Paulo na 1 Korinto 15:8 (NWT) ai ini e gwau toma: “Bona dokonai lau egu ai danu ia na e hedinarai. Lau na vaitani sina ese e havaraia karukaru merona ta na heto.” Ina siri ai Paulo ese matahanai lalonai guba ai Iesu ena hairai e itaia bona Paulo ese ia sibona enai dahaka e vara sivaraina e gwauraia. To, siri lalonai Paulo eto ia na “sina ese e havaraia karukaru merona ta na heto” anina be dahaka? Gunaguna ita na ta laloava, una hereva anina na vaitani Dirava ese lauma dalanai Paulo na e havaraia guna, o e hatorea isi lou guna, ena be tore isi lou unu hetomadia na laḡani hanred hanred muridiai bae vara. To, ina siri anina na ai ese a stadilaia namonamo lou bena a hamaoromaoroa.

Una dainai, Paulo eto ia na “sina ese e havaraia karukaru merona ta na heto” anina be dahaka? Hereva haida anidia mani aita herevalaidia.

Ia e helalo-kerehai karana na e vara haraḡa bona ia na e hoa. Sina ese beibi e havaraia haraḡamu o nega kererena ai beibi e havaraiamu neganai, nega momo ta hoamu. Saulo (gabeai ladana na Paulo) na Damasko ela Kristen taudia baine daḡedaḡe henidia totona, bona ia na asi dibana una nega ai mase amo e tore isi lou tauna, Iesu, na matahanai ta lalonai baine itaia. Paulo e helalo-kerehai karana na ia bona ia ese baine daḡedaḡe henidia taudia ese e hoalai. Danu, ia e helalo-kerehai haraḡa karana ese ia na e hahoaia dainai matana na e kepulu, ena be nega sisina murinai matana na e namo lou.​—Apos. 9:1-9, 17-19.

Ia na “nega kererena ai” e helalo-kerehai. Grik gado herevana e hahanaia “sina ese e havaraia karukaru merona ta na heto” anina ma ta be “sina ese nega kererena ai e havaraia merona ta na heto.” Baibul ta (Jewish New Testament Commentary) na ini e gwa toma: “Ibouboudiai muridiai lau ese ia na itaia, ena be lau na nega kererena ai na vara.” Paulo e helalo-kerehai neganai, Iesu na idaunegai guba ai vada e nohova. Siri ginigunadia ai Paulo ese e herevalaidia taudia ese Iesu e tore isi lou bona guba do sela neganai idia ese Iesu be e itaia to Paulo ese Iesu be se itaia. (1 Kor. 15:4-8) Ena be Iesu ena hedinarai karana ese Paulo e hahoaia to ia ese e tore isi lou tauna Iesu na e itaia, ena be vaitani una na “nega kererena ai” na heto.

Ia na manau dalana ai iena dagi e herevalaia. Scholar haida na e gwa, Paulo ese tau ta sibona e hahemaraḡimu herevadia e ḡaukaralaidia. Bema unu bamona, anina na Paulo ese e hahedinaraia ia e abia dagina na ta ese e harihari henia hahenamona. Ia na ini e gwa toma: “Aposetolo iboudiai ese lau e hereagumu; lau na dia namo aposetolo bae gwauraigu, badina be Dirava ena ekalesia oreana na daḡedaḡe heniava. To Dirava ena harihari-bada dainai lau ini name heto.”​—1 Kor. 15:9, 10.

Una dainai, Paulo eto ia na “sina ese e havaraia karukaru merona ta na heto” neganai, reana ia ese ini e herevalaidiava: Iesu e itaia negana, eiava nega kererena ai ia e helalo-kerehai karana, eiava aposetolo iboudiai ese e hereaia tauna e matahanai karana. Herevana dahaka, to Paulo ese ia enai e vara ḡauna na e laloa bada. Badina ia sibona ese e abia dae vaitaniva, Iesu na mase amo e tore isi lou. Una dainai, Paulo ese Iesu e tore isi lou sivaraina na ma haida ediai e harorolaiava negadiai, ia ese Iesu e itaia bona una negai e vara ḡaudia na e herevalai momova.​—Apos. 22:6-11; 26:13-18.