1. Dahaka dainai taunimanima asie heabidadama hehenimu karana basita hoalaia be namo?

 SATANA ena tanobada ai, taunimanima na asi dibadia daidia be bae abidadama henidia diba. Idia ese bisnes taudia, politikol taudia, bona tomadiho igunalaina taudia edia kara na asie moalelaimu. Danu idia ese turadia, dekedia taudia, bona edia ruma taudia edia kara na asie moalelaimu. Una basita hoalaia be namo. Badina Baibul e peroveta: “Dina gabedia ai . . . , taunimanima na . . . ma haida basie badinadia; . . . ma haida ladadia bae hadika; . . . turadia edia mauri ihadikadia daladia bae kara.” Eiava baita gwa diba, taunimanima na ina tanobada ena dirava, Satana, ena kara bae tohotoho​—taunimanima ta ese Satana na basie abidadama henia dibamu.​—2 Tim. 3:1-4, NWT; 2 Kor. 4:4.

2. (a) Daidia baita abidadama henidia diba? (b) Dahaka dainai haida na reana be daradaramu?

² To, ita be Kristen tauda bona dibada Iehova na baita abidadama henia diba. (Ier. 17:7, 8) Ta dibamu ia ese ita na e lalokau henidamu bona ia ese turana na basine “rakatanidia.” (Sal. 9:10) Ita ese danu Keriso Iesu na baita abidadama henia diba badina ia na ita daidai ena mauri e heni. (1 Pet. 3:18) Bona iseda mauri ai e vara ḡaudia amo ta dibaia, Baibul ese baine hakauda namonamo diba. (2 Tim. 3:16, 17) Oibe, Iehova, Iesu, bona Baibul na baita abidadama henidia diba. To haida na reana be daradaramu, kongrigeisin ai tadikaka bona taihu be bae abidadama henidia diba eiava lasi. Bema haere na oibe, dahaka dainai idia na baita abidadama henidia diba?

3. Dahaka dainai ita na ta moalemu? (Mareko 10:29, 30)

³ Tanobada heḡeḡemadai, Iehova e tomadiho heniamu taudia iboudiai na ruma bese ta bamona. Bona ia ese ena bese lalonai ita e abida dae na mai moalena bona ena hahenamo na momo herea! (Mareko 10:29, 30 ba duahi.) Iseda tadikaka bona taihu ese danu Iehova e lalokau heniamu bona ena taravatu iboudiai e badinamu. Ena be eda gado, kastom, bona dabua toadia na dia tamodia to ta helalokau hehenimu, ena be haida na nega ginigunana ta hedavari henidiamu. Ita na ta uramu idia ida Tamada lalokauna baita imodaia bona baita tomadiho henia hebou.​—Sal. 133:1.

4. Dahaka dainai iseda tadikaka bona taihu ida lalotamona ai baita noho na ḡau badana?

⁴ Hari ina negai, iseda tadikaka bona taihu ida lalotamona ai baita noho na ḡau badana. Nega haida idia ese e durudamu eda metau haida e huamu. (Roma 15:1; Gal. 6:2) Danu, idia ese e hagoadadamu Iehova ena hesiai ḡaukara baita goadalaia bona lauma dalanai baita goada hanaihanai. (1 Tes. 5:11; Heb. 10:23-25) Mani ina aita laloa: Bema kongrigeisin ese basine gimada bona basine duruda, Satana Diabolo bona ena tanobada dikana ese ita na bae hamoruda diba. Nega na e maimu, Satana bona ia ese e biagudiamu taudia ese Dirava ena hesiai taudia na be tuari henidiamu. To una negai, ita na baita moalemu badina iseda tadikaka bona taihu ese ita na be durudamu!

5. Dahaka dainai haida na e daradaramu edia tadikaka bona taihu bae abidadama henidia totona?

⁵ To haida na e daradaramu edia tadikaka o taihu bae abidadama henidia totona, badina reana tadikaka ta ese hehuni ḡauna ta e halasia o gwauhamata ta na se hamomokania. Eiava reana tadikaka ta ena hereva o kara ese idia lalodia na e hahisia bada. Bema una e varamu, reana  ma haida baita abidadama henidia na be aukamu. To dahaka ese baine duruda, unu amo eda tadikaka baita abidadama henidia diba?

