1-2. Dahaka dainai Samson sivaraina baita stadilaia na namo?

 INA lada, Samson, o kamonaiamu neganai dahaka o lalomu? Reana o lalomu ia na tau mai goadana ta. Una na momokani. To Samson na abi hidi kererena ta e karaia dainai dika bada e davari. To, Iehova ese Samson na ia ihesiai henina totona e kara ḡaudia na e lalodia bada, bona iena abidadama sivaraina na Baibul ai e torea, ita ihadibada.

² Iehova ese Samson e ḡaukaralaia hoa ḡaudia momo baine kara iena taunimanima Israel idurudia totona. Samson e mase bena laḡani hanred momo muridiai, Iehova ese ena lauma helaḡa amo aposetolo Paulo e hasiahua dainai, Samson ladana na abidadama taudia ladadia ida e torea. (Heb. 11:​32-34) Samson sivaraina ese ita na e hagoadadamu. Ia na Iehova enai e tabekau, hekwakwanai negadiai danu. Ina atikol ai, ita ese Samson amo baita dibamu ḡaudia bona iena haheitalai ese be durudamu daladia baita herevalaimu.

3. Iehova ese Samson be dahaka ḡaukara e henia?

³ Samson e vara neganai, Filistia taudia na Israel besena e  lohiaiava bona e hahisiava. (Hah. 13:1) Idia edia lohia dalana dikana dainai Israel taudia na hisihisi bada e davari. Una dainai Iehova ese Samson e abia hidi, “Israel na Filistia taudia imadia amo baine hamauridia.” (Hah. 13:5) Una na ḡaukara badana ta. To Samson na una ḡaukara baine haḡuḡurua totona, Iehova enai baine tabekau na namo.

4. Edena dala ai Iehova ese Samson e durua? (Hahemaoro Taudia 15:​14-16)

⁴ Mani Samson ese Iehova e abidadama henia bona iena heduru ai e tabekau karana aita laloa. Nega ta, Filistia tuari oreana ta na Samson iḡuina totona Lehi ela, una na Iuda ai. Iuda taudia na e gari dainai lalodia e hadai Samson na inaidia imadia ai bae atoa. Samson na iena taunimanima ese varo matamatadia rua amo e ḡuia bona e hakaua lao Filistia taudia dekedia. (Hah. 15:​9-13) To, “Iehova ena lauma ese Samson e rohea badabada” bona imana e ḡuilai varodia na e heruha. Bena Samson ese “doniki aukina turiana matamatana ta e davaria,” e abia bona e ḡaukaralaia Filistia tatau 1,000 e aladia mase.—Hahemaoro Taudia 15:​14-16 ba duahidia.

5. Samson be edena dala ai e hahedinaraia, ia na Iehova enai e tabekau?

⁵ Doniki aukina turiana na dia tuari kohuna ta. To, dahaka dainai Samson ese e ḡaukaralaia? Ia na mai dibana herevana dahaka baine ḡaukaralaia to Iehova ena heduru amo baine kwalimu diba. Momokani, una abidadama tauna na dekenai mia ḡauna e ḡaukaralaia Iehova ena ura baine haḡuḡurua. Una ese e hahedinaraiamu, Samson na Iehova enai e tabekau dainai e kwalimu.

6. Samson sivaraina amo dahaka ta dibamu?

⁶ Ita danu Iehova ese goada be henidamu eda asainmen baita haḡuḡurudia, ena be ta laloamu unu ikaradia na auka. Bona asita laloamu dalanai be durudamu. Namona na bavabidadama Iehova ena heduru ai bo tabekaumu neganai, ia ese oi na goada be henimumu, Samson e hagoadaia heḡereḡerena.—Her. 16:3.

7. Dahaka ese e hahedinaraiamu Iehova ena hahekau dalana baita tahua na namo?

 ⁷ Konstraksin ḡaukaradia ai e heduru tadikaka taihu momo na Iehova e abidadama henia. Guna, tadikaka ese Kingdom Hall matamatadia momo bona bildin ma haida e disainiva bona e haginiva. To gabeai, Iehova ena orea na e tubuva dainai sensi haida e kara. Maduna e hua tadikakadia na ḡuriḡuri amo Iehova ena hahekau dalana e tahua bona dala matamatadia e tohodia, heḡereḡere bildin haida e hoidia bona e hanamodia. Vanega laḡanidia ai iseda bildin projek momo ai e ḡaukara tadikakana, Robert na e gwaumu: “Matamanai, haida ediai na e auka, ina dala matamatana bae badinaia. Una na guna a kara ḡaukaradia amo na idau herea. To, tadikaka na mai edia ura ida una dala matamatana e badinaiamu bona Iehova ese e hanamoamu.” Ina na Iehova ese ena taunimanima e hakaudiamu iena ura bae haḡuḡurua haheitalaina ta. Nega ta ta ai, siboda baita henanadai, ‘Lau be Iehova ena hahekau dalana na tahuamu bona sensi haida na karamu ia baina hesiai henia totona, a?’

