1. Ḡaukara eiava skuli ai turada be dahaka e henanadailaimu?

 BEMA ḡaukara eiava skuli ai turamu ta ese o abi daemu ḡaudia e henanadailaimu neganai, emu hemami be ede bamona? O garimu, a? Ita momo na unu ta hemami tomamu. To idia edia henanadai amo edia lalohadai eiava e abi daemu ḡaudia baita lalopararalaimu, bona dala be kehoamu sivarai namona baita harorolaiamu. Nega haida, ta e henanadaimu badina na e uramu ita ida baine hepapahuahu. Reana unu e kara tomamu badina na haida amo ita e sivarailaida koikoi herevadia e kamonaimu. (Apos. 28:22) Danu, ita na “dina gabedia ai” ta nohomu dainai, momo na asie lalo-tamonamu bona e daḡedaḡemu.—2 Tim. 3:​1, 3.

2. Dahaka dainai manau karana na mai anina bada?

² Reana bo lalomu, ‘Bema ta na lau ese na abi daemu ḡaudia daidiai e hepapahuahumu, dahaka ese baine durugu mai gado namo ida baina hereva?’ Manau karana ese baine durumu diba. Manau tauna na se badu haraḡamu bona sibona e hebiagumu ena be haida ese e habaduamu eiava asi dibana ede baine haere toma. (Her. 16:32) To reana oi na bo lalomu unu ba kara toma na auka. Manau karana be ede ba hahedinaraia toma? Bema ta ese o abi daemu ḡaudia e hepapahuahulaimu, edena dala ai mai manaumu ida ba hereva? Bona  bema oi na tama eiava sina, edena dala ai natumu ba durudia mai manaudia ida edia abidadama bae gwauraia? Mani unu aita herevalai.

3. Dahaka dainai manau karana na lalo goada karana? (2 Timoteo 2:​24, 25)

³ Manau karana na lalo goada karana. Una kara e hahedinaraiamu tauna na hekwakwanai negadiai e lalo-mainomu. Manau na “lauma huahuana ta.” (Gal. 5:​22, 23) Greek gado ai ina hereva “manau” e ḡaukaralaia neganai, nega haida una na daḡedaḡe hosina ta e hamanadaiamu karana e herevalaiamu. Mani e hamanadaia hosina aita laloa, ia na e manada to mai goadana. To, ita taunimanima be edena dala ai baita manau bona baita lalo goada? Dirava baita noia ena lauma helaḡa amo baine duruda unu kara baita hahedinarai. Tadikaka taihu momo na unu e kara toma. Idia na haida ese e habadudia neganai manau karana e hahedinaraia, unu amo ma haida e durudia Witnes taudia ediai lalohadai maorona e abia. (2 Timoteo 2:​24, 25 ba duahidia.) Edena dala ai manau karana ba hahedinaraia?

4. Isaac ena haheitalai amo dahaka ta dibamu?

⁴ Baibul ai sivarai momo ese e hahedinaraimu manau karana na mai anina bada. Mani Isaac ena haheitalai aita laloa. Ia na Filistia tanona ta, Gerara ai e nohova neganai, Filistia taudia na e mama dainai, ia tamana ena hesiai taudia ese e ḡei ranu guridia e tahunidia. Isaac na idia ida unu ranu guri daidiai se heai, to ena ruma bese na gabu ma ta e laohaidia bona ranu guri ma haida e ḡei. (Gen. 26:​12-18) To, Filistia taudia na e gwa unu ranu guri danu idia edia. Ena be unu e vara, to Isaac na maino dalanai e kara. (Gen. 26:​19-25) Dahaka ese e durua e manau? Ia ese tamana sinana edia haheitalai namona e itaia. Ia tamana Abraham na maino daladia ai ḡau e karava bona sinana Sara na lalo manau hahinena.—1 Pet. 3:​4-6; Gen. 21:​22-34.

5. Edena haheitalai ese e hahedinaraiamu tama sina ese natudia na manau karana bae hadibalaidia?

⁵ Umui Kristen tama sina ese danu natumui na manau karana ba hadibalaidia diba. Maxence, laḡani 17 merona, mani aita laloa. Ia tamana bona sinana na mai haheaukadia ida ia e durua dainai, skuli bona haroro ḡaukara ai manau karana e hahedinaraia. Idia na e gwa: “Maxence na e laloparara, lalo goada tauna na ta ese e habaduamu neganai, ia na se badumu eiava se daḡedaḡemu.” Maxence na e manau bona e lalo goada.

6. Edena dalai ḡuriḡuri karana ese baine duruda baita manau?

⁶ Ita be dahaka baita kara bema ta na Dirava ladana e hadikaiamu eiava Baibul e gwauraia dikamu? Namona na Iehova ena lauma bona ena aonega baita noia, mai manauda ida baita hereva totona. To, bema gabeai ta laloparara e habaduda taudia na asita hereva henidia namonamo, dahaka baita kara? Namona na ma baita ḡuriḡuri lou bona gabeai ede baita haere toma dalana baita haeroa. Bena Iehova ese ena lauma helaḡa amo be durudamu, eda badu baita biaguamu bona manau karana baita hahedinaraiamu.