6. Edena dalai lalokau ese baine duruda tadikaka baita lalokau henidia totona? (1 Korinto 13:4-8)

⁶ Lalokau taudia ese edia tadikaka na e abidadama henidiamu. Baibul na e gwa, lalokau ese baine duruda diba ma haida baita abidadama henidia hanaihanai totona. (1 Korinto 13:4-8 ba duahi.) Haheitalai binai, 1 Korinto 13:4 na e gwa, “Lalokau na e haheauka taritarimu; lalokau na mai ena heabi-dae.” Iehova na e haheauka taritarimu, ena be nega haida eda kara dikana ta amo Dirava lalona ta hahisiamu. Una dainai, bema tadikakada edia hereva o kara amo ita e habaduda eiava e hahisida, namona na baita haheauka. Bona 1 Korinto 13:5 na e gwa: “[Lalokau na] se badu haraḡamu; ihadikalaina karadia se lalo taomu.” Ita na asita uramu tadikakada ‘ihadikalaina karadia baita lalo tao,’ bena vaira negadia ai ma baita herevalaidia lou. Lasi, Kohelete 7:9 na e gwa: “Basio badu haraḡa.” Namona na Efeso 4:26 ena hereva baita badinaia, eto: “Dina do basine diho ai emu badu baine doko”!

7. Edena dalai Mataio 7:1-5 ena sisiba ese baine duruda tadikaka baita lalokau henidia totona?

⁷ Iseda tadikaka bona taihu baita abidadama henidia badina ma ta be, Iehova ese idia na e lalokau henidiamu. Bema Dirava unu e kara tomamu bona edia kerere se lalo taomu, namona na Dirava baita tohotohoa danu. (Sal. 130:3) Momokani, tadikaka edia kara namodia baita itadia bona baita lalodia danu. (Mataio 7:1-5 ba duahi.) Lalohadai kereredia na basita abi badina lalokau na “ḡau iboudiai e abidadama henidiamu.” (1 Kor. 13:7, NWT) Una siri anina na se gwa, Iehova na e uramu kavakava taudia baita abidadama henidia danu, lasi, to una siri anina na, Dirava na e uramu e kara momokanimu taudia baita abidadama henidia. *

8. Tadikakamu bavabidadama henidia totona, dahaka ba kara be namo?

⁸ Tadikakamu bavabidadama henidia totona, ḡau haida ba kara be namo. Unu be dahaka? Idia ba bamodia, unu amo edia ura ḡaudia ba diba. Kongrigeisin heboudia ai idia ida ba herevahereva. Haroro ḡaukara ai idia ida ba ḡaukara hebou. Ba haheauka badina gabeai bo itaiamu idia na bavabidadama henidia diba. Matamanai, reana emu mauri sivaraidia haida mo bo herevalaimu ta enai, badina be harihari mo ome hedavari henia. To ia na turamu namona ai be laomu murinai, oi ese ḡau momo vada ia enai bo herevalaimu. (Luka 16:10) To oi be dahaka ba kara diba bema tadikaka ta ena kara ese lalomu e hahisia? Ia itura henina karana na basio hadokoa haraḡa to nega taina ba henia. Bona tau tamona ena kara dainai tadikaka iboudiai basio abidadama henidia na dia maoro. Iehova ena hesiai taudia namodia haida mani aita herevalaidia​—badina ena be idia lalodia na tadikaka haida ese e hahisiva, to idia ese dounu tadikaka iboudiai na e abidadama henidiava.

9. (a) Edena dalai Hana ese e hahedinaraia ia na Iehova e abidadama heniava, herevana Eli bona natuna na mai edia kerere? (b) Hana ena haheitalai ese e hadibamumu, Iehova itomadiho henina karana be ede ba laloa toma? (Laulau ba itaia.)

⁹ Nega ta ai, oi be elda ta ena kara dainai o lalohisihisi, a? Bema oibe, Hana sivaraina ba laloa. Una negai, Israel ai, Iehova itomadiho henina ḡaukaradia iboudiai na Hahelaḡa Tauna Badana Eli ese e gunalaiva. To, iena ruma taudia na  kara dikadia e karava. Ena be Eli natuna memerodia​—idia na hahelaḡa taudia danu​—na nega iboudiai matabodaḡa dika rohorohodia e karava, to ia ese natuna na se sisiba henidiava. Iehova ese Eli ena dagi na se kokia haraḡa. Herevana Eli na dounu hahelaḡa tauna, to hanaihanai Hana na dubu helaḡa e laova Dirava e ha tomadiho heniava. Lalohisihisi negana ta ai Hana e ḡuriḡuriva lalonai, Eli ese e itaia bona e laloava Hana na e kekero. Ia ese una hahine se nanadaia guna, to madi e gwau henia kava. (1 Sam. 1:12-16) Herevana Eli na unu e kara toma, to Hana e gwauhamata ia ese mero ta baine havaraia neganai, una mero na baine laohaia dubu helaḡa ai hesiai ḡaukara baine karaia bona Eli ese baine naria. (1 Sam. 1:11) Eli natuna be ede bamona? Iboudiai na Iehova ese gabeai e panisidia. (1 Sam. 4:17) To, Dirava ese Hana e hanamoa, bena ena nega korikori ai mero ta e havaraia, ladana na Samuel.​—1 Sam. 1:17-20.

