esodo 32:33 ai Iehova eto: “Vairagu ai vada e kara havara taudia iboudiai ladadia na egu buka amo bae heroho.” Una dainai, hari ina negai buka ai e hetore ladadia na bae heroho eiava bae hekoki diba. Baita gwa diba Iehova ese lada na pencil amo e tore guna na heto. (Apok. 3:5) To ita na ta uramu ladada na buka ai baine mia ela bona hanaihanai, vaitani Dirava ese ladada na ink pen amo e tore na heto.

⁴ Ita ese henanadai haida baita lalomu. Heḡereḡere, Dirava ese mauri bukana ai ladadia e tore taudia bona ladadia se tore taudia be Baibul ese ede e herevalaidia toma? Mauri bukana ai ladadia e hetore taudia be edena negai mauri hanaihanai be abiamu? Iehova asie dibaia bena e mase taudia be ede bamona? Idia ladadia be buka ai e hetore danu, a? Unu henanadai na ina atikol bona atikol gabena ese be haerelaimu.

DAIDIA LADADIA BE MAURI BUKANA AI E HETORE?

5-6. (a) Filipi 4:3 ena hereva heḡereḡerena, daidia ladadia be mauri bukana ai e hetore? (b) Edena negai idia ladadia na buka ai be mia hanaihanaimu?

⁵ Daidia ladadia be mauri bukana ai e hetore? Una henanadai baita haerelaia totona, ita ese grup idauidau 5 baita herevalaidiamu. Unu grup taudia haida ladadia be mauri bukana ai e hetore, a haida be lasi.

⁶ Grup namba 1 na horoa taudia, idia na Iesu ida guba ai bae lohia hebou. Hari idia ladadia be mauri bukana ai e hetore, a? Oibe. Aposetolo Paulo ese ia ida e ḡaukara hebouva taudia ediai e gwauraia herevana heḡereḡerena,  horoa taudia ladadia na hari mauri bukana ai e hetore. (Filipi 4:3 ba duahia.) To, horoa taudia ese Dirava bae badinaia hanaihanai be namo. Bena idia ese toa ginigabena bae abia murinai, idia ladadia na buka ai vada be mia hanaihanaimu. Una toa na idia do asie mase neganai e abiamu eiava hisihisi badana do se matamaia neganai be abiamu.​—Apok. 7:3.

7. Apokalupo 7:16, 17 ena hereva heḡereḡerena, edena negai hutuma bada herea ladadia na mauri bukana ai be mia hanaihanaimu?

⁷ Grup namba 2 na mamoe idaudia o hutuma bada herea. Hari idia ladadia be mauri bukana ai e hetore, a? Oibe. Aramagedono amo bae roho mauri murinai, ladadia be dounu buka ai e hetore, a? Oibe. (Apok. 7:14) Iesu na e gwa ini taunimanima hutuma ese “mauri hanaihanai” bae abia. (Mat. 25:46) To, Aramagedono amo be roho maurimu taudia na dia maoromaoro mauri hanaihanai vada be abiamu. Buka ai idia ladadia na vaitani pencil amo be hetoremu na heto. Iesu Ena Lohia Laḡanidia 1,000 lalodiai, ia ese idia na “baine reḡudia” bona “baine hakaudia” ela bona ‘e lohilohimu mauri ranudia’ bae davari. Bena Keriso bona Iehova bae badinadia hanaihanai taudia ladadia na buka ai be mia hanaihanaimu.​—Apokalupo 7:16, 17 ba duahi.

8. Dirava ese daidia ladadia be buka ai se torea, bona idia ediai be dahaka be varamu?

⁸ Grup namba 3 na goat o nanigosi hetomana taudia, idia na Aramagedono ai be hamasediamu. Dirava ese idia ladadia na buka ai se torea. Iesu na e gwa idia na bae “mase ela bona hanaihanai.” (Mat. 25:46, NWT) Paulo na e gwa, idia na “mase hanaihanai bae abia.” (2 Tes. 1:9; 2 Pet. 2:9) Lauma helaḡa e hahisiamu eiava kara dikadia asie hadokomu taudia danu Dirava ese be hamasedia vaitanimu, anina na, basie tore isi loumu o basie mauri hanaihanaimu. (Mat. 12:32; Mar. 3:28, 29; Heb. 6:4-6) Namona na tanobada ai be tore isi loumu grup rua aita herevalaidia.

MASE AMO BAE TORE ISI LOU TAUDIA

9. Aposetolo Edia Kara 24:15 heḡereḡerena, ededia grup rua be tanobada ai be tore isi loumu, bona unu grup rua edia idau be dahaka?

⁹ Baibul ese danu grup rua​—idia na tanobada ai be tore isi loumu bena be mauri hanaihanaimu​—e herevalaidia, ginigunana be “kara maoromaoro taudia” bona iharuana be “asi edia kara maoromaoro taudia.” (Aposetolo Edia Kara 24:15 ba duahia.) “Kara maoromaoro taudia” na e mauriva negadiai Iehova isiaina e lao heni goadagoadava. To, “asi edia kara maoromaoro taudia” be Iehova isiaina asie lao heni goadagoadava. Idia na Dirava ena kara maoromaoro taravatudia heḡereḡeredia asie nohova. Unu grup ruaosi na be tore isi loumu dainai, baita gwau dibamu Dirava ese idia ladadia be buka ai e tore, a? Haere baita diba totona, unu grup ruaosi mani aita herevalaidia.