7. Baibul siridia baita lalotaomu karana ese ita be ede be duruda tomamu? (Hereva Lada-isidia 15:​1, 18)

⁷ Baibul siridia haida ese ita be durudamu eda hereva baita biagudia, ena be haida ese e habadudamu. Bona Dirava ena lauma helaḡa ena heduru amo unu siri baita lalotaomu. (Ioa. 14:26) Heḡereḡere, Hereva Lada-isidia bukana ai baita duahimu hahekau  herevadia ese be durudamu baita manau totona. (Hereva Lada-isidia 15:​1, 18 ba duahidia.) Danu, una buka ese lalohisihisi negadiai baita haheauka ena namo e herevalaidia.—Her. 10:19; 17:27; 21:23; 25:15.

8. Dahaka dainai ta ena henanadai badina baita haeroa na namo?

⁸ Ita ese ma haida baita lalopararalaidiamu neganai baita manaumu. (Her. 19:11) Laloparara tauna na e boga aukamu bema e abi daemu ḡaudia na haida ese e henanadailaimu. Taunimanima edia lalohadai na ranu dobuna na heto, una dainai nega momo edia henanadai badidia na basita dibamu. Una dainai haere do asita heni lalonai, namona na edia henanadai badidia baita lalopararalai.—Her. 16:23.

9. Edena dala ai Gideon na Efraim taudia ediai laloparara bona manau e hahedinarai?

⁹ Mani Gideon ese Efraim taudia e kara henidia dalana aita laloa. Idia na mai badudia ida ia e hamaoroa dahaka dainai Israel inaidia e tuari henidia neganai idia na se boiridia. Dahaka dainai idia na e badu? Reana idia na e hekokoroku. To Gideon na idia e badu badina e lalopararalaia bona mai manauna  ida e haere. Baibul na e gwaumu: “Unu e hereva toma, bena idia lalodia e keru bona edia badu e doko.”—Hah. 8:​1-3.

10. Eda abidadama badina bae henanadailaia taudia be ede baita haere henidia toma? (1 Petro 3:15)

¹⁰ Reana ḡaukara o skuli ai turada na be henanadaimu dahaka dainai ita ese Baibul ena taravatu ta badinamu. Baibul ena hereva ta abia daemu badina baita herevalaia neganai, turada ena lalohadai baita matauraia. (1 Petro 3:15 ba duahia.) Namona na baita laloparara iena henanadai ese e laloa badamu ḡauna e hahedinaraiamu, to dia ita e hadikadamu. Herevana ta na dahaka badi dainai e henanadaimu, to mai manauda ida baita haere na namo. Reana una ese ia be duruamu e laloamu ḡauna baine haeroa lou. Danu ena be ia na baine kara auka, to nega iboudiai baita manau na namo.—Roma 12:17.

11-12. (a) Ta ena henanadai do asita haerelaia neganai, dahaka baita laloa? (Laulau danu ba itaia.) (b) Edena dala ai henanadai ese herevahereva dalana e kehoamu?

¹¹ Bema ḡaukara gabunai turamu ta baine henanadai, ‘Dahaka dainai birthday na so moalelaiamu?’ Namona na ina baita laloa: Ia be e laloamu ita na moale karadia asita karamu, a? Eiava e laloamu ita na asita uramu ta ḡaukara heboumu taudia baita bamodia? Namona na turada baita hanamoa badina ia ese ma haida e lalodiamu, bona baita hadibaia ita danu ta uramu ḡaukara gabuna ai baita moale. Reana una ese dala be kehoamu, birthday imoalelaina karana ai Baibul ena hereva baita hadibalaia.

¹² Ma haida ese henanadai aukadia e henimu neganai danu unu baita kara toma. Heḡereḡere, reana skuli ai turada ta na be gwaumu, Iehova ena Witnes ese tatau bona tatau eiava hahine bona hahine e mahuta heboumu karana bae abia dae na namo. Una anina be turada ese Iehova ena Witnes taudia be e lalodia kereremu, a? Eiava reana ia turana o varavarana ta na homosexual tauna, a? Ia be e laloamu ita ese taunimanima unu bamodia na asita ura henidiamu, a? Namona na baita hadibaia ita ese taunimanima iboudiai na ta lalodia badamu, bona edia abi hidi na ta matauraimu. b (1 Pet. 2:17) Bena Baibul ena taravatu ibadinadia karana ena namo baita herevalaia.

13. Bema ta baine gwa Dirava o abidadama heniamu na kavakava karana, edena dala ai ba durua?

¹³ Bema ta na ita ese ta abi daemu ḡaudia e dadaraimu, haraḡa herea basita lalo iena lalohadai na vada mai dibada. (Tito 3:2) Heḡereḡere, bema skuli ai turamu ese baine hamaoromu, oi ese Dirava o abidadama heniamu na kavakava karana, oi be dahaka bo karamu? Oi be bo laloamu ia na evolution lalohadaina e abia daemu dainai unu e gwau tomamu, a? Reana ia na e kamonai ḡaudia mo e herevalaimu. Namona na ia iduruna ḡauna ta ba herevalaia, to dia evolution lalohadaina. Reana ba hadibaia creation e herevalaiamu ḡaudia na jw.org ai baine itadia. Reana gabeai ia na be uramu una website ai e itaia vidiona eiava atikol ta ba herevalaia hebou. Bema mai hemataurai ida baita herevamu neganai, ia na be uramu Baibul ena hereva baine dibaia namonamo.