10. Ena be haida ese King David e gwau-edeede heniava, to dahaka dainai David ese turana ma haida na e abidadama henidiava?

¹⁰ Nega ta ai turamu namona ta ena kavakava karana ta dainai lalomu e hisihisi, a? Bema oibe, King David sivaraina ba laloa. Ia turana ta ladana na, Ahitofel. To David natuna Absalom e ura tamana ena king dagi baine abia neganai, Ahitofel na Absalom ena gwau-edeede karana e durua. Reana David na e lalohisihisi bada herea badina ia natuna bona turana namona na unu e kara toma! To, David ese turana ma haida na dounu e abidadama henidia. Idia ta be, Husai, badina ia na se urava David e gwau-edeede heniava taudia baine durudia. David ese Husai e abidadama henia badidia na momo. Husai na David turana namona, badina nega ta ai ia sibona ena mauri se laloa to David ihamaurina dalana hari e laloa bada.​—2 Sam. 17:1-16.

11. Edena dalai Nabala ena hesiai tauna ta ese abidadama karana e hahedinaraia?

¹¹ Nabala ena hesiai tauna ta sivaraina aita laloa danu. David bona ena tuari taudia e hebogahisi dainai, idia ese Israel tauna ta ladana Nabala ena hesiai taudia e gimadia. Gabeai, David bona ena tuari taudia e hitolodia negana ta ai, David ese taḡa tauna Nabala enai aniani e noi. Nabala ese una noinoi se abia dae neganai, David na e badu dikadika bona lalona e hadaia Nabala ena ruma ai memero iboudiai baine aladia mase. Hesiai tauna ta ese una sivarai na Nabala adavana, Abigail, e hamaorolaia. Una hesiai  tauna na Nabala ena ruma ai e nohova dainai, ia na dibana Abigail ese baine hamauria diba. Una dainai, ia na se heau to e abia dae Abigail ese hekwakwanai na baine hamaoromaoroa diba. Ia ese Abigail na e abidadama henia badina dibana ia na aonega hahinena. Gabeai e vara ḡauna ese e hahedinaraia, ia ese Abigail e abidadama henia na maoro. Abigail na se gari to David e koua dainai dika ta se vara. (1 Sam. 25:2-35) Abigail ese danu David e abidadama henia badina ia dibana David na kara maorona baine karaia.

12. Edena dalai Iesu ese e hahedinaraia ia ese ena aposetolo na e abidadama henidiava, ena be nega haida idia na e kerereva?

¹² Iesu ese ena aposetolo na e abidadama henidiava, ena be nega haida idia na e kerereva. (Ioa. 15:15, 16) Iakobo bona Ioane ese Iesu enai Basileia ena dagi badana e noia neganai, Iesu na idia ese Iehova e hesiai heniava badina na se henanadailaia o edia aposetolo dagi na se kokidia. (Mar. 10:35-40) Gabeai, Iesu e dogoatao hanuaboina ai, aposetolo iboudiai ese e heautania. (Mat. 26:56) To, Iesu na dounu idia e abidadama henidiava. Iesu dibana idia na dia ḡoevadae, to ia ese idia na e “lalokau henidia ela bona dokona.” (Ioa. 13:1) Iesu na mase amo e tore isi lou murinai, ia ese ena aposetolo taudia 11 e abidia hidi taunimanima ihadibadia ḡaukarana bae gunalaia bona ena mamoe bae reḡudia. (Mat. 28:19, 20; Ioa. 21:15-17) Ia ese ini aposetolo​—dia ḡoevadae taudia​—e abidadama henidia na maoro. Idia iboudiai ese edia hesiai ḡaukara na tanobada ai e karaia ela bona e mase. Momokani, Hana, David, Nabala ena hesiai tauna, Abigail, bona Iesu ese dia ḡoevadae taudia e abidadama henidia na haheitalai namona.