10. Dahaka dainai “kara maoromaoro taudia” bae tore isi lou, bona idia haida be dahaka be karamu? (Ina magasin ena rau 26 ai “Taunimanima Edia Henanadai” ba itaia danu.)

¹⁰ “Kara maoromaoro taudia” na grup namba 4. Idia do asie mase neganai, ladadia na mauri bukana ai vada e hetore. To idia e mase neganai, Dirava ese ladadia be buka amo e kokidia, a? Lasi, badina idia na doini “e maurimu” na heto eiava Iehova ese e lalodiataomu. Iehova “na dia mase taudia edia Dirava, to mauri taudia edia; badina be taunimanima iboudiai na ia dainai e maurimu.” (Luka 20:38) Una anina na kara maoromaoro taudia na tanobada ai bae mauri lou neganai, vaia ladadia na buka ai e hetore, eiava baita gwau dibamu Dirava ese ladadia na pencil amo e tore guna na heto. (Luka 14:14) Idia haida na be  tore isi loumu bena “tanobada idoinai lohiadia ai” be laomu.​—Sal. 45:16.

11. “Asi edia kara maoromaoro taudia” ladadia na buka ai bae hetore totona, idia ese dahaka bae diba guna be namo?

¹¹ Grup namba 5 be, “asi edia kara maoromaoro taudia.” Idia e mauriva negadiai, readia Iehova ena taravatu na asie dibadia dainai, kara maoromaoro taravatudia heḡereḡeredia asie nohova. Dirava ese idia ladadia buka ai se tore badina be una. To ia ese be hatoredia isi loumu, badina e uramu ladadia na buka ai baine toredia. Momokani, “asi edia kara maoromaoro taudia” ese heduru bada bae abia be namo. Badina idia haida na do asie mase neganai, kara dika rohorohodia e karava. Una dainai, idia ese Iehova ena taravatu ibadinadia daladia bae diba be namo. Una baine vara totona, Dirava ena Basileia ese tanobada ai hahediba ḡaukara bada hereana be havaraiamu.

12. (a) Asi edia kara maoromaoro taudia be daidia ese bae hadibadia? (b) Heduru bae dadarai taudia iboudiai ediai be dahaka be varamu?

¹² Asi edia kara maoromaoro taudia be daidia ese bae hadibadia? Hutuma bada herea bona tore isi lou kara maoromaoro taudia. Asi edia kara maoromaoro taudia ladadia na buka ai bae hetore totona, namona na Iehova turana ai baela bona edia mauri na Dirava enai bae gwauhamatalaia. Asi edia kara maoromaoro taudia ihadibadia ḡaukarana na Iesu Keriso bona e horodia taudia ese guba amo be itaiamu. (Apok. 20:4) Una heduru bae dadarai taudia iboudiai na bae hamasedia​—ena be idia laḡanidia na 100 bae hanaia. (Isa. 65:20) Iehova bona Iesu ese taunimanima kudoudia na e itamu bona tanobada matamatana bae hadikaia toho taudia iboudiai na be hamasedia oremu.​—Isa. 11:9; 60:18; 65:25; Ioa. 2:25.

MAURI TORE ISI LOUNA BONA HAHEMAORO TORE ISI LOUNA

13-14. (a) Guna ta laloava, Ioane 5:29 ai Iesu ena hereva anina be dahaka? (b) To dahaka baita laloatao be namo?

¹³ Tanobada ai bae tore isi lou taudia na Iesu ese danu e herevalaidia. Heḡereḡere, ia na e gwa: “Nega ta be maimu, gara ai e nohomu taudia iboudiai ese ia gadona bae  kamonaia bona bae raka lasi. Kara namodia e karava taudia na mauri tore-isina bae abia, bona kara dika rohorohodia e karava taudia na hahemaoro tore-isina bae abia.” (Ioa. 5:28, 29, NWT) Iesu ena hereva anina be dahaka?

¹⁴ Guna ta laloava, mase taudia bae tore isi lou murinai bae kara karadia na Iesu ese e herevalai; anina na, mase taudia haida bae tore isi lou bena kara namodia bae kara, a mase taudia haida be bae tore isi lou bena kara dikadia bae kara. To baita laloatao, Iesu na e gwa “Kara namodia e karava taudia na mauri tore-isina bae abia,” bona “kara dika rohorohodia e karava taudia na hahemaoro tore-isina bae abia.” Una anina na, taunimanima do se mase bona se tore isi lou neganai e karava kara namodia o kara dikadia na Iesu ese e herevalai. Bona una na maoro, badina tanobada matamatana ai taunimanima ese kara dikadia na basie kara loumu. To, “mauri tore-isina” bona “hahemaoro tore-isina” anidia be dahaka?