14. Niall ese eda website amo ena klas merona ta be ede e durua toma?

¹⁴ Matamata merona Niall ese iseda website e ḡaukaralaia Iehova ena Witnes e lalodia kereremu taudia e durudia. Ia na e gwa: “Egu klas ai ta na nega momo e gwauva lau ese saiens ḡaudia na asina abi daemu badina gori  amo e honu bukana ta na abidadama heniamu.” Una klas merona na se ura Niall na e abi daemu ḡaudia baine gwaurai, una dainai Niall ese e hadibaia jw.org ai ina kaha “Science and the Bible” baine itaia. Gabeai, Niall na e diba ena klas merona ese una kaha na e duahia bona e ura ia ida mauri e matama dalana bae herevalaia. Reana oi na ekspiriens unu bamona ta o davaria.

15. Edena dala ai tama sina ese natudia bae durudia mai manaudia ida turadia bae hereva henidia?

¹⁵ Tama sina ese natudia bae hadibadia namonamo, unu amo bae diba edia abidadama bae henanadailaia taudia be ede bae haere henidia toma. (Iak. 3:13) Tama sina haida na ruma bese tomadiho ai e heḡaeḡaemu. Idia ese topik haida e abi hidimu, e herevalaidiamu bona e tohodiamu, bona natudia na mai manaudia ida bae hereva dalana e hadibadiamu.—Maua ladana “ Ruma Bese ida Ba Heḡaeḡae” ba itaia.

16-17. Edena dala ai ruma bese bae heḡaeḡae karana ese matamata taudia baine durudia?

¹⁶ Ruma bese ida heḡaeḡae karana ese matamata taudia be durudiamu, Baibul amo e dibamu ḡaudia na sibodia ese bae hamomokanidia bona ma haida ediai bae herevalai. Eda jw.org website ai ina kaha “Young People Ask” bona matamata taudia edia worksheets bo itamu. Unu ese matamata taudia be durudiamu edia abidadama bae hagoadaia bona sibodia edia hereva amo haere bae heḡaeḡaelai. Eda ruma bese ida unu kaha baita stadilaimu neganai, mai manauda ida eda abidadama iherevalaina dalana baita dibamu.

¹⁷ Matamata tauna Matthew na heḡaeḡae karana ese e durua dalana e herevalaia. Ia bona tamana sinana na ruma bese tomadiho  ai nega momo iena klas ai e herevalaimu topik haida e hetahulai heboumu. Ia na e gwa: “Ai ese bae vara henanadaidia a lalodiamu, bona ihaerelaidia daladia a hetahulaimu bona a praktislaimu. Na abi daemu ḡaudia badidia na lalopararalai namonamomu neganai, una ese e durugumu mai manaugu ida ma haida baine haere henidia.”

18. Kolose 4:6 be dahaka e hahedinaraiamu?

¹⁸ Ita ese eda abidadama badina mo baita gwauraia na dia heḡereḡere. To namona na mai aonegada bona manauda ida baita hereva. (Kolose 4:6 ba duahia.) Ita ese ta abi daemu ḡaudia ta herevalaimu karana na vaitani bolo ta tahoamu na heto. Ita ese bolo na metaira-metaira baita tahoamu eiava baita tahoa badabadamu. Bema metaira-metaira baita tahoamu, turada ese be gobeamu bona be uramu dounu baita gadara. Una heḡereḡerena, bema mai aonegada bona manauda ida baita herevamu, taunimanima na be uramu bae kamonai bona dounu baita herevahereva. To, bema ta na e uramu ita ida baine hepapahuahu eiava ita e kirikirilaidamu, herevahereva na baita hadokoa. (Her. 26:4) To reana taunimanima haida na dia unu bamona, idia na e uramu bae kamonai.

19. Dahaka ese baine duruda mai manauda ida eda abidadama baita herevalaia?

¹⁹ Manau karana baita hahedinaraia na mai anina bada. Bema ta na hepapahuahu e havaramu henanadaidia o ihadikada herevadia e gwauraimu, Iehova enai goada baita noia, mai manauda ida baita hereva totona. Ba helalotao, manau karana ese hepapahuahu be kouamu. Bona mai hemataurai ida bo herevamu neganai, kamonai taudia bo durudiamu ita edai bona Baibul ena hereva momokani ai lalohadai maorona be abiamu. Nega iboudiai “ba heḡaeḡae,” unu amo emui abidadama badina bae nanadailaimui taudia na ‘mai manaumui bona hematauraimui ida’ ba haere henidia. (1 Pet. 3:15) Momokani, manau karana amo emu goada ba hahedinaraia!