13. Dahaka ese iseda heabidadama karana baine tohoa diba?

¹³ Nega ta ai, oi ese hehuni ḡauna ta na tadikaka ta o hamaorolaia to gabeai o davaria ia ese ma haida e hamaorolaidia danu, a? Una ese badu baine havaraia diba. Dina ta ai, taihu ta ese ena hekwakwanai na elda ta e hamaorolaia. To dina iharuanai, elda adavana ese taihu e rini henia baine hagoadaia totona​—toana na elda ese hehuni ḡauna na adavana e hamaorolaia danu. Dibada, taihu ese una elda na vada basine abidadama heniamu. To lasi, taihu ese heduru e tahua guna na haheitalai namona. Oibe, ia ese elda ma ta e hereva henia bona elda ese taihu e hagoadaia elda iboudiai baine abidadama henidia na namo.

14. Dahaka ese tadikaka ta e durua ma haida e abidadama henidia lou?

¹⁴ Tadikaka ta ese elda taudia rarua na laḡani momo e badu henidia bona se abidadama henidiava. To, ia ese e matauraia badava tadikakana ta ese e gwauraia herevana e laloa matama. Ini e gwa toma: “Satana hari baita inai henia, to tadikakada na basita inai henidia.” Tadikaka ese una hereva na e lalohadailaia bona e ḡuriḡurilaia murinai, ela elda raruosi ida maino e karaia.

15. Dahaka dainai haida ese tadikakadia na laḡani momo muridiai ma e abidadama henidia loumu? Haheitalai ta a gwauraia.

¹⁵ Nega ta ai oi ese hahenamo ta be o haboioa, a? Una na mai lalohisihisina. Laḡani 1930 lalodiai, Nazi Germany ai, eda ḡaukara e taravatua neganai, Grete bona sinana na Iehova ena Witnes goadadia. Grete be The Watchtower edia kope e taipiva bena tadikaka bona taihu e henidiava. To, tadikaka ese una hahenamo na Grete amo e kokia badina e kamonai ia tamana ese hereva momokani na e inai heniava bona hari be Grete tamana ese kongrigeisin ena infomeisin na daḡedaḡe taudia baine henidia garina. To Grete enai hekwakwanai ma haida e vara. World War II ai, tadikaka ese magasin edia kope haida na Grete bona sinana se henidiava bona dala ai e hedavariva negadiai madi se hereva henidiava. Una ese lalona e hahisia bada dainai, Grete na e gwa, ‘Laḡani momo unu tadikaka edia dika na asina gwautao bona asina abidadama  henidiava.’ To gabeai, ia na e laloparara Iehova ese unu tadikaka edia dika na e gwautao dainai, ia ese danu edia dika na e gwautao. *

16. Dahaka dainai baita hekwarahi iseda tadikaka bona taihu baita abidadama henidia lou totona?

¹⁶ Bema oi emu ai unu e vara toma, namona na ba hekwarahi tadikaka bavabidadama henidia lou totona. Bena taina ruana ela bona bo kwalimumu. Haheitalai ta binai: Bema aniani ta o aniamu negadia iboudiai na bogamu e hisihisimu, reana o animu ḡaudia nahuadia na bo tohomu. To, aniani dikana tamona ese emu aniani karana na basine kouamu. Una heḡereḡerena, hekwakwanai tamona ese tadikaka bona taihu ta abidadama henidiamu karana basine koua be namo, dibada idia na madi dia ḡoevadae taudia. Idia baita abidadama henidia loumu neganai, baita moalemu bona eda kongrigeisin taudia bae heabidadama heheni karana na ita ese baita hagoadaiamu.

17. Dahaka dainai abidadama karana na mai anina bada, bona atikol gabena ai dahaka baita herevalaimu?

¹⁷ Satana ena tanobada taudia be asie heabidadama hehenimu, to ita ese eda tadikaka bona taihu iboudiai be ta abidadama henidiamu badina be ta lalokau henidiamu. Ta heabidadama hehenimu dainai hari mai moaleda ida lalotamona ai ta nohomu. Danu vaira dinadiai hekwakwanai bae vara negadiai, ta abidadama henidiamu tadikakadia ese ita na be gimadamu. To bema ta ese lalomu e hahisia bada herea be ede heto? Namona na Iehova ena lalohadai bavabia, Baibul ena sisiba ba badina, tadikakamu ba lalokau henidia, bona Baibul sivaraidia amo ḡau haida ba diba. Ita ese lalohisihisi na baita hanaidia bona haida na baita abidadama henidia diba. Unu baita kara tomamu neganai, “tadikaka korikori” momo na turada ai be laomu. (Her. 18:24, NWT) To ḡau badana binai: Idia bona ita na baita heabidadama hehenimu. Atikol gabena ai baita herevalaiamu henanadaina be, iseda tadikaka bona taihu ese ita bae abidadama henida totona, dahaka baita kara be namo?