15. Daidia be “mauri tore-isina bae abia,” bona dahaka dainai?

¹⁵ Kara maoromaoro taudia​—idia na do se mase neganai kara namodia e karava taudia​—na “mauri tore-isina bae abia” badina idia ladadia na idaunegai buka ai vada e hetore. Una anina na Ioane 5:29 (“kara namodia e karava taudia” bae tore isi lou) bona Aposetolo Edia Kara 24:15 (“kara maoromaoro taudia” bae tore isi lou) na ḡau tamona e herevalaia. Unu siri na Roma 6:7 ena hereva heḡereḡerena, e gwa: “Mase tauna na kara dika ena amo vada e roho mauri.” Kara maoromaoro taudia edia mase ese edia kara dika gunadia na vada e rohodia, to idia ese Dirava e badinaia sivaraidia hari se boio. (Heb. 6:10) Vaia, kara maoromaoro taudia bae tore isi lou neganai, ḡau badana na Dirava bae badinaia hanaihanai, unu amo idia ladadia na buka ai bae mia hanaihanai.

16. Asi edia kara maoromaoro taudia ese “hahemaoro tore-isina” bae abia anina be dahaka?

¹⁶ Kara dika rohorohodia e kara muridiai e mase taudia be ede bamona? Ena be edia mase ese edia kara dika gunadia na vada e rohodia, to idia mauridia ai Dirava isiaina na asie lao heni. Mauri bukana ai idia na asi ladadia na heto. Ioane 5:29 (“kara dika rohorohodia e karava taudia” bae tore-isi lou) bona Aposetolo Edia Kara 24:15 (“asi edia kara maoromaoro taudia” bae tore-isi lou) na ḡau tamona e herevalaia. Idia na “hahemaoro tore-isina” bae abia. * Una anina na Iesu ese be itaiamu idia ese Dirava ena taravatu e badinamu eiava lasi. (Luka 22:30) Eiava idia ladadia buka ai bae hetore be namo eiava lasi. Bema idia ese edia kara dikadia gunadia bae rakatanidia bona edia mauri na Iehova enai bae gwauhamatalaia, una nega ai mo, Iehova ese idia ladadia na buka ai baine torea diba.

17-18. Tanobada ai bae tore isi lou taudia iboudiai ese dahaka bae kara na namo, bona Apokalupo 20:12, 13 ai ina hereva “kara” ese dahaka e herevalaiamu?

¹⁷ Kara maoromaoro taudia bona asi edia kara maoromaoro taudia bae tore isi lou neganai, ḡau badana na laḡani 1,000 lalodiai buka matamatadia lalodiai e hetore taravatudia iboudiai bae badinadia. Aposetolo Ioane ese matahanai ai e itaia ḡauna na ini e herevalaia toma: “Mase taudia kikina badana na itadia, terono vairanai gigini; bona buka vada e hekeho. Bena buka ta ma e kehoa, mauri bukana; bona mase taudia na e hahemaoro henidia, edia kara buka ai e tore heḡereḡeredia.”​—Apok. 20:12, 13.

¹⁸ Mase amo bae tore isi lou taudia be ededia “kara” daidiai bae hahemaoro henidia? Idia  do se mase neganai e karava karadia daidiai bae hahemaoro henidia, a? Lasi! Baita laloatao, idia edia mase ese edia kara dika gunadia na vada e rohodia. Apokalupo 20:12, 13 (“edia kara”) na mase taudia edia kara gunadia se herevalaimu. To, una na reana tanobada matamatana ai idia ese be karamu karadia e herevalaimu. Una negai Noa, Samuel, David, bona Daniel ese Iesu Keriso bona ena boubou iabidadama henina dalana bae dibaia be namo. Bema unu bamona, anina na asi edia kara maoromaoro taudia ese ḡau momo herea bae dibadia be namo!

19. Una heduru namona bae dadaraia taudia ediai be dahaka be varamu?

¹⁹ Una heduru namona bae dadaraia taudia ediai be dahaka be varamu? Apokalupo 20:15 ese e hamaorodamu: “Tau ta bema asi ladana mauri bukana, ia na lahi gohuna ai bema tahoa dobi.” Oibe, Dirava ese idia na be hamasedia vaitanimu. Una dainai, ita na ta uramu Dirava ese ladada na mauri bukana ai baine tore bona bae mia hanaihanai!

20. Iesu Ena Lohia Laḡanidia 1,000 lalonai, Dirava ena taunimanima be edena ḡaukara be karaiamu? (Rau 1 laulauna ba itaia.)

²⁰ Iesu Ena Lohia Laḡanidia 1,000 na moale negana! Una negai Dirava ena taunimanima ese ina tanobada ai hahediba ḡaukara bada hereana be karaiamu. To una negai danu, Iesu ese kara maoromaoro taudia bona asi edia kara maoromaoro taudia edia kara be itamu. (Isa. 26:9; Apos. 17:31) Dirava ena taunimanima ese una hahediba ḡaukarana be ede be karaia tomamu? Eda atikol gabena ese be durudamu una hahediba ḡaukarana baita lalopararalaiamu bona baita moalelaiamu.