8. Samson na ranu ese e masea neganai, dahaka e kara?  

⁸ Samson ese e kara hoa ḡaudia ma haida na reana vada o duahi. Ia sibona ese laion ta e alaia, bona gabeai Askelono ai Filistia tataudia 30 e aladia. (Hah. 14:​5, 6, 19) Samson na e diba Iehova ena heduru amo unu iboudiai e kara. Heḡereḡere, nega ta Filistia taudia 1,000 e aladia murinai, ia na ranu ese e masea. Bena dahaka e kara? Ia na dia sibona ena goada ai e tabekau, to Iehova e noia baine durua.—Hah. 15:18.

9. Samson na heduru e noi neganai, Iehova be dahaka e kara? (Hahemaoro Taudia 15:19)

⁹ Iehova ese Samson ena noinoi na e haerelaia bona hoa dalanai ranu e henia. Samson na ranu e inu neganai “e goada lou.” (Hahemaoro Taudia 15:19 ba duahia.) Una ranu gabuna na laḡani momo e mia ela bona peroveta tauna Samuel ese Hahemaoro Taudia bukana e torea negana. Israel taudia na una e aruva ranuna e itaiava neganai, e dibava Iehova ese ia e tomadiho heniamu taudia na baine durudia diba bema ia enai bae tabekau.

10. Dahaka baita kara unu amo Iehova ena heduru baita abia? (Laulau danu ba itaia.)

¹⁰ Ita danu Iehova ena heduru baita tahua na namo, herevana eda diba na bada o maraḡi eiava iena hesiai ḡaukara ai ḡau haida ta haḡuḡurudia. Namona na baita abia dae Iehova enai mo baita tabekaumu neganai, eda ḡaukara na baita haḡuḡuru dibamu. Samson na Iehova ese e henia ranuna e inua neganai goada e abi. Una heḡereḡerena, Iehova ese e henidamu heduru ḡaudia baita abi daemu neganai, lauma dalanai baita goadamu.—Mat. 11:28.

11. Tadikaka ta bona adavana be edena dala ai Iehova enai e tabekau?

¹¹ Mani Russia ai daḡedaḡe bada e davari tadikakana ta, Aleksey aita laloa. Dahaka ese e durua unu nega aukadia e haheaukalai? Ia bona adavana na hanaihanai lauma ḡaudia e goadalaiva. Ia na e gwa: “Lau na hanaihanai sibogu egu stadi na karaiamu bona dina ta ta ai Baibul na duahiamu. Daba iboudiai, lau bona adavagu na dina sirina a herevalaiamu bona Iehova a ḡuriḡuri henia heboumu.” Idia edia haheitalai amo dahaka ta dibamu? Namona na dia ita siboda edai, to Iehova enai baita tabekau. Edena dala ai? Namona na hanaihanai Baibul  baita stadilaia, baita ḡuriḡuri, hebou baitala bona haroro ḡaukara baita karaia, unu amo eda abidadama baita hagoadaia. Unu baita kara tomamu neganai, Iehova ese be hanamodamu. Ia ese Samson goada e henia heḡereḡerena, ita danu goada be henidamu.

12. Samson be edena abi hidi kererena e karaia?

¹² Samson na ita heḡereḡereda dia ḡoevadae, una dainai abi hidi kereredia haida e kara. E karaia abi hidina ta na dika bada e havaraia. Samson na hahemaoro ḡaukarana e karaia murinai, ia na “Soreke kourana hahinena ta e ura henia; hahine ladana na Delila.” (Hah. 16:4) Guna, Iehova ena ura dainai Samson na Filistia hahinena ta e adavaia, badina una dala amo Filistia taudia baine tuari henidia. To gabeai, Samson na Filistia hanuana Gasa ela bona ariara hahinena ta ena ruma ai e noho. Una negai, Iehova ese Samson na goada e henia dainai hanua iduaradia mai audia ida e raḡadia bona e huadia lasi, una ese hanua ihabuatarina dalana e kehoa. (Hah. 14:​1-4; 16:​1-3) To Delila be idau, ia na Israel hahinena bona Samson na sibona ena ura ai una hahine e adavaia.

13. Delila be dahaka e kara dainai Samson na dika e davari?

¹³ Delila na Filistia taudia ese moni bada e henia Samson taona baine tore. Reana Samson na Delila e lalokau henia dainai, Delila ese baine karaia ḡauna na se lalopararalaia. Delila ese Samson na e nanadaia loulou ena goada badina baine gwauraia hedinarai, bena Samson ese e hadibaia. Samson na abi hidi kererena e karaia dainai, ena goada e ore bona Iehova ena lalonamo e haboioa.—Hah. 16:​16-20.

14. Samson na Delila e kamonai henia dainai dahaka e vara?

 ¹⁴ Samson na Delila e kamonai henia, dia Iehova, una dainai dika bada e davari. Filistia taudia ese Samson e abia bona matana e hakepuludia. Ia na Gasa ai e hadiburaia, una na guna ia ese iduaradia e koki hanuana, bona flaoa iririlaina ḡauna igirona tauna ai e halaoa. Bena Filistia taudia na edia moale hebou ariana ta e karaia neganai, ia na e hahemaraia. Idia ese edia dirava koikoina Dagon, na boubou badana ta e henia, badina e laloava ia ese Samson na idia imadiai e atoa. Bona Samson na dibura rumana amo e laohaia una moale ariana ai bae kirikirilaia.—Hah. 16:​21-25.

15. Edena dala ai Samson ese e hahedinaraia ia na Iehova enai e tabekau lou? (Hahemaoro Taudia 16:​28-30) (Rau 1 laulauna ba itaia.)

¹⁵ Samson na kerere badana ta e karaia, to dounu Iehova e hesiai henia. Ia na dala e tahu Filistia taudia baine tuari henidia, unu amo Dirava ese e henia ḡaukarana baine haḡuḡurua. (Hahemaoro Taudia 16:​28-30 ba duahidia.) Samson na Iehova e noia, eto: “Lau na noimumu, a hagoadagu, . . . bena Filistia taudia davadia baina henidia.” Dirava momokanina ese Samson ena ḡuriḡuri e haerelaia bona goada e henia lou. Una dainai, Samson ese Filistia taudia momo herea e aladia.

16. Samson ena kerere amo dahaka ta dibamu?

¹⁶ Ena be Samson na ena kerere dainai dika bada e davari, to ia ese Iehova ena ura ikarana na se hadokoa. Ita danu bema kerere ta dainai sisiba ta abi eiava eda maduna ta haboio, namona na Iehova ena ura ikarana na basita hadokoa. Baita helalotao, Iehova na noho heḡaeḡae eda dika baine gwautao. (Sal. 103:​8-10) Ena be kerere ta kara, to Iehova ese dounu goada be henidamu iena ura baita karaia, Samson heḡereḡerena.   

17-18. Michael sivaraina ese oi be ede e hagoadamu tomamu? (Laulau danu ba itaia.)

¹⁷ Mani matamata tadikaka ta ladana Michael aita laloa. Ia na hesiai tauna ta bona regula painia dainai, hesiai ḡaukaradia ai e bisiva. To, kerere ta e karaia dainai ena kongrigeisin madunadia na e haboio. Ia na e gwa: “Lau na Iehova ihesiai henina ḡaukaradia ai na bisiva. To egu maduna na haboio neganai na mamia lau na asi egu ḡaukara. Dibagu Iehova  ese lau na basine rakatanigu, to na lalo bema egu hetura karana ia ida be goada loumu bona guna kongrigeisin ai na karava ḡaukaradia ma ba kara loumu eiava lasi.”

¹⁸ Michael ese Iehova ihesiai henina karana na se hadokoa. Ia na e gwa: “Egu hetura karana Iehova ida baina hanamoa lou totona, hanaihanai ia na ḡuriḡuri henia, Baibul na stadilaia bona na lalo dobu.” Gabeai, Michael na kongrigeisin lalonai hahenamo e abi lou bona hari ia na elda bona regula painia. Ia na e gwaumu: “Elda taudia edia heduru bona hahegoada amo na laloparara, Iehova ese lau na dounu e lalokau henigumu. Hari lau na mai lalogu ḡoevana ida kongrigeisin lalonai hesiai ḡaukaradia na karamu. Egu ai e vara ḡauna amo na diba, Iehova ese e helalo-kerehai momokanimu tauna ena dika na e gwautaomu.” Ena be kerere ta kara, to baita hekwarahimu baita hamaoromaoromu bona Iehova enai baita tabekaumu neganai, ia ese be ḡaukaralaidamu bona be hanamodamu.—Sal. 86:5; Her. 28:13.

19. Samson ena haheitalai ese oi be ede e hagoadamu tomamu?

¹⁹ Ina atikol ai, ita na Samson ena mauri lalonai e vara ḡaudia haida tame herevalai. Ia na dia ḡoevadae dainai kerere e kara bona Delila e adavaia, to Iehova ihesiai henina na se hadokoa. Bona Iehova ese Samson na dounu e ḡaukaralaia. Iehova matanai ia na abidadama tauna ta, bona Heberu karoa 11 ai abidadama taudia ida e gwauraidia hebou. Ita na ta moalemu badina Tamada lalokauna Iehova ta hesiai heniamu, bona hekwakwanai ta davarimu neganai, ia na e ura dikadikamu baine hagoadada. Una dainai Samson heḡereḡerena, Iehova baita noia baitato: “Lau na noimumu, a lalogu; lau na noimumu, a hagoadagu.”—Hah. 16:28.